1. Moote Daawiti gede ninke giddo mitu mayyee xaꞌmara dandaanno?

 NINKE baalunku beꞌe yinummokkinni keerunni heeꞌra hasiꞌneemmo. Yaaddo baxissannohu dino. Ikkirono mito woyite yaaddo waaddankera dandiitanno. Mite Yihowa soqqamaano Moote Daawiti xaꞌmi gedee xaꞌmo xaꞌmitannoha ikkara dandaanno; isi Yihowa togo yee xaꞌmino: “Mamooti geeshsha qarru giddo keeshsheemmo? Dadilliꞌya mamooti geeshsha keeshshanno?”—Far. 13:2.

2. Konni birxichira maa xiinxallineemmo?

² Yaachishanno coye woꞌmunni woꞌma hooꞌla dandiineemmokkiha ikkirono, gargadhate kayinni assa dandiineemmori lowori no. Balanxe konni birxichira, yaandeemmo gede assankera dandaannoha mito coye laꞌneemmo. Qoleno qarru iillannonke woyite beꞌe yineemmokki gede kaaꞌlannonkeha lee coye ronseemmo.

3. Yaandeemmo gede assannonkeri maati? Konne coye hooꞌla dandiineemmo?

³ Yaandeemmo gede assannonkehu batinyu coyi no; kuri giddo mitu hooꞌla dandiineemmokki coyeeti. Lawishshaho, sagalete, uddanotenna minu waagi diru kiiro lexxannota hoola didandiineemmo; ledonke loossannori woy rossannori ammanammeemmokki gede woy amanyoote bainore assineemmo  gede xixxiibbannonketa hoola didandiineemmo. Qooxeessinkera mannu jaddo loosannokki gede hoola didandiineemmo. Heeꞌnoommohu rooru manni Qullaawu Maxaafiha xintu seera harunsannokki alamera ikkino daafira togoo qarri iillannonke. Tenne alame magano ikkinohu Sheexaanu, “tenne gobba hedo [“yaaddo,” NW]” mito manna Yihowara soqqamannokki gede assitannota afino. (Mat. 13:22; 1 Yoh. 5:19) Alamete aana yaachishanno coyi woꞌminohu iseraati.

4. Qarranke calla hendeemmoha ikkiro ma ikkinammora dandiineemmo?

⁴ Qarranke calla hendeemmoha ikkiro quwa saꞌne yaandammora dandiineemmo. Lawishshaho, ‘Hasiisannonkerira gari woxella hoongummo?’ woy ‘Xissamme looso loosalla hoongummo?’ woy ‘Isinni loosunni fushshinella hunninke?’ yine yaandeemmoha ikkara dandaanno. Maganu seera diinge isira ammanammummokkinni ganteemmo yineno yaandeemmoha ikkara dandaanno. Muli yannara Sheexaanu isi gashshanno alamera noo manni Maganu manna sianno gede assanno; ‘Hakka woyite hiitto ikkineemmo?’ yine yaandeemmoha ikkara dandaanno. ‘Kuri coyi daafira yaada soꞌroteni?’ yine hendeemmoha ikkara dandaanno.

5. Yesuusi “Yaaddinoonte” yiinohu mayyaateeti?

⁵ Yesuusi harunsaanosi “Yaaddinoonte” yiinota anfoommo. (Mat. 6:25) Isi hatto yiinonkehu mittu coyi daafirano yaada dihasiissannoꞌne yaateetini? Hatto yaate diꞌꞌikkino. Hundi waro heedhinoti mite ammanantinoti Yihowa soqqamaasine yaaddino woyiti no; ikkirono insa Yihowa hagiirsiissino. b (1 Mot. 19:4; Far. 6:3) Yesuusi heeshshote hasiisanno coyi daafira yaada, Maganoho soqqamate ataawe ikkitannonke geeshsha wodha hasiissannonkekkita kule jawaachishanni noonke. Ikkina yaaddo gargadha dandiineemmo doogga hiikkuriiti?—“ Assa Dandaattore” yitanno saaxine lai.

6. Filiphisiyusi Sokka 4:6, 7 kultanno garinni, yaandeemmo woyite wodanaaꞌmineemmo gede kaaꞌlannonkeri maati?

⁶ (1) Woꞌmanka woyite huuccidhe. Qarrante yaadatto woyite kaaꞌlahera Yihowa huucciꞌra dandaatto. (1 Phe. 5:7) Yihowa ‘mannu hedora aleenni ikkinoha Maganu keere’ oye huuccattokkira dawaro qolannohe. (Filiphisiyusi Sokka 4:6, 7 nabbawi.) Yihowa yaandeemmo woyite wolqaataamu qullaawu ayyaanisinni wodanaaꞌmineemmo gede assannonke.—Gal. 5:22.

7. Magano huucciꞌneemmo woyite maa dea dihasiissannonke?

⁷ Huucciꞌratto woyite giddokkita Yihowara hasaaphi. Hasiꞌrattore badde kulte huucciꞌri. Qarrakki isira hasaaphi hattono macciishshaminohere isira kuꞌli. Iillinohe qarri tira dandiinanniha ikkiro, tira dandaatto gede hayyonna jawaante aannohe gede iso huucciꞌri. Qarrakki tira dandaattokkiha ikkiro, quwa saꞌe yaadattokki gede kaaꞌlahera Yihowa huucciꞌri. Hasiisannonke coye bande kulle huucciꞌnummoro, Yihowa hakkonni coyira dawaro qolannonke woyite seekkine wodanchineemmo. Huuccattokkira bayichonkonni dawaro afiꞌra hoogittoro nafa hexxo mudhitooti. Yihowa hasiisannohere badde kulte huucciꞌrattora calla ikkikkinni agurittokkinni huucciꞌrattora hasiꞌranno.—Luq. 11:8-10.

8. Huucciꞌneemmo woyite maa hawa dihasiissannonke?

⁸ Yaaddokki huuccattotenni Yihowara  kuꞌlatto woyite iso galatano habbooti. Qarru giddo heeꞌnoommo woyite nafa, Yihowa uyinonke atoote heda danchate. Giddokkita kuꞌla hoogge qarramatto woyite, ‘Annaꞌya kaaꞌlie ballo!’ yite huucciꞌratto huuccatto nafa isi macciishshannota deꞌooti.—2 Dud. 18:31; Rom. 8:26.

9. Addu agarooshshe afiꞌnannihu hiittoonniiti?

⁹ (2) Umiꞌneta ikkitukkinni Yihowa hayyo addaxxe. Settikki sanira K.A. Yihudu manna Asoorootu waajjishiishshinonsa. Yihudu manni Asoorootu gashshitansara hasiꞌrinokki daafira, Gibitse kaaꞌlenke yiino. (Isa. 30:1, 2) Yihowa assitanni noori gawajjannonsata kule qorowisiisinonsa. (Isa. 30:7, 12, 13) Yihowa Isayaasi widoonni insa addu agarooshshe afidhanno gara kulinonsa. Isi togo yiino: “Sammi yitine ane calla hexxitiniro, jawaante . . . afidhinanni.”—Isa. 30:15.

10. Yihowa addaxxineemmota leellisha dandiineemmohu hiittoo woyiteeti?

¹⁰ Yihowa addaxxineemmota leellisha dandiineemmohu hiittoonniiti? Hanni mito lawishsha laꞌno. Lowo woxe baantanni looso afiꞌrootto yine hendo; kuni loosi yannakki gudannoho, hattono ayyaanaamittete coye assattokki gede ataawe ikkannoheho. Woy loosu basera mitte beetto baxxinohe yine hendo; ise kayinni Yihowa Farciꞌraasincho diꞌꞌikkitinote. Woy baxatto maatekki giddo mittu hanqe “Anenna Maganikki giddo mitto doodhi” yiiherona? Togoori tuncu yaannohe woyite doodhattori qarra ikkahera dandaanno; ikkirono Yihowa dancha doorsha doodhatto gede kaaꞌlannohe biddishsha aannohe. (Mat. 6:33; 10:37; 1 Qor. 7:39) Ikkina Yihowa addaxxite isi aannohe biddishsha harunsatto?

11. Mannu giwannonke woyite wodanaaꞌmate hiittenne Qullaawu Maxaafi xagge xiinxalla dandiineemmo?

¹¹ (3) Danchanna busha lawishsha ikkitannoriwiinni rosse. Qullaawu Maxaafi giddo wodanaaꞌmanna Yihowa addaxxa kaaꞌlitannota leellishshannoti lowo xagge no. Kuri xagge xiinxallatto woyite, Maganu soqqamaano mannu giwinsa woyite wodanaaꞌmitanno gede mayi kaaꞌlinonsaro wodanchi. Lawishshaho, Yihudunnihu aliidi yoo mini soqqamaasine sabbaka agurtanno gede kulinsa woyite, insa diwaajjitino. Hatteentenni insa waajjitukkinni, “Mannaho hajajamantenni Maganoho hajajama hasiissannonke” yitino. (Soq. 5:29) Soqqamaasine ganninsahu gedensaanni nafa masse qece diyitino. Mayira? Korkaatuno insa Yihowa ledonsa noota affino. Insa iso lowo geeshsha hagiirsiissino. Konnira dancha duduwo duduwa diagurtino. (Soq. 5:40-42) Rosaancho Isxifaanoosino shinasira kaꞌni woyite, wodanaaꞌmino; konnira albisi ‘sokkaasinenniha lawino.’ (Soq. 6:12-15) Mayira? Korkaatuno isi Yihowa hagiirsiisinota afino.

12. Umi Pheexiroosi 3:14 nna 4:14 kultanno garinni, mannu giwinkerono hagiirraamma ikka dandiineemmohu mayiraati?

¹² Soqqamaasine assitinori Yihowa insa ledo noota leellishanno. Yihowa insara maalale loossanno wolqa uyinonsa. (Soq. 5:12-16; 6:8) Xaa yannara Yihowa ninke maalale loonseemmo gede wolqa diaannonke. Ikkirono keeraanchimmate yineenna mannu xiiwannonke woyite, isi assineemmorinni hagiidhannotanna ayyaanasi aannonketa Qaalisi widoonni kulinonke. (1 Pheexiroosi 3:14; 4:14 nabbawi.) Konnira albillitte buutote darti iillinkero ma ikkineemmo yine yaadantenni, Yihowara ninke kaaꞌlatenna gatisate dandoo noosita albinni roore addaxxate xa assa dandiineemmore illachisha hasiissannonke. Hundi rosaano gede ninkeno Yesuusi eino qaale addaxxa hasiissannonke. Isi togo yiino: “Ani, baarigaarraꞌne  gartaꞌnera dandiitannokki hayyonna egenno eemmoꞌne.” Hattono “Cincitiniro, lubboꞌne gatisidhinanni” yiino. (Luq. 21:12-19) Yihowa isira ammanante heedhe reyitino soqqamaasinesiha mitto mittonka coye hawannokkita deꞌooti. Konnira isi reyotenni kayisannonsa.

13. Wodanaaꞌmitinokkinna Yihowa addaxxitinokkiri daafira kultanno xagge xiinxallanke kaaꞌltinnonkehu hiittoonniiti?

¹³ Wodanaaꞌmitinokkinna Yihowa addaxxitinokki mannire kultanno xaggennino lowore ronseemmo. Insa xagge xiinxallanke ninkeno hattoo soꞌro loonseemmokki gede kaaꞌlitannonke. Lawishshaho, umi qara Yihudu Moote Aasa lowo olanto qassasira daggu woyite Yihowa addaxxino; Yihowano qeelanno gede kaaꞌlinosi. (2 Dud. 14:9-12) Ikkollana gedensaanni, Israeelete Moote Baasha qasasira shiima olanto adhe dayita, Aasa albi gede gatisasira Yihowa addaxxa agure Sooriyu olanto kaaꞌlitasira woxe baatino. (2 Dud. 16:1-3) Heeshshosi jeefora buuto dhiwame noo yannarano kaaꞌlannosi gede Yihowa diaddaxxino.—2 Dud. 16:12.

14. Aasa loosino soꞌronni maa ronseemmo?

¹⁴ Aasa qarru iillisi woyite umi qara Yihowa addaxxino. Gedensaanni kayinni Yihowa kaaꞌlo xaꞌmiꞌra agure iillinosire umisi tirate woꞌnaalino. Iimi adda laꞌnanni woyite, Aasa Israeele qasate Sooriyu kaaꞌlannosi gede xaꞌmiꞌrasi kaaꞌlitinosiha labbanno. Ikkirono assinori qiniinosihu shiima yanna geeshshaatilla. Yihowa masaalaanchu widoonni togo yiinosi: “Maganokki Kaaliiqa addaxxa agurte Sooriyu moote hexxootto daafira, . . . [“Sooriyu,” NW] olanto angakkinni fulte hadhino.” (2 Dud. 16:7) Iillannonke coye Yihowa Qaalisi widoonni aannonke biddishshi garinni agurre uminkenni tirreemmokki gede qoropha hasiissannonke. Coyi mudde noonke woyite nafa wodanaaꞌmine Yihowa addaxxineemmoha ikkiro, isi qinaannonke gede kaaꞌlannonke.

15. Qullaawa Maxaafa nabbambeemmo woyite maa assa dandiineemmo?

¹⁵ (4) Qullaawu Maxaafi qummeeshshuwa qaagge. Jawaante afiꞌnannihu wodanaaꞌminenna Yihowa addaxxine ikkinota leellishshanno qummeeshshuwa nabbabbinanni woyite, mite qara qummeeshshuwa qaagate woꞌnaalle. Kuri qummeeshshuwa huuroꞌne gotti assitine nabbawa woy borreessitine amaddine marro marro higgine laꞌꞌa tennera kaaꞌlitaꞌnera dandiitanno. Iyyaasu coye baala hayyotenni assanno gede Seeru maxaafa suutunni ganye nabbawanno gede hajanjoonnisi. Seeru giddonni nabbawannori Maganu manna waajjikkinni massaganno gede kaaꞌlinosi. (Iya. 1:8, 9) Maganu Qaali giddo nooti batinye hedo yaachishannori woy waajjishannori tuncu yaannohe woyite surretenna wodanu keere afiꞌratto gede assitannohe.—Far. 27:1-3; Law. 3:25, 26.

16. Yihowa songote widoonni wodanaaꞌmine iso addaxxineemmo gede kaaꞌlannonkehu hiittoonniiti?

¹⁶ (5) Maganu manniwa aanne. Yihowa ammanate roduuwinke widoonni wodanaaꞌmineemmonna iso addaxxineemmo gede kaaꞌlannonke. Gambooshshunniwa madirakete shiqanno rosinni, roduuwu qoltanno dawaronni, hattono roduuwu ledo hasaambeemmohu jawaachishanno hasaawinni horo afiꞌneemmo. (Ibi. 10:24, 25) Qoleno giddonketa songote giddo noote addaxxineemmo jaallankera hasaaphinummoro lowo geeshsha jawaanteemmo. Jaalinke hasaawisannonkehu “danchu hasaawi” yaaddonkenni beya afiꞌneemmo gede kaaꞌlankera dandaanno.—Law. 12:25.

17. Ibiraawoota 6:19 kultanno garinni, Maganu Mangiste hexxo qarru iillannonke woyite beꞌe yineemmokki gede kaaꞌlitannonkehu hiittoonniiti?

 ¹⁷ (6) Hexxoꞌne kaajjishidhe. Maganu Mangiste hexxonke “milli miqqi yaannokkihu addaxxinanni mokkollichi gedeete.” Tini hexxo qarru woy yaachishanno coyi iillannonke woyite beꞌe yineemmokki gede kaaꞌlitannonke. (Ibiraawoota 6:19 nabbawi.) Yihowa albillitte abbeemmo yee qaale eino coye hiince. Hatte yannara yaachishanno coyi mittuno diheeꞌranno. (Isa. 65:17) Mittuno yaachishanno coyi nookkiteranna keeru woꞌminote haaro alamera noottohu gede assite hedi. (Mik. 4:4) Tenne daafira wolootaho kulatto woyiteno hexxokki kaajjitanno. Sabbakatenna manna rosaano assate dandiittore baala assi. Hatto assittoro ‘hexxokki goofimarchu geeshsha’ seekkite cuꞌmira dandaatto.—Ibi. 6:11.

18. Albillitte mayi qarri iillankera dandaanno? Konne qarra dandiine saꞌneemmohu hiittoonniiti?

¹⁸ Tenne alame goofimarchi gambisanni dayi kiiro, yaandeemmo gede assannonkehu batinyu coyi iillankera dandaanno. Tayixehu 2021hu diru qummeeshshi, wodanaaꞌmine konne qarra dandiine saꞌneemmo gede kaaꞌlannonke; hatto assineemmohu uminke jawaantenni ikkikkinni Yihowa addaxxineeti. Yihowa, “Sammi yitine ane calla hexxitiniro, jawaante . . . afidhinanni” yee eino qaale addaxxineemmota tayixe loosunni leellinsho.—Isa. 30:15.