1. Daawitira iillinosi qarri maati?

 DAAWITI lubbosi gatisiˈrate xooqanni no. Wolqaataamu Israeelete moote Saaooli iso shaate murciˈrino. Daawiti sagale hasiissusita, Noobi yinanni katama mare onte tima uyinannisi gede xaˈmiˈrino. (1 Sam. 21:1, 3) Gedensoonni isinna mannisi maaxamannoha mitto goda afiˈrino. (1 Sam. 22:1) Daawitira togoo qarri iillinosihu hiittoonniiti?

2. Saaooli qarru giddo tugannosire assinohu ma garinniiti? (1 Saamueeli 23:16, 17)

² Daawiti mannu baxannosi daafiranna olaho duucha hige qeelinohura Saaooli lowo geeshsha hinaasino. Qoleno Saaooli Yihowara hajajama giwino daafira, Yihowa iso Israeelete moote ikkannota giwinotanna moote ikkara Daawiti doorinota afino. (1 Saamueeli 23:16, 17 nabbawi.) Saaooli Israeelete moote ikkino daafira lowo olantonna kaaˈlanno manni noosi; hakko daafira Daawiti lubbosi gatisiˈrate xooqa hasiissinosi. Addanka Saaooli, Maganu Daawiti moote assannota hooleemmo yee hedino ikka? (Isa. 55:11) Qullaawu Maxaafi tenne daafira kulannori dino; ikkollana huluullammeemmokkihu mittu coyi no: Saaooli qarru giddo tugannosire assanni no. Maganu ledo gaarantannori qeelamansa digattanno!

3. Daawitira qarru tuncu yiinosiha ikkirono macciishshaminosiri maati?

³ Daawiti silxaanete wojji yaannoha diˈˈikkino. Israeelete moote ikkate doodhinohu Daawiti umosi diˈˈikkino. Tennera doorinosihu Yihowaati. (1 Sam. 16:1, 12, 13) Saaooli Daawiti tiyyiˈre giwino. Ikkollana Daawiti togoo qarri iillinosi  daafira Yihowa dibushiishino; qoleno sagale hooginoteranna godu giddo maaxaminotera digungumino. Isinni baxissannota galatu faarso borreessinohu godu giddo maaxame noo yannara ikkara dandaanno; “Kaaliiqa hasidhannori . . . danchare dihoogganno” yaannoha cuˈmote qummeeshsha haaˈnoonnihuno tenne faarso giddonniiti.—Far. 34:10.

4. Hiikkuri xaˈmuwa hasaambeemmo? Kuri xaˈmuwa hasiissannota ikkitinohu mayiraati?

⁴ Xaa yannara batinye Yihowa soqqamaanora mito woyite sagalenna wolere heeshshote hasiisannore afiˈra qarra ikkitannonsa. * Hakko iso fayya ubbu kawa batinye Yihowa soqqamaanora togoo qarri iillinonsa. “Lowo qarri” woy bayiru qarri gambise dayi kiiro kawii saino qarri iillannonketi dihuluullissannote. (Mat. 24:21) Hanni tenne wodanaho wodhine, aante noota shoole xaˈmo hasaambo: Daawiti ‘danchare hooginokkihu’ ma garinniiti? Noonkerinni kassi yaa rosa hasiissannonkehu mayiraati? Yihowa towaatannonketa huluullammeemmokkihu mayiraati? Albillitte dagganno yannara xaanni qixxaawa dandiineemmohu hiittoonniiti?

5-6. Faarso 23:1-6 Daawiti Maganu soqqamaano “danchare dihoogganno” yaasi mayyaatero huwanteemmo gede kaaˈlitannonkehu hiittoonniiti?

⁵ Daawiti Yihowa soqqamaano “danchare dihoogganno” yaasi mayyaate? Faarso 23 noota tenne hedo ledo sumuu yitanno yaatto xiinxallanke tenne huwatate kaaˈlitannonke. (Faarso 23:1-6 nabbawi.) Daawiti tenne fooliishsho hanafinohu “Kaaliiqi allaalaanchoˈyaati; hoogeemmori mitturino dino” yeeti. Daawiti hakkiinni aane geedanno coye qummi assino; kunino isi Yihowa Allaalaanchosi asse adhino daafira afiˈrinoho falahinoho ayyaanaamittete atooteeti. Yihowa iso “keeraanchimmate doogora” massaginosi; hattono qarrunna faffote yannara ammaname kaaˈlinosi. Daawiti Yihowahu “daffino qanchira” nooha ikkirono qarru iillannosita  afino. Isi “reyo lawanno tunsichi giddoonni hige” haˈranni noohu gede asse hede hexxo mudhino woyiti no; hattono isira diinu noosi. Ikkollana Yihowa Allaalaanchosi ikkino daafira Daawiti ‘diwaajjanno.’

⁶ Ikkina Daawiti ‘danchare hooginokkihu’ ma garinniiti? Isira, Yihowawa gamba yee heeˈranno gede kaaˈlannosiri baalunkuri noosi. Isi hagiirraamo ikkannohu maalaamittete coye afiˈranno daafira diˈˈikkino. Daawiti Yihowa uyinosi coyinni kassi yiino. Daawiti lowori gede asse laˈˈannohu Maganu aannosi atooteetinna isiwiinni afiˈranno agarooshsheeti.

7. Luqaasi 21:20-24 kultanno garinni, umi xibbi diro Yihudaho heeˈrino Kiristaanira iillinonsa coyi maati?

⁷ Daawiti coyiˈrinori maalaamittete coye roorsiˈra hasiissannonkekkihu mayiraatiro huwanteemmo gede kaaˈlannonke. Noonkehu maalaamittete coyinni hagiidha dandiineemmo; kayinni heeshshonke giddo maalaamittete coye balaxisiisa dihasiissannonke. Umi xibbi diro Yihudaho heeˈrinohu mitu Kiristaani konne lowo geeshsha hasiisanno halaale huwatino. (Luqaasi 21:20-24 nabbawi.) Yesuusi insa, “Yerusaalame diinu gaaddo doyissite” amaddanno yanna daggannota kule qorowisiisinonsa. Kuni coyi ikkanno woyite insa ‘ilaallate widira higge xooqa’ hasiissannonsa. Insa xooqquro heeshshonsa gatisidhanno; kayinni lowo coye agurte xooqa hasiissannonsa. Boodu diri albaanni fultinoti mitte Agarooshshu Shae togo yitino: “Insa gatensanna minensa agurte xooqqino; wole agurina minensa noo uduunne nafa diadhitino. Insa Yihowa agarannonsatanna kaaˈlannonsata addaxxite, lowo geeshsha hasiisannonsaha lawanno coyinni roore Yihowa balaxisiissino.”

8. Umi xibbi diro Yihudaho heeˈrino Kiristaanira iillinonsa coyinni hiikkonne kaajja roso ronseemmo?

⁸ Umi xibbi diro Yihudaho heeˈrino Kiristaanira iillinonsa coyinni hiikkonne kaajja roso ronseemmo? Aleenni kulliti Agarooshshu Shae togo yitino: “Albillitte maalaamittete coyira noonke lao hiittootero leeltanno gede assanno fonqoli iillankera dandaanno; maalaamittete coye roorsiˈneemmonso Maganoho ammanamme heeshsho afiˈra roorsiˈneemmo? Goofimarchu daanno woyite, iillannonke qarra dandiine saˈˈanna mito coye facci assine agura hasiissannonkeha ikkara dandaanno. Umi xibbi diro Yihudunni fule xooqino Kiristaani gede, ninkeno dandiinummore baala assate qixxaawa hasiissannonke.” *

9. Soqqamaasinchu Phaawuloosi Ibiraawootu Kiristaana amaalino amaale jawaachishshinohehu hiittoonniiti?

⁹ Yihudaho heeˈranno Kiristaanira noonsare baalankare agure haˈranna marinowa heeshsho haaro ikke hanafa mageeshshi qarra ikkitinonsaro heda dandiineemmo. Insara Yihowa heeshshote hasiisannonsare aannonsata addaxxate, ammana hasiissinonsa. Ikkollana insa hasiissannonsa kaaˈlo afidhino. Roomu olanto Yerusaalame doyissitara ontu diri albaanni soqqamaasinchu Phaawuloosi Ibiraawootu Kiristaanira mite kaaˈlitanno amaale kulinonsa. Isi togo yiino: “Woxu baxille qorophe; nooˈnehu ikkoˈne! Maganu, ‘Horo diagureemmohe; dicallachisheemmohe’ yiino. Kunnira hawaqiˈne, ‘Kaaliiqi kaaˈlaanchoˈyaatina diwaajjeemmo. Mannu ma assannoe?’ yineemmo.” (Ibi. 13:5, 6) Roomu olanto dagge horritara albaanni Phaawuloosi amaalinota tenne amaale harunsino Kiristaana, haarote marinowa bikku heeshsho heeˈra qarrissinonsakkiti dihuluullissannote. Insa Yihowa  heeshshote hasiisannonsare aannonsata horo dihuluullantino. Phaawuloosi coyiˈrinori ninkeno Yihowa hasiisannonkere aannonketa addaxxineemmo gede assannonke.

10. Phaawuloosi ‘rosino’ coyi maati?

¹⁰ Phaawuloosi Ximootewoosirano togoo amaale amaalino; tini amaale ninkerano kaaˈlitannote. Isi togo yee borreessino: “Inteemmorinna uddiˈneemmori heeˈrinkero ikkannonke.” (1 Xim. 6:8) Hatto yaa dancha sagale ita, dancha mine afiˈra woy dancha dancha uddano hidha didandiineemmo yaateni? Phaawuloosi yaanni noohu hatto diˈˈikkino. Isi noonkehu maalaamittete coyinni kassi yaa hasiissannonketa kulanni no. (Fil. 4:12) Phaawuloosi ‘rosino’ coyi konneeti. Noonkehu muxxe coyi Maganinke ledo noonke jaaloomaati ikkinnina maalaamittete coye diˈˈikkino.—Imb. 3:17, 18.

11. Muse Israeelete mannira kulinorinni noonke coyinni kassi yaate daafira maa ronseemmo?

¹¹ Ninke hasiisannonke yine hendeemmorinna Yihowa ninkera hasiisanno yee hedannori mitto ikka hoogara dandaanno. Hanni Israeele halalla 40 diro heedhuhu gedensaanni Muse mayinonsaro laˈno. Isi togo yiino: “Angaˈnenni assitinoonni coyi baalunkura Maganiˈne Kaaliiqi lowo atoote uyinoˈne. Tenne halaˈlado halallitte gobbara raataabbini yanna baalate towatanni agarinoˈne. Kunni shoyilluu diri woˈmu giddo Kaaliiqi kiˈne ledo noo daafira, xeinoˈneri mitturino dino.” (Mar.  2:7) Hakkuyi 40 diri giddo Yihowa Israeelete menna yinanni sagale uyinonsa. Insa Gibitsete gobbanni fultu woyite noonsa uddano digooffino. (Mar. 8:3, 4) Mitu Israeelete manni noonsa coyi gariha ikkinokkihu gede asse hedirono, Muse kayinni hasiisannonsa coyi baalu noonsata qaagiissinonsa. Yihowa noonke coyinni kassi yaa ronsummoro lowo geeshsha hagiidhanno; isi, noonke coyi shiima ikkiro nafa galanteemmore ikkinammoranna isi uyinonke elto gede assine laˈnammora hasiˈranno.

12. Daawiti umosi ikkikkinni Yihowa addaxxannota leellishannori maati?

¹² Daawiti, Yihowa baxxannosirira ammanaminoha ikkinotanna towaatannonsata afino. Daawiti 34^ki faarso borreessi woyite qarru giddo nooha ikkirono, isi Yihowa ‘sokkaasinchi ledosi’ noota ammanate illenni laino. (Far. 34:7) Daawiti Yihowa sokkaasincho diinu daannota agaranno olamaanchi ledo heewisiisanni nooha ikkara dandaanno. Daawiti umisi worba olamaanchooti, hattono moote ikkanno gede Yihowa qaale einosi; ikkirono isi diina qeelate, corqaayye olate dandoosi woy bise horoonsiˈrate dandoosi diaddaxxino. (1 Sam. 16:13; 24:12) Daawiti Yihowa addaxxino; korkaatuno isi, Yihowa sokkaasinchi Magano ‘waajjitannori ledo heeˈre agarannonsata’ afino. Hige ninke xaa yannara maalaletenni agarooshshe afiˈneemmo yine dihendeemmo. Kayinni Yihowa addaxxitannori reyituro nafa hegere heeshsho afidhannota anfoommo.

13. Maagoogi Googi siˈˈi yannara tidhinoommokkire lambeemmohu mayiraati? Ikkollana beˈe yineemmokki gede assannonkeri maati? (Aaniidi qoolira noo misile lai.)

¹³ Muli yannara, Yihowa ninke gatisa dandaannota ammanneemmoronna teˈee anfanni gede assanno fonqoli iillannonke. Maagoogi Googi yaano buusantino daga Maganu manna siˈanno woyite, shitannonke yine yaandeemmoha ikkara dandaanno. Yihowara ninke gatisate dandoo noositanna gatisannonketa addaxxa hasiissannonke. Laˈannonke daga tidhinoommokkirinna gatisannohu nookki geˈreewi gede assite heddanno. (Hiz. 38:10-12) Qodhinoommo massaari dinonke hattono olaho diqajeelloommoreeti. Daga ninke shiimurinni qeeltannohu gede assite heddanno. Ninke Yihowa sokkaasine mannasi gatisate qixxaabbe noota ammanate illenni laˈneemmo; daga kayinni ammanate ille noonsakki daafira sokkaasine laˈˈa didandiitanno. Insa gordu olanto ninke gatisate kaˈanno woyite, lowo geeshsha dhagge assidhanno!—Aju. 19:11, 14, 15.

14. Albillitte dagganno yannara qixxaawate maa maa assa dandiineemmo?

¹⁴ Albillitte dagganno yannara xaanni qixxaawate maa assa dandiineemmo? Barrunni mitto barra maalaamittete coye agura hasiissannonke daafira quwa saˈne baxa dihasiissannonke. Qoleno noonkerinni kassi yaanna Yihowa ledo noonke jaaloominni lowo geeshsha hagiidha hasiissannonke. Magano roore anfummo kiiro, isi Maagoogi Googi siˈˈi yannara ninke gatisate dandoo noosita albinni roore ammanneemmo.

15. Daawiti Yihowa irraawisannosikkita addaxxanno gede kaaˈlinosihu Yihowa hakkuyira albaanni assinosi coyi maati?

¹⁵ Hanni Daawiti kaaˈlinosiri woluri maatironna ninkeno iillannonke fonqolira qixxaambeemmo gede kaaˈlannonkeri maatiro laˈno. Daawiti togo yiino: “Kaaliiqi shaqqado ikkinota shiqqine [qamassine, NW] laˈe; iso golosi assiˈrino manchi baˈraaˈrinoho.” (Far.  34:8) Tini yaatto Daawiti Yihowa kaaˈlannosita addaxxinohu mayiraatiro leellishshanno. Daawiti duucha woyite Yihowa addaxxanno; Maganisino horo irraawise diegenninosi. Daawiti wedellichu noo yannara jigeessunna wolqaataamu Filisxeemichi Goliyaadi ledo gaaramino; isi Gooliyaadi togo yiino: “Kaaliiqi techo ate angaˈyara sayise aannohe.” (1 Sam. 17:46) Gedensoonni Daawiti Moote Saaoolira soqqamanni heeˈreenna Saaooli iso duucha hige shaate woˈnaalino. Yihowa kayinni “Daawiti ledo no.” (1 Sam. 18:12) Daawiti, Yihowa hakkuyira albaanni kaaˈlinosi daafira, xa iillanni noosi qarrirano Yihowa addaxxa hasiissannosita afino.

16. Yihowa danchumma qamanse laˈˈa dandiineemmohu ma garinniiti?

¹⁶ Xaa yannara Yihowa biddishsha addaxxineemmoha ikkiro, isi albillitte dagganno yannara gatisannonketa albinni roore addaxxineemmo. Qoqqowunna woradu gambooshshe haˈneemmo gede loosiisaanchonke fajjo xaˈmiˈrate woy baalanka gambooshshe haˈratenna albinni roore soqqamate injaanno garinni loosiisaanchinke ledo hasaambe pirogiraamenke biddi assiˈrate, Yihowa addaxxanna ammana hasiissannonke. Hanni loosiisaanchinke fajja giwinonkehunna loosunni fushshe huninonkehu gede assine hendo. Yihowa horo tuge agurannonkekkitanna woˈmanka woyite heeshshote hasiisannonkere aannonketa addaxxineemmo? (Ibi. 13:5) Batinye woˈma yanna soqqamaano woˈnaalshi, Yihowa kaaˈlo roore hasiissannonsa yannara isi kaaˈlinonsata leellishanno. Yihowa ammanaminoho.

17. 2022hu diru qummeeshshi mayyaannoho? Kuni qummeeshshi malinoho yineemmohu mayiraati?

¹⁷ Yihowa ledonke noo daafira albillitte dagganno yanna waajjineemmo gede assannonkeri dino. Gashshootesi balaxisiinsummo geeshsha Maganinke horo tuge diagurannonke. Albillitte daggannote qarrissanno yannara qixxaawa hasiissannonketa qaangeemmo gedenna Yihowa tuge agurannonkekkita addaxxineemmo gede kaaˈlate, Aliidi Bisi Faarso 34:10 2022ha diru qummeeshsha ikkitanno gede doorino. Qummeeshshu, ‘Yihowa Hasidhannori Danchare Dihoogganno’ yaanno.