1. Qaagooshshu Ayyaana ayirrinsanni barri diru giddo lowo geeshsha baxxinoha ikkinohu mayiraati? (Luqaasi 22:19, 20)

 YIHOWA mannira Kiristoosi reyo qaagooshshe ayirrinsanni barri diru giddo lowo geeshsha baxxino barraati. Yesuusi harunsaanosi ayirrissanno gede hajajino ayyaani konne callaati. (Luqaasi 22:19, 20 nabbawi.) Qaagooshshu Ayyaana quqquxamme agadhineemmo gede assannonkehu lowo korkaati no. Hanni konni giddo mito laꞌno.

2. Qaagooshshu Ayyaana quqquxamme agadhineemmo gede assannonkehu mitu korkaati maati?

² Qaagooshshu Ayyaani wodote kakkalo afidhino waaga hiincineemmo gede kaaꞌlannonke. Kuni ayyaani Yesuusite wodote kakkalora galatu noonketa leellinsheemmo doogga qaangeemmo gede assannonke. (2 Qor. 5:14, 15) Qoleno ammanate roduuwinke ledo “mimmitonke jawaachinsheemmo” faro fanannonke. (Rom. 1:12) Diru kiiro ayyaanaamittetenni qiiddinori batinyu roduuwi konne gambooshshe dagganno. Mitu isinni roduuwu anga fante haadhinonsa daafira galagalte Yihowawa higgino. Konni gambooshshiwa lainorinna macciishshinori hasatto noonsaha batinye manna heeshshote doogora haꞌra hanafanno gede kakkayisinonsa. Kuni baalu coyi Qaagooshshu Ayyaana quqquxamme agadhineemmo gede assannonke!

3. Qaagooshshu Ayyaani alamete doyichora noo roduuwa mitto assannohu hiittoonniiti? (Misileno lai.)

³ Hanni Qaagooshshu Ayyaani alamete doyichora noo roduuwa mitto assanno garano hendo. Alamete doyichora noori Yihowa Farciꞌraasine arrishsho eꞌanno woyite ayyaana ayirrisate gamba yitanno. Baalunku wodo afidhino waaga luphi assite leellishshanno lallawo macciishshineemmo. Konni gambooshshiwa lame galatu faarso faarsineemmo, timanna woyine doyissinanni hattono  huuccinannite shoole huuccattora woꞌma giddonkenni “hamiiꞌni” yineemmo. Alamete doyichora noo songuwa baala 24 saate giddo mittu gari biddishsha harunsitanno. Hanni Yihowanna Yesuusi konni garinni mittimmatenni insa ayirrinsanna laꞌanno woyite mageeshshi geeshsha hagiidhitannoro hedi!

4. Konni birxichira maa xiinxallineemmo?

⁴ Konni birxichira aante noo xaꞌmuwa xiinxallineemmo: Qaagooshshu Ayyaanira wodananke qixxeessiꞌra dandiineemmohu hiittoonniiti? Wolootu konni ayyaaninni horo afidhanno gede kaaꞌla dandiineemmohu ma garinniiti? Ayyaanaamittetenni qiiddinore kaaꞌla dandiineemmohu hiittoonniiti? Kuri xaꞌmuwara qollanni dawaro tenne lowo geeshsha hasiissanno yannara qixxaambeemmo gede kaaꞌlitannonke.

QAAGOOSHSHU AYYAANIRA WODANANKE QIXXEESSIꞌRA DANDIINEEMMOHU HIITTOONNIITI?

5. (a) Wodote kakkalo afidhino waaga hiinca hasiissannonkehu mayiraati? (Faarso 49:7, 8) (b) Yesuusi Reyinohu Mayiraati? yitanno viidiyonni maa rosootto?

⁵ Qaagooshshu Ayyaanira wodananke qixxeessiꞌra dandiineemmote kaajja doogga giddo mitte Yesuusi Kiristoositi wodote kakkalo afidhino waaga hiincate. Ninke uminkenni cubbunna reyotenni horo gata didandiineemmo. (Faarso 49:7, 8 nabbawi; Yesuusi Reyinohu Mayiraati? yitanno viidiyono lai.) a Hakko daafira Yihowa Yesuusi ninke daafira heeshshosi sayise aanno gede asse kakkalo qixxeessinonke; tini Yihowanna muxxe Beettisi lowo waaga baattanno gede assitino. (Rom. 6:23) Yihowanna Yesuusi baattinonke waaga hiincinummo kiiro wodote kakkalo albinni roore naandeemmo. Yihowanna Yesuusi wodote kakkalo qixxeessate baattino waagi giddo gama ronseemmo. Hanni balanxe wodote kakkalo maatiro laꞌno.

6. Wodote kakkalo maati?

⁶ Wodo mitto coye galagalle qoꞌlate baantanni waagaati. Umi manchi Addaami kalaqaminohu guuta ikkeeti. Isi cubbo loosi woyite umisi calla ikkikkinni sirchisi baalu hegere heeshsho hexxo hooganno gede assino. Addaami huninore qolate Yesuusi guuta heeshshosi kakkalo asse shiqishino. Yesuusi uullate aana noo yannara “mitto cubbono diloosino; afiisinni sao difultino.” (1 Phe. 2:22) Yesuusi reyi woyite kakkalo asse uyinoti guuta heeshsho Addaami huninote ledo taalote.—1 Qor. 15:45; 1 Xim. 2:6.

7. Yesuusi uullate aana noo yannara iillinosihu mitu fonqoli maati?

⁷ Yesuusi uullate aana noo yannara lowo fonqoli iillisirono iimi Annisira ammaname heeꞌrino. Yesuusi guuta ikke ilaminoha ikkirono, guuta ikkitinokki annisinna amasi fushshitino biddishshira maahoyye yee hajajama hasiissinosi. (Luq. 2:51) Isi shiimu noo yannara hajajamannokki woy ammanamannokki gede assannosi fonqolo baala gargadha hasiissinosi. Qoleno isi lophe jawa ikke noo yannara Sheexaanu Daawuloosi Yihowara ammanamannokki gede assate xaaddote shiqishinosihanna wole fonqolo qeela hasiissinosi. (Mat. 4:1-11) Sheexaanu Yesuusi wodo baatannota hoolate cubbo loosanno gede assate murciꞌrino.

8. Yesuusi dandee sainohu wolu fonqoli hiikkonneeti?

⁸ Yesuusi uullate aana soqqami yannara wole fonqolono dandee saino. Iso daramanno gede assinoonnisi hattono shinannisita kulle waajjishiinshoonnisi. (Luq. 4:28, 29; 13:31) Qoleno harunsaanosita guuntete xeꞌne dandee heeꞌra hasiissinosi. (Maq. 9:33, 34) Iso qarru amade noosi yannara shetinsoonnisi hattono qacifantoonnisi. Hakkiinni beebba assiꞌne shollinshe shinoonnisi. (Ibi. 12:1-3) Isi jeefote iillinosi qarra Yihowa kaaꞌlo nookkiha umisinni dandee saꞌꞌa hasiissinosi. b—Mat. 27:46.

9. Yesuusite wodote kakkalo daafira mayi macciishshamannohe? (1 Pheexiroosi 1:8)

 ⁹ Addanko, Yesuusi wodo ikkate lowo waaga baatino. Yesuusi ninkera yee umisi fajjonni assinore baalare hiincanke iso lubbora banxeemmo gede dikakkayissannonke?—1 Pheexiroosi 1:8 nabbawi.

10. Yihowa wodo qixxeessate baatino waagi maati?

¹⁰ Yihowana? Yesuusi wodo baatanno gede Yihowa umisi fajjonni assinori maati? Yihowaranna Yesuusira annunna beettu mereero heeꞌranno gedeehu kaajju jaaloomi noonsa. (Law. 8:30) Hakko daafira, hanni Yesuusi uullate aana heeꞌreenna batinyu fonqoli iillannasi laiti Yihowa hiitto ikkinoro hedi. Yihowa Beettosi beebba assiꞌnanna, gimbannasinna fonqolu iillannasi lai woyite lowo geeshsha xissiisiꞌrinoti dihuluullissannote.

11. Yesuusa shini woyite Yihowara mayi macciishshaminosiro leellishanno lawishsha kuli.

¹¹ Qaaqqonsa shiiꞌrino anninna ama shiiꞌra mageeshshi geeshsha xissiissiꞌnanni gede assitannoro seekke afino. Kaote hexxora kaajjado ammana noonke; hatto yaa kayinni shiiꞌneemmo woyite dixissiisiꞌneemmo yaa diꞌꞌikkitino. Kuni lawishshi 33 M.D. Yihowa baxanno Beettisi qarrame reyanna lai woyite mageeshshi geeshsha xissiisiꞌrinoro huwanteemmo gede kaaꞌlannonke. c—Mat. 3:17.

12. Qaagooshshu Ayyaanira albaanni noo lamalara maa assa dandiineemmo?

¹² Qaagooshshu Ayyaanira albaanni noo lamalara hojju xiinxalloꞌne woy maatete magansiraꞌne yannara wodote daafira xiinxallate woꞌnaalle. Wodote daafira leddine afate Yihowa Farciꞌraasineta Xiinxallote Kaaꞌlitanno Borro woy wole borro horoonsiꞌra dandiitinanni. d Qoleno Kiristaanu Heeshshonna Soqqansho—Xiinxallote Maxaafichora kulloonnita Qaagooshshu Ayyaanita Qullaawu Maxaafi niwaawe pirogiraame horoonsidhe. Qaagooshshu Ayyaani barra shiqqannota baxxitinota Soodo Magansiꞌra pirogiraame laꞌꞌano deꞌinoonte. Qaagooshshu Ayyaanira wodananke qixxeessiꞌneemmoha ikkiro wolootuno konni ayyaaninni horo afidhanno gede kaaꞌla dandiineemmo.—Izi. 7:10.

WOLOOTU HORO AFIDHANNO GEDE KAAꞌLENSA

13. Wolootu Qaagooshshu Ayyaaninni horo afidhanno gede kaaꞌlate assa dandiineemmohu umi coyi maati?

¹³ Wolootu Qaagooshshu Ayyaaninni horo afidhanno gede kaaꞌla dandiineemmohu hiittoonniiti? Tenne assa dandiineemmoti umi  doogo konni ayyaanira insa koyisate. Soqqansho fulleemmo woyite hasaawinseemmo mannano agurranna konni ayyaanira koyinseemmo manna borreessine amaxxa dandiineemmo. Lawishshaho fiixanke, ledonke rossannore, ledonke loossannorenna woloota koyisa dandiineemmo. Garihu attammoonnihu koyishshu woraqati hooginkero nafa koyinseemmo mannira elektirooniksete uduunnichi widoonni linke soya dandiineemmo. Koyinseenna mageeshshi manni daaro mayi afino!—Ros. 11:6.

14. Egenninoommo mannira koyishshu woraqata aa kaaꞌlitanno gara leellishanno lawishsha kuli.

¹⁴ Egenninoommo mannira koyishshu woraqata aa kaaꞌlitannota deꞌinoonte. Mitto barra ammaꞌnotenni bebbeehantino maate giddo heedhannoti mitte rodoo minaannise Qaagooshshu Ayyaana haꞌrara hedinota kuliseta dhagge assidhino. Ise dhagge assidhinohu mayiraati? Korkaatuno konni albaanni Qaagooshshu Ayyaana daanno gede duucha higge koyissinosiha ikkirono daye diegennino. Isi xa daanno gede assinosiri maati? Isi egenninohu mittu songote cimeessi Qaagooshshu Ayyaaniha koyishshu woraqata uyinosita coyiꞌrino. Kuni minaanni hakko dironna hakkuyi gedensaanni lowo diro Qaagooshshu Ayyaana haꞌrino.

15. Manna Qaagooshshu Ayyaanira koyinseemmo woyite heda hasiissannonke coyi maati?

¹⁵ Qaagooshshu Ayyaanira koyinseemmo manni hakko iso gambooshshenke daye egenninokkiha ikkiro mite xaꞌmo xaꞌmankera dandaannota heda hasiissannonke. Hakko daafira insa xaꞌmitankera dandiitanno xaꞌmuwa seekkine hedanna dawaro qolate qixxaawa hasiissannonke. (Qol. 4:6) Lawishshaho mitu manni togo yee xaꞌmara dandaanno: ‘Konni gambooshshiwa maa maa assinanni? Gambooshshu meꞌꞌe saatenni goofanno? Hiittoo uddano uddiꞌra hasiissanno? Gambooshsheho woxe baantanni? Mutsuwaate gamba assinanni?’ Mitto mancho Qaagooshshu Ayyaanira koyinseemmo woyite togo yine xaꞌma dandiineemmo: “Huluullinohe coyi no?” Hakkiinni xaꞌmanno xaꞌmora dawaro qolate woꞌnaalle. Hasaawinseemmo manchi gambooshshe assiꞌneemmo gara afanno gede kaaꞌlate Yesuusi Reyo Qaagi yitannotanna Gambooshshu Addaraashenkera Maa Maa Assinanni? yitanno viidiyo horoonsiꞌra dandiineemmo. Qoleno Hegerera Hagiidhitanni Heeꞌra Dandaatto!  yaanno maxaafira roso 28te hasaawinseemmo manchira kula dandiineemmoti batinye kaajja hedo no.

16. Qaagooshshu Ayyaanira daanno manni wole hiikkuri xaꞌmuwa xaꞌmara dandaanno?

¹⁶ Qaagooshshu Ayyaani gedensaanni hasatto noonsahu haarote dayino manni wole xaꞌmuwa xaꞌmara dandaanno. Insa ‘Timanna woyine qamasanno manni hooginohu woy shiimu manni callu qamasinohu mayiraati?’ yite xaꞌmitara dandiitanno. Qoleno insa Qaagooshshu Ayyaana meekki meekkita ayirrinseemmoro afa hasidhannoha ikkara dandaanno. Hattono insa baalanka gambooshshe assiꞌneemmohu mittu garinniitironna teꞌee afa hasidhannoha ikkara dandaanno. Kuri xaꞌmuwa giddo duuchate Qaagooshshu Ayyaani lallawo shiqqu yannara dawaro qolloonniha ikkirono haarote dagginori ledde afa hasidhannoha ikkara dandaanno. JW.ORG aana fulinohu “Yihowa Farciꞌraasine Mootichu Hurbaate Ayirrissanno Gari Wole Ammaꞌnowiinni Baxxannohu Mayiraati?” yaanno birxichi haarote dagginori xaꞌmitannote mite xaꞌmora dawaro qolate kaaꞌlankera dandaanno. Qaagooshshu Ayyaanira albaanni, Qaagooshshu Ayyaani yannaranna Qaagooshshu Ayyaani gedensaanni “wodaninsa hegere heeshsho aanno halaali widira dooinori” konni ayyaaninni horo afidhanno gede kaaꞌlate dandiinummore baala assa hasiꞌneemmo.—Soq. 13:48, NW.

AYYAANAAMITTETENNI QIIDDINORE KAAꞌLE

17. Songote cimeeyye ayyaanaamittetenni qiiddinore kaaꞌla dandiitannohu hiittoonniiti? (Hiziqeeli 34:12, 16)

¹⁷ Qaagooshshu Ayyaani woggara songote cimeeyye ayyaanaamittetenni qiiddinore kaaꞌla dandiitannohu hiittoonniiti? Insara heddannota leellishshe tenne assa dandiitanno. (Hiziqeeli 34:12, 16 nabbawi.) Qaagooshshu Ayyaanira albaanni dandiitini deerrinni ayyaanaamittetenni qiiddinore batinye roduuwa hasaawisate woꞌnaalle. Baxxinanninsatanna dandiitini deerrinni insa kaaꞌla hasidhinannita buuxissensa. Qaagooshshu Ayyaanira koyissensa. Dagguro iibbado giddonni haadhensa. Qaagooshshu Ayyaani gedensaanni kuri muxxe roduuwinke ledo xaada agurtinoonte; hattono insa Yihowawa higganno gede kaaꞌlate hasiisannonsare baala assitine kaaꞌlensa.—1 Phe. 2:25.

18. Ninke baalunku ayyaanaamittetenni qiiddinore kaaꞌla dandiineemmohu hiittoonniiti? (Roomu Sokka 12:10)

 ¹⁸ Songote giddo noori baalunku Qaagooshshu Ayyaana daggannore ayyaanaamittetenni qiiddino roduuwa kaaꞌla dandiitanno. Hiittoonni? Insara baxillenna shaqqille hattono ayirrinseemmonsata leellinshe tenne assa dandiineemmo. (Roomu Sokka 12:10 nabbawi.) Kuri muxxe roduuwi gambooshshe daate hobbi ruxxi yitara dandiitannota deꞌinoonte. Insa, ‘Songote giddo noori mayitaekka?’ yite waajjitara dandiitanno. e Hakko daafira insa saalfattanno gede assannore xaꞌma woy xissiisidhanno gede assannore coyiꞌra qorophino. (1 Tes. 5:11) Insa ammanate roduuwankeeti. Insa ledo galagalle Yihowa magansiꞌra hagiirsiissannonke!—Far. 119:176; Soq. 20:35.

19. Yesuusi reyo qaangummoro afiꞌneemmo hoꞌro maati?

¹⁹ Yesuusi diru kiiro reyosi qaagooshshe ayirrinseemmo gede hajajinonke daafira galanteemmosi; qoleno tenne assa hasiissannota ikkitinohu mayiraatiro anfoommo. Hatto assineemmoha ikkiro ninkeno wolootuno batinye doogganni hoꞌro afiꞌneemmo. (Isa. 48:17, 18) Yihowaranna Yesuusira noonke baxilli lexxanno. Insa assitinonkere lowo geeshsha naandeemmota leellinsheemmo. Ammanate roduuwinke ledo noonke jaaloomi kaajjanno. Qoleno wolootu Yesuusi wodonni hoꞌro afiꞌra dandiitanno gara rossanno gede kaaꞌlineemmo. Hakko daafira baalunku diru giddo noohu lowo geeshsha baxxino barrira yaano Qaagooshshu Ayyaanira qixxaawate dandiinummore baala assino!