1-2. Ammanantinori Yihowa soqqamaanora hiittoo qarri iillansara dandaanno?

 BUUTOTE qarri heeshshonke hedeweelcho soorrara dandaanno. Lawishshaho Luwiisi a yinannihu mittu ammanamino rodiira, kaanserete dhibbi amadinosita kulloonnisi. Akimichu isi heeshshotenni heeꞌrannohu boode agana calla ikkinota kulinosi. Moniika yinanni rodoonna minaannise woꞌmanka woyite Yihowara diinaggaawe soqqamanno. Hakkiinni mitto barra Moniika, songote cimeessa ikke soqqamannohu minaannise lamu gari heeshsho heeꞌra hanafinku lowo diro ikkinota huwattu. Oliiviya yinanniti mitte mine assidhinokki rodoo wolqaataame hombobalatte kaꞌannota kulloonni daafira minisenni xooqa hasiissinose. Ise qaese higgu woyite hombobalatte mine diiggino. Shiima yanna giddo calla kuri manni heeshsho hedeweelcho soorrantino. Aterano togoori iille egenninohe? Hedeweelcho ragu tunsannohe gede assanno coyi tuncu yee egenninohe?

² Ammanammoommore Yihowa soqqamaano ikkinummorono manna baalaho iillanno qarri iillannonke; hattono wolu manninte gede dhiwammeemmo. Qoleno gimbanninketa woy darammeemmo gede assinanninketa dandiine saꞌꞌa hasiissannonke. Yihowa togoo qarri iillannonkekki gede golamannonkekkiha ikkirono, kaaꞌlannonketa kule qaale eino. (Isa. 41:10) Isi kaaꞌlannonke daafira hagiirrinke baikkinni heeꞌra, dancha doorsha doodhanna buutote qarri iillinkerono isira ammanamme heeꞌra dandiineemmo. Konni birxichira buutote qarri iillinkero Yihowa kaaꞌlannonketa shoole doogga laꞌneemmo. Qoleno isi kaaꞌlo afiꞌrate maa assa hasiissannonkero xiinxallineemmo.

 YIHOWA AGARANNOHE

3. Buutote qarri amadannonke woyite maa assa qarra ikkitankera dandiitanno?

³ Qarra ikkannonke coye. Buutote qarri amadannonke woyite garunni hedanna dancha doorsha doodha qarra ikkitankera dandiitanno. Mayira? Korkaatuno lowo geeshsha dadillinammoranna yaandammora dandiineemmo. Kande amandeemmori baꞌꞌankera dandaanno. Hanni aleenni kulliri lame roduuwi qarru amadinsa yannara hiitto ikkinoro laꞌno. Oliiviya “Hambabalatte mineꞌya diigguhu gedensaanni lowo geeshsha yaade hexxo mudhoomma” yitino. Moniika minaannise kaadinose daafira togo yitino: “Baasa xissiisiꞌroomma. Wodaniꞌya hiiqqamino. Bashsho asseemmare assa qarra ikkitinoe. Togoori iillannoe yee horo dihedoomma.” Hexxo mudhineemmo woyite Yihowa ma garinni kaaꞌlannonketa kule qaale einonke?

4. Filiphisiyusi Sokka 4:6, 7 kultannonte gede, Yihowa ma assannonketa kule qaale eino?

⁴ Yihowa kaaꞌlannonke gara. Isi Qullaawu Maxaafi giddo kulloonniha ‘keeresi’ aannonketa kule qaale eino. (Filiphisiyusi Sokka 4:6, 7 nabbawi.) Kuni keeri Yihowa ledo kaajja jaalooma kalaqiꞌne afiꞌneemmote giddoyidi harshammooti. Kuni keeri ‘mannu hedora aliidiho’; qoleno dhagge ikkannoho. Yihowa eeggifatte huucciꞌrittohu gedensaanni giddoyidi keere afidhe dhagge assiꞌrootto woyiti no? Maganu aanno ‘keeri’ yaa togooti!

5. Maganu keeri hedonkenna wodananke agarannohu hiittoonniiti?

⁵ Filiphisiyusi Sokka 4:7 Maganu keeri ‘wodanankenna hedonke agarannotano’ kultanno. ‘Agara’ yaannohu hundi afii qaali katama siꞌnannikki gede agartanno agaraasine kulate horoonsiꞌnoonniho. Hakko katamira heeꞌranno manni agaraasine katamu waalcho agarte noota afino daafira beꞌe yiikkinni goxe galanno. Hatteente gede ninkeno Maganu keeri wodanankenna hedonke agarannota anfoommo daafira, beꞌe diyineemmo. (Far. 4:8) Amadinonke qarri bayichonko baꞌꞌa hoogiro nafa ninkeno Haanna gede giddoyidi keere afiꞌra dandiineemmo. (1 Sam. 1:16-18) Qoleno wodanaaꞌmineemmo woyite duucha woyite garunni hedanna dancha doorsha doodha qarra diꞌꞌikkitannonke.

6. Maganu aanno keere afiꞌrate maa assa dandiineemmo? (Misileno lai.)

⁶ Assa hasiissannonkere. Qarru amadannonke woyite lawishshu yaattonni agaraancho wonshiꞌra hasiissannonke. Hiittoonni? Maganu aanno keere afidhina geeshsha Yihowa huuccidhe. (Luq. 11:9; 1 Tes. 5:17) Aleenni kullihu Luwiisi isi heeshshotenni heeꞌrannohu shiima agana calla ikkinota kullisita, konne qarra dandee saꞌꞌanno gede isonna minaamasi Aana kaaꞌlinonsari maatiro coyiꞌrino.  Isi togo yiino: “Togoo yannara fayyimmanke towaaxxatenna wole hajo daafira dancha doorsha doodha lowo geeshsha qarra ikkitanno.” Kayinni tenne qarru yannara keere afiꞌnoommohu huuccatto assiꞌnoommo daafira callaati. Luwiisinna minaamasi Yihowa giddoyidi keere aannonsa gede, wodanaaꞌmanno gedenna dancha doorsha doodhanno gede kaaꞌlitannonsa hayyo aannonsa gede duucha hige eeggifate huucciꞌrinota coyiꞌrino. Yihowano kaaꞌlinonsa. Kiꞌneno lowo qarri amadannoꞌne woyite jaattine huuccidhinanniha ikkiro, Yihowa keeri wodanaꞌnenna hedoꞌne agaranno.—Rom. 12:12.

YIHOWA WODANAAꞌMATTO GEDE KAAꞌLANNOHE

7. Qarru iillannonke woyite mayi macciishshamankera dandaanno?

⁷ Qarra ikkannonke coye. Buutote qarri amadannonke woyite, hendeemmo gari, ikkitonkenna akatinke soorramara dandaanno. Gara ikkitinokkiti addi addi hedo dagganni waaddankera dandiitanno. Aleenni kulliti Aana minaannise Luwiisi reyihu gedensaanni addi addi hedo waaddinoseta coyidhino. Ise togo yitino: “Mito woyite quwa sae yaadeemma; hattono aneneeto busha asseemma. Qoleno isi reyino daafira giirameemma.” Hakkii saeno Aanara callimma macciishshantannose; hattono konni albaanni Luwiisi dancha gede loosanno looso xa ise loosa hasiissannose daafira caaccaabbanno. Mito woyite ise dambalu shafanno baari giddo noohu gede assite heddanno. Ninkeno togoo hedo waaddannonke woyite Yihowa kaaꞌlannonkehu hiittoonniiti?

8. Umi Pheexiroosi 5:10 kultannonte gede Yihowa ma assannonketa buuxisinonke?

⁸ Yihowa kaaꞌlannonke gara. Isi teesiisannonketa buuxisinonke. (1 Pheexiroosi 5:10 nabbawi.) Baaru aana dambalu kaꞌꞌanno woyite markaawe lowo geeshsha shashshafantara dandiitanno. Togoori kalaqamannokki gede batinye markaawera kaꞌanna kawaanni markaawe shashshafantannokki gede assannore worranni. Kuni worranni coyi markaawe lowo geeshsha shashshafantannokki gede assanno; hattono markaawete gidde noo manni beꞌe yiikkinni haꞌra dandaanno. Ikkollana markaawe shashshafantannokki gede assanno uduunnichi roore kaaꞌlannohu markaawe alba higge hadhanno woyiteeti. Hatteente gede ninkeno qarru amadannonke woyite Yihowara ammanamme soqqama agurreemmokkiha ikkiro, isi teesiisannonke.

9. Xiinxallate kaaꞌlanno uduunni wodanaaꞌmineemmo gede kaaꞌlannonkehu hiittoonniiti? (Misileno lai.)

⁹ Assa hasiissannonkere. Gara ikkitinokki hedo waaddannonke woyite ganyine ayyaanaamittete coye assate dandiinummore baala assa hasiissannonke. Togoo woyite bashsho  assineemmo geeshshire assa dandiineemmokkiti egennantinote; kayinni Yihowa quwa saꞌꞌannokkiha ikkinota qaango. (Luqaasi 21:1-4 heewisiisi.) Qoleno hojju xiinxallo assiꞌratenna hiincate yanna gaaꞌme. Mayira? Yihowa dirijjitesi widoonni wodanaaꞌmineemmo gede kaaꞌlannonkeha kaajja roso qixxeessinonke. Kaaꞌlitannoꞌne mashalaqqe afiꞌrate, xiinxallate kaaꞌlanno uduunne lawishshaho, JW Layibirere appilikeeshiinenna Yihowa Farciꞌraasineta Xiinxallote Kaaꞌlitanno Borro horoonsiꞌra dandiitinanni. Aleenni kulliti Moniika gara ikkitinokki hedo waaddannose woyite kaaꞌlitannose amaale afiꞌrate, xiinxallate kaaꞌlanno uduunne horoonsidhannota coyidhino. Lawishshaho ise “hanqo” yaanno qaale borreessite hasidhino. Wole yannara kayinni “kaada” woy “ammanama” yaanno qaale borreessite hasidhino. Hakkiinni wodanaaꞌmita geeshsha nabbabbanno. Ise togo yitino: “Nabbawa hanafeemmahu lowo geeshsha yaade heeꞌreeti; nabbawa agura hoogummaro kayinni Yihowa rimmi asse hanqafinoehu gede asse hedeemma. Nabbaweemma woyite, Yihowara waaddannoeti addi addi hedo leeltannositanna kaaꞌlanni nooeta wodancheemma.” Ateno Yihowa wodanaaꞌmatto geeshsha konni garinni kaaꞌlannohe.—Far. 119:143, 144.

YIHOWA IRKISANNOꞌNE

10. Buutote qarri iillinkehu gedensaanni mayi macciishshamankera dandaanno?

¹⁰ Qarra ikkannonke coye. Buutote qarri iillinkehu gedensaanni wolqa baꞌneemmonna yaandeemmo woyiti heeꞌrara dandaanno. Konni albaanni lowo geeshsha dodannohu xa kayinni madiꞌrino daafira dinanni haꞌranno qolchamaanchi gede ikkinammora dandiineemmo. Bashshora qarrammummokki loonseemmo looso loosa qarra ikkitankera woy hagiidhinanni loonseemmo looso loosate hasattonke ajjara dandiitanno. Ninkerano Eeliyaasi gede kae uurra qarra ikkitankera dandiitanno. Hattono goxa calla hasiꞌneemmoha ikkara dandaanno. (1 Mot. 19:5-7) Wolqa baꞌneemmo woyite Yihowa ma assannonketa kule qaale eino?

11. Yihowa kaaꞌlannonketi wole doogo hiittenneeti? (Faarso 94:18)

¹¹ Yihowa kaaꞌlannonke gara. Isi irkisannonketa kule qaale eino. (Faarso 94:18 nabbawi.) Madiꞌrino qolchamaanchi kae milli yaanno gede kaaꞌlo hasiissannosinte gede ninkeno Yihowara agurrummokki soqqammeemmo gede kaaꞌlo hasiissannonkeha ikkara dandaanno. Togoo yannara isi kaaꞌlannonketa buuxisanni togo yiino: “Qiniiticho angakki  irkiseemmohe; ‘Kaaꞌleemmohena waajjitooti’ yeemmohehu, Maganikki ani Kaaliiqaati.” (Isa. 41:13) Yihowa Moote Daawiti konni garinni kaaꞌlinosi. Qarru amadisi yannaranna diinnasi waaddusi woyite Daawiti Yihowa, “angakkino irkisse amaddannoe” yiino. (Far. 18:35) Ikkina Yihowa ninke kaaꞌlannonkehu hiittoonniiti?

12. Wolqa baꞌneemmo woyite Yihowa ninke kaaꞌlate ayeoo horoonsiꞌrara dandaanno?

¹² Yihowa duucha woyite wolootu kaaꞌlitannonke gede asse irkisannonke. Lawishshaho mitte yannara Daawiti wolqiweelita jaalisi Yoonaataani mare xaꞌminosi; hattono jawaachishannore coyiꞌre sheshifachishinosi. (1 Sam. 23:16, 17) Qoleno Yihowa Eeliyaasira mitore asse kaaꞌlannosi gede Elsai doorino. (1 Mot. 19:16, 21; 2 Mot. 2:2) Xaa yannarano Yihowa mininke manna, jaallanke woy songote cimeeyye horoonsiꞌre kaaꞌlankera dandaanno. Ikkirono lowo geeshsha xissiisiꞌneemmo woyite mannunniwa gambo gimbeemmoha ikkara dandaanno. Togoo woyite calluwinke heeꞌra hasiꞌneemmo. Tini nooreentilla. Ikkollana Yihowa kaaꞌlannonke gede maa assa dandiineemmo?

13. Yihowa kaaꞌlo afiꞌrate maa assa hasiissannonke? (Misileno lai.)

¹³ Assa hasiissannonkere. Wolootunniwa gamba yaate sharrami. Wolootunniwa gambo gimbummoro halashshine heda hoongammora, uminke daafira calla hendammoranna iillanni noonke qarra calla illachinshammora dandiineemmo. Hatto ikkiro, dancha doorsha doodha qarra ikkitankera dandiitanno. (Law. 18:1) Hige roorenkanni buutote qarri amadannonke woyite mito woyite calluwinke heeꞌra hasiꞌneemmoha ikkara dandaanno. Ikkirono seeda yanna callootinke heeꞌneemmoha ikkiro, Yihowa ninke kaaꞌlate horoonsiꞌranno faro gatte baꞌannonke. Hakko daafira shota ikka hoogirono qarru yannara miniꞌne manni, jaallakki woy songote cimeeyye kaaꞌlitannohe woyite maahoyye yii. Yihowa ate kaaꞌlate insa horoonsiꞌranni noohu gede assite hedi.—Law. 17:17; Isa. 32:1, 2.

YIHOWA SHESHIFACHISHANNOꞌNE

14. Waajjineemmo gede assannonkeri mayi tuncu yaankera dandaanno?

¹⁴ Qarra ikkannonke coye. Waajjineemmo gede assannonkeri tuncu yaannonke woyiti heeꞌrara dandaanno. Qullaawu Maxaafi giddo kulloonniri ammanantinori Maganu soqqamaano diinnansa waaddinonsahura woy wolu qarri amadinonsa daafira yaaddinonna lowo geeshsha waajjitino woyiti no. (Far. 18:4; 55:1, 5) Ninkeno ledonke rossannori, ledonke loossannori, mininke manni woy gashshaano  gibbankera dandiitanno. Baasa dhiwammoommo daafira reyineemmo yine waajjineemmoha ikkara dandiineemmo. Togoo yannara qaaqquullu gede ikkine waajjinammora dandiineemmo. Togoo woyite Yihowa kaaꞌlannonkehu ma garinniiti?

15. Faarso 94:19 maa buuxissannonke?

¹⁵ Yihowa kaaꞌlannonke gara. Yihowa sheshifachishannonke hattono hagiirsiisannonke. (Faarso 94:19 nabbawi.) Kuni qummeeshshi banqo beleqqeenna waajjitino daafira goxa gibbino qaaqqo hendeemmo gede assankera dandaanno. Hakkiinni annise ise noowa mare goxxa geeshsha haaꞌre hanqafinose gara heda dandiineemmo. Banqo beleqa agurtinokkiha ikkirono, tini qaaqqo annise hanqafe noose daafira wodanaaꞌma dandiitanno. Waajjineemmo gede assanno qarri iillannonke woyite, ninkeno iimi Anninke wodanaaꞌminammo geeshsha hanqafe amadankera hasiꞌneemmo. Yihowa sheshifachishannonke gede ninke maa assa dandiineemmo?

16. Yihowa sheshifachishannonke gede maa assa dandiineemmo? (Misileno lai.)

¹⁶ Assa hasiissannonkere. Huuccatto assidhine hattono Qaalesi nabbabbine ganyitine Yihowa ledo yanna sayisse. (Far. 77:1, 12-14) Hatto assitinanniha ikkiro, yaaddo amaddannoꞌne woyite balaxxine alba iimi Anniꞌnewa higginanni. Waajjishinoꞌnerenna yaaddoꞌne Yihowara hasaaphe. Isi Qullaawa Borro widoonni hasaawisannoꞌnenna sheshifachishannoꞌne gede assidhe. (Far. 119:28) Waajjishanno coyi tuncu yaannoꞌne woyite Qullaawu Maxaafiha mito gafa nabbawaꞌne sheshifachishshaꞌnera dandiitanno. Lawishshaho Iyyoobi, Faarsotenna Lawishshu maxaafi hattono Maatewoosi fooliishsho 6te Yesuusi coyiꞌrino hedo jawaachishshaꞌnera dandiitanno. Yihowa huucciꞌneemmohanna Qaalesi nabbambeemmoha ikkiro, isi aanno shesho afiꞌneemmo.

17. Maa addaxxa dandiineemmo?

¹⁷ Buutote qarri iillannonke woyite Yihowa kaaꞌlannonketa addaxxa dandiineemmo. Horo callootanke diꞌꞌikkinoommo. (Far. 23:4; 94:14) Yihowa agarannonketa, teesiisannonketa, kaaꞌlannonketanna sheshifachishannonketa kule qaale eino. Isayaasi 26:3 Yihowa daafira kultanni togo yitanno: “Kaaliiqa, ate hexxatenni kaajjite heedhannorira, woꞌma keere aattonsa.” Hakko daafira Yihowa addaxxe; hattono isi kiꞌne kaaꞌlate horoonsiꞌranno qixxaawo dancha gede horoonsidhe. Hatto assitinanniha ikkiro, qarru amadannoꞌne woyite nafa jawaante afidhine heeꞌra dandiitinanni.