1. Mito woyite waajjineemmohu mayira ikkara dandaanno?

 NINKE baalunku waajjineemmo woyiti no. Hige Qullaawa Maxaafa xiinxalla, reyo, agaanintenna albillitte ikkannore waajjineemmokki gede assitinonke. Ikkirono xa heeꞌnoommo yanna ‘waajjishanno coyi’ lawishshaho olu, jaddonna dhibbu batiꞌrinote. (Luq. 21:11) Qoleno manna, lawishshaho gawajjitannonke gashshaano woy Yihowa Farciꞌraasine ikkinoommo daafira giwannonkeha mininke manna nafa waajjinammora dandiineemmo. Mitootu qolte ‘xaa yannara woy albillitte iillannonke fonqolo qeelle saꞌꞌa didandiineemmo’ yite yaaddanno.

2. Daawiti Gaati noo yannara iillinosire kuli.

² Daawiti waajjino woyiti no. Lawishshaho Moote Saaooli shaasira hasanni noo yannara Daawiti xooqe Filisxeemootu katama Gaati haꞌrate murciꞌrino. Gaati moote Akiishi mulenni, Daawiti “tonne kume” Filisxeemoota shiino yine guwinsoonnisiha wolqaataamo olamaancho ikkinota huwati. Hakko daafira Daawiti ‘lowo geeshsha waajjino.’ (1 Sam. 21:10-12) Isi, ‘Akiishi ma assaekka?’ yee yaadino. Daawiti waajja qeeꞌlinohu hiittoonniitiyya?

3. Faarso 56:1-3, 11 kultanno garinni Daawiti waajja qeeꞌlinohu hiittoonniiti?

³ Faarso 56te Daawiti Gaati noo yannara macciishshaminosire xawisino. Tenne faarsora Daawiti waajjanno gede assinosire xawisino; ikkirono waajja qeeꞌlanno gede assinosiri maatirono kulino. Isi waajji yannara Yihowa addaxxino. (Faarso 56:1-3, 11 nabbawi.) Daawiti Yihowa addaxxasi garankolla.  Isi rosaminokkire assino; wodana fayyinokkihu gede ikkino. Ikkirono Yihowa kaaꞌlinosi daafira assinori qiniinosi. Hakko daafira Akiishi iso shaa agure isiwiinni haꞌranno gede assino; konni garinni Daawiti gate fulino.—1 Sam. 21:13–22:1.

4. Albinni roore Yihowa addaxxa dandiineemmohu hiittoonniiti? Lawishsha kuli.

⁴ Ninkeno Yihowa addaxxine waajja qeeꞌla dandiineemmo. Kayinni roorenkanni waajjineemmo woyite albinni roore Yihowa addaxxa dandiineemmohu hiittoonniiti? Hanni mitto lawishsha laꞌno. Dhiwamoottota kullihero umi qara waajjattora dandaatto. Ikkirono akimichakki addaxxattoha ikkiro wodanaaꞌmattora dandaatto. Isi ate amadino dhibbi amadinoha batinye manna xagisinoha ikkara dandaanno. Isi seekke macciishshaheranna qarrikki leellinosita buuxisahera dandaanno. Qoleno konni albaanni woloota dancha gede kaaꞌlino xagicho hajajahera dandaanno. Hatteente gede ninkeno Yihowa alba assinonkere, xa assanni noonkerenna albillitte assannonkere hiincine albinni roore iso addaxxa dandiineemmo. Daawitino hatto assino. Isi qullaawu ayyaani massageennasi Faarso 56te borreessinota mite hedo xiinxallineemmo woyite, atino albinni roore Yihowa addaxxanna waajja qeeꞌla dandaatto gara hedi.

YIHOWA ALBA ASSINORI MAATI?

5. Waajja qeeꞌlate Daawiti maa hiincino? (Faarso 56:12, 13)

⁵ Daawiti buutote qarri iille noosiha ikkirono, Yihowa alba assinore seekke hedino. (Faarso 56:12, 13 nabbawi.) Daawiti heeshshosi diro woꞌma Yihowa assinore heda diagurino. Lawishshaho isi mito woyite Yihowa kalaqinore hiincino; tini Yihowa taalle nookki wolqa noosiha ikkinotanna mannu ooso lowo geeshsha baxannota qaaganno gede assitinosi. (Far. 65:6-9) Qoleno isi Yihowa wolootaho assinore hiincino. (Far. 31:19; 37:25, 26) Hattono roorenkanni Yihowa isi umisira assinosire hiincino. Yihowa Daawiti anjesinni kayise kaaꞌlinosi hattono agarinosi. (Far. 22:9, 10) Hanni Daawiti konni garinni hiincasi albinni roore Yihowa addaxxanno gede assitinosi gara hedi!

6. Waajjineemmo woyite Yihowa addaxxineemmo gede kaaꞌlannonkeri maati?

 ⁶ Waajjatto woyite ateneeto togo yite xaꞌmi: ‘Yihowa alba assinori maati?’ Isi kalaqinore hiinci. Lawishshaho Yihowa danisinni kalaqinokkirenna iso magansiꞌra dandiitannokkire ceanna daraaro towaatanno gara ‘seekkine laꞌneemmo’ woyite, isi ninkeno towaatannonketa albinni roore addaxxa dandiineemmo. (Mat. 6:25-32) Yihowa soqqamaanosira assinoreno hedi. Qullaawu Maxaafi giddo kulloonnihu kaajja ammana noonsata leellishino manni xagge xiinxalla woy yannankera noori Yihowa Farciꞌraasine xagge nabbawa dandaatto. a Qoleno Yihowa ate umokki towaatinohe gara hiinci. Isi halaalu minira abbinohehu hiittoonniiti? (Yoh. 6:44) Huuccattokkira dawaro qolinohehu ma garinniiti? (1 Yoh. 5:14) Baxanno Beettisi kakkalonni barru baala horo afidhanni noottohu hiittoonniiti?—Efe. 1:7; Ibi. 4:14-16.

7. Masaalaanchu Daanieeli lawishshi Vaaneesa waajja qeeꞌlitanno gede kaaꞌlinosehu hiittoonniiti?

⁷ Heyiti gobbara heedhannote Vaaneesa b yinanni rodoora lowo geeshsha waajjitanno gede assanno qarri iillinose. Qachisera heeꞌrannohu mittu manchi isi ledo jaalooma kalaqidhanno gede barra baala silke dowwolanninna borrote sokka borreessanni waadannose. Vaaneesa kayinni horo hasidhannokkita kultinosi. Ikkirono kuni manchi lowo geeshsha hanqe ise waajjishiisha hanafi. Vaaneesa “Lowo geeshsha waajjoomma” yitino. Ise waajja qeeꞌlitinohu hiittoonniitiyya? Ise agarooshshe afidhanno gede kaaꞌlannosere assitino. Mittu songote cimeessi gashshaanote ledo xaaddanno gede kaaꞌlinose. Ikkirono ise Yihowa konni albaanni soqqamaanosi agarinonsa garano heddino. Vaaneesa togo yitino: “Umo hedoommati masaalaanchu Daanieeli xaggeeti; iso assinori nookkiha beebbate hudiꞌrino doobbiyi noo balera tungoonni. Ikkirono Yihowa agarinosi. Anino baalanka coye afannoe gede Yihowara kuꞌloomma. Hakkuyi gedensaanni horo diwaajjoomma.”—Dan. 6:12-22.

YIHOWA XAA YANNARA ASSANNI NOORI MAATI?

8. Daawiti ammanino coyi maati? (Faarso 56:8)

⁸ Daawiti Gaati noo yannara shinasira dandiinanniha ikkirono waajja qeeltasira diwodhino. Hatteentenni isi Yihowa hatte yannara isira assanni noosire hedino. Daawiti Yihowa massaganninna agaranni noosita hattono qarrasi afinota huwatino. (Faarso 56:8 nabbawi.) Qoleno ammanantino jaallasi yaano Yoonaataaninna Ahimeleki Daawitira hasiisannosire assite kaaꞌlitinosi. (1 Sam. 20:41, 42; 21:6, 8, 9) Hattono Moote Saaooli shaasira hasanni nooha ikkirono Daawiti gate fulino. Daawiti Yihowa iillanni noosi qarranna macciishshamannosire afinota addaxxino.

9. Yihowa ninke mittu mittunku daafira laꞌꞌannori maati?

⁹ Waajjatto gede assanno qarri iillannohe woyite Yihowa iillannohe qarranna macciishshamannohere afannota qaagi. Lawishshaho Yihowa, Israeele Gibitsete noo yannara insa beebba assiꞌnoonninsata calla ikkikkinni “iillinonsa qarrano” seekke afino. (Ful. 3:7) Daawiti Yihowa ‘qarrasinna shettosi’ afinota kule faarsino. (Far. 31:7) Qoleno Maganu manni uminsa soꞌronni qarru giddora eꞌꞌe sheti yannara nafa Yihowa “ledonsa qarramino.” (Isa. 63:9) Waajjatto gede assanno qarri iillannohe  woyite Yihowa macciishshamannohere afanno; hattono waajja qeeꞌlatto gede kaaꞌlahera quqquxamanno.

10. Yihowa ate daafira hedannotanna iillannohe qarra baala dandiite saꞌꞌatto gede kaaꞌlannoheta addaxxattohu mayiraati?

¹⁰ Ikkollana waajjatto gede assanno qarri iillannohe woyite, ‘Yihowa kaaꞌlanni nooehu hiittoonniiti?’ yite hedattoha ikkara dandaanno. Hatto ikkiro Yihowa kaaꞌlanni noohe gara huwatate iso huucciꞌri. (2 Mot. 6:15-17) Hakkiinni aane noore hedi: Songote gambooshshiwa shiqqino lallawo woy roduuwu qoltino dawaro jawaachishshinohe? Borronke, viidiyo woy baxxitino faarso jawaachishshinohe? Mittu rodii jawaachishshanno hedo woy qummeeshsha kulinohe? Ammanate roduuwinke baxillenna shiqqannonketa ayyaanaamittete sagale mulluri gede assine laꞌneemmoha ikkara dandaanno. Ikkirono tini Yihowa uyinonkete dhagge ikkitanno eltooti. (Isa. 65:13; Maq. 10:29, 30) Tini Yihowa ate daafira hedannota buuxissannote. (Isa. 49:14-16) Qoleno addaxxa hasiissannohehu iso ikkinota leellishshannote.

11. Ayida waajja qeeꞌlitanno gede kaaꞌlinoseri maati?

¹¹ Senegaalete heedhannoti Ayida yinanni rodoo qarru iillise yannara Yihowa kaaꞌlinose gara huwattino. Ise bayira beetto ikkitino daafira annisenna amase umiserano ikko insara hasiisanno geeshshi woxe abba hasiissannose yee hedino. Ikkirono Ayida suwisaancho ikkate heeshshose bikkunnita assidhuta angate anje amaddinose. Hakkiinni annisenna amase hanqinose hattono boroorinose. Ise togo yitino: “Annaꞌyanna amaꞌya kaaꞌla didandeemma hattono baalunku manni giwannoe yee waajjoomma. Coyi bushara wore agurino yee Yihowa nafa busha assoomma.” Hakkiinni ise songote gambooshshiwa lallawo macciishshitu. Ise ledde togo yitino: “Lallawo shiqishino rodii xissiisinonke coyi ikkihano ikkiro Yihowa afannota qaagiissinonke. Hakkiinni gale hose songote cimeeyyenna wolootu roduuwi kaaꞌlitinoe daafira Yihowa baxannoeta galagale wodanchoomma. Yihowa kaaꞌlanni nooeta albinni roore addaxxate huuccatto assiꞌra hanafoomma; huuccattoꞌyara dawaro afiꞌroommata huwatummati giddoyidi keere afiꞌroomma.” Ayida  gedensoonni looso afidhino; kuni loosi suwisaancho ikkite soqqantanno woyitira hasiisannose woxe calla ikkikkinni annasenna amase hattono woloota kaaꞌlate ikkannose geeshshi woxe afidhanno gede assannoseho. Ise “Woꞌmunni woꞌma Yihowa addaxxa rosoomma. Xa huuccatto assiꞌrummahu gedensaanni horo diwaajjeemma” yitino.

YIHOWA ALBILLITTE MAA ASSANNO?

12. Faarso 56:9 kultanno garinni Daawiti maa addaxxino?

¹² Faarso 56:9 nabbawi. Kuni qummeeshshi Daawiti waajja qeeꞌlinota wole doogo kulanno. Heeshshosi qarru giddo nooha ikkirono, Daawiti Yihowa albillitte assannosire hiincino. Daawiti Yihowa gatisannosita afino. Isinni Yihowa, aane Israeelete moote ikkannohu Daawiti ikkinota kulino. (1 Sam. 16:1, 13) Daawiti Yihowa uyinosi hexxo baala woꞌmitannota dihuluullamino.

13. Yihowa ma assannonketa addaxxa dandiineemmo?

¹³ Yihowa maa assahera qaale eino? Yihowa iillannonke qarra baala hoolannonke yine dihendeemmo. c Ikkollana, xaa yannara iillanni noohe qarri ikkihano ikkiro, Yihowa daggannote haaro alamera konne qarra baala hunanno. (Isa. 25:7-9) Kalaqaanchinkera reyitinore kayisate, dhibba hursatenna gibbannonkere baala hunate wolqa noosi.—1 Yoh. 4:4.

14. Maa hiinca dandiineemmo?

¹⁴ Waajjatto gede assannoheri tuncu yaannohe woyite Yihowa albillitte assannore hiinci. Hanni Sheexaanu baꞌꞌanno woyite, bushu manni baeenna keeraano calla gattanno woyitenna barru baala guuntete xeꞌne baꞌanni hadhanno woyite heeshsho hiittoota ikkitannoro hedi. Lawishshaho 2014hu qoqqowu gambooshshiwa shiqqinoti loonse leellinshanni ikkito hexxonke hiinca dandiineemmohu hiittoonniitiro leellishshanno. Hattenne loonse leellinshanni ikkitora mittu anni maatesi ledo 2 Ximootewoosi 3:1-5 noo hedo haaro alamera ikkoommero mayine nabbambanniro hasaawino. Qummeeshsha togo yine nabbambanni: “Haaro alamera yanna baxissannota ikkitanno. Mannu wole manna baxannoha, ayyaanaamittete coye baxannoha, naaxxannokkiha, umosi heeshshi assannoha, xonamannokkiha, iltinonsarira hajajamannoha, galatannoha, ammanaminoha, maatesi baxannoha, araara baxannoha, wolootu daafira danchare hasaawannoha, umosi qeeꞌlannoha, mararannoha, danchumma baxannoha, yiinowa hosannoha, muddamannokkiha, booꞌnannokkiha, umisi qiniitinni roore Magano baxannohanna Maganoho galinoha ikkanno; togoo manniwa aani.” Maatekki woy ammanate roduuwikki ledo haaro alamera heeshsho hiittoota ikkitannoro hasaawatto?

15. Tanja waajjitinoha ikkirono waajja qeeꞌlitanno gede kaaꞌlinoseri maati?

¹⁵ Aliyye Meqedooniyira heedhannoti Tanja yinanni rodoo albillitte afidhanno atoote hiincite waajja qeeꞌlitino. Ise Qullaawa Maxaafa xiinxalla hanaffino daafira maatese tiyyidhe gibbinose. Ise togo yitino: “Iillannoe yee waajjoommahu mitu coyi iillinoe. Amaꞌya gambooshshe haꞌre dawumma kiiro gantannoe. Anniꞌyanna amaꞌya Yihowa Farciꞌraasincho ikkummaro shaannoeta kule waajjishiishinoe.” Jeefote Tanja mininni fushshine hunnoonni. Ise ma assituyya? Togo yitino: “Yihowara ammanamoomma daafira hegerera afiꞌreemma atoote illachishoomma. Qoleno Yihowa haaro alamera xa hoogoomma coye baala oye baꞌraasannoetanna xa noo qarra baala haweemmata hedoomma.”  Tanja ammanante heedhino. Hattono Yihowa kaaꞌleennase heedhanno qae afidhino. Xaa yannara ise ammanamino rodiira assidhe isi ledo woꞌma yanna soqqansho hagiirrunni soqqantanni no.

YIHOWARA NOOꞌNE AMMANA XAANNI KAAJJISHIDHE

16. Luqaasi 21:26-28 masaalotenni kulloonniri woꞌmanno woyite worbuulle ikkineemmo gede kaaꞌlannonkeri maati?

¹⁶ Quuxxote qarri yannara mannu “waajje daaqanno.” Maganu manni kayinni shashshafamikkinni worbuulle ikke heeꞌranno. (Luqaasi 21:26-28 nabbawi.) Hatte yannara waajjineemmokkihu mayiraati? Yihowa addaxxa ronsoommo daafiraati. Aleenni qummi assiniti Tanja alba iillinose qarri, iillinoseha shota ikkinokki qarra dandiite saꞌanno gede kaaꞌlinoseta coyidhino. Ise togo yitino: “Yihowa iillannonke qarra baala dandiine saꞌneemmo gede kaaꞌlannonketanna maassiꞌrannonketa rosoomma. Mito woyite baalunku coyi wolootu anga nooha lawankera dandaanno; kayinni insa tenne assitannohu Yihowa fajjinsa geeshsha callaati. Iillinonke qarri shota ikka hoogirono baꞌꞌasi digattanno.”

17. Tayixehu 2024hu diru qummeeshshi kaaꞌlannonkehu hiittoonniiti? (Aaniidi qoolira noo misile lai.)

¹⁷ Xaa yannara waajjineemmo gede assannonkehu batinyu coyi no. Kayinni Daawitinte gede waajja qeeltankera diwodhineemmo. Tayixehu 2024hu diru qummeeshshi Daawiti huucciꞌrino huuccatto aaninni haaꞌnoonniho; qummeeshshu, “Waajjillu amadannoe yannara, ate addaxxeemmo” yaanno. (Far. 56:3) Mitte Qullaawa Maxaafa xawissanno borro yitino gede ikkiro konni qummeeshshira Daawiti waajjishannosi gede assannosi coye woy qarra diꞌꞌillachishino; hatteentenni gatisannosi Magano addaxxino. Dagganno agannara roorenkanni waajjatto gede assanno coyi tuncu yaannohe woyite konne diru qummeeshsha hedi. Yihowa alba assinore, xa assanni noorenna albillitte assannore hiincate yanna gaaꞌmi. Hakkiinni Daawiti gede “Magano . . . addaxxeemmo daafira diwaajjeemmo” yaa dandaatto.—Far. 56:4.