1. Yihowa daafira hedatto woyite maa qaagatto?

 YIHOWA hiittoohoro hedate woꞌnaalte egennootto? Huuccattotenni iso hasaawisatto woyite qulli yaannoheri maati? Yihowa illete leellannokkiha ikkirono, Qullaawu Maxaafi iso duuchu garinni xawisanno. Yihowa, arrishshote, ‘wonqotenna ittanno giira’ gede assine xawinsoonni. (Far. 84:11; Ibi. 12:29) Hiziqeeli Yihowa heeꞌrannowi bulu dilqi gedeeha, giirate giddo noo camo gedeehanna xeenu gedensaanni fultanno magani-seemo gedeeha ikkinota xawisino. (Hiz. 1:26-28) Yihowa daafira kulloonnihu kuni xawishshi iso ayirrinseemmo gede hakkiino saꞌne waajjineemmo gede nafa assankera dandaanno.

2. Mitu mannira Yihowawa shiqa qarra ikkitannonsa gede assara dandaannori maati?

² Yihowa laꞌꞌa dandiineemmokki daafira isi baxannonketa ammana qarra ikkitankera dandiitanno. Mitu manni konni albaanni lowo qarri iillinonsa daafira Yihowa horo baxannonsakkihu gede asse hedanno. Insara baxannonsa anni noonsakkiha ikkara dandaanno. Yihowa macciishshamannonkerenna tini isiwa shiqa qarra ikkitannonke gede assitanno gara afino. Isi ninke kaaꞌlate baxissanno akattasi Qaalisi giddo borreessinanni gede assino.

3. Yihowa baxilli daafira seekkine xiinxalla hasiissannonkehu mayiraati?

³ Yihowa daafira dancha gede xawise kulannohu mittu qaali baxilleho. (1 Yoh. 4:8) Yihowa baalankare assannohu baxillunniiti. Maganu baxilli taalle nookkiha ikkino daafira isi iso baxxannokkire nafa baxanno. (Mat. 5:44, 45) Konni birxichira Yihowanna baxillisi daafira seekkine ronseemmo. Maganinke daafira roore ronsanni haꞌnummo kiiro iso albinni roore banxeemmo.

YIHOWA LOWO GEESHSHA BAXANNONKE

4. Yihowa baxilli mayi macciishshamannohe gede assannohe? (Misileno lai.)

⁴ ‘[Yihowa] mararannoho.’ (Yai. 5:11) Qullaawu Maxaafi giddo  Yihowa isonooto baxillaancho ama gede asse xawisino. (Isa. 66:12, 13) Hanni mitte ama qaaqqose baxillunni towaaxxitanno gara hedi. Ise qaaqqose sununni assite giwoodisera hanqafidhanno; hattono shiima huuronni hasaawissannosi. Ise qaaqqise wiꞌlanno woyite woy xissannosi woyite hasiisannosire assitannosi. Ninkeno xissiisiꞌneemmo woyite Yihowa baxillisinni towaatannonketa addaxxa dandiineemmo. Faarsaanchu “Yaaddonna dadillu amadie yannara, sheshifachishshe, hagiirsiisoottoe” yee borreessino.—Far. 94:19.

5. Yihowahu bagamannokki baxilli kaaꞌlannohehu hiittoonniiti?

⁵ Yihowa ammanaminoho. (Far. 103:8) Gara ikkinokkire assinummoro nafa isi hexxo mudhe ninke baxa diaguranno. Israeele Yihowa duucha higge dadillissinosi; ikkirono isi maaro eꞌino dagasi woꞌmanka woyite baxannonsata leellishate togo yiino: “Ati ane albaanni muxxete, hattono ayirraddoho; anino baxoommohe.” (Isa. 43:4, 5, NW) Xaa yannarano Yihowa ninke hakko garinni baxannonke. Hakko daafira woꞌmanka woyite baxannonketa addaxxa dandiineemmo. Jawa soꞌro loonsummoro nafa Yihowa tuge diagurannonke. Maaro eꞌnummoronna isiwa hingummoro Yihowa baxa agurinonkekkita wodanchineemmo. Isi “maarosi batiꞌra” ikkitinota kule qaale einonke. (Isa. 55:7) Qullaawu Maxaafi tini maaro Yihowawiinni ‘haarooꞌmineemmo yanna dagganno’ gede assitannota kulanno.—Soq. 3:20.

6. Zakkaariyaasi 2:8 Yihowa daafira maa rosiissannonke?

⁶ Zakkaariyaasi 2:8 nabbawi. Yihowa baxannonke daafira macciishshamannonkeri rahe leellannosi; hattono ninke agarate quqquxamanno. Ninke xissiisiꞌneemmo woyite isino xissiisiꞌranno. Hakko daafira, “[Illekki] diikkichi gede assite agarie” yine huucciꞌra dandiineemmo. (Far. 17:8) Bisinke kifilla giddo ille shiimare hooꞌla dandiitannokkitenna muxxete. Hakko daafira Yihowa ninke illesi diikkichi ledo heewisiisi woyite togo yaanni noohu gedeeti: ‘Kiꞌne mannaꞌya gawajjannohu aneha muxxe coye gawajjinohu gedeeti.’

7. Yihowa baxille albinni roore addaxxa hasiissannonkehu mayiraati?

⁷ Yihowa, ninke mitto mittonka baxannonketa addaxxinammora hasiꞌranno. Ikkirono isi alba iillinonke coyi isi baxannonketanna teꞌee huluullammeemmo gede assankera dandaannota afino. Woy xa iillanni noonke qarri  isi baxannonketa addaxxa qarra ikkitannonke gede assara dandaanno. Yihowa baxannonketa albinni roore addaxxineemmo gede kaaꞌlannonkeri maatiyya? Yihowa Yesuusa, buuramino Kiristaananna ninke baalanka baxannonketa leellishino gara xiinxalla kaaꞌlitannonke.

YIHOWA BAXANNONKETA LEELLISHINO GARA

8. Yesuusi Annisi baxannosita huluullaminokkihu mayiraati?

⁸ Yihowanna baxanno Beettisi kiirre tunqannikki diro mitteenni lubbora baxantanni heedhino. Yihowa Maatewoosi 17:5 Yesuusa baxannota xawise kulino. Yihowa, ‘Hagiirsiisannoehu isooti’ calla yee agura dandaanno. Ikkirono isi Yesuusa mageeshshi geeshsha baxannoro anfammora hasiꞌrino daafira, “Baxeemmohu Beettiꞌya konneeti” yiino. Yihowa Yesuusinninna isi assannorinni hagiidhannota coyiꞌrino. (Efe. 1:7) Yesuusino Annisi baxannosita dihuluullamino. Yihowa baxilli xawe leellinosi daafira Yesuusi Annisi lowo geeshsha baxannosita addaxxino. Isi Annisi baxannosita duucha hige woꞌma giddonni coyiꞌrino.—Yoh. 3:35; 10:17; 17:24.

9. Yihowa buuramino Kiristaana baxannota leellishannori maati? Xawisi. (Roomu Sokka 5:5)

⁹ Yihowa buuramino Kiristaanano baxannota leellishino. (Roomu Sokka 5:5 nabbawi.) “Woꞌmino” yaanno qaale wodanchi. Mitte borro konne qaale “ninkewa lolahu gede ikke dayi” yite xawissino. Tini yaatto Yihowara buuramino Kiristaanira noosi baxilli batiꞌra ikkinota dancha gede assite xawissanno. Buuramino Kiristaanino ‘Maganu baxannonsata’ afino. (Yih. 1) Soqqamaasinchu Yohaannisi insara macciishshamannonsare borreessanni togo yiino: “‘Maganu oosooti’ yinanninke gede Maganu Annu hiittoo baxille uyinonkero laꞌe.” (1 Yoh. 3:1) Yihowa baxannohu buuramino Kiristaana callaatini? Deeꞌni; Yihowa ninke baalanka baxannonketa leellishino.

10. Yihowa baxannoheta leellishinoti baalanta roortino doogo hiittenneeti?

¹⁰ Yihowa baxannoheta leellishinoti baalanta roortino doogo hiittenneeti? Wodote kakkalooti; Yihowa tenne kakkalo widoonni taalle nookki baxillesi leellishinonke! (Yoh. 3:16; Rom. 5:8) Yihowa cubbinkera maaro afiꞌneemmo gedenna isi jaalla ikkineemmo gede baalunku manni daafira reyara muxxe Beettosi sayise uyino. (1 Yoh. 4:10) Yihowanna Yesuusi baattino waaga hiincinummo ikkiro insa ninke mitto mittonka baxxannonke gara albinni roore wodanchineemmo. (Gal. 2:20) Wodote kakkalo Yihowa taashsho baxanno Magano ikkinota leellishshannota calla diꞌꞌikkitino. Wodote kakkalo baxillu eltooti. Yihowa muxxe Beettosi Yesuusa kakkalo asse oye baxannonketa leellishino. Isi Beettisi ninke daafira qarramannonna reyanno gede fajjino.

11. Ermiyaasi 31:3tenni maa ronseemmo?

¹¹ Aleenni ronsummonte gede, Yihowa ninkera noosi baxille dimaaxiꞌranno; hatteentenni mageeshshi geeshsha baxannonkero xawise kulanno. (Ermiyaasi 31:3 nabbawi.) Yihowa isiwa abbinonkehu baxannonke daafiraati. (Marro 7:7, 8te ledo heewisiisi.) Aye coyino woy ayino konni baxilliwiinni badankera didandaanno. (Rom. 8:38, 39) Kuni baxilli mayi macciishshamannohe gede assanno? Faarso 23 nabbabbe Yihowa baxillinna towaanyo Daawiti kaaꞌlitinosi garanna ninke baalanka kaaꞌlitannonke gara wodanchi.

YIHOWA BAXILLI MAYI MACCIISHSHAMANNOHE GEDE ASSANNO?

12. Faarso 23 ma garinni xawisatto?

¹² Faarso 23:1-6 nabbawi. Faarso 23 Yihowa baxillenna towaanyo addaxxinannita leellishshanno faarsooti. Tenne faarso borreessinohu Daawiti isinna Allaalaanchisi Yihowa mereero nooha kaajja jaalooma xawisino. Daawiti Yihowa massagannosi gede assiꞌrino daafira beꞌe diyiino; hattono woꞌmunni woꞌma iso addaxxino.  Daawiti Yihowa heeshshosi diro woꞌma baxannosita afino. Isi Yihowa addaxxanno gede assinosiri maati?

13. Daawiti Yihowa towaatannosita huluullaminokkihu mayiraati?

¹³ “Hoogeemmori mitturino dino.” Daawiti Yihowa woꞌmanka woyite hasiisannosire aannosita afino daafira isi dancha gede towaatannosita addaxxino. Qoleno Daawiti Yihowa hagiirsiisinotanna isi jaalasi ikkinota afino. Albillitte aye coyino iillisiro Yihowa hasiisannosire baala asse towaata agurannosikkita addaxxinohu iseraati. Daawiti Yihowa baxannositanna towaatannosita addaxxino; tini isi dadillanno gede ikkikkinni hagiirrenna harshammo afiꞌranno gede kaaꞌlitinosi.—Far. 16:11.

14. Yihowa baxillunni towaatannonkehu hiittoonniiti?

¹⁴ Yihowa roorenkanni qarru iillannonke woyite baxillunni towaatannonke. Beeteelete 20 diro saꞌanno yanna soqqantinote Kileeri a yinanni rodoora maatesera buutote qarri iillinsa woyite insa kaaꞌlitanno gara afa qarra ikkitinose. Annisera surrete giddo mundee duꞌnantino, mitte rodoose bohantino, maatese angate anje amaddino, qoleno qaensa hooggino. Yihowa insa baxillunni towaatannota leellishinohu hiittoonniiti? Kileeri togo yitino: “Yihowa maateꞌyara barru barrunku hasiisannonsare wonshino. Isi duucha hige hendoommohunni aleenni hasiisannonkere asse towaatinonke. Duucha woyite, Yihowa towaatinonke gara hedeemma; hattono baxillesi dihaweemma. Tenne qaagaꞌya qarru iillierono isira soqqama agureemmakki gede kaaꞌlitinoe.”

15. Daawiti haarooꞌminohu gede asse hedinohu mayiraati? (Misileno lai.)

¹⁵ ‘Haaroonsannoe.’ Iillinosi fonqolinna qarri  baalu Daawiti lowo geeshsha yaadanno gede assinosi woyiti no. (Far. 18:4-6) Ikkirono Yihowa baxillenna towaanyo afiꞌrino daafira haarooꞌmino. Yihowa konne lowo geeshsha dadillino jaalasi ‘daffino qanchonna xalalu wayiwa haaꞌre massinosi.’ Hakko daafira Daawiti jawaatino; hattono Yihowara hagiirrunni soqqama diagurino.—Far. 18:28-32.

16. Yihowa baxilli haaroonsinohehu hiittoonniiti?

¹⁶ Xaa yannarano fonqolunna qarru iillinkerono, “Baꞌnummokkinni gantoommohu, bagamannokkihu Kaaliiqi [baxillinniiti].” (Erq. 3:22; Qol. 1:11) Hanni Recheeli yinanni rodoo lawishsha laꞌno. Koroonu fayya yannara minaannise isenna Yihowa agure haꞌrita lowo geeshsha xissiisidhino. Yihowa isera ma assiseyya? Ise togo yitino: “Yihowa banxannieta huwateemma gede assinoe. Isi ledoꞌya yanna sayissannore, sagale abbitannoere, dancha hedonna qummeeshshuwa kulte jawaachishshannoere, muushshi yeemma gede assitannoerenna Yihowa woꞌmanka woyite towaatanni nooeta qaageemma gede assitannoere batinye jaalla uyinoe. Baxxannoeta halaꞌlado maate uyinoe daafira Yihowa woꞌmanka woyite galaxxeemmasi.”

17. Daawiti ‘waajjinokkihu’ mayiraati?

¹⁷ “Ati ledoꞌya nootto daafira diwaajjeemmo.” Daawitira duucha woyite buutote qarri iillinosi; hattono isira batinye wolqaataame diinna noosi. Ikkirono Yihowa baxilli beꞌe yaannokki gede assinosi; hattono agarinosi. Daawiti Yihowa woꞌmanka woyite ledosi noota addaxxino; tini qolte sheshifachishshinosi. Hakko daafira isi, “[Yihowa] waajjishannori baalunkunnino gatisie” yee faarsino. (Far. 34:4) Daawiti waajjasi garankolla; kayinni Yihowa baxilli waajjanno gede assannosi coye rooranno.

18. Yihowa baxannoheta afakki waajjatto woyite jawaante ikkitannohehu hiittoonniiti?

¹⁸ Waajjineemmo gede assanno coyi tuncu yaannonke woyite Yihowa baxannonketa afanke jawaachishshannonkehu hiittoonniiti? Suuzi yinanni suwisaancho beettinsa isonooto shiita iseranna minaannisera mayi macciishshaminonsaro kultanni togo yitino: “Hedeweelcho iillannohu dadillisanno coyi lowo geeshsha xissiisiꞌnanni gede assanno; hattono kaaꞌlannoehu dino yine hendanni gede assanno. Kayinni Yihowa baxilli wodanaaꞌmineemmo gede assinonke hattono agarooshshe ikkinonke.” Aleenni kulliti Recheeli albita qaagge togo yitino: “Mitto hashsha lowo geeshsha xissiisiꞌroomma daafira huuroꞌya naggi asse Yihowa huucciꞌroomma. Hakkiinni bayichonkonni wodanu  darga higie; hattono wodanaaꞌmumma; qoleno ama dogisiisse goxisidhino qaaqqi gede ikkumma. Hakko hashshita horo dihaweemma.” Taasoosi yinanniha songote cimeessa olaho haꞌra giwino daafira shoole diro usurroonnisi. Iso Yihowa baxannosita leellishinosihunna towaatinosihu hiittoonniiti? Isi togo yiino: “Yihowa hasiisannoerinni roorse towaatinoe. Tini albinni roore woꞌmunni woꞌma iso addaxxeemmo gede assitinoe. Usuru mini lowo geeshsha giwisanno bayicho ikkirono, Yihowa ayyaanisi widoonni lowo geeshsha hagiidheemmo gede assinoe. Tini isi ledo gamba yee loosummo kiiro isi danchummanni roore horo afiꞌreemmota buuxissinoe. Hakko daafira usuru mine heeꞌrenni woꞌma yanna suwisaancho ikke soqqama hanafoommo.”

SHAQQADU MAGANIꞌNEWA SHIQQE

19. (a) Maganu baxannonketa afa huuccattonke woyyeessiꞌrate kaaꞌlitannonkehu hiittoonniiti? (b) Yihowa baxannonketa leellishino doogga giddo atera dhagge ikkitannoheti hiittenneeti? (“ Yihowa Baxannonketa Buunxeemmo Gede Assitanno Hedo” yitanno saaxine lai.)

¹⁹ Kageeshsha xiinxallinummori baalu ‘Baxillu Magani’ Yihowa ninke ledo noota leellishanno! (2 Qor. 13:11) Isi ninke mittu mittunku daafira hedanno. ‘Maarosi [“bagamannokki baxillisi” NW] doyisse’ noonketa addaxxineemmo. (Far. 32:10) Yihowa baxannonketa leellishino gara hiincinummo kiiro isi roore xawe leellannonke; hattono albinni roore isiwa shinqeemmo. Huxuxxi yinummokki isiwa shiqanna isi baxilli mageeshshi geeshsha hasiisannonkero isira kuꞌla dandiineemmo. Isira qarrinke leellannositanna ninke kaaꞌlate quqquxamannota addaxxine yaachishannonkere baala isira hasaapha dandiineemmo.—Far. 145:18, 19.

20. Yihowa baxilli albinni roore isiwa shinqeemmo gede assannonkehu hiittoonniiti?

²⁰ Qiidu yannara iibbitino giirawa shiqqi yineemmonte gede, Yihowa baxillino isiwa shiqqi yineemmo gede assannonke. Yihowa baxilli taalle dinooho; qoleno isi shaqqadoho. Konnira Yihowa baxannonke daafira hagiidha dandiineemmo. Hakko daafira baalunku isi baxinonkente gede ninkeno “Kaaliiqa baxeemmosi” yino.—Far. 116:1.