1. Yihowa adhama qixxeessinohu mittu korkaati maati?

 YIHOWA ‘hagiirraamo Maganooti’; ninkeno hagiirraamma ikkinammora hasiꞌranno. (1 Xim. 1:11, NW) Isi hagiidhineemmo gede assitannonketa batinye elto uyinonke. (Yai. 1:17) Kuri elto giddo mitte adhamate. Labbaahunna meyati adhamanno woyite, mimmito baxatenna ayirrisate qaale eanno. Jaaloominsa kaajjado ikkiro insa addu hagiirre afiꞌra dandaanno.—Law. 5:18.

2. Xaa yannara noohu batinyu mannira adhamansa hiittoote?

² Xaa yannara noohu batinyu adhamino manni adhami woyite eino qaale hawanno; tini dadillissannote. Hakko daafira kuni manni hagiirraamma diꞌꞌikkino. Muli yannara fultinoti Alamenniti Fayyimmate Uurrinsha rippoorte kultanno garinni, batinyu minaannuwi minaamuwansa gante gawajjitanno, xontanno hattono xissiisiꞌranno gede assitanno. Togoore assanno minaanni minaamasi mannu noowa ayirrisannoha mine kayinni miicannoha ikkara dandaanno. Qoleno teeda baꞌino misilla laꞌꞌanno minaanni minaamasi dibaxannoe yite heddanno gedenna yaaddanno gede assanno.

3. Minaanni minaamasi miicanno gede assannosiri maa ikkara dandaanno?

³ Mitu minaannuwi minaamuwansa miiccanno gede assannonsari maa ikkara dandaanno? Insa finqilu anni lossinonsaha ikkara dandaanno; hakko daafira minaamuwansa miica qarra afidhinokkihu gede assite heddara dandiitanno. Woloota kayinni lophitino budi, “worbu manchi” minaamasira aliidimmasi leellishate wolqa horoonsiꞌra hasiissannosi yite heddanno gede assinonsaha ikkara dandaanno. Wolootu labballi insaneeto eemadha dirossino. Mitu labballi ganyite teeda baꞌino misilla laꞌanno daafira, meyateranna siimu xaadooshshira gara ikkitinokki lao noonsa. Qoleno mite rippoorte Koroonu fayya togoo qarri roore lexxanni haꞌranno gede assitinota kultino. Kayinni  kuri coyibba giddo mittuno minaanni minaamasi miica garaho yinanni gede diassanno.

4. Kiristaana ikkitino minaannuwi maa qoropha hasiissannonsa? Mayira?

⁴ Kiristaana ikkitino minaannuwi, meyatera gara ikkitinokki lao heedhannonsakki gede qoropha hasiissannonsa. a Mayira? Mittu korkaati, hendoonni coye assinara dandiinanni daafiraati. Soqqamaasinchu Phaawuloosi Roomaho heeꞌrannohu buuramino Kiristaani, ‘tini alame huntansara wodhannokki’ gede qorowisiisinonsa. (Rom. 12:1, 2) Phaawuloosi Roomaho heeꞌranno Kiristaanira sokka borreessi woyite, songo xintantunku haammatu diri sainoha ikkara dandaanno. Ikkirono Phaawuloosi coyiꞌrinori, songote noori mitootu alamete budinna hedo huntansara wodhitinota leellishanno. Phaawuloosi insa hedonsanna akatansa biddi assidhanno gede jawaachishinonsahu iseraati. Tini amaale xaa yannara noo minaannuwino haꞌrunsa hasiissannote. Mitu minaannuwi tini alame huntansara wodhite minaamuwansa miiccino. b Yihowa minaanni minaamasi ma assara hasiꞌranno? Konni birxichihu cuꞌmote qummeeshshinni tenne xaꞌmora dawaro afiꞌneemmo.

5. Umi Pheexiroosi 3:7 kultanno garinni, minaanni minaamasi ma assa hasiissannosi?

⁵ Umi Pheexiroosi 3:7 nabbawi. Yihowa minaannuwu minaamuwansa ayirrissara hajajino. Minaamasi ayirrisanno minaanni, isera shaqqillenna baxille leellishanno. Konni birxichira minaanni minaamasi ayirrisannota leellisha dandaanno gara ronseemmo. Kayinni hanni balanxe, minaamasi ayirrisanno minaanni assa hasiissannosikkire laꞌno.

MINAAMAꞌNE XISSIISANNO COYE ASSITINOONTE

6. Minaamasi gane gawajjanno minaanna Yihowa ma garinni laꞌꞌanno? (Qolaasiyaasi 3:19)

⁶ Ganne gawajja. Yihowa finqilannoha aye manchono giwanno. (Far. 11:5) Roorenkanni isi minaamuwansa miiccannore giwanno. (Mil. 2:16; Qolaasiyaasi 3:19 nabbawi.) Cuꞌmote qummeeshshi 1 Pheexiroosi 3:7 kultanno garinni, mittu minaanni minaamasi ayirrisannokkiha ikkiro, Yihowa ledo noosi jaaloomi baꞌꞌanno. Yihowa huuccattosi nafa macciishsha giwara dandaanno.

7. Efessooni 4:31, 32 kultanno garinni, minaannuwu hiittoo coye coyiꞌra qoropha hasiissannonsa? (Qoleno “Harancho Xawishsha” lai.)

⁷ Xono. Mitu minaannuwi minaamuwansa hanqitanno hattono xissiisannonsare coyidhanno. Ikkollana Yihowa, hanqo, giirama, raarenna xono c giwanno. (Efessooni 4:31, 32 nabbawi.) Isi baalankare macciishshanno. Mittu minaanni mannu nookkiwa nafa minaamasi hasaawisanno gari Yihowa hagiidhanno woy dadillanno gede assanno. Minaanni minaamasi ayirrinyu xeino garinni hasaawisannoha ikkiro, adhamasi gawajjantannoha calla ikkikki Maganu ledo noosi jaaloomino baꞌꞌanno.—Yai. 1:26.

8. Teeda baꞌino misilla daafira Yihowara mayi macciishshamannosi? Mayira?

⁸ Teeda baꞌino misilla laꞌꞌa. Teeda baꞌino misilla daafira Yihowara mayi macciishshamannosi? Isi teeda baꞌino misilla giwanno. Hakko daafira mittu minaanni teeda baꞌino misilla lairo Yihowa ledo noosi jaaloomi baꞌꞌanno; hattono minaamasi shollishanno. d Yihowa minaanni assootisinni calla ikkikkinni hedosinnino  minaamasira ammaname heeꞌrara hasiꞌranno. Yesuusi, “Meyata lae foorate yorinohu baalu wodanisinni ise ledo soorrinoho” yiino. e—Mat. 5:28, 29.

9. Yihowa, minaanni siimu xaadooshshi yannara minaamasi shollishannota giwannohu mayiraati?

⁹ Siimu xaadooshshi yannara minaamasi shollisha dihasiissannosi. Mitu minaannuwi siimu xaadooshshi yannara, minaamuwansa shollishannore woy tiiansa xursiisannore assanno gede xixxiibbanno. Yihowa togooha meessaneeto calla banxannita leellishanno assoote giwanno. Isi minaanni minaamasi baxara, shaqqille leellishaseranna hasattose ayirrisara hasiꞌranno. (Efe. 5:28, 29) Ikkina mittu Kiristaanchi minaamasi shollishannoha woy teeda baꞌino misilla laꞌꞌannohalla ikki? Isi hedosinna assootesi biddi assiꞌra dandaannohu hiittoonniiti?

MINAANNUWU BUSHA AMANYOOTE QEELA DANDIITANNO GARA

10. Minaannuwa Yesuusi lawishshi kaaꞌlannonsahu hiittoonniiti?

¹⁰ Mittu minaanni minaamasi miicanna shollisha aguranno gede kaaꞌlannosiri maati? Isi Yesuusi lawishsha haꞌrunsate sharrama dandaanno. Yesuusi mine kalaqiꞌrinokkiha ikkirono, rosaanosira shaqqille leellishe minaannuwaho dancha lawishsha ikkino. (Efe. 5:25) Hanni Yesuusi soqqamaasinesira shaqqille leellishinonna insa hasaawisino garinni minaannuwu maa rossannoro laꞌno.

11. Yesuusi soqqamaasinesira shaqqille leellishinohu hiittoonniiti?

¹¹ Yesuusi soqqamaasinesira shaqqille leellishinonsa; hattono ayirrisinonsa. Isi insara kaajjishe coyiꞌre woy insa gadadise diegennino. Isi Mootichansa ikkirono, wolqasi horoonsiꞌre insara silxaanesi leellishate diwoꞌnaalino. Hatteentenni umosi heeshshi asse soqqaminonsa. (Yoh. 13:12-17) Isi rosaanosira togo yiino: “Anewiinnino rosse; ani shaqqadohonna wodana joogaho; umiˈnerano fooliishsho afidhinanni.” (Mat. 11:28-30) Yesuusi shaqqado ikkinota qaango. Shaqqadu manchi laafa diꞌꞌikkino. Hatteentenni togoo manchira isonooto eemadhate jawaante noosi. Caacceessanno coyi tuncu yiisiro wodanaaꞌmanno; hattono coye heeshshi gotti asse hedanno.

12. Yesuusi woloota hasaawisinohu hiittoonniiti?

¹² Yesuusi coyiꞌranno coyinni woloota sheshifachishino hattono fooliishshiishino. Isi haꞌrunsaanosira kaajjishe coyiꞌre diegennino. (Luq. 8:47, 48) Gibbannosiri xontusi woyitenna caacceessitasira woꞌnaaltu woyite nafa “qole dixonino.” (1 Phe. 2:21-23) Isinni Yesuusi kaajjishe coyiꞌrantenni sammi yaa doodhino woyiti no. (Mat. 27:12-14) Kuni Kiristaana ikkitino minaannuwira kaajja lawishshaati!

13. Maatewoosi 19:4-6 kultanno garinni, minaanni ‘minaamasi ledo quraanyama’ dandaannohu hiittoonniiti? (Misileno lai.)

¹³ Yesuusi minaannuwu minaamuwinsara ammanante heedhanno gede hajajino. Isi Annisi minaanni ‘minaamasi ledo quraanyama’ hasiissannosita coyiꞌrino hedo qummi assino. (Maatewoosi 19:4-6 nabbawi.) Konni qummeeshshira ‘quraanyama’ yine tirroonnihu Giriikete afii qaali, noo gedeenni tirriro “qaꞌmiꞌra” yitanno tiro afiꞌrino. Hakko daafira minaanninna minaama mereero noo mittimma kaajjado ikka hasiissannose. Insa giddo mittu adhamansa gawajjannore assiro lamunku xissiisiꞌranno. Minaamasi ledo kaajjado mittimma noosi minaanni, baalunku garita teeda baꞌino misilla laꞌꞌa qorophanno. Isi ‘haafare laꞌꞌa’ bayichonkonni giwanno. (Far. 119:37) Minaamasi agurranna aye meyatano yortote illenni laꞌꞌa hoogate,  illesi ledo qaalu gondooro eanno yaate.—Iyo. 31:1.

14. Minaamasi miicanno minaanni Yihowanna minaamasi ledo noosi jaalooma haaroonsiꞌrate maa maa assa hasiissannosi?

¹⁴ Minaamasi ganannohu woy xonamanno minaanni, Yihowanna minaamasi ledo noosi jaalooma haaroonsiꞌrate woluri assa hasiissannori no. Isi maa maa assa hasiissannosi? Umihunni, loosino coyi lowo geya busha ikkinota ammane adha hasiissannosi. Yihowa illera goꞌlannohu mittu coyino dino. (Far. 44:21; Ros. 12:14; Ibi. 4:13) Layinkihunni, minaamasi miica aguranna akatasi biddi assiꞌra hasiissannosi. (Law. 28:13) Sayikkihunni, minaamasinna Yihowa maaro xaꞌmiꞌra hasiissannosi. (Soq. 3:19) Qoleno soorrame biddi yaate hasatto heedhannosi gede hattono hedosi, coyiꞌrannorenna assootesi eemadhanno gede kaaꞌlasira Yihowa eeggifate huucciꞌra hasiissannosi. (Far. 51:10-12; 2 Qor. 10:5; Fil. 2:13) Shoolkihunni, baalunku gari finqillenna xono giwa rose huuccattosi ledo sumuu yaannore assa hasiissannosi. (Far. 97:10) Ontihunni, bayichonkonni songote cimeeyye kaaꞌlo xaꞌmiꞌra hasiissannosi. (Yai. 5:14-16) Leekkihunni, albillitte togoo coye assannokki gede mixo fushshiꞌra hasiissannosi. Teeda baꞌino misilla laꞌꞌanno minaannino konne leenka coye assa hasiissannosi. Assootesi biddi assiꞌrate assannore Yihowa maassiꞌranno. (Far. 37:5) Kayinni mittu minaanni minaamasira ayirrinye xeinore assa qoropha calla diguddanno. Isi minaamasi ayirrisa rosa hasiissannosi. Tenne assa dandaannohu hiittoonniiti?

MINAAMAKKI AYIRRISA DANDAATTO GARA

15. Minaanni minaamasi baxannota leellisha dandaannohu hiittoonniiti?

¹⁵ Minaamuwaꞌne baxxinannita leellishshe. Adhamansa hagiirru noota assidhinori mitu minaannuwi, minaamuwansa baxxannota leellishate barru baala mitore assitanno. (1 Yoh. 3:18) Mittu minaanni shiimare asse minaamasi baxannota leellishara dandaanno; lawishshaho isi angase amadara woy rimmi asse hanqafasera dandaanno. Isi sokka borreesse “qalli  assoottae” yaasera woy “Keere hosoottae?” yaasera dandaanno. Mito woyite kayinni sokka borreesse lowo geeshsha baxannoseta kulasera dandaanno. Minaanni kuri coyibba assannoha ikkiro, minaamasi ayirrisanno hattono adhamansa kaajjitanno.

16. Mittu minaanni minaamasi galata hasiissannosihu mayiraati?

¹⁶ Minaamuwaꞌne galatte. Minaamasi ayirrisanno minaanni ise dhaawanno hattono jawaachishanno. Isi tenne assannoti mitte doogo, iso kaaꞌlate assitinore qaage galatate. (Qol. 3:15) Minaanni minaamasi godowinta galatannoha ikkiro tashshi yaannose. Wodanaaꞌmitanno hattono baxannoenna ayirrisannoe yite heddanno.—Law. 31:28.

17. Minaanni minaamasi ayirrisannota leellisha dandaannohu hiittoonniiti?

¹⁷ Minaamuwiꞌnera shaqqille leellishshensa; hattono ayirrissensa. Minaamasi baxanno minanni ise naadannose hattono lowo geya ayirrisannose. Ise Yihowa uyinosite muxxe elto gede asse laꞌꞌanno. (Law. 18:22; 31:10) Tini siimu xaadooshshi yannara nafa, shaqqille leellishannosenna ayirrisannose gede assitanno. Siimu xaadooshshi yannara, ise gibbannore, shollishannosere woy tiiase xursiisannore assitanno gede dixixxiiwannose. f Isino Yihowa albaanni keeraanchu tiiꞌꞌi heeꞌrannosi gede assiꞌrate sharramanno.—Soq. 24:16.

18. Minaannuwu maa assate murciꞌra hasiissannonsa? (“ Minaamasi Ayirrisanno Minaanni Assannoha Shoole Coye” yitanno saaxineno lai.)

¹⁸ Minaannuwa, baalante doogganni minaamuwaꞌne ayirrisate assitinannire Yihowa laꞌꞌannotanna naadannota addaxxa dandiitinanni. Minaamuwiꞌnera ayirrinye xeinore assa qorophitine hattono shaqqillenna baxille leellishshine insa ayirrisate murcidhe. Hatto assitinanniha ikkiro, minaamuwaꞌne baxxinanninsatanna ayirrissinanninsata leellishshinanni. Minaamuwaꞌne ayirrissine wolu baalunkunni roore Yihowa ledo nooꞌne jaaloomi baꞌꞌannokki gede assiꞌra dandiitinanni.—Far. 25:14.