1. Diru kiiro ayirrinsanniha Kiristoosi reyo Qaagooshshi Ayyaana haꞌra kaaꞌlitannonkehu hiittoonniiti?

 WODO taalle nookki eltooti yiniro sumuu yaattoti dihuluullissannote! (2 Qor. 9:15) Yesuusi heeshshosi kakkalo asse shiqishino daafira, Yihowa ledo muli jaalooma kalaqiꞌra dandaatto. Qoleno hegere heeshsho hexxo afiꞌra dandaatto. Wodote kakkaloranna baxillunni kae tenne kakkalo qixxeessinonkehu Yihowara galatu noonketa leellisha garankolla! (Rom. 5:8) Woꞌmanka woyite galatu noonketa leellinsheemmo gedenna wodote kakkalo mulluri gede assine laꞌneemmokki gede kaaꞌlate Yesuusi diru kiiro ayirrinsanniha reyosi Qaagooshshi Ayyaana xintino.—Luq. 22:19, 20.

2. Konni birxichira maa xiinxallineemmo?

² Tayixeha Qaagooshshu Ayyaana ayirrinsannihu Qidaame, Dotteessa 12, 2025. Konne ayyaana ayirrisate baalunku qixxaambanni heeꞌnoommoti dihuluullissannote. Qaagooshshu Ayyaani woggara, Yihowanna Beettisi assitinonkere yanna gaaꞌmine hiinca a lowo geeshsha kaaꞌlitannonke. Konni birxichira, wodote kakkalonni Yihowanna Beettisi daafira maa ronseemmoro xiinxallineemmo. Aananno birxichira kayinni, wodote kakkalo kaaꞌlitannonkehu hiittoonniitironna tenne kakkalora galatu noonketa leellisha dandiineemmohu ma garinniitiro xiinxallineemmo.

WODOTENNI YIHOWA DAAFIRA MAA RONSEEMMO?

3. Mittu manchi reyo lowo miliyoone ikkanno manna gatissannohu hiittoonniiti? (Misileno lai.)

³ Wodotenni Yihowa taashsho baxanno Magano ikkinota ronseemmo. (Mar. 32:4) Hiittoonni? Hanni tenne hedi: Addaami  hajajama giwino daafira isiwiinni cubbonna reyo ragiꞌnoommo. (Rom. 5:12) Konni cubbinna reyotenni keere fulleemmo gede wodo ikkankera Yihowa Yesuusa soyino. Ikkollana mittu guutu manchi kakkalo lowo miliyoone ikkanno manna gatisa dandiitannohu hiittoonniiti? Soqqamaasinchu Phaawuloosi togo yee xawisino: “Mittu manchi [Addaami] hajajama giweenna lowo manni cubbaataamma ikkinte gede, mittu manchi [Yesuusi] hajajama lowo manna keeraano assitanno.” (Rom. 5:19; 1 Xim. 2:6) Togo yaa guuta ikkinohu mittu manchi hajajama giwe cubbunna reyote borojje ikkineemmo gede assinonke yaate. Hakko daafira cubbunna reyotenni keere fushshannonkehu mittu guutu manchi hasiisanno.

4. Yihowa isira hajajamannohu Addaami sircho ikkino manni wodo baantikkinni hegere heeshsho afiꞌranno gede fajjinokkihu mayiraati?

⁴ Yesuusi ninke gatisate reya hasiissannosi? Yihowa isira hajajamannohu Addaami sircho ikkino manni wodo baantikkinni hegere heeshsho afiꞌranno gede assa didandaanno? Guuta ikkinokki mannira tini shaqqillenna quwa saꞌꞌa hooga labbara dandiitanno. Kayinni tini Yihowa taalo yoo yaannoha ikkinota dileellishshanno. Yihowa taashsho baxanno Magano ikkino daafira, Addaami afanni heeꞌrenni hajajama giwe assinore lashshi asse diaguranno.

5. Yihowa woꞌmanka woyite gara ikkinore assannota addaxxa dandiineemmohu mayiraati?

⁵ Kayinni Yihowa taashsho agure wodo qixxeessikkinni guuta ikkitinokkiri Addaami ooso hegere heeshsho afidhanno gede assinohalla ikki? Hatto ikkiro mannu Maganu taashsha hasiissannosiha wole coyeno agurara dandaanno yee huluullamara dandaanno. Lawishshaho isi einoha mito qaale wonshikki agura ikka? Wonsha hoogara dandaanno yine yaada dihasiissannonke. Yihowa lowo waaga baata hasiissannosiha ikkiro nafa muxxe Beettosi kakkalo asse shiqishe woꞌmanka woyite gara ikkinore assannoha ikkasi buuxisinonke.

6. Wodo Yihowa baxille leellishshannoti mitte doogo hiittenneeti? (1 Yohaannisi 4:9, 10)

⁶ Wodo Yihowa taashsho baxannoha ikkinota huwanteemmo gede kaaꞌlitannonkeha ikkirono, roorenkanni isi baxilli mageeshshi geeshsha lowoha ikkinoro huwanteemmo gede kaaꞌlitannonke. (Yoh. 3:16; 1 Yohaannisi 4:9, 10 nabbawi.) Wodo, Yihowa hegere heeshsho afiꞌnammora calla ikkikkinni isi maate wido ikkinammora hasiꞌrannotano leellishshanno. Hanni tenne hedi: Addaami cubbo loosita Yihowa iso magansidhanno maatesi wido ikkannokki gede assino. Hakko daafira ninke baalunku ilammummo woyite Maganu maate wido diꞌꞌikkinoommo. Kayinni  wodote kakkalo widoonni, Yihowa cubbonke gatona yaanno; hattono ammana noonsata leellishannohunna hajajamanno manni baalu jeefote maatesi wido ikkanno gede assanno. Xa nafa Yihowanna ammanate roduuwinke ledo dancha jaalooma kalaqiꞌra dandiineemmo. Addanko, Yihowa lubbora baxannonke!—Rom. 5:10, 11.

7. Yesuusira iillino qarri Yihowa mageeshshi geeshsha baxannonkero huwanteemmo gede kaaꞌlannonkehu hiittoonniiti?

⁷ Yihowa wodo qixxeessate mageeshshi waaga baatinoro hiincineemmoha ikkiro, isi mageeshshi geeshsha baxannonkero albinni roore huwanteemmo. Sheexaanu Maganu soqqamaano giddo qarru iillannosi woyite isira ammaname heeꞌrannohu dino yiino. Sheexaanu yiinori kapho ikkinota leellishate Yihowa Yesuusi qarrame reyara fajjino. (Iyo. 2:1-5; 1 Phe. 2:21) Yihowa, Yesuusa gibbannosiri ammaꞌnote massagaano qacifattannasi, olanto gantannasinna haqqaho qolte misimaaretenni gante suttannasi laino. Hakkiinni Yihowa muxxe Beettisi kaaꞌlannohu nookkiha qarrame reyanna laino. (Mat. 27:28-31, 39) Yihowara, kuni baalunku qarri Yesuusira iillannosikki gede assate wolqa noosi. Lawishshaho Yesuusa gibbannosiri, “Baxannosiha ikkiro [Maganu] hanni xa gatisosi” yitu yannara gatisasira dandaanno. (Mat. 27:42, 43) Kayinni Yihowa hatto assoommero wodo diheedhanno; hattono mulla hexxo noonkekkiha ganteemmo. Hakko daafira Yihowa Beettisi jeefote reya geeshsha qarramanno gede fajjino.

8. Yihowa Beettisi qarramanna lai woyite xissiisiꞌrino? Xawisi. (Misileno lai.)

⁸ Maganu woꞌmanka dandaannoha ikkino daafira calla didadillannoho yine heda dihasiissannonke! Ninke kalaqammoommohu isi daninniiti; konnira dadillano hagiidhano dandiineemmo; hakko daafira Yihowa hagiidhano dadillano dandaanno yee heda garaho. Qullaawu Maxaafi Yihowa Israeele hajajama gibbusita ‘dadillinotanna aaraawinota’ kulanno. (Far. 78:40, 41) Hanni Abirihaaminna Yisihaaqi lawishshano laꞌno. Abirihaami afiꞌrinoha mitto beettosi kakkalo asse shiqishanno gede hajanjoonnisita qaangeemmo. (Kal. 22:9-12; Ibi. 11:17-19) Abirihaami beettosi Yisihaaqi gorrate qixxaawi woyite mageeshshi geeshsha xissiisiꞌrinoro heda dandiineemmo. Yihowa maganiweelu manni Beettosi beebba assiꞌre shaanna lai woyite mageeshshi geeshsha xissiisiꞌrinoro hanni hedi!—JW.ORG aana noota Ammanatenni Insa Faale Hadhe—Abirihaami, Gafa 2 yitanno viidiyo lai.

9. Rooma 8:32, 38, 39 Yihowa atenna ammanate roduuwakki lowo geeshsha baxannota huwatatto gede kaaꞌlitannohehu hiittoonniiti?

⁹ Wodo Yihowa geeshsha baxannonkehu nookkita leellishshanno; muli fiixinke woy  muxxe jaalinke nafa Yihowa geeshsha baxankera didandaanno. (Rooma 8:32, 38, 39 nabbawi.) Yihowa ninke umonke banxeemmohunni roorse baxannonketi dihuluullissannote. Hegerera heeꞌra hasiꞌratto? Ati hasiꞌrattohunni roore Yihowa hegerera heeꞌrattora hasiꞌranno. Cubbokki gatona yinahera hasiꞌratto? Yihowa ati hasiꞌrattohunni roore cubbokki gatona yaa hasiꞌranno. Isi, ammana noonketa leellinshenna hajajamme isi aanno elto afiꞌnammora hasiꞌranno. Wodo Yihowa lowo geeshsha baxannonketa leellishshannote muxxe eltooti. Qoleno haaro alamera Yihowa baxilli daafira lowore ronseemmo.—Ros. 3:11.

WODOTENNI YESUUSI DAAFIRA MAA RONSEEMMO?

10. (a) Yesuusi reyosi lainohunni roore dadillinohu mayiraati? (b) Yesuusi Yihowa suꞌmi qullaawanno gede assinohu ma garinniiti? (“ Yesuusi Minshe Nookkiha Ikke Yihowa Suꞌmi Qullaawanno Gede Assino” yitanno saaxineno lai.)

¹⁰ Yesuusi lowo geeshsha yaadinohu Annisi suꞌmi daafiraati. (Yoh. 14:31) Yesuusa, Maganu suꞌma xonnanni gede assino yine kassansoonnisi daafira, isi Anniꞌya suꞌmi mishamanno yee yaadino. Isi “Annaꞌya dandaamannoha ikkiro kuni finiinchi anewiinni saona” yee huucciꞌrinohu iseraati. (Mat. 26:39) Yesuusi reyote geeshsha minshe nookkiha ikke Annisi suꞌmi woꞌmunni woꞌma qullaawanno gede assino.

11. Yesuusi manna lowo geeshsha baxannota leellishinohu hiittoonniiti? (Yohaannisi 13:1)

¹¹ Wodo Yesuusi mannaho roorenkanni rosaanosira lowo geeshsha hedannota leellishshanno. (Law. 8:31; Yohaannisi 13:1 nabbawi.) Lawishshaho Yesuusi uullate aana soqqami yannara lowo qarri iillannosita roorenkanni qarrame reyannota afino. Ikkirono isi uullate aana uyinoonnisi looso loosi  yannara konne looso loosinohu Yihowa hajajinosi daafira calla ikkikkinni mannano baxanno daafiraati. Yesuusi woꞌmu wodanisinni sabbakino, rosiisino hattono wolootaho soqqamino. Isi reyi barra nafa soqqamaasinesi lekka hayishshino; hattono sheshifachishshannota lowo amaalenna biddishsha uyinonsa. (Yoh. 13:12-15) Hakkiinni isi qarru haqqi aana sutame heeꞌre, reyara kae noohu jaddo loosino manchira hexxo uyino; hattono amasi towatanno gede Yohaannisira hadara uyino. (Luq. 23:42, 43; Yoh. 19:26, 27) Hakko daafira, Yesuusi manna lubbora baxannota leellishinohu insa daafira reye calla ikkikkinni uullate aana heeꞌrino heeshsho baalatenniiti.

12. Yesuusi xaa geeshsha ninke kaaꞌlanni noohu hiittoonniiti?

¹² Yesuusi ninkera yee “mitte hige higge higgannokki” reyo reyino; ikkirono xaa geeshsha lowore assanni noonke. (Rom. 6:10) Hiittoonni? Isi wodote kakkalo widoonni xaa yannara batinye dancha coye afiꞌneemmo gede loosanni no. Hanni isi maa assanni nooro laꞌno. Isi Mootenke, Kakkalaanote Biilonna songote umo ikke soqqamanni no. (1 Qor. 15:25; Efe. 5:23; Ibi. 2:17) Hattono buurantinorenna lowo daga gamba assanni no; isi konne looso gudannohu quuxxote qarri gumulamara albaanniiti. b (Mat. 25:32; Maq. 13:27) Qoleno isi tenne goofimarchu barruwa giddo ammanantino soqqamaanosi ayyaanaamittetenni dancha gede sagaꞌlitanno gede assanni no. (Mat. 24:45) Kumu Diri Gashshootisi yannarano ninkera hasiisannore wonshate soqqamanno. Addanko Yihowa Beettosi ninkera uyino!

ROSA AGURTINOONTE

13. Hiinca Maganunna Kiristoosi leellishshinohe baxilli daafira rosa agurattokki gede kaaꞌlitannohehu hiittoonniiti?

¹³ Maganu Yihowanna Kiristoosi Yesuusi leellishshinohe baxilli daafira woꞌmanka woyite hiincattoha ikkiro konni baxilli daafira woꞌmanka woyite rosa dandaatto. Tayixehu Qaagooshshu Ayyaani woggara mito Wongeella seekkite nabbawa dandaatto. Mitte higge lowo fooliishsho nabbabbe gudate woꞌnaaltooti. Hatteentenni sunu sununni nabbawi hattono Yihowanna Yesuusa banxeemmo gede assannonkeha wole korkaata  ledde afate woꞌnaali. Qoleno nabbabbe afiꞌroottore wolootaho kuli.

14. Faarso 119:97 kultanno garinni, seekkine xiinxallanke wodotenna wole hajo daafira rosa agurreemmokki gede kaaꞌlitannonkehu hiittoonniiti? (Misileno lai.)

¹⁴ Lowo diro halaalu mine keeshshoottoha ikkiro, rosantino hajo daafira lawishshaho Maganu taashsho, baxillisinna wodote daafira ronsanniri haaruri heeꞌra ikka? yite hedattoha ikkara dandaanno. Noore coyiꞌniro kurinna wole hajo daafira ronse digundeemmo. Ikkina ma assa dandaatto? Borruwanke giddo noota batinye mashalaqqe seekkite xiinxalli. Qullaawa Maxaafa nabbabbanna leellinohekkiri heeꞌriro borruwanke horoonsidhe xiinxalli. Hakkiinni xiinxalloottorinni Yihowa, Beettisinna insa leellishshinohe baxilli daafira maa rosoottoro barra woꞌma hiinci.—Faarso 119:97 nabbawi.

15. Qullaawu Maxaafi giddonni muxxe jiro agurrummokkinni hasiꞌra hasiissannonkehu mayiraati?

¹⁵ Nabbawatto woyite woy xiinxallatto woyite haarore woy dhagge ikkanno roso afiꞌra hoogittoro hexxo mudhitooti. Hanni ateneeto culka hasiꞌranno manchi gede assite hedi. Culka hasiꞌranno manchi shiima culka afiꞌrate nafa lowo saate woy lowo barra cince hasiꞌra hasiissannosi. Ikkirono shiimmaaddu culki nafa lowo waaga afiꞌrino daafira hexxo mudhe hasiꞌra diaguranno. Qullaawu Maxaafi giddo noo jiro culka lowo geeshsha roortanno! (Far. 119:127; Law. 8:10) Hakko daafira cincattoha ikki hattono Qullaawa Maxaafa xiinxallate fushshiꞌrootto pirogiraame seekkite haꞌrunsi.—Far. 1:2.

16. Yihowanna Yesuusi lawishsha haꞌrunsa dandiineemmohu hiittoonniiti?

¹⁶ Xiinxallatto woyite rosoottore loosu aana hosiisatto faro hasiꞌri. Lawishshaho manna mallaada qorophite Yihowa gede taashsho baxattoha ikka dandaatto. Yesuusi Annasinna woloota baxannota leellishino; atino Yihowa suꞌmira qarra adhate maahoyye yitenna ammanate roduuwakki kaaꞌlite Yesuusi lawishsha haꞌrunsa dandaatto. Qoleno wolootaho farciꞌrate Yesuusi lawishsha harunsi; hatto assittoro insano Yihowata muxxe elto afidhanno.

17. Aananno birxichira maa ronseemmo?

¹⁷ Wodote daafira roore huwanteemmohanna wodo albinni roore naandeemmoha ikkiro Yihowaranna Beettisira noonke baxilli lexxanni haꞌranno. Insano ninke albinni roore baxxannonke. (Yoh. 14:21; Yai. 4:8) Hakko daafira Yihowa qixxeessinonke qixxaawo horoonsiꞌne wodote daafira rosa agurroonke. Aananno birxichira wodo kaaꞌlitannonketa mite doogganna Yihowa baxillira galatu noonketa leellisha dandiineemmo gara ronseemmo.