XIINXALLOTE BIRXICHO 5
FAARSO 108 Baꞌꞌannokkiha Maganu Baxille
Yihowa Baxilli Kaaꞌlannonke Gara
“Yesuusi Kiristoosi cubbaataamma gatisara yee tenne gobba [alame] dayino.”—1 XIM. 1:15.
GUULCHO HEDO
Wodo kaaꞌlitannonkehu hiittoonniitironna Yihowara galatu noonketa leellisha dandiineemmo gara ronseemmo.
1. Yihowa hagiirsiisate maa assa dandiineemmo?
HANNI baxatto manchira biifadonna kaaꞌlannosiha mitto baxxino coye oottosi yine hendo. Kuni manchi hakkoye coye mullawa worinotanna horo hawinota afittoro lowo geeshsha dadillatto! Kayinni kuni manchi oottosire dancha gede horoonsiꞌrironna galatu noosita leellishiro hagiidhattoti dihuluullissannote. Tennenni maa ronseemmo? Yihowa Beettosi ninkera yee uyino. Yihowa tenne muxxe eltoranna wodo qixxeessanno gede kakkayisinosi baxillira galatu noonketa leellinsheemmo woyite lowo geeshsha hagiidhanno!—Yoh. 3:16; Rom. 5:7, 8.
2. Konni birxichira maa ronseemmo?
2 Ikkirono galle honse wodo mulluri gede assine laꞌꞌa hananfammora dandiineemmo. Hatto assa Maganu uyinonke elto mullawa worre agurate gedeeti. Tenne elto afiꞌnoommo daafira hagiidhinoommo; kayinni horonta hambammora dandiineemmo. Togoori ikkannokki gede, ganyine Maganunna Kiristoosi assitinonkerira galatu noonketa leellisha hasiissannonke. Kuni birxichi tenne assineemmo gede kaaꞌlannonke. Hattono wodo xaa yannaranna albillitte kaaꞌlitannonke gara ronseemmo. Qoleno, roorenkanni tenne Qaagooshshu Ayyaani yannara Yihowa baxillira galatu noonketa leellisha dandiineemmo gara ronseemmo.
WODO XAA YANNARA KAAꞌLITANNONKE GARA
3. Wodo xaa yannara kaaꞌlitannonketi mitte doogo hiittenneeti?
3 Xaa yannara nafa Kiristoositi wodote kakkalo kaaꞌlitanni noonke. Lawishshaho, Yihowa wodo kaima assiꞌre cubbonke gatona yaanno. Isira cubbonke gatona yaate giddeeti dinosi. Kayinni isi hatto assa hasiꞌranno. Faarsaasinchu galatu noosita leellishanni, “Ati shaqqadohonna cubbono agurattoho” yiino.—Far. 86:5; 103:3, 10-13.
4. Yihowa wodo qixxeessinohu ayeooraati? (Luqaasi 5:32; 1 Ximootewoosi 1:15)
4 Mitootu Yihowa maaro afiꞌrate ikkado diꞌꞌikkoommo yite hedannoha ikkara dandaanno. Noore coyiꞌniro ninke baalunku Yihowa maaro afiꞌrate ikkadda diꞌꞌikkinoommo. Soqqamaasinchu Phaawuloosi tenne huwatino daafira, “Soqqamaasincho ikke woshshama dihasiissannoeho” yiino. Ikkirono isi lede “Maganu eltonni xa noommo gedeeha ikkoommo” yiino. (1 Qor. 15:9, 10) Loonsoommo cubbira maaro eꞌnummoro Yihowa gatona yaannonke. Mayira? Ninke tennera ikkadda ikkinoommo daafira ikkikkinni isi baxannonke daafiraati. Ditidhoommoho yite hedattoha ikkiro, Yihowa wodo qixxeessinohu cubbu noonsakki mannira ikkikkinni cubbo loosse maaro eꞌannorira ikkinota qaagi.—Luqaasi 5:32; 1 Ximootewoosi 1:15 nabbawi.
5. Ninke giddo ani Yihowa maaro afiꞌrate ikkadoho yee hedannohu no? Xawisi.
5 Yihowara lowo diro soqqammanni keeshshinoommoha ikkiro nafa ninke giddo mittuno ani Yihowa maaro afiꞌrate ikkadoho yee heda dihasiissannosi. Yihowa isira ammanamme assinoommore naadannoti dihuluullissannote. (Ibi. 6:10) Isi Beettosi uyinonkehu elto asseeti ikkinnina isira soqqamate assinoommorira waaga baatate diꞌꞌikkino. Assinoommorira Yihowa maaro afiꞌrate ninke ikkaddaho yine hendeemmoha ikkiro, Kiristoosi reyo waaga diafidhino yinanni heeꞌnoommohu gedeeti.—Galaatiya 2:21 ledo heewisiisi.
6. Phaawuloosi Yihowara diinaggaawe soqqaminohu mayiraati?
6 Phaawuloosi Yihowara soqqamate lowore assinoha ikkirono,Yihowa maaro afiꞌranno gede assitannositi tenne ikkitinokkita afino. Ikkina isi Yihowara diinaggaawe soqqaminohu mayiraatiyya? Yihowa maaro afiꞌrate ikkado ikkasi leellishate ikkikkinni Yihowa leellishinosi shaqqillira galatu noosita leellishateeti. (Efe. 3:7) Ninkeno Phaawuloosi gede Yihowara diinaggaambe soqqammeemmohu Yihowa maaro afiꞌrate ikkadda ikkinoommota leellishate ikkikkinni galatu noonketa leellishateeti.
7. Xaa yannara wodo kaaꞌlitannonketi wole doogo hiittenneeti? (Rooma 5:1; Yaiqoobi 2:23)
7 Xaa yannara wodo kaaꞌlitannonketi wole doogo Yihowa ledo muli jaalooma kalaqiꞌneemmo gede assate. a Sai birxichira qummi assininte gede ilammummo woyite Maganu jaalla ikkine diꞌꞌilammoommo. Kayinni wodote kakkalo noonke daafira “Maganu ledo keere [heeꞌranna]” isiwa shiqa dandiineemmo.—Rooma 5:1; Yaiqoobi 2:23 nabbawi.
8. Huuccattote qoossora Yihowa galata hasiissannonkehu mayiraati?
8 Hanni Yihowa ledo jaalooma kalaqiꞌnoommo daafira afiꞌnoommota mitte horo yaano huuccattote qoosso daafira laꞌno. Yihowa mannisi huuccatto macciishshannohu mannisi mitteenni gamba yee huucciꞌranno woyite calla ikkikkinni, insa mittu mittunku huuccidhanno huuccattono macciishshanno. Huuccatto wodanaaꞌmineemmonna giddoyidi keere afiꞌneemmo gede assitannonke; kayinni huuccatto kaaꞌlitannonkehu konni garinni calla diꞌꞌikkino. Huuccatto Maganu ledo noonke jaaloomi kaajjanno gede assitanno. (Far. 65:2; Yai. 4:8; 1 Yoh. 5:14) Yesuusi uullate aana noo yannara Yihowa huuccattosi macciishshanni nootanna tini huuccatto Annisi ledo noosi jaaloomi kaajjanno gede assitannota afino daafira duucha hige huucciꞌrino. (Luq. 5:16) Yihowa jaalla ikkanna huuccattotenni iso hasaawisa dandiinoommo daafira Yihowa galaxxineemmosi!
WODO ALBILLITTE KAAꞌLITANNONKE GARA
9. Wodo ammanantinore Yihowa soqqamaano albillitte kaaꞌlitannonsahu hiittoonniiti?
9 Wodo ammanantinore Yihowa soqqamaano albillitte kaaꞌlitannonsahu hiittoonniiti? Yihowa insara hegere heeshsho aannonsa. Lowo kume diro mannu reyanni keeshshino daafira, batinyu manni kuni ikkannokkireeti yee hedanno. Kayinni Yihowa umo manna kalaqinohu hegerera heeꞌraraati. Addaami cubbo loosa hoogoommero, aye manchino hegerera heeꞌra ikkannokkireeti yee dihedanno. Qoleno xaa yannara hegerera heeꞌra ikkannokki coye labburono, Yihowa tenne faro afiꞌneemmo gede muxxe Beettosi kakkalo asse oye lowo waaga baatino daafira, hegerera heeꞌra dandiineemmota dihuluullammeemmo.—Rom. 8:32.
10. Buuramino Kiristaaninna wolu geꞌreewi quqquxame agadhannori maati?
10 Hegere heeshsho albillitte afiꞌneemmo atoote ikkiturono, Yihowa xaa yannarano tenne hexxonke hendammora hasiꞌranno. Buurantinori iima Kiristoosi ledo uulla gashshitanno yanna quqquxante agadhitanno. (Aju. 20:6) Wolu geꞌreewi kayinni xissonna qarru nookkiha gannate ikkitino uulla aana heeꞌrate quqquxamanno. (Aju. 21:3, 4) Ati uullate aana gawalo nookki heeshsho heeꞌrate hexxo noonsahu wolu geꞌreewi widooti? Kuni baꞌraarshi mulla ninke sheshifachishate qixxeessinoonniha diꞌꞌikkino! Wonanni mannu ooso kalaqantinohu uullate aana heedharaati. Uullate aana hegerera heeꞌra lowo geeshsha hagiidhineemmo gede assitannonke.
11-12. Albillitte Gannatete afiꞌneemmohu mitu atooti hiikkonneeti? (Misillano lai.)
11 Hanni Gannate ikkitino uullara hiittoo heeshsho heeꞌrattoro hedi. Dhiwammeemmo woy reyineemmo yine diyaandeemmo. (Isa. 25:8; 33:24) Yihowa gara ikkitino hasattonke baala wonshanno. Hatte yannara maa rosa hasiꞌratto? Saadate daafira, muuziiqa godoꞌlinanni gara hattono misile kayinsanni gara rosa hasiꞌrattoha ikkara dandaanno. Hakkiicho akeeka fushshinanni gara, mine minnanni garanna baatto loonsanni gara afino manni hasiisannoti dihuluullissannote. Qoleno addi addi looso loosannohu, lawishshaho sagale qishannohu, addi addi uduunne seekkannohunna uulla biifisanno manni hasiisanno. (Isa. 35:1; 65:21) Albillitte hegerera heeꞌneemmo daafira hasiꞌnummo dandoo lossiꞌneemmo yanna heedhannonke.
12 Reyotenni kaꞌꞌannore anga fane haaꞌra lowo geya hagiirsiissanno! (Soq. 24:15) Hanni Yihowa kalaqinohu, batinyu kalaqami daafira xiinxalline isi daafira albinni roore rosa mageeshshi geeshsha hagiirsiissannorono hedi. (Far. 104:24; Isa. 11:9) Wolu baalunkunni roore kayinni horo ninkeneeto bushiinshummokkinni Yihowa magansiꞌra lowo geeshsha hagiirsiissanno! ‘Cubbunni afiꞌnannihunni yannate geeshshi hagiirrira’ yine konne baala atoote hooga hasiꞌneemmo? (Ibi. 11:25) Hasiꞌneemmokkiti egennantinote! Konne atoote afiꞌrate yine xaa yannara agurreemmohu aye coyino gaabbisannoha diꞌꞌikkino. Gannate ikkitino uullara heeꞌra hexxo calla ikkite gattannokkita qaagi. Muli yannara tini hexxo woꞌmitanno. Yihowa baxillunni, Beettosi aa hoogoommenkero konne atoote afiꞌra didandiineemmo!
Gannatete giddo roore hiikkonne atoote afiꞌrate quqquxamatto? (Gufo 11-12 lai)
YIHOWA BAXILLIRA GALATU NOOꞌNETA LEELLISHSHE
13. Yihowa baxillira galatu noonketa leellisha dandiineemmohu hiittoonniiti? (2 Qorontoosi 6:1)
13 Yihowa qixxeessinonke wodora galatu noonketa leellisha dandiineemmohu hiittoonniiti? Heeshshonke giddo isira soqqama balaxisiisatenniiti. (Mat. 6:33) Qoleno Yesuusi reyinohu “lubbote noori xaate uminsara heeꞌra agurte insara yee reyinohuranna reyotenni kainohura heedhanno [gedeeti].” (2 Qor. 5:15) Yihowa elto mullawa huna hasiꞌneemmokkiti egennantinote.—2 Qorontoosi 6:1 nabbawi.
14. Yihowa aannonke biddishsha addaxxineemmota leellisha dandiineemmohu hiittoonniiti?
14 Yihowa baxillira galatu noonketa leellinsheemmoti wole doogo isi aannonke biddishsha addaxxineemmota leellishate. Magarinni? Mitto coye doodhineemmo woyite, lawishshaho hiittoo roso ronseemmoro woy hiittoo looso loonseemmoro doodhineemmo woyite, Yihowa maa assinammora hasiꞌrannoro heda hasiissannonke. (1 Qor. 10:31; 2 Qor. 5:7) Ammananke loosunni leellinsheemmo woyite dhagge ikkanno coyi ikkanno; ammananke lexxitanno hattono Yihowa ledo noonke jaaloomi albinni roore kaajjanno. Hexxonkeno roore xabbe leeltanno.—Rom. 5:3-5; Yai. 2:21, 22.
15. Qaagooshshu Ayyaani woggara galatu noonketa leellisha dandiineemmohu hiittoonniiti?
15 Yihowa baxillira galatu noonketa leellisha dandiineemmoti wole doogono no. Tenne Qaagooshshu Ayyaani yannara Yihowa wodo qixxeessinonke daafira galatu noonketa leellisha dandiineemmo. Ninke uminke Qaagooshshu Ayyaana ayirrisate haꞌneemmotano agurranna, wolootuno dagganno gede koyisa dandiineemmo. (1 Xim. 2:4) Koyisatto mannira Qaagooshshu Ayyaana ayirrinsanni woyite maa maa assinanniro xawisse kulinsa. Qoleno jw.org aana noota Yesuusi Reyinohu Mayiraati? yitannotanna Yesuusi Reyo Qaagi yitanno viidiyo leellisha dandaatto. Songote cimeeyye ayyaanaamittetenni qiiddinore koyisa hasiissannonsa. Yihowa geꞌreewi giddonni ballekke bainori mitootu hoshshasiwa higganno woyite, iimano ikko uulla mageeshshi hagiirri ikkannoro hedi! (Luq. 15:4-7) Qaagooshshu Ayyaaniwa, egentinoonni roduuwa calla ikkikkinni roorenkanni haarote dagginore woy gambooshshe seeda yanna gedensaanni dagginore keere haaꞌrate mixo fushshidhe. Insa anga fanne haaꞌra hasiꞌneemmo!—Rom. 12:13.
16. Qaagooshshu Ayyaani woggara soqqanshonke halashshiꞌrate daafira heda hasiissannonkehu mayiraati?
16 Qaagooshshu Ayyaani woggara soqqanshokki halashshiꞌra dandaatto? Tenne assa Maganunna Kiristoosi assitinonkerira galatu noonketa leellinsheemmote kaajja doogooti. Soqqanshonke halashshiꞌnummo kiiro albinni roore Yihowa kaaꞌlannonketa huwanteemmo; tini qolte albinni roore iso addaxxineemmo gede kaaꞌlitannonke. (1 Qor. 3:9) Qoleno Qullaawu Maxaafire Barru Barrunku Hasaawa yitanno buukileete woy Kiristaanu Heeshshonna Soqqansho Gambooshshi Maxaafichora noo pirogiraame garinni Qaagooshshu Ayyaanita Qullaawu Maxaafi niwaawe nabbawi. Isinni tenne Qullaawu Maxaafi niwaawe xiinxallote pirojektera horoonsiꞌra dandaatto.
17. Yihowa hagiirsiisannori maati? (“ Yihowa Baxillira Galatu Noonketa Leellinsheemmo Doogga” yitanno saaxineno lai.)
17 Hige konni birxichira kulloonnire baala loosu aana hosiisate heeꞌnoommo gari fajjannonkekkiha ikkara dandaanno. Ikkirono Yihowa ati assattore wolootu assitannori ledo heewisiisannokkita qaagi; isi wodana laꞌꞌanno. Isi, uyinohete muxxe eltora yaano wodote galatu nooheta leellishshanna laꞌꞌanno woyite hagiidhanno.—1 Sam. 16:7; Maq. 12:41-44.
18. Magano Yihowanna Yesuusi Kiristoosa galata hasiissannonkehu mayiraati?
18 Cubbinkera maaro afiꞌnoommohu, Yihowa ledo jaalooma kalaqiꞌnoommohunna hegere heeshsho hexxo afiꞌnoommohu wodo baantoonninke daafira callaati. Yihowa konne atoote afiꞌneemmo faro fane leellishinonke baxillira woꞌmanka woyite galatu noonketa leellinsho. (1 Yoh. 4:19) Qoleno heeshshosi ninkera sayise aa geeshsha lubbora baxinonkeha Yesuusa galanteemmota leellinsho!—Yoh. 15:13.
FAARSO 154 Geedanno Baxille
