XIINXALLOTE BIRXICHO 3
FAARSO 35 ‘Roore Hasiisanno Coye Baddine Affe’
Yihowa Hagiirsiisanno Doorsha Doodhi
“Kaaliiqa waajja egennote umoho. Qullaawa Magano egennittoro wodancha afiˈratto.”—LAW. 9:10.
GUULCHO HEDO
Egenno, wodanchanna coye seekkine buuxa dancha doorsha doodhineemmo gede kaaꞌlitannonke gara ronseemmo.
1. Ninke baalunkura mayi tuncu yaannonke?
BARRU baala mito doorsha doodha hasiissannonke. Mitu doorshi doodhate hakkeya diqarrisannoho; lawishshaho, afoo seekkiꞌrate maa inteemmoro woy meꞌꞌe saatenni gonxeemmoro doodha qarra diꞌꞌikkitannonke. Mitu coyi kayinni doodhate qarrisannoho. Doodhineemmohu mitu doorshi fayyimmanke, hagiirrinke, banxeemmo manni ledo woy magansiꞌranke ledo xaadooshshe afiꞌrinoha ikkara dandaanno. Doodhineemmo doorshi ninkeno maatenkeno kaaꞌlannoha ikkara hasiꞌneemmo. Baalunkunni roore doodhineemmo doorshi Yihowa hagiirsiisara hasiꞌneemmo.—Rom. 12:1, 2.
2. Dancha doorsha doodhate maa maa assa dandaatto?
2 Dancha doorsha doodhate (1) woꞌma taje afiꞌra, (2) hatte hajo daafira Yihowa hedo maatiro wodanchanna (3) noohe doorsha keente laꞌꞌa hasiissannohe. Konni birxichira kuri sasunku coyi daafira xiinxallineemmo hattono wodanchate dandoonke qajeelsiꞌra dandiineemmohu hiittoonniitiro huwanteemmo.—Law. 2:11.
WOꞌMA TAJE AFIꞌRI
3. Mitto doorsha doodhattora albaanni, woꞌma taje afiꞌra hasiissannohehu mayiraatiro leellishanno lawishsha kuli.
3 Dancha coye doodhate kaaꞌlannonkehu umi coyi woꞌma taje afiꞌrate. Tini hasiissannota ikkitinohu mayiraati? Hanni mittu manchi amadinosihu buutote dhibbi daafira, akimichaho kulino yine hendo. Akimichu konne mancho amadino dhibbi maatiro afikki woy iso mite xaꞌmo xaꞌmikkinni isira xagicho aate kaꞌꞌannoni? Hatto diassanno. Atino doodhatto doorshi daafira balaxxe woꞌma taje afiꞌrittoro, dancha doorsha doodha dandaatto. Hatto assa dandaattohu hiittoonniiti?
4. Lawishsha 18:13 kultanno garinni, woꞌma taje afiꞌra dandaattohu hiittoonniiti? (Misileno lai.)
4 Xaꞌmo xaꞌmattoha ikkiro duucha woyite woꞌma taje afiꞌra dandaatto. Hanni mannu gamba yee boohaarannowa koyinsoonnihe yine hendo. Konni koyishshira haꞌra hasiissannohe? Koyisinohe mancho egennoottokkiha woy hakko maa qixxeessinanniro afoottokkiha ikkiro, iso aante noo xaꞌmuwa xaꞌma hasiissannohe: “Gamba yinannihu mamaatinna mamooteeti? Mageeshshi manni gamba yaanno? Konne koyishsha qineessannohu ayeti? Gamba yitannori ayeooti? Hakko maa maa assinanni? Agu heeꞌranno?” Kuri xaꞌmuwara dawaro afiꞌrakki dancha doorsha doodhatto gede kaaꞌlitannohe.—Lawishsha 18:13 nabbawi.
Xaꞌmo xaꞌmite woꞌma taje afiꞌri (Gufo 4 lai) a
5. Woꞌma taje afiꞌrittohu gedensaanni maa assa hasiissannohe?
5 Woꞌma mashalaqqe afiꞌrittohu gedensaanni baalanka coye huwatate seekkite hedi. Lawishshaho, gamba yaanno manni giddo mitu Qullaawu Maxaafiha xintu seera ayirrisannokkiha ikkinota woy mannu ago quwa sayise agannota hoollannikkitalla afitto? Hakkiicho mannu akkimala gede ikkara dandaannota hedootto? (1 Phe. 4:3) Woy konni koyishshira koyinsoonnihe yanna gambooshshe haꞌratto yanna ledo woy soqqansho fulatto yanna ledo mittella ikkitu? Baalanka coye seekkite hedattoha ikkiro dancha doorsha doodha dandaatto. Kayinni assa hasiissannohehu wolu coyino no. Tenne hajo daafira atera noohe hedo afootto; kayinni Yihowara mayi macciishshamannosi?—Law. 2:6.
YIHOWA HEDO MAATIRO WODANCHI
6. Yaiqoobi 1:5 kultanno garinni Yihowa kaaꞌlo afiꞌrate huuccatto assiꞌra hasiissannonkehu mayiraati?
6 Yihowa isi hedo afatto gede kaaꞌlahera huucciꞌri. Yihowa iso hagiirsiisanno doorsha doodhineemmo gede kaaꞌlitannonke hayyo aankera qaale eino. Isi togoo hayyo “ayeno mishikkinni baalunkura [elanno].”—Yaiqoobi 1:5 nabbawi.
7. Yihowa hedo afa dandaattohu hiittoonniiti? Lawishsha kuli.
7 Yihowa biddishsha afiꞌrate huuccatto assiꞌrittohu gedensaanni, isi qolannohe dawaro seekkite illachishi. Lawishshaho, doogo hadhanni heedhe raga habbe hakko qooxeessira heeꞌranno mancho xaꞌmitto. Kayinni manchu tenne teꞌenne yiihekkinni agurte haꞌrattoni? Haꞌrattokkiti egennantinote. Isi kulannohere seekkite macciishshatto. Hatteente gede hayyo afiꞌrate Yihowa huucciꞌrittohu gedensaanni, atera kaaꞌlannoha Qullaawu Maxaafi seeranna xintu seera hasidhe, isi qolannohe dawaro wodanchate woꞌnaali. Lawishshaho, aleenni qummi assini boohaarsha haꞌrattoronna teꞌee doodhatto woyite, Qullaawu Maxaafi akkimala gede ikkate daafira, bushu jaaloomi daafiranna uminke hasattonni roore Maganu Gashshoote balaxisiisate daafira mayyaannoro heda dandaatto.—Mat. 6:33; Rom. 13:13; 1 Qor. 15:33.
8. Hasiissannohe mashalaqqe afiꞌrate kaaꞌlo hasiissuhero ma assa dandaatto? (Misileno lai.)
8 Ikkirono mito woyite mashalaqqe afiꞌrate kaaꞌlo hasiissannonkeha ikkara dandaanno. Togoo woyite woꞌnaalshu noonsa roduuwa amaaꞌla dandaatto. Ikkirono, umikkinni xiinxallano kaaꞌlitannohe. Xiinxallate kaaꞌlanno uduunninke giddo, lawishshaho, Yihowa Farciꞌraasinete Xiinxallote Kaaꞌlitanno Borro hattono Kiristaanu Heeshshora Kaaꞌlitanno Qummeeshshuwa yitanno borro giddo lowo mashalaqqe afiꞌra dandaatto. Mixokki Yihowa hagiirsiisanno doorsha doodha ikkitinota qaagi.
Yihowa hedo maatiro wodanchate woꞌnaali (Gufo 8 lai) b
9. Doodhineemmo doorshi Yihowa hagiirsiisannoronna teꞌee afa dandiineemmohu hiittoonniiti? (Efessooni 5:17)
9 Doodhineemmo doorshi Yihowa hagiirsiisannoronna teꞌee afa dandiineemmohu hiittoonniiti? Balanxe Yihowa seekkine afa hasiissannonke. Qullaawu Maxaafi, “Qullaawa Magano egennittoro wodancha afiˈratto” yaanno. (Law. 9:10) Addanko, Yihowa akatta, isi assara hedinore hattono isi maa baxannoronna maa giwannoro anfummoro wodancha afiꞌneemmo. Ateneeto togo yite xaꞌmi: ‘Yihowa daafira afoommore hendiro, isi hagiidhannohu maa doodhummorooti?’—Efessooni 5:17 nabbawi.
10. Qullaawu Maxaafihu xintu seeri maatenke hasattonni woy budinkenni roorannohu mayiraati?
10 Yihowa hagiirsiisate, mito woyite fiixanke woy jaallanke hagiirsiisannokkire assa hasiissannonkeha ikkara dandaanno. Lawishshaho, mitu anninna ama danchare hede beettonsa dureessu manchira woy lowo miine miinannohura assidhanno gede xixxiiwara dandaanno; kayinni kuni manchi ayyaanaamittetenni jawaatinoha ikka hoogara dandaanno. Hige insa beettonsa maalaamittetenni qawaaxxidhara hasiꞌransa nooreentilla; kayinni ise ayyaanaamittetenni ayi towaatannoseyya? Yihowa tenne hajo ma garinni laꞌꞌanno? Maatewoosi 6:33 tennera dawaro qoltanno. Hakkiicho, Kiristaanu ‘balaxe Maganu Gashshoote hasiꞌranno’ gede amaalloonni. Annankenna amanke hattono qooxeessinkera noo manna ayirrinseemmoha ikkirono, qara hasattonke Yihowa hagiirsiisate.
NOOHE DOORSHA KEENTE LAI
11. Filiphisiyusi 1:9, 10 noonke doorsha keenne laꞌꞌate kaaꞌlannonkeha hiikkonne akata kulloonni?
11 Doodhatto doorshi ledo xaadooshshe afiꞌrinoha Qullaawu Maxaafiha xintu seera badde afittohu gedensaanni, noohe doorsha seekkite heda hasiissannohe. (Filiphisiyusi 1:9, 10 nabbawi.) Wodancha mittu mittunku doorshi mayi guma abbannoro huwatatto gede kaaꞌlitannohe. Mito woyite mitto coye qarrammikkinni doodha dandiinanni. Mitu doorshi kayinni doodhate lowo geeshsha qarrisannoho. Wodancha doodhate qarrisannore nafa hayyotenni doodhatto gede kaaꞌlitannohe.
12-13. Wodancha looso lainohunni dancha doorsha doodhatto gede kaaꞌlitannohehu hiittoonniiti?
12 Hanni maatekki kaaꞌlate looso hasidhanni nootto yine hendo. Lame looso afiꞌritto. Konni lamunku loosi daafira woꞌma taje afiꞌrate sharramitto; loosu hiittoohoro, looso loonsanni saate daafira, loosu bayicho haꞌrate gudatto yannanna wolereno togoore heditto. Lamunku loosi Qullaawa Borro ledo sumuu yaannoho. Loosu dananna baantannihe woxe hedde mitto roore baxoottoha ikkara dandaanno. Kayinni, doodhattora albaanni heda hasiissannohehu wolu coyino no.
13 Lawishshaho, afiꞌrootto loosi songote gambooshshe hosatto gede assannoheho? Maatekkira baxille leellishatenna insa ayyaanaamittetenni towaaxxate yanna hoogatto gede assannoho? Togoo xaꞌmuwa hedakki maalaamittete coye roorsiꞌrantenni, “roore hasiisanno coye” yaano ayyaanaamittekkinna maatekkira hasiisannore balaxisiisatto gede kaaꞌlitannohe. Hakkiinni Yihowa hagiirsiisanno doorsha doodha dandaatto.
14. Wodanchanna baxille leellisha woloota gufinseemmokki gede kaaꞌlitannonkehu hiittoonniiti?
14 Wodancha doodhineemmo doorshi woloota gawajjara dandaanno gara hendeemmo gedeno assitannonke; tini qolte ‘wolootaho guficho ikkineemmokki gede’ kaaꞌlitannonke. (Fil. 1:10) Uddiꞌneemmonna seenseemmo gara doodhineemmo woyiteno kaaꞌlitannonke. Lawishshaho, ninke banxeemmohu uddiꞌneemmonna seenseemmo gari heeꞌrara dandaanno. Kayinni uddiꞌneemmonna seenseemmo gari ammanate roduuwanke woy Yihowa Farciꞌraasine ikkinokki manna koffi assannohalla ikki? Wodancha insara guficho ikkineemmokki gede kaaꞌlitannonke. Baxillu “wolu injo” ikkinnina uminke injo hasiꞌneemmokki gede hattono dhukanke anfoommore ikkineemmo gede kaaꞌlannonke. (1 Qor. 10:23, 24, 32; 1 Xim. 2:9, 10) Hakkiinni woloota banxeemmotanna ayirrinseemmota leellishanno doorsha doodha dandiineemmo.
15. Lowo geeshsha hasiisanno doorsha doodhattora albaanni maa heda hasiissannohe?
15 Lowo geeshsha hasiisanno doorsha doodhate kaoottoha ikkiro, doodhoottore umo fushshate mayi hasiisannohero hedi. Yesuusi, ‘balanxe shallaga’ hasiissannota rosiisino. (Luq. 14:28) Hakko daafira doodhatto doorsha umo fushshate mageeshshi yanna, woxinna wolqa hasiissannoro hedi. Qoleno mito woyite, doodhatto doorshi qinaanno gede mittu mittunku maatekki miili maa assa hasiissannosiro insa ledo amaalama kaaꞌlitara dandiitanno. Konni garinni balaxe heda dancha ikkitinohu mayiraati? Hatto assittoro doodhootto doorsha mito geeshsha biddi assa hasiissannoheta woy wolere woꞌnaala woyyitannota huwatattora dandaatto. Qoleno maatekki ledo amaalamattohanna insa yitannore macciishshattoha ikkiro, doodhootto doorshi qinaanno gede insa roore kaaꞌlitahera dandiitanno.—Law. 15:22.
QINAANNOHE GEDE ASSANNO DOORSHA DOODHI
16. Qinaannohe gede assanno doorsha doodhatto gede kaaꞌlannoheri maati? (“ Dancha Doorsha Doodha Dandaatto Gara” yitanno saaxineno lai.)
16 Aleenni kulloonnire baala loosu aana hosiisoottoha ikkiro, dancha doorsha doodhate qixxaawootto yaate. Woꞌma mashalaqqe afiꞌrootto hattono Yihowa hagiirsiisanno doorsha doodhate kaaꞌlannoheha xintu seera xiinxallootto. Xa doodhootto doorshi qinaannohe gede kaaꞌlahera Yihowa huucciꞌra dandaatto.
17. Dancha doorsha doodhate kaaꞌlannonkehu qaru coyi maati?
17 Konni albaanni batinye dancha doorsha doodhoottoha ikkiro nafa, dancha doorsha doodhate kaaꞌlannohehu qaru coyi umikki egenno woy woꞌnaalsha addaxxantenni Yihowa aanno hayyo addaxxa ikkitinota qaagi. Addu egenno, wodanchanna buuxa aannohu iso callaati; kuri coyibba hayyo afiꞌnanni gede assitanno. (Law. 2:1-5) Yihowa iso hagiirsiisannoha dancha doorsha doodhatto gede kaaꞌlannohe.—Far. 23:2, 3.
FAARSO 28 Yihowa Jaala Ikka
