1. Xaa yannara batinyu manni maa calla illachishanno?

 XAA YANNARA batinyu manni uminsa daafira calla hedannota huwatootto? Lawishshaho, mitu manni dagoomittete webisayite widoonni insaneetonna insa loosino looso jajanno. Ikkirono xaa yannara Maganu Yihowara ayirrinye aanno manni boodeholla. Konni birxichira, Yihowara ayirrinye aate yaa mayyaateronna isira ayirrinye uyineemmo gede kakkayisannonkeri maatiro ronseemmo. Qoleno Maganoho hasiisannosi ayirrinye aa dandiineemmohu hiittoonniitironna muli yannara isi umisi suꞌmisi ayirranno gede assannohu ma garinniitiro ronseemmo.

YIHOWARA AYIRRINYE AATE YAA MAYYAATE?

2. Yihowa Siina Ilaalira ayirrinyesi leellishinohu hiittoonniiti? (Misileno lai.)

² Ayirrinyu maati? Qullaawu Maxaafi giddo “ayirrinye” yaanno qaali mitto mancho ayirrinsannisi gede assanno coye baala leellishanno. Israeelete daga Gibitsete borojjimmanni fultuhunni shiima yanna gedensaanni, Yihowa ayirrinyesi dhagge ikkanno garinni leellishino. Hanni tenne hedi: Lowo miliyoone ikkannohu Israeelete manni Maganinsa coyiꞌrannore macciishshate Siina Ilaali hunda gamba yiino. Hakkiinni tunsino gomichi ilaala guggushshi. Hedeweelcho ilaalu qooxeessira guunjo woꞌmitu, baattono lowo geeshsha huxidhu, beleqonna banqo hattono lowota buudu xurumbi luulo macciishshini.  (Ful. 19:16-18; 24:17; Far. 68:8) Israeelete manni Yihowa dhagge ikkanno ayirrinyesi konni garinni leellishi woyite, mageeshshi geeshsha maalaꞌlinoro hanni hedi.

3. Yihowara ayirrinye aate yaa mayyaate?

³ Ninke mannu oosona? Addinta Yihowara ayirrinye aa dandiineemmo? Ee dandiineemmo. Yihowara ayirrinye uyineemmoti mitte doogo, dhagge ikkitanno wolqasinna baxissanno akattasi daafira wolootaho kulate. Qoleno Yihowa uyinonke wolqanni loonsoommo loosira iso galante isira ayirrinye aa dandiineemmo. (Isa. 26:12) Moote Daawiti Yihowara ayirrinye oye kaajja lawishsha ikkinonke. Daawiti Israeelete manni gamba yiinowa huuccatto assi woyite, Magano togo yiino: “Ati jawahonna wolqaataamoho; ati ayirrinyu, xummenna gaamaarre woꞌmitinoheho; gordohonna baattote aana noori baalu ateho.” Daawiti huuccatto asse kaihu gedensaanni, “Gamba yee noo manni baalu . . . Magano Kaaliiqa galati.”—1 Dud. 29:11, 20.

4. Yesuusi Yihowara ayirrinye uyinohu hiittoonniiti?

⁴ Yesuusi uullate aana noo waro isi loosino maalale Buicho Yihowa ikkinota kule Annisi ayirranno gede assino. (Maq. 5:18-20) Qoleno Yesuusi wolootu Yihowa dhagge ikkanno Magano ikkinota huwattanno gede kaaꞌle hattono mannaho shaqqille leellishe Annisira ayirrinye uyino. Mitte yannara Yesuusi xaadu mine rosiisanni no. Isi rosiisanni noo manni giddo bushu ayyaani amadeenna 18 diro xiwantinoti mitte mancho no. Ise hallo ukkitino daafira horonta subbe uurra didandiitanno. Tini lowo geeshsha dadillissannote! Yesuusi mancho mararino daafira isewa mare shaqqillunni, “Tee mancho, dhibbikkinni hurootta” yiinose. Hakkiinni angasi aanaho worita bayichonko hossi yite uurrite “Magano galattu.” (Luq. 13:10-13) Tini mancho Yihowara ayirrinye uyitanno gede assannosehu ikkadu korkaati noose; ninkerano noonke.

YIHOWARA AYIRRINYE UYINEEMMO GEDE KAKKAYISANNONKERI MAATI?

5. Yihowa ayirrinseemmo gede assannonkeri maati?

⁵ Yihowa ayirrinseemmohu isira ayirrinyu hasiisannosi daafiraati. Iso ayirrinseemmo gede assannonkehu batinyu korkaati no. Yihowa woꞌmanka dandaannoho; isi wolqa taalle dinoote. (Far. 96:4-7) Isi lowo geeshsha hayyicha ikkinoti kalaqino coyi aana xabbe leeltanno. Heeshshote Buichonna heeshshotenni heeꞌrate hasiisannonkere uyinonkehu isooti. (Aju. 4:11) Isi ammanaminoho. (Aju. 15:4) Isi assanno coyi baalu qinaanno; eino qaaleno woꞌmanka woyite wonshanno. (Iya. 23:14) Masaalaanchu Ermiyaasi Yihowa daafira aane noore coyiꞌrasi garankolla. Isi togo yiino: “Uullate egennaamminna, gashshaano baalate giddo ate gedeehu dino.” (Erm. 10:6, 7) Addanko, iimi Annanke ayirrinseemmo gede assannonkehu ikkadu korkaati no. Ikkirono Yihowa ayirrinseemmosiha calla ikkikkinni lowo geeshsha banxeemmosi.

6. Yihowa banxeemmohu mayiraati?

⁶ Yihowara ayirrinye uyineemmohu iso lubbora banxeemmo daafiraati. Hanni Yihowa banxeemmosi gede assitannonketa batinye akattasi hedi. Isi maarannohonna mararannoho. (Far. 103:13; Isa. 49:15) Mannu qarri leellannosiho; isi ninke xissiisiꞌneemmo woyite xissiisiꞌranno. (Zak. 2:8) Yihowa isiwa shinqeemmonna jaallasi ikkineemmo gede assinonke. (Far. 25:14; Soq. 17:27) Qoleno umosi heeshshi assannoho; isi, “iimaanni heeꞌre gordonna baatto woro qole laꞌꞌanno. Buxane bukote aaninni kayisanno.” (Far. 113:6, 7) Kuni baalunku coyi Maganinkera ayirrinye uyineemmo gede kakkayisannonke.—Far. 86:12.

7. Baxxitinoti hiitti faro noonke?

 ⁷ Yihowara ayirrinye uyineemmohu wolootu iso affara hasiꞌneemmo daafiraati. Batinyu manni Yihowa daafira halaale diafino. Mayira? Korkaatuno Sheexaanu isi daafira kapho tareesse surrensa ballisino. (2 Qor. 4:4) Sheexaanu, mannu Yihowa qorichishannoho, mannaho dihedannoho hattono alamete qarru batiꞌranno gede assinohu isooti yee ammananno gede assino. Kayinni ninke Maganinke daafira halaale anfoommo! Mannaho Yihowa daafira halaale kulle isira ayirrinye aate qoosso noonke. (Isa. 43:10) Faarso 96te Yihowara ayirrinye aate daafira luphi assine kulloonni. Qullaawu ayyaaninni borreessinoonnita tenne faarso xiinxallineemmo woyite, Yihowara hasiisannosi ayirrinye aa dandiineemmo doogga hedate woꞌnaalle.

YIHOWARA HASIISANNOSI AYIRRINYE AA DANDIINEEMMO GARA

8. Yihowara ayirrinye aa dandiineemmoti mitte doogo hiittenneeti? (Faarso 96:1-3)

⁸ Faarso 96:1-3 nabbawi. Yihowa daafira coyiꞌneemmo coyinni isira ayirrinye aa dandiineemmo. Konni qummeeshshira Yihowa manni isira ‘faarsanno gede, iso galatanno gede, gatisaanchimmasi duduwanno gedenna dagate ayirrinyesi lallawanno’ gede kulloonni. Tenne baalante doogganni iimi Anninkera ayirrinye aa dandiineemmo. Ammanantino Ayihudootinna umi xibbi diro heeꞌrino Kiristaani wolootaho Yihowa assinonsaha dancha coye kulatenna suꞌmisira halamate hobbi ruxxi diyiino. (Dan. 3:16-18; Soq. 4:29) Ninkeno hatto assa dandiineemmohu hiittoonniiti?

9-10. Anjeliina woꞌnaalshinni maa rosootto? (Misileno lai.)

⁹ Hanni Yunayitidi Isteetisete heedhannote Anjeliina a yinanni rodoo woꞌnaalsha laꞌno. Ise loosu basera worbimmatenni Yihowa suꞌmira halantino. Ise qaxarantino dirijjite haarote qaxarantinori insaneeto egensiissanno gede gambooshshe qixxeessitino; Anjeliinano haarote qaxarantinota ikkitino daafira gambooshsheho koyinsise. Anjeliina Yihowa Farciꞌraasincho ikkasenni afidhino hagiirre leellishshanno foto qixxeessitu. Kayinni Anjeliina bado iillitara albaanni mittu ledose loosannohu isonooto egensiisanni lophinohu Yihowa Farciꞌraasine maate giddo ikkinota coyiꞌri. Hakkiinni isi ammaꞌnonke misha hanafi. Anjeliina togo yitino: “Lowo geya yaadoomma. Kayinni togo yee hedumma: ‘Mittu manchi Yihowa  daafira kapho coyiꞌranna sammi yee laꞌꞌa hasiissannoenso isira halama hasiissannoe?’”

¹⁰ Ledose loosannohu isonooto egensiise kaita Anjeliina wodanisenni harancho huuccatto assidhu. Hakkiinni shaqqillunni togo yitusi: “Anino atente gedeeti. Lophoommahu Yihowa Farciꞌraasine maate giddooti; xaano Yihowa Farciꞌraasinchooti.” Anjeliina lowo geeshsha yaadinoha ikkirono wodanaaꞌmite, ayyaanaamittete coye assitanni kaꞌinota baxissanno foto leellishshino; hattono hayyotenni ammanase daafira kultino. (1 Phe. 3:15) Tini mayi guma abbituyya? Anjeliina iseneeto egensiisse kaꞌuta manchu wodani shaqqino. Wole agurina isi anje Yihowa Farciꞌraasincho ikke heeꞌre assinoha mito dancha coye qaagino. Anjeliina togo yitino: “Yihowara halama hasiissannonke. Suꞌmisira halama ninkera lowo ayirrinyeeti.” Ninkerano, wolootu Yihowara ayirrinye uyitannokkiha ikkiro nafa Yihowa guwisiꞌratenna isira ayirrinye aate qoosso noonke.

11. Yihowa halaalunni magansidhannori lowo diro Faarso 96:8 nooha xintu seera harunsitinohu hiittoonniiti?

¹¹ Faarso 96:8 nabbawi. Miinjinkenni Yihowa ayirranno gede assa dandiineemmo. Hundinni hanaffe Yihowa halaalunni magansidhinori konni garinni isira ayirrinye uyitino. (Law. 3:9) Lawishshaho, Israeele qullaawa mine minatenna gatamarate woxe fushshitino. (2 Mot. 12:4, 5; 1 Dud. 29:3-9) Mannaho heddannori Kiristoosi rosaano “woxinsanni” isiranna soqqamaasinesira soqqantino. (Luq. 8:1-3) Umi xibbi diro heeꞌrino Kiristaanino ammanate roduuwansa kaaꞌlate woxe fushshino. (Soq. 11:27-29) Ninkeno xaa yannara uminke fajjonni woxe fushshine Yihowara ayirrinye aa dandiineemmo.

12. Fushshineemmo woxi Yihowara ayirrinye abbannohu hiittoonniiti? (Misileno lai.)

¹² Hanni fushshineemmo woxi Yihowara ayirrinye abbannohu hiittoonniitiro leellishannoha mitto woꞌnaalsha laꞌno. Zimbaawete gobba 2020 seeda yanna keeshshitino moolle gantino. Tenne moollenni kainohunni lowo miliyoone ikkanno manni hudiꞌrino; konni manni giddo mitte Piriska yinanni rodoonkeeti. Moolle lowo geeshsha waaddurono Piriska bashsho assitannonte gede ganyite Roowenna Arbe soqqansho fula diagurtino. Olliise manni ise gate loosiꞌra agurte soqqansho fultanno daafira “Hudetenni reyakki digattanno” yaanni qacifatinose. Ise woꞌma giddonni, “Yihowa soqqamaanosi horo  tuge diegennino” yitino. Kuni ikkihunni shiima yanna gedensaanni dirijjitenke Piriskara sagalenna wolere hasiisannosere sokkinose. Ise konne hasiisannose coye afidhinohu ninke uminke fajjonni woxe fushshinoommo daafiraati. Olliise manni tenne lae lowo geya dhagge assiꞌrino daafira, “Maganu horo tuge diegenninohe; konnira isi daafira roore rosa hasiꞌneemmo” yiise. Hakko daafira olliisera heeꞌrannohu lamalu manni songote gambooshshe haꞌra hanafino.

13. Amanyootinkenni Yihowa ayirranno gede assa dandiineemmohu hiittoonniiti? (Faarso 96:9)

¹³ Faarso 96:9 nabbawi. Amanyootinkenni Yihowa ayirranno gede assa dandiineemmo. Yihowahu qullaawu minira soqqantanno kakkalaano bisonna uddanonsa hayishshidhe xuru nookkire ikka hasiissannonsa. (Ful. 40:30-32) Ikkirono, roore hasiissannoti amanyootunni xuru nookkire ikkate. (Far. 24:3, 4; 1 Phe. 1:15, 16) “Akkala mannimma” yaano battaabbino hedonna rosicho mulqine tugatenna “haaro mannimma” uddiꞌrate yaano ayirrado Yihowa akatta leellishshanno hedonna amanyooti heeꞌrannonke gede assiꞌrate sharrama hasiissannonke. (Qol. 3:9, 10) Amanyoote bainohunna lowo geeshsha finqilu manni nafa soorrame haaro mannimma uddiꞌra dandaanno.

14. Jaaki woꞌnaalshinni maa rosootto? (Misileno lai.)

¹⁴ Hanni Jaaki yinanni manchi woꞌnaalsha laꞌno. Jaaki lowo geeshsha finqila mancho ikkino daafira mannu iso Agaanintete yaanno. Isi lowo jaddo loosino daafira reyote yoo yinoonnisi. Ikkirono isi shinannisi barra agadhe heeꞌre usuru mine mare sabbakanno rodiinke ledo Qullaawa Maxaafa xiinxallate sumuu yii. Jaaki lowo geeshsha busha mancho ikkirono akkala mannimma mulqe tugino hattono gale hose cuuamate ikkado ikkino. Jaaki lowo geeshsha soorrame biddi yiino daafira iso shinanni barri iillita, usuru mini agaraano giddo mitu iso keerunni yitara daggu woyite hindiiddo qalxitinonsa. Usuru mine loosannohu mittu manchi togo yiino: “Usuru mine noo manni giddo alba Jaaki gedeehu bushu manchi dino. Xa kayinni isi lowo geeshsha dancha mancho ikkino.” Jaaki shinihunni mitte lamala gedensaanni, roduuwu gambooshshe massagate usuru minira hadhu woyite, gambooshshe mite yee dayinoha mitto usuranya laꞌu. Kuni usuranyi gambooshshe daanno gede kakkayisinosiri maati? Isi Jaaki soorramino daafira lowo geeshsha dhagge  assiꞌrinohura Yihowa magansiꞌrate maa assa hasiissannosiro afa hasiꞌrino. Addanko, amanyootinke iimi Anninke ayirranno gede assanno!—1 Phe. 2:12.

YIHOWA MULI YANNARA SUꞌMISI AYIRRANNO GEDE ASSANNOHU HIITTOONNIITI?

15. Yihowa muli yannara suꞌmisi woꞌmunni woꞌma ayirranno gede assannohu hiittoonniiti? (Faarso 96:10-13)

¹⁵ Faarso 96:10-13 nabbawi. Faarso 96 jeefote noo kiiro Yihowa taalo yoo yaanno Moote ikkinota kultanno. Yihowa muli yannara suˈmisi ayirranno gede assannohu hiittoonniiti? Yoosi widoonniiti. Muli yannara suꞌmisi mishamanno gede assitinota Batiꞌra Baabiloone hunanno. (Aju. 17:5, 16; 19:1, 2) Batiꞌra Baabiloone baꞌanna laꞌꞌannohu mitu manni ninke ledo Yihowa magansiꞌra hanafara dandaanno. Jeefote Yihowa Armagedooni olinni Sheexaanu alame woꞌma hunanno; iso gibbannorenna suꞌmisi mishamanno gede assitannore baala coꞌo asse hunanno; iso baxxannore, isira hajajantannorenna isira ayirrinye uyitannore baala kayinni gatisanno. (Maq. 8:38; 2 Tes. 1:6-10) Kiristoosihu Kumu Diri Gashshooti gedensaanni heeꞌrannohu jeefote fonqoli gedensaanni Yihowa suꞌmasi woꞌmunni woꞌma keereensanno. (Aju. 20:7-10) Hatte yannara, “Wayi baaraho woꞌminohu gede, Kaaliiqi ayirrinye afano baatto woꞌmitanno.”—Imb. 2:14.

16. Maa assate murciꞌrootto? (Misileno lai.)

¹⁶ Baalunku manni Yihowara malino ayirrinye aanno yanna lowo geeshsha hagiirsiissannota ikkitanno! Hakka geeshsha kayinni, afiꞌnummo faro baala horoonsiꞌne Maganinkera ayirrinye aate dandiinummore baala assino. Aliidi Bisi, tenne hasiissanno hajo illachinsheemmo gede, Faarso 96:8 2025 diru qummeeshsha ikkitara doorino. Qummeeshshu, “Yihowara, suꞌmisira malino ayirrinye uuyyesi” yaanno.