Kakkalaasine ikkitinokki leewaawooti giddo gamu polise loossannohu gedee looso loossanno. Insa loosonsa loossannohu qullaawu mini hajajaanchi kulannonsa garinniiti. Ayihudennihu xaggete borreessaanchi Fayilo insa loossanno looso togo yee xawisino: “Kuri leewaawooti giddo gamu xullichoho zawanya ikkite uurritanno; mitootu kayinni qullaawu minira giddoonni xullote uurrite mannu afanni woy afikkinni hakkira eannota gargarte hooltanno. Wolootu kayinni tara tara hashshanna barra qullaawa mine doyitanni agartanno.”

Sanihediriini shongo kuri polise hajajate silxaane noonsa. Roomu gashshooti massaara qodhitanno gede kuri polisera calla fajjanno.

Yoakiimi Yermiyaasi yinanni fullahaanchi togo yiino: “Yesuusa amandisi yannara, barru baala Qullaawa Mine rosiisanna amandoonnisikkihu mayiraatiro xaꞌminohu (Mat. 26:55) amaddasira dagginori qullaawu mini polise ikkitinohura ikkikki digatino.” Kuni borreessaanchi hakkuyira albaanni Yesuusa amaddara sonkoonnirino qullaawu mini polise ikkitinota ammananno. (Yoh. 7:32, 45, 46) Gedensoonni polisenna qullaawu mini hajajaanchi Yesuusi rosaano amadde Sanihediriini shongowa massitanno gede hajanjoonni; soqqamaasincho Phaawuloosino qullaawu mininni goshooshshe fushshituri insa ikkitukkinni digattino.—Soq. 4:1-3; 5:17-27; 21:27-30.