1-2. Mannu cuuamanno yannara duucha woyite mayi ikkanno? Konni birxichira maa ronseemmo?

 GAMBA yee nooha cuuamate qixxaawino manna laˈe egennootto? Insa cuuantara albaanni xaˈminanninsate lame xaˈmora dawaro qoltanno woyite huuronsanni ammanansa mageeshshitero afa dandaatto. Hatte yannara maatensanna jaallansa lowo geeshsha hagiidhitanno. Cuuantannori wayi giddonni fultanno woyite, gamba yee noo manni anga shooshshe gananno; cuuantinorino lowo geeshsha hagiidhitinota wodancha dandaatto. Lamalate kiiro mereerimunni, lowo kume ikkanno manni heeshshonsa Yihowara sayise oye cuuame Yihowa Farciˈraasine ikkanno.

² Atina? Cuuamate heddanni noottoha ikkiro, tenne busha alame giddo heedhe baxxoottoha ikkootto; mayira yiniro, ati ‘Magano hasidhanni’ nootto. (Far. 14:1, 2) Aja woy akkalano ikkittoro kuni birxichi kaaˈlannohe. Ikkollana ninke cuuammoommorino Yihowara hegerera soqqammanni heeˈrate albinni roore murciˈra hasiˈneemmo. Hakko daafira hanni Yihowara soqqammeemmo gede kakkayisannonkeha ajayi ajeenna sase korkaata laˈno.

3. Yihowa soqqamaano halaalenna keeraanchimma baxxannohu mayiraati? (Faarso 119:128, 163)

³ Yihowa mannisi ‘halaale baxanno’ gede hajajino. (Zak. 8:19) Yesuusi harunsaanosi keeraanchimma hasidhanno gede kulinonsa. (Mat. 5:6) Hatto yaa Maganu albaanni gara, danchanna keeraancho ikkinore assate hasatto heedhannonke gede assiˈra hasiissannonke yaate. Ati halaalenna keeraanchimma baxatto? Baxattoti dihuluullissannote. Kaphonna busha coye baala giwootto. (Faarso 119:128, 163 nabbawi.) Kaphu tenne alame gashshaanchi Sheexaanu akataati. (Yoh. 8:44; 12:31) Sheexaanu  mixo giddo mitte qullaawa ikkinoha Maganu Yihowa suˈma hunate. Sheexaanu Edenete finqille kaˈuhunni hanafe Maganinke daafira kapho tareessa diagurino. Isi, Yihowa mannu oosora danchare hoˈlannoho, umosi calla baxannohonna kaphaancho Gashshaanchooti yiino. (Kal. 3:1, 4, 5) Sheexaanu Yihowa daafira coyiˈrino kaphi mannu surrenna wodana daafa diagurino. Mannu ‘halaale baxannokkiha’ ikkiro, Sheexaanu kuni manni keeraancho ikkinokkihanna busha coye assanno gede xixxiiwansara dandaanno.—Rom. 1:25-31.

4. Yihowa “halaalu Magano” ikkinota leellishinohu hiittoonniiti? (Misileno lai.)

⁴ Yihowa ‘halaalu Maganooti’; hattono isi baxxannosirira shaqqillunni halaale rosiisannonsa. (Far. 31:5) Konni garinni isi insa Sheexaanu kaphinni dogantannokki gede kaaˈlannonsa. Qoleno Yihowa soqqamaanosi ammaˈninannirenna keeraano ikkitanno gede rosiisannonsa. Tini insaneetira ayirrinyu heeˈrannonsa gedenna giddoyidi keere afidhanno gede kaaˈlitannonsa. (Law. 13:5, 6) Qullaawa Maxaafa xiinxallitto woyite tini halaale ikkitinota huwatootto? Yihowa assannori aterano ikko baalante mannu oosora lowo geeshsha hasiisannoha ikkinota rosootto. (Far. 77:13) Hakko daafira Maganu albaanni gara ikkinore assa hasiˈrootto. (Mat. 6:33) Halaaleho halamanna Sheexaanu Maganinke Yihowa daafira coyiˈrinori kapho ikkinota leellisha hasiˈrootto. Tenne assa dandaattohu hiittoonniiti?

5. Halaalehonna keeraanchimmate halama dandaattohu hiittoonniiti?

⁵ Aane noore assa hasiˈrattota leellishshanno heeshsho doodha dandaatto: “Sheexaanu kapho giweemmo; halaaleho halameemmo. Yihowa Aliidi Gashshaanchoˈya ikkara hasiˈreemmo; hattono isi albaanni gara ikkinore assa hasiˈreemmo.” Tenne assa dandaattohu hiittoonniiti? Yihowa huucciˈri, heeshshokki isira sayisse uyi hattono heeshshokki sayisse oottota cuuante mannu albaanni leellishi. Halaalenna gara ikkinore assa baxakki cuuama hasiˈratto gede kakkayisannoheho qara coyeeti.

6. Faarso 45:4 Yesuusi Kiristoosa banxeemmo gede assannonkeha hiikkonne korkaata kulloonni?

⁶ Yesuusi Kiristoosa baxoottohu mayiraati? Kiristoosa banxeemmo gede assannonkeha mito korkaata Faarso 45:4 kulloonni. (Qummeeshsha nabbawi.) Yesuusi halaale, joongillenna keeraanchimma  baxanno. Halaalenna keeraanchimma baxattoha ikkiro, Yesuusi Kiristoosano baxattoti dihuluullissannote. Yesuusi halaalenna gara ikkinorira worbimmatenni halamino gara hedi. (Yoh. 18:37) Ikkina isi jooga ikkinota leellishinohu hiittoonniiti?

7. Yesuusi joongilli daafira dhagge ikkannoheri maati?

⁷ Yesuusi jooga ikkinota leellishino. Lawishshaho isi, ayirrinye umisira ikkikkinni Annisira uyino. (Maq. 10:17, 18; Yoh. 5:19) Isi joongilli daafira hedatto woyite mayi macciishshamannohe? Tini Maganu Beetto baxatto gedenna iso harunsatto gede diassitannohe? Assitannoheti dihuluullissannote. Yesuusi jooga ikkinohu mayiraati? Jooga ikkinoha Annasi baxannonna isi faale haˈranno daafiraati. (Far. 18:35; Ibi. 1:3) Tini, Yihowa akatta guutu garinni leellishinohu Yesuusiwa shiqatto gede diassitannohe?

8. Mootenke ikkinoha Yesuusa banxeemmohu mayiraati?

⁸ Yesuusi taalle nookki Gashshaanchonke ikkino daafira banxeemmosi. Yihowa Beettosi qajeelsino; hattono gashshaancho ikkanno gede shoominosi. (Isa. 50:4, 5) Hanni Yesuusi umisi horo agure baxille leellishino gara hedi. (Yoh. 13:1) Yesuusi Mootenke ikkino daafira iso baxa hasiissannonke. Isi jaallaˈya yee woshshannonsari iso addinta baxxannori, hajajosi agadhite baxille leellishshannota coyiˈrino. (Yoh. 14:15; 15:14, 15) Yihowa Beetti jaalla ikka ninkera lowo ayirrinyeeti!

9. Kiristaanu cuuamanna Yesuusi cuuama mitto assannori maati?

⁹ Yesuusi hajajo giddo mitte harunsaanosi ikkitannori cuuantanno gede hajajino hajajooti. (Mat. 28:19, 20) Tennera isi lawishsha ikkinonke. Yesuusi cuuama rosaanosi cuuamawiinni mito geeshsha baxxitanno. (“ Yesuusi Cuuamanna Rosaanosi Cuuama Mereero Noo Badooshshi Maati?” yitanno saaxine lai.) Kayinni lamenta cuuama mitto assannonsarino no. Yesuusi cuuami woyite Annisi fajjo wonshate maahoyye yiino. (Ibi. 10:7) Kiristoosi rosaanono cuuantanno woyite heeshshonsa Maganu Yihowara sayisse uyitinota mannu albaanni leellishshanno. Hakko daafira xaate insa uminsa fajjo ikkikkinni Yihowa fajjo balaxisiissanno. Konni garinni Mootichinsa lawishsha harunsitanno.

10. Yesuusa baxakki cuuamatto gede kakkayissannohehu mayiraati?

¹⁰ Yesuusi Yihowaha mitto Beetto ikkinotanna Maganu iso Mootenke ikkara shoominota ammanootto. Yesuusi umosi heeshshi assannoha ikkinotanna Annisi akatta guutu garinni leellishannoha ikkinota rosootto. Qoleno isi hudidhinore itisinota, hexxo mudhitinore sheshifachishinotanna dhiwantinore hursinota rosootto. (Mat. 14:14-21) Xaa yannara songuwa massaganni noo garano afootto. Qoleno isi Maganu Mangiste Moote ikkino daafira albillitte kawiinni sainore assannotano afootto. Iso baxattota leellisha dandaattohu hiittoonniitiyya? Isi lawishsha harunsatenniiti. (Yoh. 14:21) Heeshshokki Yihowara sayisse uyite cuuante isi lawishsha harunsa dandaatto.

11. Cuuamatto gede assannohehu qaru korkaati maati? Hatto yoottohu mayiraati?

¹¹ Cuuamatto gede assannohehu qaru korkaati maati? Yesuusi Maganu hajajo giddo baalanta roortannoti hiittenneetiro kulanni togo yiino: “Maganokki Kaaliiqa woˈmu wodanikkinni, woˈma lubbokkinni, woˈma hedokkinninna woˈma wolqakkinni baxi!” (Maq. 12:30) Konni qummeeshshira noo hedo Magano mageeshshi geeshsha baxattoro leellishshanno?

12. Yihowa baxattohu mayiraati? (Misileno lai.)

¹² Yihowa banxeemmo gede assannonkehu batinyu korkaati no. Lawishshaho, isi “heeshshote buicho” ikkinotanna “dancha eltonna  woˈmu atooti baalu” isiwiinni ikkinota huwatootto. (Far. 36:9; Yai. 1:17) Dancha coye baala afiˈnoommohu shaqqadunna baxillaanchu Maganinkewiinniiti.

13. Wodo dhagge ikkitanno eltooti yineemmohu mayiraati?

¹³ Wodo Yihowa uyinonkete dhagge ikkitanno eltooti. Hatto yineemmohu mayiraati? Hanni Yihowanna Beettisi mereero noo jaalooma hedi. Yesuusi, “Anniˈya ane baxannoe” hattono “Ani Annaˈya baxeemmo” yiino. (Yoh. 10:17; 14:31) Insa lowo biliyoone diro mitteenni heeˈransa mereeronsa noo jaaloomi kaajjanno gede assitino. (Law. 8:22, 23, 30) Hanni Maganu Beettisi qarramannonna reyanno gede fajji woyite mageeshshi geeshsha xissiisiˈrinoro hedi. Yihowa mannu ooso lowo geeshsha baxanno; hakko daafira atino wolu mannino hegere heeshsho afidhinanni gede baxanno Beettosi wodo asse uyino. (Yoh. 3:16; Gal. 2:20) Magano banxeemmo gede assannonkehu qaru korkaati konneeti.

14. Heeshshokki giddo fushshiˈratto mixo baalanta roortannoti hiittenneeti?

¹⁴ Yihowa daafira rositto kiiro isira noohe baxilli lexxanni haˈranno. Xaano ikko hegerera isiwa roore shiqa hasiˈrattoti dihuluullissannote. Qoleno hatto assa dandaatto. Isi wodanasi tashshi assineemmo gede jawaachishinonke. (Law. 23:15, 16) Coyiˈrattorinni  calla ikkikkinni assattorinnino hatto assa dandaatto. Yihowa addinta baxattota heeˈratto heeshshonni leellisha dandaatto. (1 Yoh. 5:3) Tini fushshiˈratto mixo baalanta roortannote.

15. Yihowa baxattota leellisha dandaattohu hiittoonniiti?

¹⁵ Yihowa baxattota leellisha dandaattohu hiittoonniiti? Umihunni, heeshshokki mittu halaalaanchu Maganira sayisse oottota baxxino garinni huuccattotenni kulteeti. (Far. 40:8) Hakkiinni heeshshokki isira sayisse oottota mannu albaanni leellishatto. Konni birxichira aleenni laˈnummonte gede, cuuamakki hagiidhatto gedenna tenne yanna horo hawattokki gede assitannohe. Konni garinni umikkira ikkikkinni Yihowara haaro heeshsho heeˈra hanafatto. (Rom. 14:8; 1 Phe. 4:1, 2) Kuni dishaaˈˈa doorshaati. Ikkirono baalantenni woyyitino heeshsho heeˈratto faro fanannohe. Hiittoonni?

16. Faarso 41:12 kultanno garinni Yihowa heeshshonsa isira soqqamate sayisse uyitinore baˈraasannohu hiittoonniiti?

¹⁶ Yihowa gedee shaqqadi no. Yihowara aattori ikkireno ikkiro isi woˈmanka woyite hakkiinni roorse aannohe. (Maq. 10:29, 30) Isi tenne baˈara shiima yanna gatte noo alame giddo nafa hagiirsiissannotanna harshammi assitanno heeshsho aannohe. Tini hanafotella. Cuuante hanafoottoti tini heeshsho gawalo diafidhinote. Baxillaanchu Annikkira hegerera soqqantanni heeˈra dandaatto. Atenna Annikki Yihowa mereero noo baxilli lexxanni haˈranno; Yihowa hegerera heeˈrannoha ikkino daafira atino hegerera heeˈratto.—Faarso 41:12 nabbawi.

17. Yihowara noosikkihu aattosira dandaatto coyi maati?

¹⁷ Heeshshokki Maganoho sayisse aatto woyitenna cuuamatto woyite Annikki Yihowara lowo geeshsha muxxe ikkinore aate qoosso afiˈratto. Hagiidhatto gede assannoheha dancha coye baala uyinohehu isooti. Atino iimanna uulla kalaqino Maganira noosikki coye aa dandaatto; kuni coyi umikki fajjonni isira ammanante soqqamate. (Iyo. 1:8; 41:11; Law. 27:11) Tenne saˈino heeshsho horo dino. Cuuamatto gede assannohehu qaru korkaati Yihowara noohe baxille ikkinoti dihuluullissannote.

18. Ateneeto hiikkuri xaˈmuwa xaˈma dandaatto?

¹⁸ Cuuamate qixxaawootto? yitanno xaˈmora qolatto dawaro maati? Tenne xaˈmora dawaro qola dandaattohu ate callaati. Kayinni ‘Cuuamummokkinni keeshshoommohu mayiraati?’ yite ateneeto xaˈmakki kaaˈlitahera dandiitanno. (Soq. 8:36) Hanni aleenni laˈnummoha sase coye qaagi. Umihunni, halaalenna keeraanchimma baxootto. Ateneeto togo yite xaˈmi: ‘Baalunku manni halaale coyiˈrannotanna gara ikkinore assanno yanna laˈˈate halcheemmo?’ Layinkihunni, Yesuusi Kiristoosa baxootto. Ateneeto togo yite xaˈmi: ‘Maganu Beetto Mooteˈya asse adhanna isi lawishsha harunsa hasiˈreemmo?’ Sayikkihunni, baalunkunni roore Yihowa baxootto. Ateneeto togo yite xaˈmi: ‘Maganiˈya Yihowara soqqame isi wodana tashshi assa hasiˈreemmo?’ Kuri xaˈmuwara ee yite qolattoha ikkiro, keeshshittokkinni xaanni mayira dicuuamatto?—Soq. 16:33.

19. Cuuamate hobbi ruxxi yaa hasiissannohekkihu mayiraati? Lawishsha kuli. (Yohaannisi 4:34)

¹⁹ Cuuamate hobbi ruxxi yitanni noottoha ikkiro Yesuusi horoonsiˈrino lawishsha hedi. (Yohaannisi 4:34 nabbawi.) Isi Annisi fajjo wonsha sagalete ledo heewisiisinota wodanchi. Mayira? Sagale kaaˈlitannonke. Yesuusi Yihowa asse yaannonkeri baalu ninkera kaaˈlannonkere ikkinota afino. Yihowa horo gawajjannonkere assinammora dihasiˈranno. Yihowa assattora hasiˈranno coyi giddo mittu cuuamate? Ee. (Soq. 2:38) Hakko daafira tenne hajajo wonsha kaaˈlitannoheta addaxxa dandaatto. Dancha sagale itate hobbi ruxxi yaattokkiha ikkiro, cuuamateno hobbi ruxxi yaa dihasiissannohe.

20. Aananno birxichira maa ronseemmo?

²⁰ Mitootu cuuantukkinni keeshshitannohu mayiraati? Batinyu manni, “Xaara diqixxaawoommo” yee qolara dandaanno. Heeshshokki Yihowara sayise aatenna cuuamate doodhatto doorshi, doodhatto doorsha baalanka roorannoho. Hakko daafira tennera qixxaawate seekkine heda, yanna gaaˈmanna diinaggaambe sharrama hasiissannonke. Ikkina addinta heeshshokki Yihowara sayisse aanna cuuama hasiˈrattoha ikkiro tennera qixxaawate xaanni maa assa dandaatto? Aananno birxichira tenne xaˈmora dawaro qollanni.