1. Annuwunna amuuwu oosonsara maa halchitanno?

 ANNUWANNA AMUUWA, oosoˈne Yihowa affannonna baxxanno gede kaaˈla hasidhinannita anfoommo. Kayinni Magano laˈˈa didandiinanni. Ikkina qaaqquulliˈnera isi xawe leellannonsa gedenna isiwa shiqqanno gede kaaˈla dandiitinannihu hiittoonniiti?—Yai. 4:8.

2. Annuwunna amuuwu oosonsara Yihowa akatta daafira rosiisa dandiitannohu hiittoonniiti?

² Ooso Yihowawa shiqqanno gede kaaˈla dandiinanniti qara doogo insara Qullaawa Maxaafa xiinxallisate. (2 Xim. 3:14-17) Ikkirono Qullaawu Maxaafi ooso Yihowa daafira rosa dandiitannota wole doogono kulanno. Lawishshu maxaafi giddo mittu anni beettisi kalaqamu aana leeltannota Yihowa akatta hawannokki gede kulinosi. (Law. 3:19-21) Annuwunna amuuwu kalaqama horoonsidhe oosonsa Yihowa ayimma affanno gede kaaˈla dandiitannota mite doogga laˈneemmo

3. Annuwunna amuuwu oosonsa kaaˈla dandiitannohu hiittoonniiti?

³ Qullaawu Maxaafi, ‘Alame kalaqantuhunni kayise mannaho leellannokkihu Maganu dani xawe leellannota’ kulanno. (Rom. 1:20) Annuwanna amuuwa, gobba fultine oosoˈne ledo yanna sayisa baxxinanniha ikkara dandaanno. Togoo yanna horoonsidhine oosoˈne Yihowa kalaqino ‘kalaqaminna’ dhagge ikkitanno akattasi mereero noo xaadooshshe huwattanno gede kaaˈlensa. Hanni tenne assate annuwunna amuuwu Yesuusi lawishsha harunsa dandiitannohu hiittoonniitiro laˈno.

4. Yesuusi rosaanosi rosiisate kalaqama horoonsiˈrinohu hiittoonniiti? (Luqaasi 12:24, 27-30)

 ⁴ Yesuusi rosiisate kalaqama horoonsiˈrino gara wodanche. Mitte yannara isi rosaanosi haraqeeyyenna xawu daraaro laˈanno gede kulinonsa. (Luqaasi 12:24, 27-30 nabbawi.) Yesuusi hasiˈroommero wole saada woy muˈro qummi assa dandaanno; ikkirono isi rosaanosi seekkite affinore lawishshaho, ceanna daraaro lawishsha asse kulino. Rosaanosi haraqeeyye iima buubbanna hattono daraaro daraartanna laˈinoha ikkara dandaanno. Yesuusi angasi haraqeeyyenniwanna daraaronniwa qole coyiˈranna heda dandaatto. Konne lawishsha kulihu gedensaanni isi maa assiyya? Isi rosaanosira iimi Anninsa shaqqillinna danchumma daafira mitto kaajja roso rosiisinonsa: Yihowa haraqeeyyetenna xawu daraarora assinte gede ammanantino soqqamaanosira ittanno sagale aannonsa hattono uddisiisannonsa.

5. Annuwunna amuuwu oosonsara Yihowa daafira rosiisate kalaqama horoonsiˈra dandiitannohu hiittoonniiti?

⁵ Annuwanna amuuwa, oosoˈne rosiissinanni woyite Yesuusi lawishsha harunsitinanni? Oosoˈnera kiˈne baxxinanni kalaqami daafira lawishshaho, saadatenna muˈrote daafira kultinansara dandiitinanni. Togo assitinanni woyite kuni kalaqami Yihowa daafira maa rosiisannonsaro kullensa. Hakkiinni qaaqqoˈne isi baxanno muro woy saada daafira xaˈma dandiitinanni. Isi baxanno kalaqama horoonsidhine rosiissinisiro qaaqqiˈne Yihowa akatta daafira kultinannisi woyite seekke macciishshara dandaanno.

6. Kiristooferi ama lawishshinni maa ronseemmo?

⁶ Annuwunna amuuwu saada woy muˈro Yihowa daafira maa rosiissannoro oosonsara kulate qixxaabbanni lowo yanna guda hasiissannonsa? Dihasiissannonsa. Yesuusi haraqeeyye ma garinni sagaˈlitannoro woy xawu daraaro hiittoonni lophitannoro kulanni lowore dicoyiˈrino. Qaaqqiˈne Yihowa kalaqino kalaqami daafira mitto mittonka coye afa hasiˈrannoha ikkiro nafa, mito woyite kayinni qaaqqiˈne kultinara hasidhinoonnire huwatanno gede harancho hedo kula woy xaˈmo xaˈma calla ikkitanno. Kiristooferi yinanni rodii qaaqqu noo warita qaage togo yiino: “Amanke qooxeessinkera noo kalaqama banxeemmo gede kaaˈlate lowo coye dicoyidhanno. Lawishshaho, ilaalu noowa marrummoro togo yitannonke: ‘Kuni ilaali mageeshshihoronna biifino gara laˈe! Yihowa didhagge ikkanno Maganooti?’ Woy wuqiyanoose noowa marrummoro togo yitannonke: ‘Dambalu mageeshshi wolqa afiˈrinoro laˈe! Yihowa diwolqaataamo Maganooti?’” Kiristooferi, “Tini kaajjanna harancho hedo lowo geeshsha kaaˈlitinonke” yiino.

7. Qaaqqiˈne kalaqamu daafira hiincanno gede qajeelsa dandiitinannihu hiittoonniiti?

⁷ Qaaqqiˈne lophanni haˈranno woyite kalaqamu daafira seekke hedanno gedenna Yihowa daafira rosanno gede qajeelsa dandiitinanni. Yihowa kalaqinoha mitto kalaqama kultine qaaqqoˈne togo yitine xaˈma dandiitinanni: “Kuni kalaqami Yihowa daafira maa rosiisannohe?” Qaaqqiˈne kulannoˈnere macciishshitine dhagge assidhinara dandiitinanni.—Mat. 21:16.

8. Israeele ikkitino annuwinna amuuwi ‘doogo hadhanno’ woyite maa assate faro afidhanno?

⁸ Israeele ikkitino annuwinna amuuwi ‘doogo hadhanno’ woyite oosonsara Yihowa hajajo rosiissanno gede kulloonninsa. (Mar. 11:19) Tini doogo Israeelete gobbara gaxarete qooxeessi geeshsha iillitannote. Insa hadhanno woyite doogo batinye saada, ceanna daraaro laˈˈa dandiitanno. Maate mitteenni hadhanno woyite annuwunna amuuwu oosonsara Yihowa kalaqinori daafira rosiisate faro  afidhanno. Annuwanna amuuwa, kiˈneno togoo faro horoonsidhine oosoˈne rosiisa dandiitinanni. Hanni mitu annuwinna amuuwi tenne assino gara laˈno.

9. Puniitanna Kaatiya woˈnaalshinni maa rosootto?

⁹ Hindete gobbara jawu katami giddo heedhannoti Puniita yinanni ama togo yitino: “Gaxarete noo maatenke laˈnammora haˈneemmo woyite tenne faro horoonsiˈne oosonkera dhagge ikkannohu Yihowa kalaqino coyi daafira rosiinseemmonsa. Oosoˈya katamaho mannu batiˈrinowiinni hadhanno woyite kalaqama roore dhagge assidhanno yee hedeemma.” Annuwanna amuuwa, oosoˈne biifado bayicho kiˈne ledo sayissino yanna horo dihabbanno. Moldoovaho heedhannoti Kaatiya yinanni rodoo togo yitino: “Roorenkanni anje heeˈre gaxarete anniˈyanna amaˈya ledo sayisoomma yanna horo dihaweemma. Insa anjeˈyanni kayise Yihowa kalaqinore taxxi yee hedeemma gedenna kalaqama lae isi daafira roseemma gede kaaˈlitinoe daafira lowo geeshsha galaxxeemmansa.”

10. Annuwunna amuuwu heedhanno kataminni haˈra dandiitannokkiha ikkiro maa assa dandiitanno? (“ Annuwanna Amuuwa Kaaˈlitanno Hedo” yitanno saaxine lai.)

¹⁰ Gaxare haˈra dandiitinannikkihalla ikki? Hindete heeˈrannohu Amooli togo yiino: “Heeˈreemmo qooxeessira annuwunna amuuwu looso seeda saate loosa hasiissannonsa; qoleno gaxare haˈrate lowo woxi hasiisanno. Ikkirono shiimaadda paarke haˈne woy barandaho uurrine Yihowa kalaqinore laˈˈanna akattasi daafira hasaawa dandiineemmo.” Seekkitine heddiniro miniˈne qooxeessira oosoˈnera kula dandiitinannihu batinyu kalaqami noota huwata dandiitinanni. (Far. 104:24) Miniˈne qooxeessira cea, shiimaadda lubbuwa, muˈro woy woluri nooha ikkara dandaanno. Jarmanete heedhannoti Kariina togo yitino: “Amaˈya daraaro lowo geeshsha baxxanno; hakko daafira qaaqqo noomma waro lekkatenni milli yinummo  kiiro biifado daraaro laˈuro kultannoe.” Annuwanna amuuwa, oosoˈne rosiisate Yihowa dirijjite qixxeessitinota kalaqamu daafira kultannota batinye viidiyonna borruwano horoonsiˈra dandiitinanni. Addanko heedhinoonniwi ikkiwano ikkiro, oosoˈne Maganu kalaqinore seekkite laˈanno gede kaaˈla dandiitinanni. Hanni xa oosoˈnera kula dandiitinannita mite Yihowa akatta laˈno.

11. Annuwunna amuuwu oosonsa Yihowa baxannonsata huwattanno gede kaaˈla dandiitannohu hiittoonniiti?

¹¹ Oosoˈne Yihowa baxannonsata huwattanno gede kaaˈlate batinye saada oosonsa shaqqillunni towaaxxitanno gara kultinansara dandiitinanni. (Mat. 23:37) Qoleno hagiidhineemmo gede assannonkeha addi addi kalaqamano kultinansara dandiitinanni. Aleenni kulliti Kariina togo yitino: “Amaˈya ledo lekkatenni milli yineemmo woyite mitte mittenti daraaro lowo geeshsha baxxitinota ikkitinotanna biinfillinsa Yihowa baxille leellishannohu hiittoonniitiro seekke hedeemma gede jawaachishshannoe. Xaano lowo diri gedensaanni daraaro addi addita ikkase, Yihowa kalaqino gara hattono kuulansa seekke laeemma. Xaano ikkiro tini daraaro Yihowa mageeshshi geeshsha baxannonkero qaageemma gede assitannoe.”

12. Annuwunna amuuwu oosonsa Yihowa hayyo huwattanno gede kaaˈla dandiitannohu hiittoonniiti? (Faarso 139:14) (Misileno lai.)

¹² Oosoˈne Maganu hayyo huwattanno gede kaaˈlensa. Yihowa ninkenni roore lowo geeshsha hayyichaho. (Rom. 11:33) Lawishshaho wayi gomichoho soorramanno garanna kuni gomichi waa bayichunni bayicho haaˈre haˈranno gara oosoˈnera kula dandiitinanni. (Iyo. 38:36, 37) Qoleno dhagge ikkanno garinni kalaqaminohu mannu bisi daafirano kultinansara dandiitinanni. (Faarso 139:14 nabbawi.) Hanni Vilaadimiiri yinannihu mittu anni tenne assino gara laˈno. Isi togo yiino: “Mitto barra qaaqqinke biskilliitete aaninni uwe madiˈrino. Shiimu barri gedensaanni mada hurtinosi. Aninna minaamaˈya Yihowa bisonke kalaqinohu isi isonoo dhaawa dandaanno gede asse ikkinota kullummosi. Mannu loosannohu aye coyino hatto assa dandaannokkita kulloommosi. Lawishshaho makeenu gawajjamihu gedensaanni isonoo dhaawa didandaanno. Tini qaaqqinke Yihowa hayyo huwatanno gede kaaˈlitinosi.”

13. Annuwunna amuuwu oosonsa Maganu wolqa wodanchitanno gede kaaˈla dandiitannohu hiittoonniiti? (Isayaasi 40:26)

 ¹³ Yihowa iima hinge gordo laˈneemmo gedenna dhagge ikkitanno wolqasinna kalqe alame kalaqino gara hendeemmo gede koyisinonke. (Isayaasi 40:26 nabbawi.) Oosoˈne iima higge gordo laˈanno gedenna laˈinore hiincitanno gede jawaachishshensa. Hanni Tayiwaanete heedhannoti Tingitingi yinanni rodoo anje noo warita qaagge coyidhinore laˈno. Ise togo yitino: “Mitto barra amaˈya dunkaana qasiˈne gobba gallanniwa haadhe hadhinoe. Hakkiicho katamu caabbichi nookki daafira gordoho noota batinye beeddahe laˈˈa dandiinoommo. Hatte yannara, ledoˈya rossanno ooso waaddinoe daafira Yihowara ammaname soqqameemmaronna teˈee huluullame noomma. Amaˈya Yihowa tenne baala beeddahe kalaqate horoonsiˈrino wolqa hedeemma gedenna isi tenne wolqasinni iillannoe qarra baala dandee saeemma gede kaaˈlannoeta qaageemma gede jawaachishshinoe. Hakka woyite, kalaqama seekke laummahu gedensaanni Yihowa albinni roore afatenna isira soqqamate murciˈroomma.”

14. Annuwunna amuuwu kalaqama horoonsidhe, oosonsa Yihowa hagiirraamo Magano ikkinota affanno gede kaaˈla dandiitannohu hiittoonniiti?

¹⁴ Yihowa kalaqinori isi hagiirraamo ikkinotanna ninkeno hagiidhinammora hasiˈrannota leellishanno. Sayinsete fullahaano, roore saada lawishshaho ceanna qulxuˈme godoˈla dandiitannota huwattino. (Iyo. 40:20) Oosoˈne saada godoˈlitanna laˈe osoˈlite egentino? Basu qaaqquulli kaase shorranna woy woshshu buttuˈli mimmitu ledo godoˈlanna laˈe egentinoha ikkara dandaanno. Aantanno yannara oosoˈne saada godoˈlitanna laˈe osoˈlitanno woyite soqqammeemmo Magani Yihowa hagiirraamo ikkinota qaagganno gede kaaˈlensa.—1 Xim. 1:11.

15. Annuwunna amuuwu oosonsa giddonsata fushshite kuˈlitanno gede assate kaaˈlannonsari maati? (Lawishsha 20:5) (Misileno lai.)

¹⁵ Mito woyite annuwahonna amuuwaho oosonsa iillanni noonsa qarra kultannonsa gede assa qarra ikkitannonsa. Kiˈnerano tini qarra ikkitinoˈneha ikkiro, oosoˈne giddonsata fushshite kultannoˈne gede assa hasiissannoˈneha  ikkara dandaanno. (Lawishsha 20:5 nabbawi.) Mitu annuwinna amuuwi oosonsa ledo kalaqama laˈanni hagiidhitanno yannara oosonsa giddonsata fushshite kultannonsa gede assa shota ikkitinonsa. Mayira? Mittu korkaati, togoo yannara hakkeeshshi geeshsha hedonsa bebbeehantanno gede assanno coyi diheeˈranno. Tayiwaanete heeˈrannohu Masahiko yinannihu mittu anni wolereno qummi assino; isi togo yiino: “Oosonke ledo ilaala gooddiˈneemmo woyite woy baaru qaccera milli yineemmo woyite oosonke roore wodanaaˈmitanno. Togoo woyite giddonsata fushshite kuˈlitanno gede assa shota ikkitannonke.” Aleenni kulliti Kaatiya togo yitino: “Rosu mininni higummaro duucha woyite amaˈya biifado paarke haadhe hadhannoe. Togoo woyite, rosu mine tuncu yiinoere woy yaachishinoere kuˈla shota ikkitannoe.”

16. Maate Yihowa kalaqinore laˈanni boohaaranna hagiidha dandiitannohu hiittoonniiti?

¹⁶ Yihowa kalaqinori maate hagiidhitanni mitteenni yanna sayissanno gedeno kaaˈlannonsa; tini qolte mimmito albinni roore baxxanno gede assitannonsa. Qullaawu Maxaafi ‘hagiidhatenna sirbate yanna noota’ kulanno. (Ros. 3:1, 4) Yihowa banxeemmo coye assineemmoha biifado addi addi bayicho kalaqino. Batinye maate boohaarate qixxeessinoonni base, gaxarete qooxeessa, ilaalla woy baaru qacce hadhe boohaara baxxanno. Mitu qaaqquulli paarkete giddo dodamanna godoˈla, addi addi saada laˈˈa, baaraho, lagaho woy hayiqete waa daaha baxxanno. Boohaarreemmo gede assannohu Yihowa kalaqinohu batinyu coyi noonke!

17. Annuwunna amuuwu oosonsa Yihowa kalaqinorinni hagiidhitanno gede kaaˈla hasiissannonsahu mayiraati?

¹⁷ Maganu abbannote haaro alamera annuwunna amuuwu hattono oosonsa Yihowa kalaqinorinni konni albaanni hagiidhite egentinokki garinni hagiidhitanno. Hatte yannara saada waajjineemmo gede assannonkeri diheeˈranno; saadano ninke diwaajjitanno. (Isa. 11:6-9) Yihowa kalaqinorinni hegerera hagiidhineemmo. (Far. 22:26) Ikkirono annuwanna amuuwa, oosoˈne Yihowa kalaqinorinni hagiidhitanno gede assate hatte yanna geeshsha agara dihasiissannoˈne. Kalaqama horoonsidhine oosoˈnera Yihowa daafira rosiissinanniha ikkiro, insano Moote Daawiti yiinori ledo sumuu yitannoti dihuluullissannote. Daawiti, “Mooticha! . . . loosatto looso loosara dandaannohu dino” yiino.—Far. 86:8.