Boeezi “rodooˈya” yiino manchi, Ruuti adhiro oososira ‘iqqiˈrannori ajannosita’ coyiˈrinohu mayiraati? (Ruuti 4:1, 6)

Hundi waro mittu manchi ooso ilikkinni reyiro mannu aante noo gedee xaˈmuwa xaˈmara dandaanno: Baattosi hiikkitanno? Maatesi suˈmi hegerera baˈˈanno? Muse Seeri kuri xaˈmuwara dawaro qolanno.

Reyino manchita woy buxino daafira baattosi hirino manchi baatto ma assinanni? Rodiisi woy muli fiixisi hatte baatto woxxara woy ragiˈrara dandaanno. Tini, reyino manchi baatto maatesita ikkite heedhanno gede assitanno.—Lew. 25:23-28; Kir. 27:8-11.

Reyino manchi maate suˈmi baikkinni heeˈra dandaannohu hiittoonniiti? Mittu manchi reyiro minaamasi rodiisi woy muli fiixisi adhanno; Ruuti assidhinohuno hakko garinniiti. Minaanna shiidhino mancho adhino manchi isewiinni qaaqqo iliro, kuni qaaqqi hakko manchi jajja ragiˈranno. Tini baxillu qixxaawo minaanna shiidhinoterano kaaˈlitannote.—Mar. 25:5-7; Mat. 22:23-28.

Hanni Naaoomi xagge laˈno. Ise Elimeleeki yinanni manchira assidhino. Ise minaannasenna lame oosose shiidhuhu gedensaanni towaatannosehu nookkiha gattino. (Rut. 1:1-5) Naaoominna Ruuti Yihudu gobba higihu gedensaanni, Boeezi baattonsa hidhanno gede xaˈmitara Naaoomi ballose Ruutira kultino. Boeezi Elimeleekira muli fiixaati. (Rut. 2:1, 19, 20; 3:1-4) Ikkirono Boeezi, “rodooˈya” yee woshshi manchi isinni roore muli fiixa ikkinota huwatino. Hakko daafira balaxe ragiˈrate qoosso noosihu konne mancho ikkinohura Boeezi kuni manchi ragiˈra hasiˈrannoronna teˈee buuxa hasiˈrino.—Rut. 3:9, 12, 13.

Boeezi “rodooˈya” yee woshshi manchi umi qara maahoyye yiino. (Rut. 4:1-4) Isi baatto hidhate mito geeshshi woxe baata hasiissannosita afino; ikkirono Naoomi geedhitino daafira Elimeleeki baatto ragiˈranno qaaqqo ila dandiitannokkita huwatino. Hakko garinni tini baatto konni manchi iqqi wido ikkitanno; tini isi hoˈro afiˈranno gede assitanno.

Kayinni kuni manchi Ruutino ragiˈra hasiissannosita afiti giwino. Isi “Umiˈya oosora iqqiˈreemmori ajannoe daafira didandeemmo” yiino. (Rut. 4:5, 6) Isi hedinore agurinohu mayiraati?

Boeezi rodooˈya yii manchi woy wolu manchi Ruuti adheenna ise qaaqqo ilturo ilamanno qaaqqi Elimeleeki baatto ragiˈranno. Tini konni manchira oososira ‘iqqiˈrannori ajanno gede’ assitannohu hiittoonniiti? Qullaawu Maxaafi tenne daafira kulannori dino; hanni kayinni ikkara dandaannoha mito coye laˈno.

• Umihunni, Elimeleeki baatto gedensoonni konni manchita ikkitannokki daafira isi Elimeleeki baatto hidhate fushshino woxi mulla gatanno. Tini baatto gedensaanni Ruuti iltanno qaaqqita ikkitanno.

• Layinkihunni, isira Naoominna Ruuti itisatenna towaatate qeechi heeˈrannosi.

• Sayikkihunni, Ruuti konni manchira wole oosi ilturo Ruuti ooso hakko manchi ooso ledo iqqa taalo beeqqitanno.

• Shoolkihunni, konni manchira wole ooso noosikkiha ikkiro Ruuti iltanno qaaqqi Elimeleekitano konni manchi baattono ragiˈrate qoosso afiˈranno. Konni garinni isi reyiro baattosi ragiˈrannohu isi suˈminni ikkikkinni Elimeleeki suˈminni woshshamanno qaaqqooti. Kuni manchi oosoˈyara iqqiˈreemmori ajannoe yee Naoomi kaaˈla giwinohu iseraati. Isi, isinni aane ragiˈrate qoosso noosihu Boeezi ragiˈranno gede kulino. Boeezi ragiˈrinohu ‘reyino manchi suˈmi ilamasinna gaˈresi giddonni hawamikkinni heeˈranno gede’ assa hasiˈrino daafiraati.—Rut. 4:10.

Kuni manchi roore illachishinohu suˈmisi ayiddisi giddonni baˈˈannokki gede assiˈrateetinna iqqasi agadhateeti. Ikkollana isi hedinori diˈˈikkino; hatteentenni xaa yannara suˈmisi ayetiro nafa dianfoonni. Qoleno isi Boeezi afiˈrinota baxxitino qoosso hoogino; Boeezi Buuraminohu Yesuusi Kiristoosi dayino ilama wido ikkate qoosso afiˈrino. Boeezi rodooˈya yii manchi umosi calla baxino daafira kaaˈlo hasiissannonsare kaaˈla giwasi dadillissannote!—Mat. 1:5; Luq. 3:23, 32.