Boeezi “rodooꞌya” yiino manchi, Ruuti adhiro oososira ‘iqqiꞌrannori ajannosita’ coyiꞌrinohu mayiraati? (Ruuti 4:1, 6)

Hundi waro mittu manchi ooso ilikkinni reyiro mannu aante noo gedee xaꞌmuwa xaꞌmara dandaanno: Baattosi hiikkitanno? Maatesi suꞌmi hegerera baꞌꞌanno? Muse Seeri kuri xaꞌmuwara dawaro qolanno.

Reyino manchita woy buxino daafira baattosi hirino manchi baatto ma assinanni? Rodiisi woy muli fiixisi hatte baatto woxxara woy ragiꞌrara dandaanno. Tini, reyino manchi baatto maatesita ikkite heedhanno gede assitanno.—Lew. 25:23-28; Kir. 27:8-11.

Reyino manchi maate suꞌmi baikkinni heeꞌra dandaannohu hiittoonniiti? Mittu manchi reyiro minaamasi rodiisi woy muli fiixisi adhanno; Ruuti assidhinohuno hakko garinniiti. Minaanna shiidhino mancho adhino manchi isewiinni qaaqqo iliro, kuni qaaqqi hakko manchi jajja ragiꞌranno. Tini baxillu qixxaawo minaanna shiidhinoterano kaaꞌlitannote.—Mar. 25:5-7; Mat. 22:23-28.

Hanni Naaoomi xagge laꞌno. Ise Elimeleeki yinanni manchira assidhino. Ise minaannasenna lame oosose shiidhuhu gedensaanni towaatannosehu nookkiha gattino. (Rut. 1:1-5) Naaoominna Ruuti Yihudu gobba higihu gedensaanni, Boeezi baattonsa hidhanno gede xaꞌmitara Naaoomi ballose Ruutira kultino. Boeezi Elimeleekira muli fiixaati. (Rut. 2:1, 19, 20; 3:1-4) Ikkirono Boeezi, “rodooꞌya” yee woshshi manchi isinni roore muli fiixa ikkinota huwatino. Hakko daafira balaxe ragiꞌrate qoosso noosihu konne mancho ikkinohura Boeezi kuni manchi ragiꞌra hasiꞌrannoronna teꞌee buuxa hasiꞌrino.—Rut. 3:9, 12, 13.

Boeezi “rodooꞌya” yee woshshi manchi umi qara maahoyye yiino. (Rut. 4:1-4) Isi baatto hidhate mito geeshshi woxe baata hasiissannosita afino; ikkirono Naoomi geedhitino daafira Elimeleeki baatto ragiꞌranno qaaqqo ila dandiitannokkita huwatino. Hakko garinni tini baatto konni manchi iqqi wido ikkitanno; tini isi hoꞌro afiꞌranno gede assitanno.

Kayinni kuni manchi Ruutino ragiꞌra hasiissannosita afiti giwino. Isi “Umiꞌya oosora iqqiꞌreemmori ajannoe daafira didandeemmo” yiino. (Rut. 4:5, 6) Isi hedinore agurinohu mayiraati?

Boeezi rodooꞌya yii manchi woy wolu manchi Ruuti adheenna ise qaaqqo ilturo ilamanno qaaqqi Elimeleeki baatto ragiꞌranno. Tini konni manchira oososira ‘iqqiꞌrannori ajanno gede’ assitannohu hiittoonniiti? Qullaawu Maxaafi tenne daafira kulannori dino; hanni kayinni ikkara dandaannoha mito coye laꞌno.

• Umihunni, Elimeleeki baatto gedensoonni konni manchita ikkitannokki daafira isi Elimeleeki baatto hidhate fushshino woxi mulla gatanno. Tini baatto gedensaanni Ruuti iltanno qaaqqita ikkitanno.

• Layinkihunni, isira Naoominna Ruuti itisatenna towaatate qeechi heeꞌrannosi.

• Sayikkihunni, Ruuti konni manchira wole oosi ilturo Ruuti ooso hakko manchi ooso ledo iqqa taalo beeqqitanno.

• Shoolkihunni, konni manchira wole ooso noosikkiha ikkiro Ruuti iltanno qaaqqi Elimeleekitano konni manchi baattono ragiꞌrate qoosso afiꞌranno. Konni garinni isi reyiro baattosi ragiꞌrannohu isi suꞌminni ikkikkinni Elimeleeki suꞌminni woshshamanno qaaqqooti. Kuni manchi oosoꞌyara iqqiꞌreemmori ajannoe yee Naoomi kaaꞌla giwinohu iseraati. Isi, isinni aane ragiꞌrate qoosso noosihu Boeezi ragiꞌranno gede kulino. Boeezi ragiꞌrinohu ‘reyino manchi suꞌmi ilamasinna gaꞌresi giddonni hawamikkinni heeꞌranno gede’ assa hasiꞌrino daafiraati.—Rut. 4:10.

Kuni manchi roore illachishinohu suꞌmisi ayiddisi giddonni baꞌꞌannokki gede assiꞌrateetinna iqqasi agadhateeti. Ikkollana isi hedinori diꞌꞌikkino; hatteentenni xaa yannara suꞌmisi ayetiro nafa dianfoonni. Qoleno isi Boeezi afiꞌrinota baxxitino qoosso hoogino; Boeezi Buuraminohu Yesuusi Kiristoosi dayino ilama wido ikkate qoosso afiꞌrino. Boeezi rodooꞌya yii manchi umosi calla baxino daafira kaaꞌlo hasiissannonsare kaaꞌla giwasi dadillissannote!—Mat. 1:5; Luq. 3:23, 32.