1-2. Mittu manchi cuuamihu gedensaanni afiˈranno atooti maati?

 CUUAMME Yihowa maate wido ikka lowo geeshsha hagiirsiissanno. Tenne qoosso afidhinori faarsaanchu Daawiti coyiˈrino hedora sumuu yitanno; isi togo yiino: “Ati dooroottohura, Qullaawa Darga heeˈrara woshshoottosihura tashshi yoosi.”—Far. 65:4.

² Yihowa minisira woshshannohu baalanka manna diˈˈikkino. Sai birxichira ronsummonte gede, Yihowa isi ledo jaalooma kalaqiˈra hasidhannoriwa shiqqi yaanno. (Yai. 4:8) Heeshshokki Yihowara sayisse uyitto woyitenna cuuamitto woyite Yihowawa baxxino garinni shiqootto. Hakkunni gedensaanni isi ‘dancha atootesi batise aannoheta’ addaxxa dandaatto.—Mil. 3:10; Erm. 17:7, 8.

3. Heeshshonsa Yihowara sayisse uyite cuuantinori assa hasiissannonsahu shota ikkinokki coyi maati? (Rosiisaancho 5:4, 5)

³ Hige cuuama Yihowara soqqamate hanafotella. Cuuamittohu gedensaanni, guficho ikkannori woy ammanakki fonqolannori iillihero nafa cuuamitto woyite eootto qaale agadhite heeˈrate dandiittore baala assa hasiissannohe. (Rosiisaancho 5:4, 5 nabbawi.) Yesuusi rosaancho ikkootto daafira, dandiitto deerrinni isi lawishsha harunsanna hajajosi seekkite agadha hasiissannohe. (Mat. 28:19, 20; 1 Phe. 2:21) Kuni birxichi tenne assatto gede kaaˈlannohe.

 QARRUNNA FONQOLU HEEˈRIRONO YESUUSA HARUNSA AGURTINOONTE

4. Yesuusi rosaano, ‘masiqala’ woy qarru haqqa duqqitannohu ma garinniiti? (Luqaasi 9:23)

⁴ Cuuamittohu gedensaanni qarru nookki heeshsho heeˈratto yaa diˈˈikkino. Isinni Yesuusi, rosaanosi ‘qarru haqqa’ duqqa hasiissannonsata xawise kulino. Insa qarru haqqa duqqa hasiissannonsahu ‘barru barrunkunniiti.’ (Luqaasi 9:23 nabbawi.) Yesuusi hatto yaasi harunsaanosi woˈmanka woyite qarrantanno yaateni? Hatto yaa diˈˈikkino. Hatteentenni isi afidhanno atooteno agurranna qarru iillannonsata luphi asse kulanni no. Iillannonsa qarri giddo mitu lowo geeshsha xissiisannonsaha ikkara dandaanno.—2 Xim. 3:12.

5. Yesuusi uminsa horo agurtannori mayi atoote afidhannota kule qaale eino?

⁵ Minikki manni giwinoheha woy Maganu Gashshoote balaxisiisate yite mito maalaamittete coye aguroottoha ikkara dandaanno. (Mat. 6:33) Hatto ikkiro, Yihowa isira yite assoottore baala laˈˈannota addaxxa dandaatto. (Ibi. 6:10) Aante nooti Yesuusi coyiˈrino hedo halaale ikkase umikki heeshshonni laoottoha ikkara dandaanno; isi togo yiino: “Aneranna danchu duduwira yee labballo roduuwa woy meya roduuwa woy ama woy anna woy ooso woy gate agurannohu baalu, xa tenne yannara dartu ledo mine, labballo roduuwa, meya roduuwa, amuuwa, oosonna gate xibbe ero afiˈranno; dagganno alamera qole hegere heeshsho afiˈranno.” (Maq. 10:29, 30) Afiˈrootto atooti agurootto coye baala lowo geeshsha rooranno.—Far. 37:4.

6. Cuuamittohu gedensaannino “maalu yorto” qeeˈlate sharrama hasiissannohehu mayiraati?

⁶ Cuuamittohu gedensaannino “maalu yorto” qeeˈlate sharrama hasiissannohe. (1 Yoh. 2:16) Hatto assattohu guuntete xeˈne nooheha Addaami sircho ikkoottohuraati. Mito woyite, Soqqamaasinchu Phaawuloosira qarra ikkinosi coyi aterano qarra ikkahera dandaanno; isi togo yee borreessino: “Giddoyidi mannimmaˈya Maganu Seerinni hagiidhitanno. Ikkollana wodaniˈya seeri ledo gaaramannohu, mannimmaˈya widoonni cubbu seeri usuranya assannoehu wolu seeri mannimmaˈya giddo noota afoommo.” (Rom. 7:22, 23) Busha yorto qeeˈlate sharrama hexxo mudhatto gede assitahera dandiitanno. Ikkirono heeshshokki Yihowara sayisse uyitto woyite eootto qaale hedakki, fonqolo ikkannore gargadhate albinni roore murciˈratto gede kaaˈlitannohe. Heeshshokki Yihowara sayisse uyitto woyite eootto qaali fonqolo ikkannori iillannohe woyite kaaˈlannohe. Hiittoonni?

7. Heeshshokki Yihowara sayisse aakki isira ammanante heeˈratto gede kaaˈlitannohehu hiittoonniiti?

⁷ Heeshshokki Yihowara sayisse uyitto woyite umokki kaadootto. Hatto yaa Yihowa dadillissannota umikki hasatto giwa doodhootto yaate. (Mat. 16:24) Hakko daafira fonqolu tuncu yaannohe woyite maa assattoro heddanni yaada dihasiissannohe. Wonanni baalanka coye agurte Yihowara ammanante heeˈrate murcidhe kaootto. Iyyoobi gede Yihowa hagiirsiisate murcidhe heeˈratto. Isi buutote qarri iillisirono, “Keeraanchimmaˈya diagureemmo” yiino.—Iyo. 27:5.

8. Huuccatto assidhe heeshshokki Yihowara sayisse oottota hiincakki iillannohe fonqolo gargadhate kaaˈlitannohehu hiittoonniiti?

⁸ Huuccatto assidhe heeshshokki Yihowara sayisse oottota hiincakki iillannohe fonqolo baala gargadhate jawaante ikkitannohe. Lawishshaho wolu manchi galtera gara ikkinokki baxille leellishattoni? Hatto assattokkiti egennantinote! Togoo coye assattokki gede wonanni Yihowara qaale eootto. Konni garinni gara ikkitinokki yorto wodanikkira rumuxxitannokki gede assiˈrittoro, gedensaanni  iillannohe qarrinni gatatto. ‘Bushuullu doogowa higge dihaˈratto.’— Law. 4:14, 15.

9. Huuccatto assidhe heeshshokki Yihowara sayisse oottota hiincakki, ayyaanaamittete coye balaxisiisatto gede kaaˈlitannohehu hiittoonniiti?

⁹ Gambooshshe ganyite haˈrattokki gede assannohe loosolla afiˈritto? Togoo woyite maa assattoro afootto. Togoo looso afiˈrattora albaanni wonanni konni loosira maahoyye yaa hoogate murciˈrootto. Hakko daafira konne looso loossanni heedhenni Yihowa hagiirsiisa dandaattoronna teˈee heda dihasiissannohe. Yesuusi Annasi hagiirsiisate murciˈrino gara qaagakki, heeshshokki sayisse ootto Magano dadillissannoha aye coyeno bayichonko giwatto gede kaaˈlitannohe.—Mat. 4:10; Yoh. 8:29.

10. Yihowa cuuamittohu gedensaanni Yesuusa harunsa agurattokki gede kaaˈlannohehu hiittoonniiti?

¹⁰ Qarrunna fonqolu woˈmanka woyite Yesuusa harunsate murciˈroottota leellishatto faro fanannohe. Hatto assatto woyite Yihowa kaaˈlannoheta addaxxa dandaatto. Qullaawu Maxaafi togo yaanno: “Maganu ammanaminoho; wolqaˈnera aleenni ikkitino jifama iillitaˈnera wore dilaˈˈanno. Jifantinanni woyite cincitine saˈˈa dandiitinanni gede, fultinanni doogo qixxeessannoˈne.”—1 Qor. 10:13.

WOˈMANKA WOYITE YESUUSA HARUNSATE MAA ASSA DANDAATTO?

11. Woˈmanka woyite Yesuusa harunsineemmo gede kaaˈlitannonketi kaajja doogo hiittenneeti? (Misileno lai.)

¹¹ Yesuusi Yihowara diinaggaawe soqqamino; hattono huuccatto assiˈre isiwa gamba yee heeˈrino. (Luq. 6:12) Cuuamittohu gedensaanni Yesuusa harunsa agurattokki gede kaaˈlitannoheti kaajja doogo, woˈmanka woyite Yihowawa shiqatto gede kaaˈlannohere assate. Qullaawu Maxaafi, “Kulloonninke garinni heeˈnoommowiinni alba hinge qaanfo” yaanno. (Fil. 3:16) Yannate kiiro, soqqanshonsa  halashshiˈrate fushshidhino mixo wonshidhino roduuwi woˈnaalsha macciishshatto. Kuri roduuwi Maganu Mangiste Sawaakooti Rosi Mine eˈˈe rossinoha woy sabbakkannori roore hasiissannowa hadhinoha ikkara dandaanno. Dandaattoha ikkiro, atino togoo mixo fushshiˈrakki danchate. Yihowa manni isira albinni roore soqqamate quqquxamanno. (Soq. 16:9) Kayinni xa hatto assa dandaattokkihalla ikki? ‘Ani wolootu assitanno geeshshire assa didandeemmoho’ yite heddooti. Qaru coyi goofimarchu geeshsha Yihowara kaajjite soqqamate. (Mat. 10:22) Isira soqqamate dandiittore baala assitto geeshsha Yihowa hagiidhannota deˈooti. Cuuamittohu gedensaanni woˈmanka woyite Yesuusa harunsa dandaattoti qara doogo tenneeti.—Far. 26:1.

12-13. Albi gede diinaggaabbe soqqantanni noottokkiha ikkiro maa assa dandaatto? (1 Qorontoosi 9:16, 17) (“ Qolchanshote Giddonni Fultooti” yitanno saaxineno lai.)

¹² Albi gede giddokkita fushshite huuccidhanni noottokkitanna soqqanshokkinni hagiirraamo ikkoottokkita huwatittoro maa assa dandaatto? Qullaawa Maxaafa nabbawa albi geeshsha baxisanni noohekkihalla ikki? Cuuamittohu gedensaanni togoo coyi tuncu yiihero Yihowa ayyaana hoogoottohu gede assite heddooti. Guuntete xeˈne nooheha ikkootto daafira, yannate kiiro hedatto gari soorramara dandaanno. Albi gede diinaggaabbanni noottokkiha ikkiro, soqqamaasinchu Phaawuloosi lawishsha hiinci. Isi Yesuusi faale haˈrate woˈnaalinoha ikkirono, mito woyite assa hasiˈrinore assate hasatto heedhannosikkita afino. (1 Qorontoosi 9:16, 17 nabbawi.) Isi togo yiino: “Gadadinseennae kuleemmoha ikkiro kayinni, yinoonni wogalla wonshanni noommo yaate.” Phaawuloosi mito woyite hasatto heedhannosikkiha ikkirono, diinaggaawe soqqanshosi umo fushshate murciˈrino.

 ¹³ Hatteente gede atino guuntete xeˈne nooheha ikkootto daafira, hedattori gara ikkinokkire doodhatto gede assahera wodhitooti. Hasatto heedhannohekki woyite nafa gara ikkinore assate murciˈri. Woˈmanka woyite gara ikkinore assate sharramattoha ikkiro, gale hose hedatto garino soorramara dandaanno. Ganyite ayyaanaamittete coye assakki cuuamittohu gedensaannino woˈmanka woyite Yesuusa harunsatto gede kaaˈlitannohe. Woˈmanka woyite tenne assakki ammanate roduuwakkino jawaachishshanno.—1 Tes. 5:11.

“KIˈNENEE QONQOLCHITINE . . . FONQOLTINE LAˈE”

14. Ganyite maa layiˈra hasiissannohe? Mayira? (2 Qorontoosi 13:5)

¹⁴ Cuuamittohu gedensaanni ateneeto ganyite layiˈrakkino kaaˈlitannohe. (2 Qorontoosi 13:5 nabbawi.) Barru baala huuccatto assidhanni noottoro, Qullaawa Maxaafa nabbabbanninna xiinxallitanni noottoro, gambooshshe hadhanni noottoronna soqqansho fultanni noottoro yannate kiiro ateneeto seekkite layiˈrakki danchate. Yihowa magansiˈrate assattoti kuri coyibba roore baxissannohe gede assiˈrate woˈnaali. Lawishshaho ateneeto aante noo xaˈmuwa xaˈmi: ‘Xinta ikkinoha Qullaawu Maxaafi roso wolootaho xawise kula dandeemmo? Soqqanshoˈya roore hagiirsiissannota assiˈra dandeemmo gari no? Mitto mittonka coye bade kule huucciˈreemmo? Hattono huuccattoˈya Yihowa woˈmunni woˈma addaxxeemmota leellishshanno? Gambooshshe ganye haˈreemmo? Gambooshshunniwa seekke macciishshanna qoleemmo dawaro woyyeessiˈra dandeemmohu hiittoonniiti?’

15-16. Fonqolo dandee saˈˈate daafira mittu rodii woˈnaalshinni maa rosootto?

¹⁵ Laanfekki maatiro afate ateneeto seekkite layiˈrakkino danchate. Rooberti yinanni rodii woˈnaalshi tenne leellishanno; isi togo yiino: “Lemuu diri balla ikke nooe yannara darate barra looso looseemmo. Mitto barra loosu gedensaanni, ledoˈya loossanno beetto minisera koyissue. Ise, ‘Wolu noohu nookki daafira hasiˈnummota ikka dandiineemmo’ yitinoe. Umi qara tidhinokki korkaata shiqishoommo; gedensoonni kayinni dihasiˈreemmo yee hasiˈreemmokkihu mayiraatiro xawise kuloommose.” Rooberti fonqolo dandee saino; tini danchate. Ikkirono gedensoonni isi hakkawarita qaage, hatte yannara iillinosi fonqolo hakkiinni woyyino garinni qeele saˈˈa dandaannota wodanchino. Isi lede togo yiino: “Yooseefi Phoxifaari minaamara qoli garinni kaajjishe bayichonkonni dihasiˈreemmo  yee diqoloommo. (Kal. 39:7-9) Isinni ise koyissinoe koyishsha dihasiˈreemmo yaa qarra ikkitinoe gari dhagge ikkannoe. Hakku iillinoe coyi Yihowa ledo nooe jaalooma kaajjishiˈra hasiissannoeta wodancheemmo gede assinoe.”

¹⁶ Rooberti assinte gede ateneeto seekkite layiˈrakki kaaˈlitahera dandiitanno. Fonqolo dandiite saoottoha ikkiro nafa, ateneeto, ‘Konne fonqolo bayichonkonni giwoommo?’ yite xaˈmi. Woyyeessiˈratto coyi noota afittoro hexxo mudhitooti. Xa laanfekki afootto daafira hagiidha dandaatto. Tenne hajo daafira huuccatto assiˈri; hattono albinni roore Yihowa fushshinohu amanyootu seeri garinni heeˈrate kaaˈlannohere assi.—Far. 139:23, 24.

17. Rooberti assinori Yihowa suˈmi ayirranno gede assinohu hiittoonniiti?

¹⁷ Rooberti woˈnaalshinni ronseemmori wolurino no. Isi togo yiino: “Ledoˈya loossanno beetto koyissinoe koyishsha giwummohu gedensaanni, ise ‘Fonqolo saootto!’ yitinoe. Hakkiinni mayyaate? yee xaˈmummose. Isera, alba Yihowa Farciˈraasincho ikkino jaalise, ‘Baalunku Yihowa Farciˈraasine ikkitino wedelli coyi dagatinsaro mannu afikkinni gara ikkinokkire assitanno’ yee kulinose. Hakko daafira ise jaalisera ane fonqolte laˈannota kultinosi. Anino Yihowa suˈmi ayirranno gede assoommota afummoti lowo geeshsha hagiidhoommo.”

18. Cuuamittohu gedensaanni maa assate murciˈrootto? (“ Kaaˈlannoheha Lame Birxicho” yitanno saaxineno lai.)

¹⁸ Heeshshokki Yihowara sayisse uyite cuuamitto woyite, dayirino dayiro Yihowa suˈmi qullaawanno gede assa hasiˈrattota leellishootto. Yihowa iillannohe qarranna dandiite saˈˈatto fonqolo afannota addaxxa dandaatto. Yihowa isira ammanante heeˈrate assattore maassiˈranno. Isi tenne assatto gede qullaawu ayyaanisi widoonni jawaante aannoheta addaxxi. (Luq. 11:11-13) Yihowa kaaˈlonni cuuamittohu gedensaannino woˈmanka woyite Yesuusa harunsa dandaatto.