1-2. Mittu manchi cuuamara albaanni ma assa hasiissannosi?

 SAIHU ontu diri giddo mitte miliyoone saꞌꞌanno manni cuuame Yihowa Farciꞌraasine ikkino. Umi xibbi diro heeꞌrino rosaanchi Ximootewoosi gede, konni manni giddo batinyu manni, halaale rosinohu ‘anjensanni kayiseeti.’ (2 Xim. 3:14, 15) Wolootu rossinohu jajjabba ikkituhu gedensaanniiti; mitootu rossinohu kayinni geedhimmate yannansaraati. Mitte mancho Yihowa Farciꞌraasine ledo Qullaawa Maxaafa xiinxallite cuuantinohu 97 dirisenniiti!

² Yihowa Farciꞌraasine ledo Qullaawa Maxaafa xiinxallitanni noottoha woy halaalu mine lophoottoha ikkiro, cuuamate heddanni nootto? Tini kaajja mixooti! Ikkirono, cuuamattora albaanni heeshshokki Yihowara sayisse aa hasiissannohe. Konni birxichira heeshshonke Yihowara sayinse aate yaa mayyaatero ronseemmo. Qoleno qixxaawoottoha ikkiro, heeshshokki Yihowara sayisse aatenna cuuamate hobbi ruxxi yaa hasiissannohekkihu mayiraatiro laꞌneemmo.

HEESHSHONKE YIHOWARA SAYINSE AATE YAA MAYYAATE?

3. Qullaawu Maxaafi giddo kulloonniha Yihowara baxxino manni lawishsha kuli.

³ Qullaawu Maxaafi giddo, mittu manchi heeshshosi Yihowara sayise aanno woyite qullaawu loosira baxxinoha ikkannota kulloonni. Israeele Yihowara baxxitino dagaati. Kayinni insa giddo mitu manni, heeshshonsa Yihowara sayise uyinohu baxxino garinniiti. Lawishshaho Aarooni, Yihowara ‘aamaminoha’ woy baxxinoha ikkinota leellishannoha culku irra aanaho worroonniha xaanxoonni koffiya umoho wodhanno. Kuni culku irri isi baxxino loosira yaano Israeelenniha Kakkalaanote  Biilo ikke soqqamate dooraminota leellishanno. (Lew. 8:9) Naazirootuno Yihowara baxxino garinni soqqamate doorantino. “Naaziricha” yaanno qaali naaziri yaannohu Ibiraawootu afii qaalinni dayinoho; Naaziricha yaa, “Baxxinoha” woy “Dooraminoha” yaate. Naazirootu Muse Seeri giddo kulloonnita baxxitino hajajo agadha hasiissannonsa.—Kir. 6:2-8.

4. (a) Heeshshonsa Yihowara sayisse uyitinori qullaawu loosira baxxitinore ikkitannohu ma garinniiti? (b) “Umosi kaado” yaa mayyaate? (Misileno lai.)

⁴ Heeshshokki Yihowara sayisse aatto woyite, Yesuusi Kiristoosi rosaancho ikkanna Maganu fajjo balaxisiisa hasiꞌrattota leellishatto. Heeshshokki Yihowara sayisse aate maa assa hasiissannohe? Yesuusi, “Hoodeꞌya haꞌra hasiꞌrannohu aye manchino umosi kaado” yiino. (Mat. 16:24) “Umosi kaado” yine tirroonniha Giriikete afii qaale, “xaate umisira heeꞌroonke” yineno tira dandiinanni. Atino heeshshokki Yihowara sayisse ootto soqqamaancho ikkootto daafira, Yihowa fajjo ledo sumuu yaannokki coye baala giwa hasiissannohe. (2 Qor. 5:14, 15) Tenne assate ‘maalu looso’ lawishshaho foorre giwa hasiissannohe. (Gal. 5:19-21; 1 Qor. 6:18) Tini hajajo furro fuuqqo hooltannoni? Yihowa baxattohanna seerisi ate umokki kaaꞌlannoheta ammanattoha ikkiro, tini hajajo qarra diꞌꞌikkitannohe. (Far. 119:97; Isa. 48:17, 18) Nikolaasi yinanni rodii tenne daafira togo yiino: “Mittu manchi Yihowa seera, hasiꞌrinore assannokki gede hoolannosihu usuru mini gede asse laꞌꞌara woy doobbiichu itannosikki gede kaaꞌlannosi huxxi gede asse laꞌꞌara dandaanno.”

5. (a) Heeshshokki Yihowara sayisse aattohu hiittoonniiti? (b) Heeshshonke Yihowara sayisse aatenna cuuamate mereero noo badooshshi maati? (Misileno lai.)

⁵ Heeshshokki Yihowara sayisse aattohu hiittoonniiti? Yihowa calla magansiꞌratenna heeshshokki giddo isi fajjo balaxisiisate huuccattotenni qaale eatto. Hakkiinni,  woꞌmanka woyite Yihowa “woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni” baxate qaale eatto. (Maq. 12:30) Heeshshokki Yihowara sayisse aa atinna Yihowa calla affinannireeti. Cuuamattohu kayinni mannu albaanniiti; hatto assittoro wolootu heeshshokki Yihowara sayisse oottota affanno. Heeshshokki Yihowara sayisse aa qullaawa xanooti; tenne xano wonsha hasiissannohe; Yihowano wonshattora hasiꞌranno.—Ros. 5:4, 5.

HEESHSHOKKI YIHOWARA SAYISSE AATTOHU MAYIRAATI?

6. Mittu manchi heeshshosi Yihowara sayise aanno gede kakkayisannosiri maati?

⁶ Heeshshokki Yihowara sayisse aatto gede assannohehu qaru korkaati isira noohe baxilleeti. Yihowa baxattohu iso baxa mulla hagiirsiissannohe daafira calla diꞌꞌikkino. Hatteentenni Yihowanna isi hedinori daafira gara ikkinore rosakki isira noohe baxilli lexxanno gede assitino. (Qol. 1:9) Qullaawa Borro xiinxallakki, (1) Yihowa addinta nooha ikkinota, (2) Qullaawu Maxaafi Maganu ayyaaninni borreessinoonniha ikkinotanna (3) Yihowa fajjosi wonshate dirijjitesi horoonsiꞌranni noota ammanatto gede assitinohe.

7. Heeshshonke Maganoho sayinse uyinammora albaanni ma assa hasiissannonke?

⁷ Heeshshonsa Maganoho sayisse uyitinori, Maganu Qaali giddo nooha xinta roso afanna Maganu biddishshi ledo sumuu yaanno garinni heeꞌra hasiisannonsa. Insa dandiitu deerrinni rossino roso wolootaho kultanno. (Mat. 28:19, 20) Yihowara noonsa baxilli lexxanni haꞌrino; hattono iso calla magansiꞌrate lowo hasatto noonsa. Ate hasattono iseeti? Heeshshokki Yihowara sayisse aattohunna cuuamattohu  Yihowa woꞌmu wodanikkinni baxatto daafiraati ikkinnina, Qullaawu Maxaafi rosiisaanchokki woy annakkinna amakki hagiirsiisate woy jaallakki hatto assitino daafira diꞌꞌikkino.

8. Yihowara noohe galati heeshshokki isira sayisse aatto gede kaaꞌlannohehu hiittoonniiti? (Faarso 116:12-14)

⁸ Yihowa assinohere baala hedittoro iso galatanna heeshshokki isira sayisse aa hasiꞌratto. (Faarso 116:12-14 nabbawi.) Qullaawu Maxaafi ‘dancha eltonna woꞌma atoote baala’ afiꞌnannihu Yihowawiinni ikkinota kulanno. (Yai. 1:17) Isi uyinonke elto baala roortannoti Beettisi Yesuusi kakkalooti! Hanni tenne hedi! Wodo Yihowa ledo muli jaalooma kalaqiꞌratto gede assitinohe. Qoleno isi hegerera heeꞌrate hexxo uyinohe. (1 Yoh. 4:9, 10, 19) Heeshshokki Yihowa sayisse aa isi leellishinohehu baalanka rooranno baxilliranna isiwiinni afiꞌrootto atooti baalaho galatu nooheta leellishattote qara doogooti. (Mar. 16:17; 2 Qor. 5:15) Hegerera Hagiidhitanni Heeꞌra Dandaatto! yaanno maxaafa roso 46, naxiwe 4te Yihowa galata dandiineemmo gara luphi assine kulloonni; hattono konni maxaafira nooti Maganoho Aa Dandiineemmore yitannoti sasu daqiiqi viidiyo tenne xawissanno.

HEESHSHOKKI MAGANOHO SAYISSE AATENNA CUUAMATE QIXXAAWOOTTO?

9. Mittu manchi heeshshosi Yihowara sayise aanno gede xixxiiwa hasiissannokkihu mayiraati?

⁹ ‘Heeshshoꞌya Yihowara sayisse aatenna cuuamate diqixxaawoommo’ yite hedattoha ikkara dandaanno. Yihowa biddishshi garinni heeꞌrate biddi assiꞌra hasiissannohe coyi nooha woy ammanakki roore kaajjishiꞌrate yanna hasiissannoheha ikkara dandaanno. (Qol. 2:6, 7) Baalanti Qullaawu maxaafi rosaano ayyaanaamittetenni taalo lophitanno yaa diꞌꞌikkino; qoleno mitu wedelli heeshshonsa Yihowara sayisse uyitannohunna cuuantannohu babbaxxino diri giddo heedheeti. Ateneeto wolootu ledo heewisiisittokkinni assa dandaattore heddanni ayyaanaamittetenni mageeshsha lophoottoro seekkite hedi.—Gal. 6:4, 5.

10. ‘Heeshshoꞌya Yihowara sayise aatenna cuuamate diqixxaawoommo’ yite hedattoha ikkiro ma assa dandaatto? (“ Halaalu Mine Lophitinore Kaaꞌlitanno Hedo” yitanno saaxineno lai.)

¹⁰ Heeshshokki Yihowara sayisse aate qixxaawoottokkita wodanchittoro nafa, mixokki wonshiꞌrate sharrama agurtooti. Biddi assiꞌra hasiissannohe coyi ikkihano ikkiro, assattore maassiꞌrannohe gede Yihowa huucciꞌri. (Fil. 2:13; 3:16) Isi huuccattokki macciishshannotanna dawaro qolannoheta addaxxa dandaatto.—1 Yoh. 5:14.

MITOOTU HOBBI RUXXI YITANNOHU MAYIRAATI?

11. Yihowa isira ammanamme heeꞌneemmo gede kaaꞌlannonkehu hiittoonniiti?

¹¹ Mitootu heeshshonsa Yihowara sayisse aatenna cuuamate qixxaabbinoha ikkirono hobbi ruxxi yitanno. Insa, ‘Cuuammummohu gedensaanni jawa cubbo loonsella bohammummo?’ yite yaaddara dandiitanno. Atino hatto yite waajjattoha ikkiro, Yihowa ‘isira maltino heeshsho heedhanni baalunku coyinni iso hagiirsiisatto gede’ kaaꞌlannoheta addaxxa dandaatto. (Qol. 1:10) Qoleno isi gara ikkinore assatto gede jawaante aannohe. Isi konni albaanni batinye manna kaaꞌle tenne assa dandaannota leellishino. (1 Qor. 10:13) Xaphoomunni laꞌniro Kiristaanu songo giddonni bohamanno manni kiiro shiima ikkitinohu iseraati. Yihowa mannisi isira ammaname heeꞌranno gede kaaꞌlannonsa.

12. Jawa cubbo loonseemmokki gede qoropha dandiineemmohu hiittoonniiti?

¹² Guuntete xeꞌne noonsa manni baalu gara  ikkinokkire assate fonqolamanno. (Yai. 1:14) Ikkirono, fonqolu iillannohe woyite maa assattoro doodha hasiissannohe. Noore coyiꞌniro hiittoo heeshsho heeꞌrattoro doodhattohu ate umokkiiti. Kayinni mitu manni tini digaraho yaannoha ikkirono, gara ikkitinokki hedo qeeꞌlatto gara rosa dandaatto. Qoleno fonqolo ikkannori tuncu yiihero nafa gara ikkinokkire assa hooga doodha dandaatto. Hakko daafira ganyite huuccatto assiꞌri. Maganu Qaale xiinxallate rosichi heeꞌrohe. Gambooshshe haꞌri. Ammanakki daafira wolootaho kuli. Hatto assakki heeshshokki Yihowara sayisse uyitto woyite eootto qaali garinni heeꞌratto gede kaaꞌlitannohe. Qoleno Yihowa tenne assatto gede kaaꞌlannoheta horo deꞌooti.—Gal. 5:16.

13. Yooseefi dancha lawishsha ikkinonkehu hiittoonniiti?

¹³ Fonqolu tuncu yaannohe woyite maa assattoro balaxxe hedittoro, heeshshokki Yihowara sayisse uyitto woyite eootto qaale agadhite heeꞌra qarra diꞌꞌikkitannohe. Qullaawu Maxaafi giddo, guuntete xeꞌne noonsaha ikkirono Yihowara ammaname heeꞌrinohu batinyu manni noota kulloonni. Lawishshaho Phoxifaari minaama Yooseefi soꞌrisiisate duucha higge woꞌnaaltino. Kayinni isi maa assannoro wonanni balaxe afe no. Qullaawu Maxaafi Yooseefi giwinota kulanno; isi togo yiino: “Maganu albaanni tenne jawa bunshenna konne cubbo hiitto asse looseemmo?” (Kal. 39:8-10) Yooseefi Phoxifaari minaama iso soꞌrisiisate woꞌnaaltara albaanni nafa maa assannoro balaxe afinoti dihuluullissannote. Tini fonqolu iillisi woyite gara ikkinore assa qarra ikkitannosikki gede assitino.

14. Busha coye giwa rosa dandiineemmohu hiittoonniiti?

¹⁴ Yooseefi gede mitte giddoha ikkoottota leellisha dandaattohu hiittoonniiti? Fonqolu iillannohe woyite maa assa dandaattoro xaanni heda dandaatto. Yihowa giwanno coye bayichonkonni giwa rosi; togo coye heda nafa heddooti. (Far. 97:10; 119:165) Hatto assattoha ikkiro fonqolu iillannohe woyite mitte giddoha ikkatto. Korkaatuno maa assattoro balaxxe affe nootto.

15. Mittu manchi Magano ‘hasiꞌrannota’ leellisha dandaannohu hiittoonniiti? (Ibiraawoota 11:6)

¹⁵ Halaale afiꞌroottota afoottohanna woꞌmu wodanikkinni Yihowara soqqama hasiꞌrattoha ikkara dandaanno; ikkirono mitu coyi heeshshokki Yihowara sayisse uyite cuuamattokki gede guficho ikkahera dandaanno. Togoo  woyite Moote Daawiti assinore assa dandaatto. Yihowa togo yite eeggifatte huucciꞌra dandaatto: “Maganoꞌya ballo, fonqolte foniiꞌyatano afi; jiffe laie, hedoꞌyano afi. Giddoꞌya sao nooro lai; hegere doogo aanano haꞌrisie.” (Far. 139:23, 24) Yihowa ‘iso hasidhannore’ maassiꞌranno. Heeshshokki Yihowara sayisse aatenna cuuamate fushshiꞌrootto mixo wonshiꞌrate sharramakki tenne assitanni noottota leellishshanno.—Ibiraawoota 11:6 nabbawi.

WOꞌMANKA WOYITE YIHOWAWA SHIQQE

16-17. Halaalu mine lophitinori Yihowawa shiqqinohu hiittoonniiti? (Yohaannisi 6:44)

¹⁶ Yesuusi rosaanosi isiwa dagganno gede assinohu Yihowa ikkinota coyiꞌrino. (Yohaannisi 6:44 nabbawi.) Hanni tini hedo mageeshshi geeshsha dhagge ikkitannoteronna ate ma garinni kaaꞌlitannohero hedi. Yihowa mittu mittunku manchi giddo nooha dancha coye laꞌꞌanno daafira isiwa abbanno. Isi mitto mittonka mancho ‘umisi woxi’ gede woy baxxino jajjisi gede asse laꞌꞌanno. Isi ateno konni garinni laꞌꞌannohe.

¹⁷ Ikkollana ati halaalu mine lophootto wedellicha ikkattora dandaatto. Yihowara soqqamattohu isi umisiwa abbinohe daafira ikkikkinni annikkinna amakki Yihowara soqqantanno daafira ikkinohu gede assite hedattoha ikkara dandaanno. Ikkirono Qullaawu Maxaafi togo yaanno: “Maganunniwa shiqqi yiiyye; isino kiꞌnewa shiqqi yaanno.” (Yai. 4:8; 1 Dud. 28:9) Ati umikkinni kaꞌe Yihowawa shiqqi yaattoha ikkiro, isino atewa shiqqi yaanno. Yihowa halaalu minira maatekki laꞌe dayottohu gede asse dihedanno. Isi mitto mittonka mancho hattono halaalu mine lophitinoreno umisiwa abbanno. Yaiqoobi 4:8 kultannonte gede togoo manchi Yihowawa shiqqi yiiro Yihowano isiwa shiqanno.—2 Teselonqe 2:13 ledo heewisiisi.

18. Aananno birxichira maa ronseemmo? (Faarso 40:8)

¹⁸ Heeshshokki Yihowara sayisse uyite cuuamatto woyite Yesuusi lawishsha harunsattota leellishatto. Isi Annisi assanno gede kulinosire baalankare assate maahoyye yiino. (Faarso 40:8 nabbawi; Ibi. 10:7) Aananno birxichira cuuamittohu gedensaanni Yihowara ammanante soqqantanni heeꞌratto gede kaaꞌlannoheri maatiro xiinxallineemmo.