Cubbinkera maaro afiꞌneemmohu Yesuusi mundeesinni baatinote wodote kakkalo widoonni callaati. (Efe. 1:7) Ikkirono, Qullaawu Maxaafi “Maganu hatto assinohu, cincasinni albi cubbo hune halaalaancho yoosi leellishara yeeti” yaanno; togo yaa Yesuusi wodo ikkara albaanni yaate. (Rom. 3:25) Yihowa taashshote daafira fushshino seeri diigamikkinni wodote kakkalo shiqqara albaanni cubbo gatona yaa dandaannohu hiittoonniiti?

Yihowa isonna isi uyino hexxo ammananno manna gatisanno ‘sircho’ qixxeessate hedi yannanni kayise, wodote kakkalo shiqqinohu gede asse laino. (Kal. 3:15; 22:18) Maganu hirqino yannara, mittu Beettisi wodote kakkalo ikkate maahoyye yaannota seekke afino. (Gal. 4:4; Ibi. 10:7-10) Yesuusi uullate aana noo yannara wodote kakkalo shiqqara albaanni cubbo gatona yaanno gede Yihowa silxaane uyinosi. Isi tenne assinohu albillitte shiqqannoti wodote kakkalo ammana noonsa manni cubbinsara maaro afiꞌranno gede assitannota afino daafiraati.—Mat. 9:2-6.