1, 2. (a) Yesuusi heeshshosi giddo illachishinohu hiikkonni loosi aanaati? Mayira? (b) “Maganu ledo” loonseemmore ikkinoommo daafira, loosinkenni dancha guma afiꞌrate maa assa hasiissannonke?

 YESUUSI KIRISTOOSI uullate aana noo yannara hanaatsicha ikke loosino, hattono manna rosiisino. (Maq. 6:3, NW; Yoh. 13:13) Isi lamenka looso seekke loosino. Yesuusi hanaatsichu heeꞌre, babbaxxinoha hanaatsete uduunne horoonsiꞌre haqqa bonce biifado uduunne loonsanni gara rosino. Qoleno isi rosiisaancho ikke, batinyu manni Maganu Qaali halaale wodanchanno gede kaaꞌlinonsa; isi tenne assi yannara Qullaawu Maxaafi egennosi seekke horoonsiꞌrino. (Mat. 7:28; Luq. 24:32, 45) Yesuusi 30 diro ikkisita, hanaatsimmate looso agure rosiisa hanafino; isi hatto assinohu kuni loosi wolu baalunkunni roore hasiisannoha ikkinota afino daafiraati. Isi Maganu uullara soyinosi korkaati giddo mittu Maganu Mangisteha dancha duduwo duduwate ikkinota coyiꞌrino. (Mat. 20:28; Luq. 3:23; 4:43) Yesuusi heeshshosi giddo roore illachishinohu sabbakate loosi aanaati, qoleno wolootu hatto assitara hasiꞌrino.—Mat. 9:35-38.

² Ninke hanaatse ikka hoongammora dandiineemmo; ikkollana ninke baalunku Maganu Mangisteha dancha duduwo dudumbeemmoreeti. Kuni loosi lowo geeshsha hasiisannoha ikkino daafira, Maganu ledonke loosanno; konnira ninke “Maganu ledo loonseemmoreeti.” (1 Qor. 3:9; 2 Qor. 6:4) Yihowa ‘qaali woꞌmunni woꞌma halaale’ ikkinota dihuluullammeemmo. (Far. 119:159, 160) Soqqammeemmo woyite, ‘halaalu qaale taashshine’ rosiinseemmohu iseraati. (2 Ximootewoosi 2:15 nabbawi.) Konni daafira, Qullaawa Maxaafanna  wole borruwanke horoonsiꞌne mannaho Yihowa, Yesuusinna Maganu Mangiste daafira halaale rosiisate, kuri uduunnicho horoonsiꞌnanni gara seekkine rosa hasiissannonke. Soqqanshonkenni dancha guma afiꞌneemmo gede, Yihowa dirijjite babbaxxino uduunnicho qixxeessitinonke. Konne uduunne Rosiisate Horoonsiꞌneemmo Borruwa yine woshshineemmo.

3. Soqqammeemmo woyite mayi aana illachisha hasiissannonke? Soqqamaasinete Looso 13:48 kultanno garinni ayeoo hasa hasiissannonke?

³ ‘Sabbakate Horoonsiꞌneemmo Borruwa yaa agurre Rosiisate Horoonsiꞌneemmo Borruwa yinoonnihu mayiraati?’ yite hedattoha ikkara dandaanno. “Sabbakate” yaa sokka duduwate; “rosiisate” yaa kayinni mittu manchi rosino rosi garinni heeꞌranno gede hatte sokka surresiranna wodanisira qaꞌmidhanno gede seekke xawisate. Tini alame baꞌanno yanna gambissino daafira, manna Qullaawu Maxaafi xiinxallo hanafisiisatenna halaale rosiisate aana illachisha hasiissannonke. Hatto yaa, “hegere heeshsho afiꞌrate gara ikkitinoti wodanu dooꞌꞌo” noonsare diinaggaambe hanseemmo yaate.—Soqqamaasinete Looso 13:48 (NW) nabbawi. a

4. “Hegere heeshsho afiꞌrate gara ikkitinoti wodanu dooꞌꞌo” noonsare afa dandiineemmohu hiittoonniiti?

⁴ “Hegere heeshsho afiꞌrate gara ikkitinoti wodanu dooꞌꞌo” noonsare afa dandiineemmohu hiittoonniiti? Umi xibbi dirinte gede togoo manna afa dandiineemmo doogo, insara farciꞌrate. Konni daafira, Yesuusi, “Martinanni katamira woy qachira sokka macciishsha hasiissannosi mancho hasse” yee hajajinonke hajajo harunsineemmo. (Mat. 10:11, NW) Suwashshu wodani noonsakkihu woy ayyaanaamittete coye baxannokki manni dancha duduwo macciishsha baxanno yine dihendeemmo. Ninke ammanaminoha, umonsa heeshshi assannohanna halaale gooꞌrino manna hanseemmo. Yesuusi hanaatsicha ikke loosanno yannara mini uduunne, saanqa, qambara woy wole uduunne seekkate subbino haqqe hasinoha ikkara dandaanno. Isi dancha haqqe afiꞌri gedensaanni, uduunnichosinna ogimmasi horoonsiꞌre uduunne seekkanno. Ninkeno balanxe suwashshu wodani noonsa manna hanseemmo; hakkiinni noonke uduunnenna ogimmanke horoonsiꞌne Yesuusi rosaano ikkitanno gede kaaꞌlineemmonsa.—Mat. 28:19, 20.

5. Rosiisate Horoonsiꞌneemmo Borruwanke daafira maa afa hasiissannonke? Lawishsha kuli. (Hanafote noo misilla lai.)

⁵ Hanaatse horoonsidhanno uduunni addi addi horo afiꞌrino. Lawishshaho hanni Yesuusi hanaatsicha ikke heeꞌre horoonsiꞌrino uduunne hedi. b Isira haqqe bikkatenna masimara fushshate, haqqe darate, xulluwanna akeeka fushshate hattono mitteenni xaadisate babbaxxino uduunni hasiisinosi. Hatteente gede mitte mittenti Rosiisate Horoonsiꞌneemmo Borruwa horo afidhinote. Hanni konne lowo geeshsha kaaꞌlanno uduunnicho horoonsiꞌra dandiineemmohu hiittoonniitiro laꞌno.

6, 7. (a) jw.org egensiissanno kaarde ma garinni horoonsirootto? (b) Songote gambooshshihu koyishshu woraqati maaho kaaꞌlanno?

⁶ JW.ORG Egensiissanno Kaarde. Tini kaarde shiima ikkiturono mannu ayimmanke afanno gedenna webisayitenke horoonsiꞌranno gede jawaachishshanno. Insa webisayitenke aana ninke daafira ledde affaranna Qullaawa Maxaafa xiinxallinsanninsa gede nafa xaꞌmidhara dandiitanno. Xaa geeshsha 400,000 saꞌꞌanno manni jw.org widoonni Qullaawa Maxaafa xiinxallinsanninsa gede xaꞌmirino; lowo xibbe ikkanno manni barru baala Qullaawa Maxaafa xiinxallinsanninsa gede xaꞌmiꞌranno. Atino faro afiꞌratto yannara farciꞌra dandaatto gede, mitowa haꞌratto woyite boode kaarde adhite haꞌra dandaatto.

⁷ Koyishshu Woraqata. Kuni woraqati haammata hoꞌro afiꞌrino. Konni woraqati aana togo yitanno hedo no: “Qullaawa Maxaafa ninke Yihowa Farciꞌraasine ledo xiinxallattora koyinsoommohe.” Hakkiinni Qullaawa Maxaafa “baalunku  gamba yaannowa” “woy xiinxallisannohe manchi ledo” xiinxalla dandaatto yaanno doorshi no. Konni daafira kuni uduunnichi, ninke ayimma xawisannoha calla ikkikki, “ayyaanaamittete coye goodhinori” ninke ledo Qullaawa Maxaafa xiinxallitanno gede koyisanno. (Mat. 5:3, NW) Qullaawa Maxaafa xinxallannokki mannino gambooshshenke daa dandaanno. Insa gambooshshenke dayiro, Qullaawu Maxaafinni lowore rosa dandaannota wodanchanno.

8. Mannu ajayi ajeenna mitte hige gambooshshenke daansa kaaꞌlitannonsahu hiittoonniiti? Lawishsha kuli.

⁸ Mannu ajayi ajeenna mitte hige gambooshshenke daanno gede hexxo mudhinummokkinni koyisa hasiissannonke. Mayira? Korkaatuno insa gambooshshenke dagganno woyite Yihowa manni mereero noota ayyaanaamittete jironna Bayira Baabiloone giddo noota ayyaanaamittete gatto huwatanno. (Isa. 65:13) Ameerikaho heeꞌrannori Rayinna Linda yinanni minaanninna minaama shiimu diri albaanni tenne huwatino. Insa beetekiristaane haꞌrate hedino. Insa Magano ammananno, hattono isi daafira rosa hasiꞌrino; konni daafira katamu giddo noo beetekiristaanna baala haꞌrino. Hakkiicho batinye beetekiristaanna no. Kuri minaanninna minaama mitte beetekiristaane miila ikkate hatte beetekiristaanewiinni afiꞌra hasiꞌrannoha lame coye murino. Umihunni, beetekiristaanenniwa mito roso rosa hasiissannonsa; layinkihunni beetekiristaanete miilla Magano magansiꞌranno manni uddiꞌranno garinni uddiꞌra hasiissannonsa. Insa lowo diro katamu giddo noo beetekiristaanna baala haꞌrinoha ikkirono, mittoreno diafiꞌrino. Qoleno rosinori dino; beetekiristaane haꞌranno mannino ayirrinye baino garinni uddiꞌranno. Mitto barra insa jeefote beetekiristaane haꞌri gedensaanni Linda loosoho hadhino; minaannise Rayi kayinni minira higino. Isi minira higanni heeꞌre Yihowa Farciꞌraasineta Gambooshshu Addaraashe laiti hakkira mare ma assinanni heeꞌnoonniro afate hedino. Isi hakkiicho wole beetekiristaanera assinannirinni baxxinore laino! Gambooshshu Addaraashera noo manni baalu faasiiqahonna amanyootunni uddiꞌrinoho. Rayi Gambooshshu Addaraashe giddo albaanni ofollino; qoleno rosinore baasa baxino. Soqqamaasinchu Phaawuloosi konni albaanni gambooshshe daye egenninokki manchi gambooshshe daanno woyite “Halaalinta Maganu ledoꞌne no” yee coyiꞌrannota xawisino; Rayi woꞌnaalshi tenne qaangeemmo gede assannonke. (1 Qor. 14:23-25) Rayi hakkuyi gedensaanni Sambatu kiiro gambooshshe dihosanno; hakkiinni lamalate mereero assinanni gambooshshe daa hanafino. Lindano gambooshshe daa hanaffino; hakkiinni insa 70 diri balla ikke heeꞌreennansa Qullaawa Maxaafa xiinxalle cuuamino.

9, 10. (a) Tiraaktuwanke horoonsiꞌrate injiitannote yineemmohu mayiraati? (b) Maganu Mangiste Maati? yitanno tiraakte horoonsiꞌra dandiinanni gara xawisi.

⁹ Tiraaktuwa. Horoonsiꞌrate injiitannotinna hasaawa hanafate kaaꞌlitannoti sette tiraaktuwa noonke. Kuri tiraaktuwa 2013nni fultu kawa, onte biliyoone ikkitannota attammoonni! Kuri tiraaktuwa qixxeessinoonnihu mittu garinniiti. Konni daafira mitte tiraakte horoonsiꞌneemmo gara anfummoro, baalanta hakko garinni horoonsiꞌra dandiineemmo. Tenne tiraakte horoonsidhe hasaawa hanafa dandaattohu hiittoonniiti?

¹⁰ Lawishshaho, hanni Maganu Mangiste Maati? yitanno tiraakte ela hasiꞌrootto yine hendo. Hasaawisatto manchira tiraaktete albiidi qoolira noo xaꞌmo leellishitto gedensaanni togo yite xaꞌmi: “‘Maganu Mangiste maati?’ yite hedde egennootto?” Hakkiinni sasente dawaro giddo hiittenne qolannoro xaꞌmi. Qolino dawaro garaho woy digaraho yaa agurte, tiraaktete giddiidi qoolira “Qullaawu Maxaafi Togo Yaanno” yaannoha fante hakko qoolira noota Daanieeli 2:44 nna Isayaasi 9:6 nabbawi. Hasaawu jeefora, badhiidi qoolira “Hanni Konne Coye Hedi” yaanno birxichi hunda “Maganu Mangiste gashshooti yannara mannu hiittoo heeshsho heeꞌranno?” yitanno xaꞌmo xaꞌmi. Hatto assakki hakko manchi ledo wole woyite xaadde hasaawatto faro fantannohe. Wole woyite xaaddinanni yannara, Maganuwiinni Dayinoha  Dancha Duduwo! yitanno birosherera nooha 7^ki roso leellisha dandaatto; rosiisate horoonsiꞌneemmo borruwanke giddo mitte tenne biroshereeti.

11. Metseettanke qixxeessinannihu ma garinniiti? Tenne metseetta daafira maa afa hasiissannonke?

¹¹ Metseetta. Alamete aana Agarooshshu Shaenna Baqqi Yiiyye! yinanni metseete geeshsha tuqinsoonnitinna lowo afiira qolle tirroonniti wole metseete dino. Alamete doyichora tenne metseete batinyu manni nabbawanno daafira, aaniidi qoolira noo birxicho manna baala baxisanno garinni qixxeessinanni. Kuri metseetta horoonsiꞌne mannu xaa yannara heeshshonsa giddo roore hasiisanno coyi maatiro rosanno gede kaaꞌla hasiissannonke. Ikkollana kuri metseetta garunni horoonsiꞌra dandiineemmo gede hiittenne metseete hiittoo mannira qixxeessinoonniro afa hasiissannonke.

12. (a) Baqqi Yiiyye! yinanni metseete qixxeessinoonnihu ayeoo hendeeti? (b) Tenne metseete horoonsidhe muli yannara mayi guma afiꞌrootto?

¹² Baqqi Yiiyye! yinanni metseete qixxeessinannihu gariti Qullaawu Maxaafi egenno noonsakki manna hendeeti. Kuni manni Kiristaanu rosi daafira afinokkiha, ammaꞌno addaxxannokkiha, woy Qullaawu Maxaafi heeshshonsa giddo kaaꞌlannonsa gara afinokkiha ikkara dandaanno. Baqqi Yiiyye! yinanni metseete qixxeessinannihu qaru korkaati mannu Maganu noota ammananno gedeeti. (Rom. 1:20; Ibi. 11:6) Qoleno tini metseete mannu Qullaawu Maxaafi “Maganu Qaale” ikkinota addaxxanno gede kaaꞌlitanno. (1 Tes. 2:13) Baqqi Yiiyye! yinanni metseeteti 2018nniti sase ittime togo yaanno birxicho afidhino: “Hagiirraamo Ikka Dandaattohu Hiittoonniiti?”, Maate Hagiirraame Assiꞌrate Kaaꞌlannoha 12 Coye,” nna “Xissiisidhinore Sheshifachishannonsari Maati?” c

13. (a) Ellannita Agarooshshu Shae qixxeessinannihu ayeoo hendeeti? (b) Muli yannara tenne metseete horoonsidhe afiꞌrootto gumi no?

¹³ Mannaho ellanniti Agarooshshu Shae ittime Maganonna Qaalesi ayirrisanno manni aana illachishshanno. Insara Qullaawu Maxaafi egenno noonsaha ikkirono, garunni huwatinoha ikka hoogara dandaanno. (Rom. 10:2; 1 Xim. 2:3, 4) Agarooshshu Shae metseeteti 2018nniti sase ittime aante noo xaꞌmuwara dawaro qoltanno: “Qullaawu Maxaafi Yannankera Kaaꞌlannori No?,” “Albillitte Heeshsho Hiittoota Ikkitanno?” nna “Maganu Ate Daafira Hedanno?”

14. (a) Rosiisate Horoonsiꞌneemmo Borruwa wido ikkitinoti shoole viidiyubba qixxeessinoonnihu mayiraati? (b) Kuri viidiyubba leellishshe mayi guma afiꞌrootto?

¹⁴ Viidiyubba. Yesuusi yannara, hanaatsete angatenni horoonsiꞌnanni uduunni calla noonsa. Yannankera noo hanaatse kayinni korreentetenni loosanno uduunne lawishshaho korreentete magaazenna haqqe dartanno maashine horoonsidhanno. Attammanni borrono agurranna mannaho leellinsheemmoti kaajja viidiyubba noonke; rosiisate horoonsiꞌneemmo viidiyubba giddo shoole aante noote: Qullaawa Maxaafa Xiinxalla Hasiissannohu Mayiraati?, Qullaawa Maxaafa Xiinxallinseemmohu Hiittoonniiti?, Mangistete Addaraashenkera Maa Maa Assinanni?, hattono Yihowa Farciꞌraasine Hiittoo Mannaati? Lamu daqiiqi woro ikkitanno viidiyubba manna umo hasaawinsanni woyitira baasa kaaꞌlitanno. Seeda viidiyubba kayinni galagalle marre hasaawinseemmo woyitenna loosu batiꞌrinonsakkirira leellishate kaaꞌlitannonke. Kuri uduunni mannu Qullaawa Maxaafa xiinxalla hasiꞌrannonna gambooshshuwanke daanno gede kakkayisara dandaanno.

15. Mannaho uminsa afiinni viidiyo leellisha mayi guma abbitannoro lawishshunni kuli.

¹⁵ Lawishshaho mitte rodoo Mayikironeezhiyunni daggino manchora afoo dadhitinohu Yappesi yinanni qaalinni Qullaawa Maxaafa Xiinxalla Hasiissannohu Mayiraati? yitanno viidiyo leellishshinose. Hatti mancho, rodoo viidiyo fantuta togo yitino: “Kuni ani coyiꞌreemma qaaleeti. Dhaggete! Viidiyote giddo coyiꞌranno manchi coyiꞌranno gari, ani heeꞌreemma giddichonni dayinota leellishanno. Isi ane afoo coyiꞌrannoho!”  Hakkunni gedensaanni, jw.org aana umise qaalinni borronke nabbabbannotanna viidiyubba laꞌannota coyidhino. (Soqqamaasinete Looso 2:8, 11 ledo heewisiisi.) Hanni wole woꞌnaalsha laꞌno. Mitte Ameerikaho heedhanno rodoo wole gobbara heeꞌrannohu rodiise beettira Qullaawa Maxaafa Xiinxalla Hasiissannohu Mayiraati? yitanno viidiyowa massitanno linke sokkinosi. Isi tenne viidiyo umisi afiinni lai gedensaanni togo yee imeeletenni sokka borreessino: “Roorenkanni tenne viidiyo giddo alame gashshinohu daafira kultanno hedo dhagge ikkitinoe! Qoleno Qullaawa Maxaafa xiinxallinsannie gede xaꞌmiꞌroommo.” Isi heeꞌrannohu loosonke agamboonni gobbaraati!

16. Aante noo birosherubba qixxeessinoonnihu mayiraatiro xawisi: (a) Maganu Yaannore Macciishshite Hegerera Heeꞌri. (b) Maganuwiinni Dayinoha Dancha Duduwo! (c) Xaa Yannara Yihowa Fajjo Assitanni Noori Ayeooti?

¹⁶ Biroosherubba. Gari geeshsha nabbawa dandaannokkihura woy umisi afiinni qixxeessinoonni borro nookki manchira halaale rosiisa dandaattohu hiittoonniiti? Maganu Yaannore Macciishshite Hegerera Heeꞌri yitanno biroshere tennera kaaꞌlitannonke. d Maganuwiinni Dayinoha Dancha Duduwo! yitanno biroshere xiinxallo hanafisiisate kaaꞌlitannote kaajja borrooti. Tenne birosherera badhiidi qoolira noota 14 birxichuwa leellishitto gedensaanni roore afa hasiꞌranno birxicho xaꞌma dandaatto. Hakkiinni hakkonne birxicho horoonsidhe xiinxallisa hanafi. Manna galagalte marte hasaawisatto woyite tenne hayyo horoonsidhe egennootto? Xaa Yannara Yihowa Fajjo Assitanni Noori Ayeooti? yitanno biroshereno Rosiisate Horoonsiꞌneemmo Borruwa widooti. Tenne biroshere qixxeessinoonnihu Qullaawu Maxaafi rosaano Yihowa dirijjite daafira affanno gedeeti. Qullaawa Maxaafa xiinxallisatto kiiro tenne biroshere horoonsiꞌra dandaatto gara afate, Badheessa 2017nnita Kiristaanu Heeshshonna Soqqansho—Xiinxallote Maxaaficho lai.

17. (a) Mitto mittonka xiinxallote maxaafa qixxeessinoonnihu mayiraati? (b) Haaruuddu cuuantu gedensaannino maa assa hasiissannonsa? Mayira?

¹⁷ Maxaaffa. Biroosherubba horoonsidhe xiinxallisa hanafitto gedensaanni, hasiꞌritto yannara Qullaawu Maxaafinni Maa Ronseemmo? yaanno maxaafa hanafisiisa dandaatto. Kuni maxaafi xinta ikkitinota Qullaawu Maxaafi egenno afiꞌrate kaaꞌlanno. Konne maxaafa xiinxallisse guditto gedensaanni rosaanchu ayyaanaamittetenni lophanni nooha ikkiro, Maganu Baxilli Giddo Heedhe yaanno maxaafa hanafisiisa dandaatto. Kuni maxaafi heeshshosi giddo barru baala Qullaawu Maxaafiha xintu seera harunsa dandaanno gara rosate kaaꞌlannosi. Mittu rosaanchi cuuami gedensaannino, lamenta maxaaffa guda geeshsha xiinxalla hasiissannosita deꞌooti. Hatto assansa halaale seekkite cuꞌmidhanno gede kaaꞌlitannonsa.—Qolasiyaasi Sokka 2:6, 7 nabbawi.

 18. (a) Umi Ximootewoosi 4:16 maa assineemmo gede jawaachishshannonke? Tini mayi guma abbitanno? (b) Rosiisate Horoonsiꞌneemmo Borruwa horoonsiꞌneemmo woyite mixonke maa ikka hasiissannose?

¹⁸ Yihowa Farciꞌraasine ikkankenni mannu hegere heeshsho afiꞌranno gede kaaꞌlannoha ‘halaalu qaale’ rosiisate qeechi noonke. (Qol. 1:5; 1 Ximootewoosi 4:16 nabbawi.) Tennera kaaꞌlitannonketa Rosiisate Horoonsiꞌneemmo Borruwa qixxeessinoonninke. (“ Rosiisate Horoonsiꞌneemmo Borruwa” yaanno birxicho lai.) Dandaaminke deerrinni konne uduunne danchu garinni horoonsiꞌrate sharrammo. Mittu mittunku halashshaanchi tenne borro giddonni mamootenna hiittenne horoonsiꞌrannoro doodha dandaanno. Ikkollana mixonke borro ela calla diꞌꞌikkitino; qoleno sokkanke macciishshate hasatto noonsakki mannira borronke mulaaginse haꞌra dihasiissannonke. Mixonke ammanaminohu, umonsa heeshshi assannohunna ayyaanaamittete sagale hudiꞌrinohu, hattono “hegere heeshsho afiꞌrate gara ikkitinoti wodanu dooꞌꞌo noonsa” manni Yesuusi rosaano ikkanno gede kaaꞌlate.—Soq. 13:48, NW; Mat. 28:19, 20.