1. Heeshshonke giddo doodhineemmohu wolu baalunkunni roorino doorshi hiikkonneeti?

DUUCHA woyite annuwunna amuuwu doodhitanno doorshi qaaqquullinsa gedenso seekkara woy hunara dandaanno. Annuwunna amuuwu busha doorsha doodhiro, qaaqquullinsara qarru iillara dandaanno. Dancha doorsha doodhiro kayinni, qaaqquullinsa hagiirrunna harshammo noo heeshsho heedhanno gede kaaˈlitansara dandiitanno. Ikkollana oosono dancha doorsha doodha hasiissannonsa. Baxillaanchu iimi Anninke Yihowara soqqamate doodhineemmo doorshi wolu baalunku doorshinni lowo geeshsha roorinoho.—Far. 73:28.

2. Yesuusino ikko annisinna amasi hiikkonne dancha doorsha doodhitino?

² Yesuusi anninna ama qaaqquullinsa Yihowara soqqantanno gede kaaˈlate murcidhino; insa doodhitino doorshi qara mixonsa tenne ikkitinota leellishanno. (Luq. 2:40, 41, 52) Yesuusino Yihowa loosara uyinosi looso loosate kaaˈlannosiha dancha doorsha doodhino. (Mat. 4:1-10) Yesuusi lophe shaqqado, ammanaminohanna worba mancho ikkino; Magano waajjanno anninna ama togoo beetti heeˈrinsaro hagiidhanno.

3. Konni birxichira hiikkuri xaˈmuwa xiinxallineemmo?

³ Konni birxichira aante noo xaˈmuwa xiinxallineemmo: Yihowa Yesuusa kaaˈlate hiikkonne dancha doorsha doodhino? Kiristaana ikkino annuwinna amuuwi Yesuusi anninna ama doodhitino doorshinni maa rosa dandaanno? Kiristaana ikkino wedelli Yesuusi doodhino doorshinni maa rosa dandaanno?

4. Yihowa Beettosi kaaˈlate hiikkonne dancha doorsha doodhino?

⁴ Yihowa Yesuusira dancha maate doorinosi. (Mat. 1:18-23; Luq. 1:26-38) Qullaawu Maxaafi giddo borreessinoonniri Maariyaami coyidhinori, ise Yihowanna Qaalesi lubbora baxxannota leellishanno. (Luq. 1:46-55) Yooseefino Yihowa biddishsha uyisi yannara assinori, isi Magano waajjannohanna Iso hagiirsiisa hasiˈrannoha ikkinota leellishanno.—Mat. 1:24.

5-6. Yihowa Beettisira mittu qarrino iillannokki gede assino?

⁵ Yihowa Yesuusira dureeyye ikkitino maate doorinokkita qaango. Yooseefinna Maariyaami Yesuusi ilamihu gedensaanni shiqishino kakkalo insa buxane ikkitinota leellishshanno. (Luq. 2:24) Yooseefira Naazireetete noosi mini mule hanaatsimmate looso loosannohu shiimu daasi noosiha ikkara dandaanno. Insara ajayi ajeenna lamala ooso noonsa; konnira maatensara qawaaxxisannori noonsakkiha ikkara dandaanno.—Mat. 13:55, 56.

⁶ Yihowa, Yesuusira mite dano iillitannosikki gede agarinosiha ikkirono, mittu qarrino iillannosikki gede kayinni diassino. (Mat. 2:13-15) Lawishshaho, Yesuusira iso ammanannokki fiixi noosi. Umi qara mite maatesi miilla isi Mesihicha ikkinota diammantino; tini mageeshsha dadillissinosiro heda dandiitinanni. (Maq. 3:21; Yoh. 7:5) Yesuusi, lossiˈrinosi anni Yooseefi reyi woyiteno lowo geeshsha xissiisiˈrikkinni digatino. Yesuusi bayira beetto ikkino daafira, Yooseefi reyita maatensara hasiisannore shiqishannohu iso ikkikki digatino. (Maq. 6:3) Yesuusi lophihu gedensaanni, maatesira hasiisannore wonsha hasiissannosita huwatino. Isi maatesi kaaˈlate diinaggaawe loosinoti dihuluullissannote. Konnira isi loonsanni honsiro hawarro mageeshsha daafurranniro afino.

7. (a) Minaanninna minaama insaneeto hiikkuri xaˈmuwa xaˈma hasiissannonsa? (b) Lawishsha 2:1-6 noo hedo ooso qajeelsiˈrate kaaˈlitannohu hiittoonniiti?

⁷ Ooso ila hasidhinanni minaanninna minaama kineˈneneeto togo yitine xaˈme: ‘Yihowa qaaqquulle hadara aannonke gedee manna yaano umonke heeshshi assineemmorenna Yihowa banxeemmore ikkinoommo?’ (Far. 127:3, 4) Ooso iltinoonniri kayinni kiˈneneeto togo yitine xaˈme: ‘Oosonkera diinaggaawe  loosa lowo geeshsha hasiissannota ikkitinota rosiinseemmo?’ (Ros. 3:12, 13) ‘Oosoˈya tini busha Sheexaanu alame gawajjitannokki gede agarate danduummore baala asseemmo?’ (Law. 22:3) Oosoˈnera tuncu yaannore baalankare hoola didandiitinanni. Hatto assa dandiinannikkireeti. Ikkirono iillannonsa qarra dandiite saˈˈate Maganu Qaali amaale addaxxitanno gara baxillunni rosiisa dandiitinanni. (Lawishsha 2:1-6 nabbawi.) Lawishshaho, fiixikki Yihowara soqqama aguriro, Maganoho ammaname heeˈra lowo geeshsha hasiissannota ikkitinohu mayiraatiro oosoˈne Qullaawu Maxaafinni affanno gede kaaˈlensa. (Far. 31:23) Woy shiidhiniro, oosoˈne Maganu Qaalinni sheshonna salaame afidhanno gara rosiissensa.—2 Qor. 1:3, 4; 2 Xim. 3:16.

8. Marro 6:6, 7 kultanno garinni, Yooseefinna Maariyaami maa assa hasiissinonsa?

⁸ Yooseefinna Maariyaami, Yesuusi Magano hagiirsiisanno garinni lophanno gede kaaˈlitinosi; insa Yihowa maatete uyino biddishsha harunsitino. (Marro 6:6, 7 nabbawi.) Yooseefinna Maariyaami Yihowa lowo geeshsha baxanno; insati qara mixo qaaqquullinsano Yihowa baxxanno gede kaaˈlate.

9. Yooseefinna Maariyaami hiikkonne lowo geeshsha hasiisanno doorsha doodhino?

⁹ Yooseefinna Maariyaamira maatensa ledo mitteenni Yihowa magansiˈrate rosichi noonsa. Insa lamalate kiiro Naazireetete noohu xaadu mine assinanni gambooshshe hadhannotinna diru kiiro ayirrinsanniha Faasiku ayyaana ayirrisate Yerusaalame hadhannoti dihuluullissannote. (Luq. 2:41; 4:16) Insa Yerusaalame hadhanno woyite doogote Yesuusiranna roduuwisira Maganu manni xagge kultannonsaha ikkikkinni digatino; insa hadhanni doogo Qullaawa Borro giddo qummi assinoonni bayicho iillitanno woyite hakko ikkinore kultannonsaha ikkara dandaanno. Maatensa kiiro lexxitanni hadhuta, Maariyaamiranna Yooseefira ganye Yihowa magansiˈra shota ikkitinonsakkiha ikkara dandaanno. Ikkirono insa ganyite Yihowa magansidhino daafira afidhino atoote heda dandiineemmo. Insa Yihowa magansiˈra balaxisiissino daafira, maatensa Yihowa ledo jaaloontino gedee heedhino.

10. Kiristaana ikkino anninna ama Yooseefinna Maariyaami lawishshinni maa rosa dandaanno?

 ¹⁰ Magano waajjitanno annuwinna amuuwi Yooseefinna Maariyaami lawishshinni maa rosa dandiitanno? Baalunkunni roore coyidhinannirinninna assitinannirinni oosoˈnera Yihowa lubbora baxxinannita leellishshe. Oosoˈnera uyitinannihu baalunkunni roorino coyi Yihowa baxxanno gede kaaˈla ikkitinota deˈinoonte. Insara rosiisa dandiitinannihu kaajju rosi giddo mittu, Qullaawa borro ganyite xiinxalla, gambooshshe haˈranna soqqansho fula roso assidhanno gede kaaˈlate. (1 Xim. 6:6) Oosoˈnera maalaamittete hasiisannoreno wonsha hasiissannoˈneti egennantinote. (1 Xim. 5:8) Kayinni tini busha alame baˈanno woyite gatte saˈe Maganu abbannota haaro alame eate kaaˈlitannonsati, Yihowa ledo muli jaalooma kalaqiˈransaati ikkinnina maalaamittete jiro ikkitinokkita deˈinoonte. *—Hiz. 7:19; 1 Xim. 4:8.

11. (a) Umi Ximootewoosi 6:17-19 noo amaale annuwunna amuuwu ooso lossidhanno woyite dancha doorsha doodhate kaaˈlitannonsahu hiittoonniiti? (b) Maateˈne hiittenne mixo fushshiˈra dandiitanno? Tini mayi atoote abbitannonsa? (“ Hiittenne Mixo Fushshira Dandiitinanni?” yitanno saaxine lai.)

¹¹ Kiristaana ikkinohu batinyu annuwinna amuuwi qaaqquullinsa Yihowa ledo jaaloontanno gede kaaˈlate dancha doorsha doodhitino; tini lowo geeshsha hagiirsiissannote. Insa ganyite mitteenni Yihowa magansidhanno. Songotenna qoqqowu gambooshshe hadhanno. Hattono soqqansho fultanno. Mite maate isinni hakkeeshsha sabbanke egenninoonnikki qoqqowira soqqantino. Wolootu Beeteele daaˈˈattanno woy gimbaatu looso kaaˈlitanno. Togoore assitanno maate lowo woxe fushshitara dandiitanno; hattono mitu qarri iillansara dandaanno. Ikkirono Yihowa ayyaanaamittetenni lowo geeshsha maassiˈrannonsa. (1 Ximootewoosi 6:17-19 nabbawi.) Togoo maate giddo lophitino ooso duucha woyite rossinoha dancha coye assa diagurtanno; hatto assansannino digaabbitanno. *—Law. 10:22.

12. Yesuusi lophiti maa assino?

¹² Yesuusi anni Yihowa woˈmanka woyite dancha doorsha doodhanno; loossiˈrinosi anninna ama yaano Yooseefinna Maariyaamino dancha doorsha doodhino. Yesuusino lophiti dancha doorsha doodhino. (Gal. 6:5) Ninke baalunku gede isirano doodhate dandoo noosi. Isi hasiˈriro umisi hasatto balaxisiisa dandaanno. Ikkirono isi Yihowa ledo jaala ikke heeˈra doodhino. (Yoh. 8:29) Xaa yannara noo wedelli Yesuusi lawishshinni maa rosa dandiitanno?

13. Yesuusi wedellichu noo waro hiikkonne lowo geeshsha hasiisanno doorsha doodhino?

 ¹³ Yesuusi annisiranna amasira maahoyye yee galino. Isi insa roore afoommoho yee annisinna amasi biddishsha adha digiwino. Hatteentenni insara “hajajamanni heeˈri[no].” (Luq. 2:51) Yesuusi maatete giddo bayira beetto ikkino daafira assannori lowori heeˈrannoti egennantinote. Isi lossinosi anni yaano Yooseefiwiinni hanaatsimma rosate jawaate loosino; konne looso loose afiˈranno woxinni maatesi kaaˈlannoti dihuluullissannote.

14. Yesuusi Maganu Qaale seekke xiinxallinota anfeemmohu hiittoonniiti?

¹⁴ Yesuusi anninna ama isi maalaletenni ilamino garanna Maganu soqqamaano isi daafira coyidhinore kultusikki digattino. (Luq. 2:8-19, 25-38) Yesuusi kulloonnisirinni calla harshammi yee diofollino; Qullaawa Borro umisinni xiinxallino. Yesuusi Maganu Qaale seekke xiinxallinota anfeemmohu hiittoonniiti? Isi shiimu noo waro nafa Yerusaalamete heedhanno rosiisaano “egennosinna qolanno dawaro maalale” assidhino. (Luq. 2:46, 47) Yesuusi 12 dirihu heeˈre Yihowa annasi ikkinota isi umisi buuxino.—Luq. 2:42, 43, 49.

15. Yesuusi Yihowa fajjo assa doodhinota leellishinohu hiittoonniiti?

¹⁵ Yesuusi Yihowa fajjo afiti, uyinoonnisi looso maahoyye yee adhino. (Yoh. 6:38) Yesuusi lowo manni giwannosita afino daafira, uyinoonnisi looso loosa shota ikkitannosikkita hedikki digatino. Ikkirono isi Yihowara maahoyye yee gala doodhino. Yesuusi 29 M.D. cuuamiti woˈmunni woˈma Yihowa fajjo assate illachishino. (Ibi. 10:5-7) Isi haqqu aana sutame reyara kae noo yannara nafa Annisi fajjo assate horonta badhera dihigino.—Yoh. 19:30.

16. Ooso Yesuusiwiinni rossanno rosi giddo mittu maati?

¹⁶ Anniˈneranna amaˈnera hajajamme. Yooseefinna Maariyaaminte gede anniˈnenna amaˈne guuta diˈˈikkitino. Ikkirono Yihowa anniˈneranna amaˈnera kiˈne agartannonna qajeelsitannoˈne gede hadara uyino. Amaalensa macciishshitinannihanna silxaanensa ayirrissinanniha ikkiro, ‘baalunku coyi seyannoˈne.’—Efe. 6:1-4.

17. Iyyaasu 24:15 kultanno garinni, wedellu hiikkonne doorsha doodha hasiissannonsa?

¹⁷ Ayera soqqantinanniro doodhe. Yihowa ayetiro, fajjosi maatironna fajjosi assa dandiitinannihu hiittoonniitiro kiˈne umiˈne buuxa hasiissannoˈne. (Rom. 12:2) Hatto assitiniro  Yihowara soqqamate doodhitinanni; kuni doorshi heeshshoˈne giddo doodhitinannihu wolu baalunku doorshinni roorinoho. (Iyyaasu 24:15 nabbawi; Ros. 12:1) Qullaawa Maxaafa ganyitine nabbabbinannihanna xiinxallitinanniha ikkiro, Yihowara nooˈne baxillinna ammana lexxitanninna kaajjado ikkitanni hadhanno.

18. Wedellu maa doodha hasiissannonsa? Hatto assituro mayi atoote afidhanno?

¹⁸ Heeshshokki giddo Yihowa fajjo balaxisiisate doodhi. Sheexaanu alame dandooˈne umiˈne hasatto wonshiˈrate horoonsidhiniro hagiirraamma ikkitinanni yitanno. Maalaamittete coye illachishshannori kayinni jifante ubbannotanna lowo qarri iillannonsata anfoommo. (1 Xim. 6:9, 10) Yihowa yaannore macciishshineemmohanna isi fajjo assa doodhineemmoha ikkiro, “baalunku coyi danchu garinni” qinaannonke—Iya. 1:8.

19. Annuwunna amuuwu maa dea dihasiissannonsa?

¹⁹ Annuwanna amuuwa, maateˈne Yihowara soqqantanno gede kaaˈlate dandiitinire baala asse. Iso addaxxe; isino dancha doorsha doodhitinanni gede kaaˈlannoˈne. (Law. 3:5, 6) Oosoˈne coyidhinannirinni roore assitinanniri kaaˈlannonsata deˈinoonte. Konni daafira oosoˈne Yihowa hagiirsiisanno doorsha doodhitanno gede kaaˈlensa.

20. Wedellu Yihowara soqqama doodhiro mayi atoote afiˈranno?

²⁰ Wedella, anniˈnenna amaˈne dancha doorsha doodha dandiitinanni gede kaaˈlitannoˈne. Kiˈneno Magano hagiirsiisate sharrama hasiissannoˈne. Konnira Yesuusi lawishsha harunsitine baxillaanchu iimi Anniˈnera soqqamate doodhe. Hatto assitiniro xaa yannara nafa lowo atoote afidhine hagiirraame heeshsho heedhinanni. (1 Xim. 4:16) Albillitte afidhinanni hagiirrino baete!