1. Heeshshonke giddo doodhineemmohu wolu baalunkunni roorino doorshi hiikkonneeti?

 DUUCHA woyite annuwunna amuuwu doodhitanno doorshi qaaqquullinsa gedenso seekkara woy hunara dandaanno. Annuwunna amuuwu busha doorsha doodhiro, qaaqquullinsara qarru iillara dandaanno. Dancha doorsha doodhiro kayinni, qaaqquullinsa hagiirrunna harshammo noo heeshsho heedhanno gede kaaꞌlitansara dandiitanno. Ikkollana oosono dancha doorsha doodha hasiissannonsa. Baxillaanchu iimi Anninke Yihowara soqqamate doodhineemmo doorshi wolu baalunku doorshinni lowo geeshsha roorinoho.—Far. 73:28.

2. Yesuusino ikko annisinna amasi hiikkonne dancha doorsha doodhitino?

² Yesuusi anninna ama qaaqquullinsa Yihowara soqqantanno gede kaaꞌlate murcidhino; insa doodhitino doorshi qara mixonsa tenne ikkitinota leellishanno. (Luq. 2:40, 41, 52) Yesuusino Yihowa loosara uyinosi looso loosate kaaꞌlannosiha dancha doorsha doodhino. (Mat. 4:1-10) Yesuusi lophe shaqqado, ammanaminohanna worba mancho ikkino; Magano waajjanno anninna ama togoo beetti heeꞌrinsaro hagiidhanno.

3. Konni birxichira hiikkuri xaꞌmuwa xiinxallineemmo?

³ Konni birxichira aante noo xaꞌmuwa xiinxallineemmo: Yihowa Yesuusa kaaꞌlate hiikkonne dancha doorsha doodhino? Kiristaana ikkino annuwinna amuuwi Yesuusi anninna ama doodhitino doorshinni maa rosa dandaanno? Kiristaana ikkino wedelli Yesuusi doodhino doorshinni maa rosa dandaanno?

4. Yihowa Beettosi kaaꞌlate hiikkonne dancha doorsha doodhino?

⁴ Yihowa Yesuusira dancha maate doorinosi. (Mat. 1:18-23; Luq. 1:26-38) Qullaawu Maxaafi giddo borreessinoonniri Maariyaami coyidhinori, ise Yihowanna Qaalesi lubbora baxxannota leellishanno. (Luq. 1:46-55) Yooseefino Yihowa biddishsha uyisi yannara assinori, isi Magano waajjannohanna Iso hagiirsiisa hasiꞌrannoha ikkinota leellishanno.—Mat. 1:24.

5-6. Yihowa Beettisira mittu qarrino iillannokki gede assino?

⁵ Yihowa Yesuusira dureeyye ikkitino maate doorinokkita qaango. Yooseefinna Maariyaami Yesuusi ilamihu gedensaanni shiqishino kakkalo insa buxane ikkitinota leellishshanno. (Luq. 2:24) Yooseefira Naazireetete noosi mini mule hanaatsimmate looso loosannohu shiimu daasi noosiha ikkara dandaanno. Insara ajayi ajeenna lamala ooso noonsa; konnira maatensara qawaaxxisannori noonsakkiha ikkara dandaanno.—Mat. 13:55, 56.

⁶ Yihowa, Yesuusira mite dano iillitannosikki gede agarinosiha ikkirono, mittu qarrino iillannosikki gede kayinni diassino. (Mat. 2:13-15) Lawishshaho, Yesuusira iso ammanannokki fiixi noosi. Umi qara mite maatesi miilla isi Mesihicha ikkinota diammantino; tini mageeshsha dadillissinosiro heda dandiitinanni. (Maq. 3:21; Yoh. 7:5) Yesuusi, lossiꞌrinosi anni Yooseefi reyi woyiteno lowo geeshsha xissiisiꞌrikkinni digatino. Yesuusi bayira beetto ikkino daafira, Yooseefi reyita maatensara hasiisannore shiqishannohu iso ikkikki digatino. (Maq. 6:3) Yesuusi lophihu gedensaanni, maatesira hasiisannore wonsha hasiissannosita huwatino. Isi maatesi kaaꞌlate diinaggaawe loosinoti dihuluullissannote. Konnira isi loonsanni honsiro hawarro mageeshsha daafurranniro afino.

7. (a) Minaanninna minaama insaneeto hiikkuri xaꞌmuwa xaꞌma hasiissannonsa? (b) Lawishsha 2:1-6 noo hedo ooso qajeelsiꞌrate kaaꞌlitannohu hiittoonniiti?

⁷ Ooso ila hasidhinanni minaanninna minaama kineꞌneneeto togo yitine xaꞌme: ‘Yihowa qaaqquulle hadara aannonke gedee manna yaano umonke heeshshi assineemmorenna Yihowa banxeemmore ikkinoommo?’ (Far. 127:3, 4) Ooso iltinoonniri kayinni kiꞌneneeto togo yitine xaꞌme: ‘Oosonkera diinaggaawe  loosa lowo geeshsha hasiissannota ikkitinota rosiinseemmo?’ (Ros. 3:12, 13) ‘Oosoꞌya tini busha Sheexaanu alame gawajjitannokki gede agarate danduummore baala asseemmo?’ (Law. 22:3) Oosoꞌnera tuncu yaannore baalankare hoola didandiitinanni. Hatto assa dandiinannikkireeti. Ikkirono iillannonsa qarra dandiite saꞌꞌate Maganu Qaali amaale addaxxitanno gara baxillunni rosiisa dandiitinanni. (Lawishsha 2:1-6 nabbawi.) Lawishshaho, fiixikki Yihowara soqqama aguriro, Maganoho ammaname heeꞌra lowo geeshsha hasiissannota ikkitinohu mayiraatiro oosoꞌne Qullaawu Maxaafinni affanno gede kaaꞌlensa. (Far. 31:23) Woy shiidhiniro, oosoꞌne Maganu Qaalinni sheshonna salaame afidhanno gara rosiissensa.—2 Qor. 1:3, 4; 2 Xim. 3:16.

8. Marro 6:6, 7 kultanno garinni, Yooseefinna Maariyaami maa assa hasiissinonsa?

⁸ Yooseefinna Maariyaami, Yesuusi Magano hagiirsiisanno garinni lophanno gede kaaꞌlitinosi; insa Yihowa maatete uyino biddishsha harunsitino. (Marro 6:6, 7 nabbawi.) Yooseefinna Maariyaami Yihowa lowo geeshsha baxanno; insati qara mixo qaaqquullinsano Yihowa baxxanno gede kaaꞌlate.

9. Yooseefinna Maariyaami hiikkonne lowo geeshsha hasiisanno doorsha doodhino?

⁹ Yooseefinna Maariyaamira maatensa ledo mitteenni Yihowa magansiꞌrate rosichi noonsa. Insa lamalate kiiro Naazireetete noohu xaadu mine assinanni gambooshshe hadhannotinna diru kiiro ayirrinsanniha Faasiku ayyaana ayirrisate Yerusaalame hadhannoti dihuluullissannote. (Luq. 2:41; 4:16) Insa Yerusaalame hadhanno woyite doogote Yesuusiranna roduuwisira Maganu manni xagge kultannonsaha ikkikkinni digatino; insa hadhanni doogo Qullaawa Borro giddo qummi assinoonni bayicho iillitanno woyite hakko ikkinore kultannonsaha ikkara dandaanno. Maatensa kiiro lexxitanni hadhuta, Maariyaamiranna Yooseefira ganye Yihowa magansiꞌra shota ikkitinonsakkiha ikkara dandaanno. Ikkirono insa ganyite Yihowa magansidhino daafira afidhino atoote heda dandiineemmo. Insa Yihowa magansiꞌra balaxisiissino daafira, maatensa Yihowa ledo jaaloontino gedee heedhino.

10. Kiristaana ikkino anninna ama Yooseefinna Maariyaami lawishshinni maa rosa dandaanno?

 ¹⁰ Magano waajjitanno annuwinna amuuwi Yooseefinna Maariyaami lawishshinni maa rosa dandiitanno? Baalunkunni roore coyidhinannirinninna assitinannirinni oosoꞌnera Yihowa lubbora baxxinannita leellishshe. Oosoꞌnera uyitinannihu baalunkunni roorino coyi Yihowa baxxanno gede kaaꞌla ikkitinota deꞌinoonte. Insara rosiisa dandiitinannihu kaajju rosi giddo mittu, Qullaawa borro ganyite xiinxalla, gambooshshe haꞌranna soqqansho fula roso assidhanno gede kaaꞌlate. (1 Xim. 6:6) Oosoꞌnera maalaamittete hasiisannoreno wonsha hasiissannoꞌneti egennantinote. (1 Xim. 5:8) Kayinni tini busha alame baꞌanno woyite gatte saꞌe Maganu abbannota haaro alame eate kaaꞌlitannonsati, Yihowa ledo muli jaalooma kalaqiꞌransaati ikkinnina maalaamittete jiro ikkitinokkita deꞌinoonte. b—Hiz. 7:19; 1 Xim. 4:8.

11. (a) Umi Ximootewoosi 6:17-19 noo amaale annuwunna amuuwu ooso lossidhanno woyite dancha doorsha doodhate kaaꞌlitannonsahu hiittoonniiti? (b) Maateꞌne hiittenne mixo fushshiꞌra dandiitanno? Tini mayi atoote abbitannonsa? (“ Hiittenne Mixo Fushshira Dandiitinanni?” yitanno saaxine lai.)

¹¹ Kiristaana ikkinohu batinyu annuwinna amuuwi qaaqquullinsa Yihowa ledo jaaloontanno gede kaaꞌlate dancha doorsha doodhitino; tini lowo geeshsha hagiirsiissannote. Insa ganyite mitteenni Yihowa magansidhanno. Songotenna qoqqowu gambooshshe hadhanno. Hattono soqqansho fultanno. Mite maate isinni hakkeeshsha sabbanke egenninoonnikki qoqqowira soqqantino. Wolootu Beeteele daaꞌꞌattanno woy gimbaatu looso kaaꞌlitanno. Togoore assitanno maate lowo woxe fushshitara dandiitanno; hattono mitu qarri iillansara dandaanno. Ikkirono Yihowa ayyaanaamittetenni lowo geeshsha maassiꞌrannonsa. (1 Ximootewoosi 6:17-19 nabbawi.) Togoo maate giddo lophitino ooso duucha woyite rossinoha dancha coye assa diagurtanno; hatto assansannino digaabbitanno. c—Law. 10:22.

12. Yesuusi lophiti maa assino?

¹² Yesuusi anni Yihowa woꞌmanka woyite dancha doorsha doodhanno; loossiꞌrinosi anninna ama yaano Yooseefinna Maariyaamino dancha doorsha doodhino. Yesuusino lophiti dancha doorsha doodhino. (Gal. 6:5) Ninke baalunku gede isirano doodhate dandoo noosi. Isi hasiꞌriro umisi hasatto balaxisiisa dandaanno. Ikkirono isi Yihowa ledo jaala ikke heeꞌra doodhino. (Yoh. 8:29) Xaa yannara noo wedelli Yesuusi lawishshinni maa rosa dandiitanno?

13. Yesuusi wedellichu noo waro hiikkonne lowo geeshsha hasiisanno doorsha doodhino?

 ¹³ Yesuusi annisiranna amasira maahoyye yee galino. Isi insa roore afoommoho yee annisinna amasi biddishsha adha digiwino. Hatteentenni insara “hajajamanni heeꞌri[no].” (Luq. 2:51) Yesuusi maatete giddo bayira beetto ikkino daafira assannori lowori heeꞌrannoti egennantinote. Isi lossinosi anni yaano Yooseefiwiinni hanaatsimma rosate jawaate loosino; konne looso loose afiꞌranno woxinni maatesi kaaꞌlannoti dihuluullissannote.

14. Yesuusi Maganu Qaale seekke xiinxallinota anfeemmohu hiittoonniiti?

¹⁴ Yesuusi anninna ama isi maalaletenni ilamino garanna Maganu soqqamaano isi daafira coyidhinore kultusikki digattino. (Luq. 2:8-19, 25-38) Yesuusi kulloonnisirinni calla harshammi yee diofollino; Qullaawa Borro umisinni xiinxallino. Yesuusi Maganu Qaale seekke xiinxallinota anfeemmohu hiittoonniiti? Isi shiimu noo waro nafa Yerusaalamete heedhanno rosiisaano “egennosinna qolanno dawaro maalale” assidhino. (Luq. 2:46, 47) Yesuusi 12 dirihu heeꞌre Yihowa annasi ikkinota isi umisi buuxino.—Luq. 2:42, 43, 49.

15. Yesuusi Yihowa fajjo assa doodhinota leellishinohu hiittoonniiti?

¹⁵ Yesuusi Yihowa fajjo afiti, uyinoonnisi looso maahoyye yee adhino. (Yoh. 6:38) Yesuusi lowo manni giwannosita afino daafira, uyinoonnisi looso loosa shota ikkitannosikkita hedikki digatino. Ikkirono isi Yihowara maahoyye yee gala doodhino. Yesuusi 29 M.D. cuuamiti woꞌmunni woꞌma Yihowa fajjo assate illachishino. (Ibi. 10:5-7) Isi haqqu aana sutame reyara kae noo yannara nafa Annisi fajjo assate horonta badhera dihigino.—Yoh. 19:30.

16. Ooso Yesuusiwiinni rossanno rosi giddo mittu maati?

¹⁶ Anniꞌneranna amaꞌnera hajajamme. Yooseefinna Maariyaaminte gede anniꞌnenna amaꞌne guuta diꞌꞌikkitino. Ikkirono Yihowa anniꞌneranna amaꞌnera kiꞌne agartannonna qajeelsitannoꞌne gede hadara uyino. Amaalensa macciishshitinannihanna silxaanensa ayirrissinanniha ikkiro, ‘baalunku coyi seyannoꞌne.’—Efe. 6:1-4.

17. Iyyaasu 24:15 kultanno garinni, wedellu hiikkonne doorsha doodha hasiissannonsa?

¹⁷ Ayera soqqantinanniro doodhe. Yihowa ayetiro, fajjosi maatironna fajjosi assa dandiitinannihu hiittoonniitiro kiꞌne umiꞌne buuxa hasiissannoꞌne. (Rom. 12:2) Hatto assitiniro  Yihowara soqqamate doodhitinanni; kuni doorshi heeshshoꞌne giddo doodhitinannihu wolu baalunku doorshinni roorinoho. (Iyyaasu 24:15 nabbawi; Ros. 12:1) Qullaawa Maxaafa ganyitine nabbabbinannihanna xiinxallitinanniha ikkiro, Yihowara nooꞌne baxillinna ammana lexxitanninna kaajjado ikkitanni hadhanno.

18. Wedellu maa doodha hasiissannonsa? Hatto assituro mayi atoote afidhanno?

¹⁸ Heeshshokki giddo Yihowa fajjo balaxisiisate doodhi. Sheexaanu alame dandooꞌne umiꞌne hasatto wonshiꞌrate horoonsidhiniro hagiirraamma ikkitinanni yitanno. Maalaamittete coye illachishshannori kayinni jifante ubbannotanna lowo qarri iillannonsata anfoommo. (1 Xim. 6:9, 10) Yihowa yaannore macciishshineemmohanna isi fajjo assa doodhineemmoha ikkiro, “baalunku coyi danchu garinni” qinaannonke—Iya. 1:8.

19. Annuwunna amuuwu maa dea dihasiissannonsa?

¹⁹ Annuwanna amuuwa, maateꞌne Yihowara soqqantanno gede kaaꞌlate dandiitinire baala asse. Iso addaxxe; isino dancha doorsha doodhitinanni gede kaaꞌlannoꞌne. (Law. 3:5, 6) Oosoꞌne coyidhinannirinni roore assitinanniri kaaꞌlannonsata deꞌinoonte. Konni daafira oosoꞌne Yihowa hagiirsiisanno doorsha doodhitanno gede kaaꞌlensa.

20. Wedellu Yihowara soqqama doodhiro mayi atoote afiꞌranno?

²⁰ Wedella, anniꞌnenna amaꞌne dancha doorsha doodha dandiitinanni gede kaaꞌlitannoꞌne. Kiꞌneno Magano hagiirsiisate sharrama hasiissannoꞌne. Konnira Yesuusi lawishsha harunsitine baxillaanchu iimi Anniꞌnera soqqamate doodhe. Hatto assitiniro xaa yannara nafa lowo atoote afidhine hagiirraame heeshsho heedhinanni. (1 Xim. 4:16) Albillitte afidhinanni hagiirrino baete!