1. Manna rosaano assate loosi heeshsho gatisate looso ikkinota anfeemmohu hiittoonniiti?

MANNA rosaano assate loosi heeshsho gatisanno loosooti! Tenne mayinni anfeemmo? Yesuusi Maatewoosi 28:19, 20te togo yee hajajino: “Hadhine gosa baala . . . cuuˈinanni rosaanoˈya assensa.” Cuuama lowo geeshsha hasiissannote yineemmohu mayiraati? Gato afiˈra hasidhannori cuuama hasiissannonsa. Cuuamate qixxaabbinori gato afiˈra dandiitannohu Yesuusi ninkera yee wodote kakkalo ikke reyinotanna reyotenni kainota ammanturo callaati. Soqqamaasinchu Pheexiroosi ammanate roduuwisira, “cuuama . . . [gatissannoˈnehu] Yesuusi Kiristoosi kao widoonniiti” yiinohu iseraati. (1 Phe. 3:21) Konnira Qullaawu Maxaafi rosaanchi cuuamanno woyite hegerera heeˈrate hexxo afiˈranno.

2. Layinki Ximootewoosi 4:1, 2 hiittoo rosiisaano ikkineemmo gede jawaachishshannonke?

² Manna rosaano assate “rosiisate” dandoonke woyyeessiˈra hasiissannonke. (2 Ximootewoosi 4:1, 2 nabbawi.) Mayira? Korkaatuno Yesuusi, “Hadhine gosa baala . . . rosaanoˈya assensa. . . . rosiissensa!” yee hajajinonke. Soqqamaasinchu Phaawuloosi “konne coye jaatte assi. Hatto assittoro, ateneenna macciishshitannohere gatisatto” yiino. Konnira Phaawuloosi, “rosiisatto roso seekkite agadhi” yiino. (1 Xim. 4:16) Rosiisa manna rosaano assate ledo xaado afidhino daafira, rosiisate dandoonke woyyeessiˈra hasiissannonke.

3. Konni birxichira manna Qullaawa Maxaafa xiinxallisate daafira maa ronseemmo?

³ Alamete doyichora lowo miliyoone ikkanno manna ganyine Qullaawa Maxaafa rosiinsanni heeˈnoommo. Sai birxichira ronsummonte gede kuni manni cuuame Yesuusi Kiristoosi rosaano  ikkanno gede kaaˈlineemmo gara afa hasiˈneemmo. Konni birxichira, Qullaawu Maxaafi rosaanchi ayyaanaamittetenni lophe cuuamanno gede kaaˈlate mittu mittunku rosiisaanchi assa hasiissannosiha lende onte coye laˈneemmo.

4. Qullaawu Maxaafi rosiisaanchi rosiisanno woyite isonooto eemadha hasiissannosihu mayiraati? (Lekkaalliidi qaagiishshano lai.)

⁴ Maganu Qaale rosiisa banxeemmo. Konnira Maganu Qaalinni ronsoommore lowore coyiˈra rakkannonke. Ikkollana Agarooshshu Shae woy Songonnita Qullaawu Maxaafi xiinxallo massagannohu, woy manna Qullaawa Maxaafa xiinxallisannohu, lowore coyiˈra dihasiissannosi. Qullaawa Maxaafa xiinxallisanno manchi, afinoha Qullaawu Maxaafiha mitto mittonka qummeeshsha xawisannokki gede isonooto eemadha hasiissannosi; hatteentenni rosiisanno woyite Qullaawa Maxaafa seekke horoonsiˈra hasiissannosi. * (Yoh. 16:12) Hanni cuuamitto woyite nooheta Qullaawu Maxaafi egenno xa noohete ledo heewisiisi. Hakka waro afoottohu Qullaawu Maxaafiha xinta ikkino roso calla ikkara dandaanno. (Ibi. 6:1) Xa nooheti Qullaawu Maxaafi egenno lowo diri giddo afiˈroottote; konnira haaru rosaanchira afoottore baala mitte higge rosiisate woˈnaaltooti.

5. (a) Umi Teselonqe 2:13 kultanno garinni, Qullaawu Maxaafi rosaanchi maa huwatara hasiˈneemmo? (b) Rosaanchu rosinore wolootaho kulanno gede jawaachisha dandiineemmohu hiittoonniiti?

⁵ Rosaanchinke rosanni noori Qullaawu Ayyaaninni borreessaminoho Maganu Qaalinni ikkinota afanno gede assa hasiˈneemmo. (1 Teselonqe 2:13 nabbawi.) Hatto assa dandiineemmohu hiittoonniiti? Rosaanchu Qullaawu Maxaafinni rosinore wolootaho kulanno gede jawaachishi. Duucha woyite Qullaawu Maxaafi qummeeshsha ati xawisattontenni, mito qummeeshsha rosaanchu umisi xawisanno gede assi. Rosaanchu Maganu Qaalinni rosinore loosu aana hosiisanno gara afanno gede kaaˈlisi. Nabbawino qummeeshshuwa ma garinni wodanchinoronna isira mayi macciishshamannosiro afate mite xaˈmo xaˈmi. (Luq. 10:25-28) Togo yite xaˈma dandaatto: “Kuni qummeeshshi Yihowa akatta giddo hiikkonne xawisanno?” “Kuni Qullaawu Maxaafi halaali ate kaaˈlahera dandaannohu hiittoonniiti?” “Rosoottori daafira mayi macciishshamannohe?” (Law. 20:5) Roore hasiisanno coyi, rosaanchu lowo egenno afiˈra calla ikkitukkinni, rosinore baxatenna loosu aana hosiisate.

6. Qullaawa Maxaafa xiinxallisatto woyite, woˈnaalshu noonsa roduuwa koyisa danchate yineemmohu mayiraati?

⁶ Qullaawa Maxaafa xiinxallisatto woyite,  woˈnaalshu noonsa roduuwa ate ledo xiinxallissanno gede koyisatto? Hatto ikkiro, xiinxallisatto gari hiittootiro xaˈminsa; xiinxallisitto woyite Qullaawa Maxaafa seekkite horoonsiˈroottoronna teˈee kultannohe gede xaˈmi. Rosiisate dandookki woyyeessiˈra hasiˈrittoro umokki heeshshi assa hasiissannohe. (Soqqamaasinete Looso 18:24-26 ledo heewisiisi.) Hakkiinni woˈnaalshu noosi rodoo ‘rosaanchu rosinore huwatinoha lawannohe’ yite xaˈmi. Mitte woy hakkiinni saˈino lamala geeshsha heeˈrattokkiha ikkiro, rosaanchokki hakku rodii xiinxallisanno gede xaˈma dandaatto. Tini rosaanchu ganye xiinxalla agurannokkinna xiinxalla lowo geeshsha hasiissannota ikkitinota huwatanno gede kaaˈlitannosi. Rosaanchu ati xiinxallisattoha ikkino daafira, wolu xiinxallisa dihasiissanno yite horo heddooti. Baalunkunni roore rosaanchikkira danchare assa hasiˈratto daafira, halaale rosa agurara dihasiˈratto.

7. Qullaawu Maxaafi rosaanchi rosanni noore baxanno gede kaaˈlannosiri maati?

⁷ Rosaanchikki rosiisattoha Qullaawu Maxaafi halaale baxattotanna ammanattota afa hasiˈranno. (1 Tes. 1:5) Hatto ikkiro rosannore roore baxara dandaanno. Hasiisannoha ikkiro, Qullaawu Maxaafi biddishsha harunsakki kaaˈlitinohe gara kulisi. Hatto assittoro, Qullaawu Maxaafi isono kaaˈlanno biddishsha amadinota wodanchanno.

8. Qullaawu Maxaafi rosaancho kaaˈlate maa assa dandaatto? Hatto assattohu mayiraati?

⁸ Qullaawa Maxaafa xiinxallisatto woyite, rosaanchikkira isira iillinori gedeeri iilleennansa dandiite saˈinori woˈnaalsha kulisi. Songoˈne giddo rosaanchikkira kaaˈlanno woˈnaalshi noosi halashshaanchi nooha ikkiro, xiinxallisatto woyite iso koyisa dandaatto. Woy jw.org aana “Qullaawu Maxaafi Heeshsho Biddi Assanno” * yaannohu aante aantenni fulanno birxichira nooha jawaachishanno woˈnaalsha kula dandaatto. Togoo birxichuwanna viidiyo rosaanchikki Qullaawu Maxaafi biddishsha harunsa hayyo ikkitinota huwatanno gede kaaˈlitannosi.

9. Rosaanchikki rosinore maatesiranna jaallasira kulanno gede jawaachisha dandaattohu hiittoonniiti?

⁹ Xiinxallisattohura galte noosiha ikkiro, iseno xiinxallitanno? Xiinxallitannokkiha ikkiro, xiinxallitanno gede koyisi. Rosaanchikki rosinore maatesiranna jaallasira kulanno gede jawaachishisi. (Yoh. 1:40-45) Hiittoonni? Togo yite xaˈma dandaatto: “Konne halaale maatekkira hiittoonni xawisa dandaatto?” woy “Jaalikkira konne halaale xawisate hiikkonne qummeeshsha  horoonsiˈratto?” Konni garinni rosaanchikki rosiisaancho ikkanno gede qajeelsa dandaatto. Hakkiinni ikkado ikkiro, cuuaminokki halashshaancho ikke soqqama dandaanno. Qullaawa Maxaafa xiinxalla hasiˈrannohu afino manni nooro rosaanchokki xaˈmi. Kulihero bayichonko hakko mancho Qullaawa Maxaafa xiinxallanno gede koyisisi. Qullaawa Maxaafa Xiinxallinseemmohu Hiittoonniiti? * yitanno viidiyo leellishisi.

10. Umi Teselonqe 2:7, 8 kultanno garinni, Qullaawu Maxaafi rosiisaanchi Phaawuloosi lawishsha harunsa dandaannohu hiittoonniiti?

¹⁰ Rosiisaanchu rosaanosi daafira lowo geeshsha heda hasiissannosi. Insa albillitte ayyaanaamittete roduuwakki ikkitannota hedi. (1 Teselonqe 2:7, 8 nabbawi.) Insara alamete noo jaalla aguranna biddi assiˈra hasiissannonsare baala biddi assidhe Yihowara soqqama shota diˈˈikkitannonsa. Songote giddo addu jaalla afidhanno gede kaaˈla hasiissannonke. Qullaawa Maxaafa xiinxallisatto yannara calla ikkikkinni wole woyiteno rosaanchikki ledo yanna sayisse isira jaala ikkisi. Xiinxallisatto yannara calla ikkikkinni wole barrano marte xaˈmite, silke bilbilte woy harancho sokka borreessite isira hedattota leellishi.

11. Rosaanchinke songote giddo maa afiˈranno gede kaaˈla hasiissannonke? Mayira?

¹¹ “Mitto qaaqqo lossannohu qachaho” yinanni yaatto no. Ninkeno “Mitto mancho Yesuusi rosaancho assitannoti songote” yaa dandiineemmo. Woˈnaalshu noonsari Qullaawu Maxaafi rosiisaano, rosaanonsa songote roduuwi ledo egensiissannohu iseraati; songote roduuwi rosaanchu ayyaanaamittetenni lophanno gede kaaˈlitannosi. Qullaawu Maxaafi rosaano ayyaanaamittete kaaˈlannonsahunna qarru iillannonsa woyite jawaachishannonsahu Maganu manni ledo jaalooˈma baxxara dandiitanno. Qullaawu Maxaafi rosaanchi songote miilanna ayyaanaamittete maatenke wido ikkinohu gede asse hedara hasiˈneemmo. Isi hagiirsiisannohunna baxisannohu roduuwu maamari wido ikkara hasiˈneemmo. Hatto assinummoro Yihowa baxannokki manni ledo noosi aante agura diqarrissannosi. (Law. 13:20) Albi jaallasi gibbusirono, Yihowa dirijjite giddo addu jaalla afiˈra dandaannota huwatanno.—Maq. 10:29, 30; 1 Phe. 4:4.

12. Rosaanchinke ledo meessaneeto Yihowara sayise aatenna cuuamate daafira hasaawa hasiissannonkehu mayiraati?

¹² Meessaneeto Yihowara sayise aatenna cuuamate daafira xawissine hasaabbe. Qoleno,  Manna Qullaawa Maxaafa rosiinseemmohu qaru korkaati, cuuame Yesuusi rosaano ikkanno gede kaaˈlateeti. Qullaawu Maxaafi rosaanchi xiinxallanni boode agana keeshshiro, hakko iso gambooshshe daa hanafihu gedensaanni, Qullaawa Maxaafa xiinxallinsoommosihu Yihowa Farciˈraasincho ikke isira soqqamara kaaˈlate ikkinota huwata hasiissannosi.

13. Rosaanchu ayyaanaamittetenni lophe cuuamate dirimu dirimunni maa assa hasiissannosi?

¹³ Suwashshu wodani noosihu Qullaawu Maxaafi rosaanchi cuuamate dirimu dirimunni assa hasiissannosiri no. Umihunni, rosaanchu Yihowa afanna iso baxa, hattono ammana hasiissannosi. (Yoh. 3:16; 17:3) Hakkiinni rosaanchu Yihowa ledonna sonogote roduuwi ledo jaalooma kalaqiˈra hasiissannosi. (Ibi. 10:24, 25; Yai. 4:8) Jeefoteno isi busha rosicho facci asse aguranna cubbisira maaro adha hasiissannosi. (Soq. 3:19) Hattono ammanannore wolootaho kula hasiissannosi. (2 Qor. 4:13) Hakkiinni heeshshosi Yihowara sayise oye mannu albaanni cuuamanno. (1 Phe. 3:21; 4:2) Hakko barra roduuwu baalu lowo geeshsha hagiidhitanno. Rosaanchu cuuamate dirimu dirimunni assannorira galatisi; hattono tenne assa agurannokki gede jawaachishisi.

14. Qullaawu Maxaafi Rosiisaanchi rosaanchisi ayyaanaamittetenni lophanni nooronna teˈee buuxa dandaannohu hiittoonniiti?

¹⁴ Rosaanchinke heeshshosi Yihowara sayise oye cuuamanno gede kaaˈlineemmo woyite cincineemmore ikka hasiissannonke. Ikkirono Yihowara soqqama hasiˈrannotanna teˈee afa hasiissannonke. Rosaanchikki Yesuusi hajajo agadhate sharramannonso, Qullaawa Maxaafa rosannohu egenno afiˈrate callaati?

15. Qullaawu Maxaafi rosiisaanchi rosaanchisi ayyaanaamittetenni lophanni nootanna teˈee afannohu hiittoonniiti?

¹⁵ Rosaanchiˈne ayyaanaamittetenni lophanni nooronna teˈee ganyitine buuxxe. Lawishshaho, isi Yihowa baxannota leellishanno? Yihowa huucciˈranno? (Far. 116:1, 2) Qullaawa Maxaafa nabbawanno? (Far. 119:97) Gambooshshe ganye daanno? (Far. 22:22) Heeshshosi giddo biddi assiˈra hasiissannosire biddi assiˈrino? (Far. 119:112) Rosinore maatesiranna jaallasiˈra kulanno? (Far. 9:1) Baalunkunni roore Yihowa Farciˈraasincho ikka hasiˈranno? (Far. 40:8) Rosaanchikki aleenni kulliri giddo mitto nafa assannokkiha ikkiro, hatto assannokkihu mayiraatiro hayyotenni afate woˈnaali,  hattono hatte hajo daafira shaqillunni xawissine hasaabbe. *

16. Qullaawu Maxaafi rosaancho xiinxallisa agura hasiissannohehu mamooteeti?

¹⁶ Rosaanchokki xiinxallisa agura hasiissannoheronna teˈee yannate kiiro buuxa hasiissannohe. Ateneeto togo yite xaˈmi: ‘Rosaanchu xiinxallate diqixxaawanno? Gambooshshe haˈra dibaxanno? Busha gadesi xaano diagurino? Kaphu ammaˈno giddonni xaano difulino?’ Hatto ikkiro, iso xiinxallisa shamuri kisasira hasiˈrannokki mancho waa daahanno gara rosiisate gedeeti! Qullaawu Maxaafi rosaanchi rosino halaale naadannokkihanna biddi assiˈra hasiissannosire biddi assiˈrannokkiha ikkiro, iso xiinxallissanni yanna guxxitooti.

17. Umi Ximootewoosi 4:16 kultanno garinni, Qullaawu Maxaafi rosiisaano baalanti maa assa hasiissannonsa?

¹⁷ Manna rosaano assate qoossonke lowo geeshsha naandeemmo; qoleno Qullaawu Maxaafi rosaanchinke ayyaanaamittetenni lophe cuuamanno gede kaaˈla hasiˈneemmo. Rosiinseemmo woyite Qullaawa Maxaafa horoonsiˈneemmohu hattono rosiinseemmore banxeemmotanna ammaneemmota leellishanno garinni rosiinseemmohu iseraati. Rosaanchinke songote giddo jaalla kalaqiˈranno gede jawaachinsheemmo. Meessaneeto Yihowara sayise aanna cuuama lowo geeshsha hasiissannota ikkitinota luphi assine kulleemmo; hattono rosaanchu ayyaanaamittetenni lophanni nooronna teˈee yannate kiiro buunxeemmo. (“ Qullaawu Maxaafi Rosiisaanchi Rosaanchisi Cuuamanno Gede Kaaˈlate Maa Assa Hasiissannosi?” yitannota qoola 13 noo saaxine lai.) Konne heeshsho gatisanno looso loonseemmo daafira lowo geeshsha hagiirraammaho! Qullaawu Maxaafi rosaano ayyaanaamittetenni lophite cuuantanno gede kaaˈlate dandiinummore baala assineemmo.