XIINXALLOTE BIRXICHO 41
Qullaawu Maxaafi Rosaanchi Ayyaanaamittetenni Lophe Cuuamanno Gede Kaaˈlineemmo Gara—Gafa Mite
“Ninke soqqanshonni dagginoonniri kiˈne, Kiristoosi sokka ikkaˈne xawoho.”—2 Qor. 3:3.
FAARSO 78 “Maganu Qaale Rosiisa”
GUULCHO *
Mitte Qullaawu Maxaafi xiinxallo ayyaanaamittetenni lophite cuuantanna laˈˈatenni roore songo hagiirsiisannori woluri mayi no? (Gufo 1 lai)
1. Layinki Qorontoosi 3:1-3 Qullaawu Maxaafi rosaanchi cuuamanno gede kaaˈlate qoossonke naandeemmo gede assitannonkehu hiittoonniiti? (Aaniidi qoolira noo misile lai)
SONGOˈNE qoqqowi giddo noohu mittu Qullaawu Maxaafi rosaanchi cuuamiro mayi macciishshamannohe? Lowo geeshsha hagiidhattoti dihuluullissannote. (Mat. 28:19) Cuuamino manchi ati xiinxallisoottoha ikkiro, hakko manchi cuuamanna laˈˈakki lowo geeshsha hagiirsiissinohe. (1 Tes. 2:19, 20) Hakku manchi ayyaanaamittetenni lophe cuuamasi atinna wole songote miilla iso kaaˈlate diinaggaabbine lossinoonnita leellishshanno.—2 Qorontoosi 3:1-3 nabbawi.
2. (a) Hiittenne lowo geeshsha hasiissanno xaˈmo laˈneemmo? Mayira? (b) Qullaawa Maxaafa xiinxallisate yaa mayyaate? (Lekkaalliidi qaagiishsha lai.)
2 Saihu shoolu diro giddo roduuwu alamete doyichora mite 10,000,000 meddi yaanno mannira Qullaawa Maxaafa xiinxallissinota afa lowo geeshsha hagiirsiissanno. * Hattee dirra giddo diru kiiro 280,000 saˈˈanno manni cuuame Yihowa Farciˈraasinenna Yesuusi Kiristoosi rosaano ikkino. Lowo miliyoone ikkannohu Qullaawa Maxaafa xiinxallanno manni giddo rooru cuuamanno gede kaaˈla dandiineemmohu hiittoonniiti? Yihowa cince mannu Kiristoosi rosaano ikkanno gede yannanna faro faninonsa; konnira ninkeno dandaami deerrinni kuni manni mulenni ayyaanaamittete lophe cuuamanno gede kaaˈla hasiissannonke. Yanna horonta gooffe daggino!—1 Qor. 7:29; 1 Phe. 4:7.
3. Manna Qullaawa Maxaafa xiinxallisate daafira konni birxichinni maa ronseemmo?
3 Xaa yannara manna rosaano assa lowo geeshsha hasiissinota ikkitino daafira, Qullaawa Maxaafa xiinxallannohu lowo manni ayyaanaamittetenni lophe cuuamanno gede maa assa dandiinanniro afate sinu biiruwa qoqqowinsara xiinxallo assitanno gede assinoonni. Konninna aananno birxichira woˈnaalshu noonsa suwisaano, misiyoone ikkite soqqantanno roduuwi, hattono woradu aliidi laˈˈaano lawishshinni maa ronseemmoro laˈneemmo. * (Law. 11:14; 15:22) Insa Qullaawu Maxaafi rosaanchi horo afiˈrate assa hasiissannosiri maatironna rosiisaanchuno maa assa hasiissannosiro coyidhino. Konni birxichira Qullaawu Maxaafi rosaanchi ayyaanaamittetenni lophe cuuamate assa hasiissannosiha onte coye xiinxallineemmo.
LAMALATE KIIRO XIINXALLISSE
Rosaanchiˈne ledo mitto bayicho ofoltine Qullaawu Maxaafire hasaawa dandiitinannironna teˈee xaˈme (Gufo 4-6 lai)
4. Minu annira xullote uurre heeˈreenna Qullaawa Maxaafa xiinxallisate daafira maa huwata hasiissannonke?
4 Batinyu roduuwi Qullaawa Maxaafa minu anni xullote uurre heeˈreenna xiinxallisa hanaffanno. Tini umi qara hakko manchira Qullaawu Maxaafi hasatto heedhannosi gede kaaˈlitannosiha ikkirono, duucha woyite togoo hasaawa shiima yanna calla hasaabbanno hattono lamalate kiiro hasaawisa hooggara dandiitanno. Mite halashshaano hasaawissanno manchi hasatto lexxitanno gede assate hakko manchi teesso xaˈmitanno; hakkiinni silke bilbilte woy sokka borreessite mite harancho Qullaawu Maxaafi hedo kultannosi. Konni garinni Qullaawa Maxaafa biddiitto xiinxallisa hanaffukkinni boode agana keeshshitannoha ikkara dandaanno. Mittu Qullaawu Maxaafi rosaanchi yanna gaaˈme Maganu Qaale xiinxallate sharramannokkiha ikkiro ayyaanaamittetenni lophe cuuama dandaanno? Didandaanno.
5. Luqaasi 14:27-33 kultanno garinni, Yesuusi manna rosaano assate kaaˈlannonkeha hiikkonne lawishsha coyiˈrino?
5 Mitte yannara Yesuusi, isi rosaancho ikka hasiˈranno manchi maa assa hasiissannosiro lawishshunni kulino. Isi mine miˈna hasiˈranno manchi daafiranna olaho fulanno moote daafira coyiˈrino. Yesuusi mine miˈnannohu miˈne gudate “mageeshshi woxi hasiisannosiro” ofolle maˈla hasiissannosita coyiˈrino; hattono olaho fulanno moote olantosi ola qeeltannoronna teˈee ‘ofolle maˈla’ hasiissannosita coyiˈrino. (Luqaasi 14:27-33 nabbawi.) Hatteente gede Yesuusi rosaancho ikka hasiˈranno manchi maa assa hasiissannosiro seekke buuxa hasiissannosi. Konnira Qullaawu Maxaafi rosaanonke lamalate kiiro xiinxallitanno gede jawaachisha hasiissannonke. Hatto assa dandiineemmohu hiittoonniiti?
6. Qullaawu Maxaafi rosaanchi ayyaanaamittetenni lophanno gede maa assa dandiineemmo?
6 Minu anni xullote uurre heeˈreenna xiinxallissinanni woyite, xiinxallissinanni yanna leda dandiitinanni. Martinanni kiiro Qullaawu Maxaafi hedo leddine hasaawa dandiitinanni. Minu anni halashshe hasaawa giwannokkiha ikkiro, mitto bayicho ofoltine hasaawa dandiitinannironna teˈee xaˈme. Minu anni qolanno dawaro, isi Qullaawa Maxaafa xiinxalla hasiˈrannoronna teˈee leellishshanno. Hattono ayyaanaamittetenni rahe lophanno gede lamalate giddo lame hige xiinxalla dandaannoronna teˈee xaˈma dandiitinanni. Ikkirono lamalate giddo mitte woy lame hige xiinxallisatenni sainore assa hasiissanno.
ROSAANCHOˈNE XIINXALLISSINARA ALBAANNI QIXXAABBE
Xiinxallisattora albaanni seekkite qixxaawi; hattono rosaanchikki qixxaawanno gara leellishisi (Gufo 7-9 lai)
7. Qullaawu Maxaafi rosiisaanchi rosiisara albaanni balaxe qixxaawa dandaannohu hiittoonniiti?
7 Ninke Qullaawu Maxaafi rosiisaano ikkinoommo daafira, rosiinseemmore balanxe seekkine qixxaawa hasiissannonke. Balanxe rosiinseemmore nabbambe, hakkiinni qummeeshshuwa fushshine laˈˈa dandiineemmo. Qara hedo wodancha hasiissannonke. Rosu birxicho, cinaancho birxicho, xiinxallote xaˈmuwa, “nabbawi” yaanno qummeeshshuwa, misillanna konne roso xawissanno viidiyo hedi. Hakkiinni rosaanchokki heddanni konne roso xawe leellannosi garinni hattono loosu aana hosiisa dandaanno garinni rosiisa dandaatto gara hiinci.—Neh. 8:8; Law. 15:28a.
8. Soqqamaasinchu Phaawuloosi Qolasiyaasi Sokka 1:9, 10 coyiˈrinori Qullaawu Maxaafi rosaanora huuccate daafira maa rosiisannonke?
8 Qixxaawatto woyite, rosaanchikkinna isira hasiisannori daafira Yihowa huucci. Qullaawa Maxaafa rosaanchikki loosoho kakkaˈˈanno gede assite rosiisa dandaatto gede kaaˈlahera Yihowa huucciˈri. (Qolasiyaasi Sokka 1:9, 10 nabbawi.) Rosaanchikkira huwatate woy ammane adhate qarrisasira dandaannori maatiro balaxxe hedi. Mixokki Qullaawu Maxaafi rosaanchi ayyaanaamittetenni lophe cuuamanno gede kaaˈla ikkitinota deˈooti.
9. Qullaawu Maxaafi rosiisaanchi, rosaanchisi xiinxallanno woyitira qixxaawanno gede kaaˈla dandaannohu hiittoonniiti? Xawisi.
9 Rosaanchonke ganyine Qullaawa Maxaafa xiinxallinseemmoha ikkiro, Yihowanna Yesuusi assitinore naadannotanna lede rosa hasiˈrannota dihuluullammeemmo. (Mat. 5:3, 6) Qullaawu Maxaafi rosaanchi xiinxallotenni woˈmunni woˈma horo afiˈrate, rosannore seekke illachisha hasiissannosi. Rosaanchiˈne, xiinxallannoha mitto mittonka gafa balaxe nabbawanna qixxaawa hattono hiince loosu aana hosiisa lowo geeshsha kaaˈlitannosita kullesi. Qullaawu Maxaafi rosiisaanchi, rosaanchisi hatto assanno gede kaaˈla dandaannohu hiittoonniiti? Rosaanchikki ledo mitteenni qixxaabbe, qixxaawanno gara leellishisi. * Xiinxallote xaˈmuwara dawaro afiˈranno gara kulisi; hattono dawaro qola dandaanno gede qara qara hedonna qaalla xuruuranno gara leellishisi. Dawaro umisi yaattonni qolanno gede assi. Hatto assiro, rosinore mageeshshi geeshsha huwatinoro afa dandaatto. Qullaawu Maxaafi rosaanchiˈne assara jawaachisha hasiissannoˈneri wolurino no.
ROSAANCHIKKI BARRU BAALA YIHOWA LEDO HASAAWANNO GEDE ROSIISISI
Qullaawu Maxaafi rosaanchikki Yihowa ledo hasaawanno gara rosiisisi (Gufo 10-11 lai)
10. Barru baala Qullaawa Maxaafa xiinxalla hasiissannohu mayiraati? Qullaawu Maxaafi niwaawenni woˈmunni woˈma horo afiˈrate maa assa hasiissanno?
10 Qullaawu Maxaafi rosaanchi horo afiˈrate lamalate kiiro rosiisaanchisi ledo xiinxallannotano agurranna barru baala assa hasiissannosiri wolurino no. Yihowa ledo hasaawa hasiissannosi. Hiittoonni? Yihowa yaannore macciishshenna isi ledo hasaawe hatto assa dandaanno. Barru baala Qullaawa Maxaafa nabbawe Maganu yaannore macciishsha dandaanno. (Iya. 1:8; Far. 1:1-3) Jw.org aana fultinota “Qullaawu Maxaafi Niwaawe Pirogiraame” horoonsiˈranno gara leellishisi. * Rosaanchikki Qullaawu Maxaafi niwaawenni horo afiˈranno gede, nabbawinori Yihowa daafira maa rosiisannosironna loosunni leellisha dandaanno gara hiincanno gede kaaˈlisi.—Soq. 17:11; Yai. 1:25.
11. Rosaanchikki garunni huuccatto assiˈra rosa dandaannohu hiittoonniiti? Isi Yihowa ganye huucciˈra hasiissannosihu mayiraati?
11 Rosaanchikki barru baala huuccattotenni Yihowa ledo hasaawanno gede jawaachishisi. Xiinxallo huuccattotenni hanafinna jeefisi; hattono isi daafira huucci. Ati huuccitanna macciishshiro, isino giddosinni huucciˈranna Yihowa Yesuusi Kiristoosi suˈminni huucciˈra hasiissannosita rosanno. (Mat. 6:9; Yoh. 15:16) Isi Qullaawa Maxaafa barru baala nabbawannohanna (Yihowa yaannore macciishsha) huucciˈrannoha (Yihowa hasaawisa) ikkiro albinni roore Maganunniwa shiqanno. (Yai. 4:8) Tenne roso assiˈrasi heeshshosi Yihowara sayise oye cuuamanno gede kaaˈlitannosi. Woluri kaaˈlannosiri maati?
YIHOWA LEDO NOOSI JAALOOMA KAAJJISHIˈRANNO GEDE KAAˈLISI
12. Qullaawu Maxaafi rosiisaanchi, rosaanchisi Yihowa ledo noosi jaalooma kaajjishiˈranno gede kaaˈla dandaannohu hiittoonniiti?
12 Qullaawu Maxaafi rosaanchinke Yihowa daafira rose egenno afiˈrara calla ikkikkinni rosinore wodanche loosu aana hosiisara hasiˈneemmo. Yesuusi mannaho lowore rosiisino; mannuno isi rosiisinore baxino. Kayinni iso harunsitinohu rossinori wodaninsara coino daafiraati. (Luq. 24:15, 27, 32) Rosaanchiˈne Yihowa seekke afa hasiissannosi; isi Yihowa ledo jaalooma kalaqiˈra, hattono Iso Annisi, Maganisinna Jaalisi gede asse laˈˈa dandaanno. (Far. 25:4, 5) Qullaawa Maxaafa xiixallissinanni woyite Maganinke akatta luphi assitine kulle. (Ful. 34:5, 6; 1 Phe. 5:6, 7) Xiinxallissinanni heedhinoonni birxichi ikkihano ikkiro, Yihowa ayimma illachishanno gede asse. Rosaanchiˈne Yihowa akatta yaano, baxillesi, shaqqillesinna mararrosi naadanno gede kaaˈlesi. Yesuusi, “baalanta roortannotinna umi hajajo” Yihowa ‘Maganokki baxate’ yiino. (Mat. 22:37, 38) Rosaanchikki Magano lubbora baxanno gede kaaˈlate sharrami.
13. Rosaanchikki Yihowa akatta rosanno gede kaaˈla dandaattohu hiittoonniiti?
13 Qullaawu Maxaafi rosaanchi ledo hasaawatto woyite, Yihowa lowo geeshsha baxattota afanno gede assi. Tini isino Maganu ledo muli jaalooma kalaqiˈra hasiissannosita huwatanno gede kaaˈlitasira dandiitanno. (Far. 73:28) Lawishshaho, xiinxallisatto borrora woy mittu qummeeshshi giddo Yihowa akatta yaano, baxillesi, hayyosi, taashshosi woy wolqasi kultannoti lowo geeshsha baxatto hedo no? Tenne rosaanchikkira kulisi; hattono Yihowa baxatto gede assinohehu batinyu korkaati giddo mittu konne ikkinota kulisi. Qullaawu Maxaafi rosaano ayyaanaamittetenni lophite cuuamate assa hasiissannonsari wolurino no.
SONGOTE GAMBOOSHSHE DAANNO GEDE JAWAACHISHISI
Dandaamannoha ikkiro rosaanchikki mulenni gambooshshe daa hanafanno gede jawaachishisi! (Gufo 14-15 lai)
14. Ibiraawoota 10:24, 25 kultanno garinni Qullaawu Maxaafi rosaanchi ayyaanaamittete lophate maa assa hasiissannosi?
14 Ninke baalunku rosaanonke ayyaanaamittetenni lophite cuuantara hasiˈneemmo. Insa kaaˈla dandiineemmo doogga giddo mitte songote gambooshshe dagganno gede koyisate. Mittu woˈnaalshu noosi rodii gambooshshe daggannori Qullaawu Maxaafi rosaano ayyaanaamittetenni mulenni lophitannota coyiˈrino. (Far. 111:1) Mitu roduuwi Qullaawu Maxaafi rosaanonsara gambooshshe hadhuro, hakkiichono lowore rossannota kultannonsa. Rosaanchikki ledo Ibiraawoota 10:24, 25 nabbawi; hakkiinni gambooshshe haˈriro mayi horo afiˈrannoro xawisisi. Mangistete Addaraashenkera Maa Maa Assinanni? * yitanno viidiyo leellishisi. Rosaanchikki lamalate gambooshshe ganye daanno gede kaaˈlisi.
15. Qullaawu Maxaafi rosaanchi gambooshshe ganye daanno gede jawaachishate maa assa dandiineemmo?
15 Rosaanchikki gambooshshe daannokkiha woy sae sae calla daannoha ikkiro maa assa dandaatto? Muli yannara gambooshshunniwa rosoottore faasiiqqe kulisi. Tini rosaanchikki gambooshshe daanno gede roore kakkayissasira dandiitanno. Muli yannara gambooshshunniwa xiinxallinannita Agarooshshu Shae woy Kiristaanu Heeshshonna Soqqanshota Xiinxallote Maxaaficho uyisi. Aante noo lamalara gambooshshunniwa maa xiinxallinanniro leellishshisi; hattono hiikku gafi baxisannosiro xaˈmisi. Isi gambooshshe dayiro laˈˈannorinna macciishshannori, konni albaanni haˈrinohu wole ammaˈno gambooshshinni baxxinoha ikkinota huwatasi digattanno. (1 Qor. 14:24, 25) Isi gambooshshunniwa dancha lawishsha ikkitannosiri ledo xaadanno; insa ayyaanaamittetenni lophe cuuamanno gede kaaˈlitasira dandiitanno.
16. Qullaawu Maxaafi rosaanchi ayyaanaamittetenni lophe cuuamanno gede kaaˈlate maa assa hasiissannonke? Aananno birxichira maa ronseemmo?
16 Qullaawu Maxaafi rosaanchi ayyaanaamittetenni lophe cuuamanno gede kaaˈla dandiineemmohu hiittoonniiti? Rosaanonke lamalate kiiro xiinxallitanno gedenna xiinxallonsarano qixxaabbanno gede jawaachinshe, Qullaawa Maxaafa xiinxalla lowo geeshsha hasiissannota ikkitinota wodanchitanno gede kaaˈla dandiineemmo. Qoleno barru baala Yihowa ledo hasaabbanno gedenna isi ledo jaalooma kalaqidhanno gede jawaachisha hasiissannonke. Songote gambooshshe dagganno gedeno jawaachinsheemmo. (“ Qullaawu Maxaafi Rosaanchi Ayyaanaamittetenni Lophe Cuuamate Maa Assa Hasiissannosi?” yitannota qoola 12 noo saaxine lai.) Aananno birxichira kayinni Qullaawu Maxaafi rosiisaanchi, rosaanchisi ayyaanaamittetenni lophe cuuamanno gede kaaˈlate assa hasiissannosiha onte coye laˈneemmo.
FAARSO 76 Hagiirsiissannohe?
^ GUFO 5 Mitto mancho rosiisate yaa hakko manchi rosinore wodanchanno gedenna harunsanno gede kaaˈlate yaate. Tayixehu yaano 2020nnihu diru qummeeshshi Maatewoosi 28:19te; kuni qummeeshshi mannu cuuame Yesuusi Kiristoosi rosaano ikkanno gara afanno gede Qullaawa Maxaafa xiinxallisanna rosiisa lowo geeshsha hasiissannota ikkitinota qaagiissannonke. Konninna aananno birxichira konni lowo geeshsha hasiisanno loosira dandoonke woyyeessiˈra dandiineemmo gara ronseemmo.
^ GUFO 2 HARANCHO XAWISHSHA: Mittu manchi ledo ganyite Qullaawu Maxaafire hasaawattoha ikkiro, Qullaawa Maxaafa xiinxallissanni nootto yaate. Hakko manchira Qullaawa Maxaafa xiinxallisatto gara leellishshe lame higge xiinxallisittohu gedensaanni, kuni manchi xiinxalla diaguranno yite ammanattoha ikkiro, Qullaawu Maxaafi xiinxallo nooe yite rippoorte aa dandaatto.
^ GUFO 3 Kuri birxichuwara Maaja 2004 kayise Onkoleessa 2005 geeshsha noote Maganu Mangiste Soqqanshonkera (Amaaru Afoo) “Ayyaanaamittetenni Lophitanni Noore Qullaawu Maxaafi Rosaano Xiinxallisa” yaannohu aante aantete fulanno birxichira noota mite kaaˈlitanno hedo qummi assinoonni.
^ GUFO 9 Xiinxallinseemmo Manna Xiinxallote Qixxaawanno Gara Rosiisa yitannota shoolu daqiiqi viidiyo lai. Jw.org aana, LAYIBIRERE > ADDI ADDI VIIDIYO > GAMBOOSHSHENKENNA SOQQANSHONKE > SOQQANSHONKE ISILANCHIMMA WOYYEESSIˈRA yaannohu hunda lai.
^ GUFO 10 Jw.org aana LAYIBIRERE > MAXAAFFANNA BIROSHERUBBA yaannohu hunda lai.
^ GUFO 14 Jw.org aana LAYIBIRERE > ADDI ADDI VIIDIYO > GAMBOOSHSHENKENNA SOQQANSHONKE > SOQQANSHOTE KAAˈLANNORE yaannohu hunda lai.
