1. Manna rosaano assate loosi heeshsho gatisate looso ikkinota anfeemmohu hiittoonniiti?

 MANNA rosaano assate loosi heeshsho gatisanno loosooti! Tenne mayinni anfeemmo? Yesuusi Maatewoosi 28:19, 20te togo yee hajajino: “Hadhine gosa baala . . . cuuꞌinanni rosaanoꞌya assensa.” Cuuama lowo geeshsha hasiissannote yineemmohu mayiraati? Gato afiꞌra hasidhannori cuuama hasiissannonsa. Cuuamate qixxaabbinori gato afiꞌra dandiitannohu Yesuusi ninkera yee wodote kakkalo ikke reyinotanna reyotenni kainota ammanturo callaati. Soqqamaasinchu Pheexiroosi ammanate roduuwisira, “cuuama . . . [gatissannoꞌnehu] Yesuusi Kiristoosi kao widoonniiti” yiinohu iseraati. (1 Phe. 3:21) Konnira Qullaawu Maxaafi rosaanchi cuuamanno woyite hegerera heeꞌrate hexxo afiꞌranno.

2. Layinki Ximootewoosi 4:1, 2 hiittoo rosiisaano ikkineemmo gede jawaachishshannonke?

² Manna rosaano assate “rosiisate” dandoonke woyyeessiꞌra hasiissannonke. (2 Ximootewoosi 4:1, 2 nabbawi.) Mayira? Korkaatuno Yesuusi, “Hadhine gosa baala . . . rosaanoꞌya assensa. . . . rosiissensa!” yee hajajinonke. Soqqamaasinchu Phaawuloosi “konne coye jaatte assi. Hatto assittoro, ateneenna macciishshitannohere gatisatto” yiino. Konnira Phaawuloosi, “rosiisatto roso seekkite agadhi” yiino. (1 Xim. 4:16) Rosiisa manna rosaano assate ledo xaado afidhino daafira, rosiisate dandoonke woyyeessiꞌra hasiissannonke.

3. Konni birxichira manna Qullaawa Maxaafa xiinxallisate daafira maa ronseemmo?

³ Alamete doyichora lowo miliyoone ikkanno manna ganyine Qullaawa Maxaafa rosiinsanni heeꞌnoommo. Sai birxichira ronsummonte gede kuni manni cuuame Yesuusi Kiristoosi rosaano  ikkanno gede kaaꞌlineemmo gara afa hasiꞌneemmo. Konni birxichira, Qullaawu Maxaafi rosaanchi ayyaanaamittetenni lophe cuuamanno gede kaaꞌlate mittu mittunku rosiisaanchi assa hasiissannosiha lende onte coye laꞌneemmo.

4. Qullaawu Maxaafi rosiisaanchi rosiisanno woyite isonooto eemadha hasiissannosihu mayiraati? (Lekkaalliidi qaagiishshano lai.)

⁴ Maganu Qaale rosiisa banxeemmo. Konnira Maganu Qaalinni ronsoommore lowore coyiꞌra rakkannonke. Ikkollana Agarooshshu Shae woy Songonnita Qullaawu Maxaafi xiinxallo massagannohu, woy manna Qullaawa Maxaafa xiinxallisannohu, lowore coyiꞌra dihasiissannosi. Qullaawa Maxaafa xiinxallisanno manchi, afinoha Qullaawu Maxaafiha mitto mittonka qummeeshsha xawisannokki gede isonooto eemadha hasiissannosi; hatteentenni rosiisanno woyite Qullaawa Maxaafa seekke horoonsiꞌra hasiissannosi. b (Yoh. 16:12) Hanni cuuamitto woyite nooheta Qullaawu Maxaafi egenno xa noohete ledo heewisiisi. Hakka waro afoottohu Qullaawu Maxaafiha xinta ikkino roso calla ikkara dandaanno. (Ibi. 6:1) Xa nooheti Qullaawu Maxaafi egenno lowo diri giddo afiꞌroottote; konnira haaru rosaanchira afoottore baala mitte higge rosiisate woꞌnaaltooti.

5. (a) Umi Teselonqe 2:13 kultanno garinni, Qullaawu Maxaafi rosaanchi maa huwatara hasiꞌneemmo? (b) Rosaanchu rosinore wolootaho kulanno gede jawaachisha dandiineemmohu hiittoonniiti?

⁵ Rosaanchinke rosanni noori Qullaawu Ayyaaninni borreessaminoho Maganu Qaalinni ikkinota afanno gede assa hasiꞌneemmo. (1 Teselonqe 2:13 nabbawi.) Hatto assa dandiineemmohu hiittoonniiti? Rosaanchu Qullaawu Maxaafinni rosinore wolootaho kulanno gede jawaachishi. Duucha woyite Qullaawu Maxaafi qummeeshsha ati xawisattontenni, mito qummeeshsha rosaanchu umisi xawisanno gede assi. Rosaanchu Maganu Qaalinni rosinore loosu aana hosiisanno gara afanno gede kaaꞌlisi. Nabbawino qummeeshshuwa ma garinni wodanchinoronna isira mayi macciishshamannosiro afate mite xaꞌmo xaꞌmi. (Luq. 10:25-28) Togo yite xaꞌma dandaatto: “Kuni qummeeshshi Yihowa akatta giddo hiikkonne xawisanno?” “Kuni Qullaawu Maxaafi halaali ate kaaꞌlahera dandaannohu hiittoonniiti?” “Rosoottori daafira mayi macciishshamannohe?” (Law. 20:5) Roore hasiisanno coyi, rosaanchu lowo egenno afiꞌra calla ikkitukkinni, rosinore baxatenna loosu aana hosiisate.

6. Qullaawa Maxaafa xiinxallisatto woyite, woꞌnaalshu noonsa roduuwa koyisa danchate yineemmohu mayiraati?

⁶ Qullaawa Maxaafa xiinxallisatto woyite,  woꞌnaalshu noonsa roduuwa ate ledo xiinxallissanno gede koyisatto? Hatto ikkiro, xiinxallisatto gari hiittootiro xaꞌminsa; xiinxallisitto woyite Qullaawa Maxaafa seekkite horoonsiꞌroottoronna teꞌee kultannohe gede xaꞌmi. Rosiisate dandookki woyyeessiꞌra hasiꞌrittoro umokki heeshshi assa hasiissannohe. (Soqqamaasinete Looso 18:24-26 ledo heewisiisi.) Hakkiinni woꞌnaalshu noosi rodoo ‘rosaanchu rosinore huwatinoha lawannohe’ yite xaꞌmi. Mitte woy hakkiinni saꞌino lamala geeshsha heeꞌrattokkiha ikkiro, rosaanchokki hakku rodii xiinxallisanno gede xaꞌma dandaatto. Tini rosaanchu ganye xiinxalla agurannokkinna xiinxalla lowo geeshsha hasiissannota ikkitinota huwatanno gede kaaꞌlitannosi. Rosaanchu ati xiinxallisattoha ikkino daafira, wolu xiinxallisa dihasiissanno yite horo heddooti. Baalunkunni roore rosaanchikkira danchare assa hasiꞌratto daafira, halaale rosa agurara dihasiꞌratto.

7. Qullaawu Maxaafi rosaanchi rosanni noore baxanno gede kaaꞌlannosiri maati?

⁷ Rosaanchikki rosiisattoha Qullaawu Maxaafi halaale baxattotanna ammanattota afa hasiꞌranno. (1 Tes. 1:5) Hatto ikkiro rosannore roore baxara dandaanno. Hasiisannoha ikkiro, Qullaawu Maxaafi biddishsha harunsakki kaaꞌlitinohe gara kulisi. Hatto assittoro, Qullaawu Maxaafi isono kaaꞌlanno biddishsha amadinota wodanchanno.

8. Qullaawu Maxaafi rosaancho kaaꞌlate maa assa dandaatto? Hatto assattohu mayiraati?

⁸ Qullaawa Maxaafa xiinxallisatto woyite, rosaanchikkira isira iillinori gedeeri iilleennansa dandiite saꞌinori woꞌnaalsha kulisi. Songoꞌne giddo rosaanchikkira kaaꞌlanno woꞌnaalshi noosi halashshaanchi nooha ikkiro, xiinxallisatto woyite iso koyisa dandaatto. Woy jw.org aana “Qullaawu Maxaafi Heeshsho Biddi Assanno” c yaannohu aante aantenni fulanno birxichira nooha jawaachishanno woꞌnaalsha kula dandaatto. Togoo birxichuwanna viidiyo rosaanchikki Qullaawu Maxaafi biddishsha harunsa hayyo ikkitinota huwatanno gede kaaꞌlitannosi.

9. Rosaanchikki rosinore maatesiranna jaallasira kulanno gede jawaachisha dandaattohu hiittoonniiti?

⁹ Xiinxallisattohura galte noosiha ikkiro, iseno xiinxallitanno? Xiinxallitannokkiha ikkiro, xiinxallitanno gede koyisi. Rosaanchikki rosinore maatesiranna jaallasira kulanno gede jawaachishisi. (Yoh. 1:40-45) Hiittoonni? Togo yite xaꞌma dandaatto: “Konne halaale maatekkira hiittoonni xawisa dandaatto?” woy “Jaalikkira konne halaale xawisate hiikkonne qummeeshsha  horoonsiꞌratto?” Konni garinni rosaanchikki rosiisaancho ikkanno gede qajeelsa dandaatto. Hakkiinni ikkado ikkiro, cuuaminokki halashshaancho ikke soqqama dandaanno. Qullaawa Maxaafa xiinxalla hasiꞌrannohu afino manni nooro rosaanchokki xaꞌmi. Kulihero bayichonko hakko mancho Qullaawa Maxaafa xiinxallanno gede koyisisi. Qullaawa Maxaafa Xiinxallinseemmohu Hiittoonniiti? d yitanno viidiyo leellishisi.

10. Umi Teselonqe 2:7, 8 kultanno garinni, Qullaawu Maxaafi rosiisaanchi Phaawuloosi lawishsha harunsa dandaannohu hiittoonniiti?

¹⁰ Rosiisaanchu rosaanosi daafira lowo geeshsha heda hasiissannosi. Insa albillitte ayyaanaamittete roduuwakki ikkitannota hedi. (1 Teselonqe 2:7, 8 nabbawi.) Insara alamete noo jaalla aguranna biddi assiꞌra hasiissannonsare baala biddi assidhe Yihowara soqqama shota diꞌꞌikkitannonsa. Songote giddo addu jaalla afidhanno gede kaaꞌla hasiissannonke. Qullaawa Maxaafa xiinxallisatto yannara calla ikkikkinni wole woyiteno rosaanchikki ledo yanna sayisse isira jaala ikkisi. Xiinxallisatto yannara calla ikkikkinni wole barrano marte xaꞌmite, silke bilbilte woy harancho sokka borreessite isira hedattota leellishi.

11. Rosaanchinke songote giddo maa afiꞌranno gede kaaꞌla hasiissannonke? Mayira?

¹¹ “Mitto qaaqqo lossannohu qachaho” yinanni yaatto no. Ninkeno “Mitto mancho Yesuusi rosaancho assitannoti songote” yaa dandiineemmo. Woꞌnaalshu noonsari Qullaawu Maxaafi rosiisaano, rosaanonsa songote roduuwi ledo egensiissannohu iseraati; songote roduuwi rosaanchu ayyaanaamittetenni lophanno gede kaaꞌlitannosi. Qullaawu Maxaafi rosaano ayyaanaamittete kaaꞌlannonsahunna qarru iillannonsa woyite jawaachishannonsahu Maganu manni ledo jaalooꞌma baxxara dandiitanno. Qullaawu Maxaafi rosaanchi songote miilanna ayyaanaamittete maatenke wido ikkinohu gede asse hedara hasiꞌneemmo. Isi hagiirsiisannohunna baxisannohu roduuwu maamari wido ikkara hasiꞌneemmo. Hatto assinummoro Yihowa baxannokki manni ledo noosi aante agura diqarrissannosi. (Law. 13:20) Albi jaallasi gibbusirono, Yihowa dirijjite giddo addu jaalla afiꞌra dandaannota huwatanno.—Maq. 10:29, 30; 1 Phe. 4:4.

12. Rosaanchinke ledo meessaneeto Yihowara sayise aatenna cuuamate daafira hasaawa hasiissannonkehu mayiraati?

¹² Meessaneeto Yihowara sayise aatenna cuuamate daafira xawissine hasaabbe. Qoleno,  Manna Qullaawa Maxaafa rosiinseemmohu qaru korkaati, cuuame Yesuusi rosaano ikkanno gede kaaꞌlateeti. Qullaawu Maxaafi rosaanchi xiinxallanni boode agana keeshshiro, hakko iso gambooshshe daa hanafihu gedensaanni, Qullaawa Maxaafa xiinxallinsoommosihu Yihowa Farciꞌraasincho ikke isira soqqamara kaaꞌlate ikkinota huwata hasiissannosi.

13. Rosaanchu ayyaanaamittetenni lophe cuuamate dirimu dirimunni maa assa hasiissannosi?

¹³ Suwashshu wodani noosihu Qullaawu Maxaafi rosaanchi cuuamate dirimu dirimunni assa hasiissannosiri no. Umihunni, rosaanchu Yihowa afanna iso baxa, hattono ammana hasiissannosi. (Yoh. 3:16; 17:3) Hakkiinni rosaanchu Yihowa ledonna sonogote roduuwi ledo jaalooma kalaqiꞌra hasiissannosi. (Ibi. 10:24, 25; Yai. 4:8) Jeefoteno isi busha rosicho facci asse aguranna cubbisira maaro adha hasiissannosi. (Soq. 3:19) Hattono ammanannore wolootaho kula hasiissannosi. (2 Qor. 4:13) Hakkiinni heeshshosi Yihowara sayise oye mannu albaanni cuuamanno. (1 Phe. 3:21; 4:2) Hakko barra roduuwu baalu lowo geeshsha hagiidhitanno. Rosaanchu cuuamate dirimu dirimunni assannorira galatisi; hattono tenne assa agurannokki gede jawaachishisi.

14. Qullaawu Maxaafi Rosiisaanchi rosaanchisi ayyaanaamittetenni lophanni nooronna teꞌee buuxa dandaannohu hiittoonniiti?

¹⁴ Rosaanchinke heeshshosi Yihowara sayise oye cuuamanno gede kaaꞌlineemmo woyite cincineemmore ikka hasiissannonke. Ikkirono Yihowara soqqama hasiꞌrannotanna teꞌee afa hasiissannonke. Rosaanchikki Yesuusi hajajo agadhate sharramannonso, Qullaawa Maxaafa rosannohu egenno afiꞌrate callaati?

15. Qullaawu Maxaafi rosiisaanchi rosaanchisi ayyaanaamittetenni lophanni nootanna teꞌee afannohu hiittoonniiti?

¹⁵ Rosaanchiꞌne ayyaanaamittetenni lophanni nooronna teꞌee ganyitine buuxxe. Lawishshaho, isi Yihowa baxannota leellishanno? Yihowa huucciꞌranno? (Far. 116:1, 2) Qullaawa Maxaafa nabbawanno? (Far. 119:97) Gambooshshe ganye daanno? (Far. 22:22) Heeshshosi giddo biddi assiꞌra hasiissannosire biddi assiꞌrino? (Far. 119:112) Rosinore maatesiranna jaallasiꞌra kulanno? (Far. 9:1) Baalunkunni roore Yihowa Farciꞌraasincho ikka hasiꞌranno? (Far. 40:8) Rosaanchikki aleenni kulliri giddo mitto nafa assannokkiha ikkiro, hatto assannokkihu mayiraatiro hayyotenni afate woꞌnaali,  hattono hatte hajo daafira shaqillunni xawissine hasaabbe. e

16. Qullaawu Maxaafi rosaancho xiinxallisa agura hasiissannohehu mamooteeti?

¹⁶ Rosaanchokki xiinxallisa agura hasiissannoheronna teꞌee yannate kiiro buuxa hasiissannohe. Ateneeto togo yite xaꞌmi: ‘Rosaanchu xiinxallate diqixxaawanno? Gambooshshe haꞌra dibaxanno? Busha gadesi xaano diagurino? Kaphu ammaꞌno giddonni xaano difulino?’ Hatto ikkiro, iso xiinxallisa shamuri kisasira hasiꞌrannokki mancho waa daahanno gara rosiisate gedeeti! Qullaawu Maxaafi rosaanchi rosino halaale naadannokkihanna biddi assiꞌra hasiissannosire biddi assiꞌrannokkiha ikkiro, iso xiinxallissanni yanna guxxitooti.

17. Umi Ximootewoosi 4:16 kultanno garinni, Qullaawu Maxaafi rosiisaano baalanti maa assa hasiissannonsa?

¹⁷ Manna rosaano assate qoossonke lowo geeshsha naandeemmo; qoleno Qullaawu Maxaafi rosaanchinke ayyaanaamittetenni lophe cuuamanno gede kaaꞌla hasiꞌneemmo. Rosiinseemmo woyite Qullaawa Maxaafa horoonsiꞌneemmohu hattono rosiinseemmore banxeemmotanna ammaneemmota leellishanno garinni rosiinseemmohu iseraati. Rosaanchinke songote giddo jaalla kalaqiꞌranno gede jawaachinsheemmo. Meessaneeto Yihowara sayise aanna cuuama lowo geeshsha hasiissannota ikkitinota luphi assine kulleemmo; hattono rosaanchu ayyaanaamittetenni lophanni nooronna teꞌee yannate kiiro buunxeemmo. (“ Qullaawu Maxaafi Rosiisaanchi Rosaanchisi Cuuamanno Gede Kaaꞌlate Maa Assa Hasiissannosi?” yitannota qoola 13 noo saaxine lai.) Konne heeshsho gatisanno looso loonseemmo daafira lowo geeshsha hagiirraammaho! Qullaawu Maxaafi rosaano ayyaanaamittetenni lophite cuuantanno gede kaaꞌlate dandiinummore baala assineemmo.