1. Batinyu mannira coyi gurchaawinonsahu mayiraati?

XAA yannara ninke Kiristaanaho yitannoti lowo kume ikkitanno ammaˈno no; kuri baalunku Magano halaalunni magansiˈnanni heeˈnoommori ninkeeti yitanno. Hakko daafira batinyu mannira coyi gurchaawinonsa. Kuni manni, “Halaalaancho ammaˈno mitte callatenso, tini baalanti ammaˈno Magano hagiirsiissannote?” yee hedanno. Ninkena? Yihowa Farciˈraasine rosiissanno rosi halaale ikkinotanna Magano hagiirsiisanno garinni magansidhanni noori insa calla ikkitinota buuxiˈnoommo? Tenne woˈmunni woˈma buuxa dandiinanni? Hanni tenne huwatate kaaˈlitannonke taje laˈno.

2. Soqqamaasinchu Phaawuloosi cuˈmiˈrinohu halaale ikkinota ammaninohu mayiraati? (1 Teselonqe 1:5)

² Soqqamaasinchu Phaawuloosi cuˈmiˈrinohu halaale ikkinota seekke ammanino. (1 Teselonqe 1:5 nabbawi.) Isi ammaninohu mulla baxisinosi daafira calla diˈˈikkino. Phaawuloosi Maganu Qaale diinaggaawe xiinxallanno manchooti. Isi “Qullaawa Borro baala Maganunnihu Qullaawu Ayyaani kulanna [borreessinoonnita]” ikkitinota ammanino. (2 Xim. 3:16) Phaawuloosi xiinxalle buuxino coyi maati? Isi Qullaawa Borro giddo, Yesuusi daanno yinoonni Mesihicha ikkinota buuxissannota ammansiissanno taje afiˈrino. Ayihudenniri ammaˈnote murrooti kayinni tenne taje lashshi assite agurtino. Kuri lawisiisaano ammaˈnote murrooti halaale rosiinseemmoreeti yiturono, loosinsanni kayinni Magano kaaddino. (Tit. 1:16) Phaawuloosi kayinni insa gede Maganu Qaali giddo gama ammane gama agurannoha diˈˈikkino. Isi Maganu Qaali kulannore baalankare ammanatenna rosiisate qixxaawinoho.—Soq. 20:27.

3. Cuˈmiˈnoommohu halaale ikkinota buuxiˈrate xaˈmonke baalantera dawaro afiˈra hasiissannonke? (“ Yihowa Loosonna Hedosi ‘Hasaambe Gunde Dianfeemmo’” yitanno saaxineno lai.)

 ³ Mitootu addu ammaˈno xaˈmonke baalantera wole agurina Qullaawu Maxaafi giddo bande kulloonnikki coyira nafa dawaro qola hasiissannose yite heddanno. Hatto yee heda garaho? Hanni Phaawuloosi lawishsha laˈno. Isi ammanate roduuwasi, “Baalanka coye fonqoltine laˈe” yee amaalino; ikkirono isi huwatinokkihu batinyu coyi noota xawise coyiˈrino. (1 Tes. 5:21) Isi “Egennonke xeate” yee borreessino; qoleno togo yiino: “Xa coˈo yee leellinkekkinni hincilaallote giddoonni qolle laˈnanni heeˈnoommo.” (1 Qor. 13:9, 12) Phaawuloosi woˈmankare afino yaa diˈˈikkino; ninketino hattoontilla. Ikkollana Phaawuloosi Yihowa daafira xinta ikkino halaale afino. Noosi egenno, cuˈmiˈrinohu halaale ikkinota ammanate ikkitanno geeshshite!

4. Cuˈmiˈnoommohu halaale ikkinota buuxiˈra dandiineemmohu hiittoonniiti? Addu Kiristaani daafira maa ronseemmo?

⁴ Cuˈmiˈnoommohu halaale ikkinota buuxiˈra dandiineemmoti mitte doogo, Yesuusi Yihowa halaalunni magansiˈre lawishsha ikkinonke gara xaa yannara Yihowa Farciˈraasine assitanni noori ledo heewisiisate. Konni birxichira, addu Kiristaani (1) kaphu maganna magansiˈra giwannota, (2) Yihowa suˈma ayirrisannota, (3) Qullaawu Maxaafi halaale baxannotanna (4) mimmito godowinta baxannota ronseemmo.

5. Magano halaalunni magansiˈrate daafira Yesuusiwiinni maa ronseemmo? Isi rosiisinore harunsa dandiineemmohu hiittoonniiti?

⁵ Yesuusi Yihowa lubbora baxanno daafira, iima noo warono ikko uullate aana daye heeˈri yannara iso calla magansiˈrino. (Luq. 4:8) Rosaanosino Yihowa calla magansidhanno  gede rosiisino. Yesuusino ikko ammanantino rosaanosi magansiˈrate misilla horoonsidhe horo diegentino. Maganu Ayyaana ikkino daafira, mannu ooso loossannohu aye coyino Maganu ayirrinye leellishara horo didandaanno! (Isa. 46:5) Ikkina mannu qullaawootaho yee hedanno manni misile kayisanna insa huucciˈrate daafira mayyaa dandiinanni? Yihowa Tonne Hajajo giddo layinkitera togo yiino: “Gordohono ikko baattote, baattote woroonni wayi giddo noorichinnino ikkiro magansiˈrate yitine ayee misileno seekkidhinoonte. Kaphu magannara kumbuultinoonte.” (Ful. 20:4, 5) Magano hagiirsiisa hasidhannori, isi misile magansiˈnammora hasiˈrannokkita affino.

6. Yannankera Yihowa Farciˈraasine magansidhannohu hiikkonne lawishsha harunsiteeti?

⁶ Xaggete xiinxallaano, hundi Kiristaani Magano calla magansiˈrannota buuxxino. Lawishshaho, mittu xaggete maxaafi hundi Kiristaani magansiˈnanni basera misilla horoonsiˈra “effiˈre giwannota” xawisino. Yannankera Yihowa Farciˈraasineno umi xibbi diri Kiristaani lawishsha harunsitanno. “Qullaawootaho” yinanni manni misilla woy sokkaasine dihuucciˈneemmo; wole agurina Yesuusa nafa dihuucciˈneemmo. Qoleno baandiira keere dihaaˈneemmo; hattono heeˈneemmo gobba dimagansiˈneemmo. Dayirino dayiro, Yesuusi “Mootichu Maganikkira kumbuuli; iso calla magansiˈri!” yee hajajinonke hajajo ayirrisate murciˈnoommo.—Mat. 4:10.

7. Yihowa Farciˈraasine wole baalante ammaˈnowiinni baxxitannohu mayinniiti?

⁷ Xaa yannara batinyu manni maccare ikkitinori ammaˈnote murrooti hoode haˈranno. Insa kore murroota quwa saˈe jajjanno daafira, magansiˈrate ledo taalo ayirrinye uyitannonsa. Batinyu manni beetekiristaanensa timanno, maxaaffansa hidhanno, hattono beetekiristaanensa kaaˈlate lowo woxe fushshanno. Mitootu kuri ammaˈnote murrooti yitannore baalankare ammantanno. Kuni manni ammaˈnote murrootansa laˈˈanno woyite Yesuusa umosi lainohu gede ikke hagiidhanno! Yihowa halaalunni magansidhannorira kayinni qeese dinonsa. Mereeronke albisa ikkite soqqantannore ayirrinseemmoha ikkirono, Yesuusi ‘Kiˈne [baalunku] roduuwaho’ yee rosiisinonke roso harunsineemmo. (Mat. 23:8-10) Ammaˈnote murrichano ikko poletiku gashshaanchono ikko, manna dimagansiˈneemmo. Qoleno togoo manni loosira dieˈneemmo. Hatteentenni, alametewiinni baxxinoommore ikkine heeˈneemmo. Tenne doogganni, ninke Kiristaanaho yitannote batinye ammaˈnowiinni baxxinoommoreeti.—Yoh. 18:36.

8. Yihowa suˈmasi ayirrinsammoranna manna baalaho dudumbammora hasiˈrannota mayinni anfeemmo?

⁸ Mitte hige Yesuusi, “Annaˈya, suˈmakki ayirrisi!” yee huucciˈrino. Yihowano gordoho heeˈre lowo huuronni suˈmasi ayirrisannota kule Yesuusi huuccattora dawaro qolino. (Yoh. 12:28) Yesuusi uullate aana soqqami yanna baalantera Annisi suˈmi ayirranno gede assino. (Yoh. 17:26) Konni daafira, addu Kiristaani Maganu suˈma woshshanna wolootaho kula lowo ayirrinyi gede asse kiiranno.

9. Umi xibbi diri Kiristaani Maganu suˈma ayirrisannota leellishinohu hiittoonniiti?

⁹ Kiristaanu songo xintantuhunni shiima yanna gedensaanni, Yihowa ‘suˈmisinni woshshino manna doorara daga towaatino.’ (Soq. 15:14) Kuni umi xibbi diri Kiristaani Maganu suˈma woshshansanninna mannaho kulansanni hagiidhino. Roorenkanni insa soqqanshonsa yannaranna qullaawa borro borreessitu woyite Maganu suˈma horoonsidhino. * Konni garinni  insa Maganu suˈmisinni woshshino manna ikkitinota leellishshino.—Soq. 2:14, 21.

10. Yihowa suˈma dudubbannori Yihowa Farciˈraasine calla ikkitinota mayinni anfeemmo?

¹⁰ Yihowa Farciˈraasine Yihowa suˈmisinni woshshanno mannaati? Hanni taje maa leellishshannoro laˈno. Yannankera batinye ammaˈnote murrooti mannu Maganu suˈma afannokki gede assate dandaaminsare baala assitino. Insa Qullaawu Maxaafi tironsa giddonni Maganu suˈma fushshite hooltino; mitowa isinni konne suˈma beetekiristaanensa giddo horoonsiˈnannikki gede agabbino. * Maganu suˈmira ayirrinye uyitanni noori Yihowa Farciˈraasine calla ikkitinota kaadannohu ayi no? Wole baalante ammaˈnonni roore mannu baalunku Maganu suˈma afanno gede assinanni heeˈnoommori ninkeeti! Konni garinni, Yihowa Farciˈraasine yinanni suˈminke ledo sumuu yaanno garinni heeˈrate dandiinummore baala assinanni heeˈnoommo. (Isa. 43:10-12) Qullaawa Borrota Haaro Alame Tiro 240 miliyoone saˈannota attamme mannaho iillinshoommo; tenne Qullaawu Maxaafi tiro giddo, Qullaawa Maxaafa tirtinori wolootu fushshite hooltinoha Maganu suˈma bayichosi qolloonni. Qoleno Yihowa suˈma amaddinota Qullaawu Maxaafi aana xintantino borro 1,000 saˈˈanno afiinni tirranni heeˈnoommo!

11. Hundi Kiristaani halaale baxannota leellishinohu hiittoonniiti?

¹¹ Yesuusi, Maganunnirenna Maganu hedinore kulanno halaale baalanka baxanno. Qoleno Yesuusi hakko halaali ledo sumuu yaanno garinni heeˈrino; wolootuno konne halaale affanno gede assino. (Yoh. 18:37) Yesuusiti addu rosaanono halaale lowo geeshsha baxxanno. (Yoh. 4:23, 24) Isinni soqqamaasinchu Pheexiroosi Kiristinnu ammaˈno ‘halaalu doogooti’ yiino. (2 Phe. 2:2) Hundi Kiristaani halaale lowo geeshsha baxanno daafira, halaalu ledo sumuu yaannokkiha ammaˈnote roso, budenna woga, hattono mannu hedo giwino. (Qol. 2:8) Yannankerano addu Kiristaani ammanansanna heeshshonsa Yihowa Qaali ledo sumuu yitannota assiˈrate sharramanno; konni garinni ‘halaalunni heeˈrate’ dandaaminsare baala assanno.—3 Yoh. 3, 4.

12. Aliidi Bisi mitto coye biddi assa hasiissannota huwatanno woyite ma assanno? Konne assannohu mayiraati?

¹² Xaa yannara noohu Maganu manni Qullaawu Maxaafi giddo noore baalankare anfoommo diyaanno. Maganu manni mito Qullaawu Maxaafi roso xawisinonna songo qineessanno gara lainohunni soˈrino woyiti no. Tenne dhagge assiˈra dihasiissannonke. Qullaawa Borro, halaalu egenno lexxitannohu sunu sununni ikkinota xawisse kultanno. (Qol. 1:9, 10) Yihowa halaale xawisannohu sunu sununniiti; hakko daafira, halaalu xawaabbi roore waraˈa yee xawa geeshsha cince agadha hasiissannonke. (Law. 4:18) Aliidi Bisi mitto coye huwantoommo gara woy mitto looso loonseemmo gara biddi assa hasiissannota huwatiro, bayichonko biddi assanno. Batinye Suˈmu Kiristinni ammaˈno mito coye soorritannohu ammanaasinensa woy alame hagiirsiisateeti; Yihowa dirijjite mitto coye soorritannohu kayinni Yihowawa albinni roore shinqeemmo gedeetinna Magano Yesuusi magansiˈrino garinni magansiˈneemmo gedeeti. (Yai. 4:4) Mitto coye soorrineemmohu yanna soorrantino daafira woy batinyu manni hasatto wonshate yine ikkikkinni Qullaawa Borro yitannore albinni roore huwantoommo daafiraati. Addanko Qullaawu Maxaafi halaale banxeemmo!—1 Tes. 2:3, 4.

13. Addu Kiristaani leellishannohu roore luphi yee leellanno akati hiikkonneeti? Yannankera Yihowa Farciˈraasine konne akata leellishshanni noohu hiittoonniiti?

¹³ Hundi Kiristaanira batinye dancha akatta noonsaha ikkirono, roore luphi yee leellannohu kayinni baxilleho. Yesuusi togo yiino: “Kiˈne kiˈneneewa baxantiniro, ane rosaano ikkitinoonnita mannu baalu tennenni egennannoˈne.” (Yoh. 13:34, 35) Xaa yannara alame woˈmate noorira Yihowa Farciˈraasinera addu baxillinna mittimma noonsa. Addi addi gobbanninna budinni dangoommore ikkinummorono, ninke mitte maate gedeeti; konni garinni wole baalante ammaˈnowiinni baxxinoommoreeti. Songote gambooshshinkewa, woradu gambooshshinkewanna qoqqowu gambooshshinkewa baxillinke xawe leellanno. Tinino Yihowa hagiirsiisanno garinni magansiˈnanni heeˈnoommori ninke ikkinoommota albinni roore ammanneemmo gede assitannonke tajeeti.

14. Efesooni Sokka 4:32 kultanno garinni, mimmito godowinta banxeemmota leellinsheemmoti mitte doogo hiitteeti?

¹⁴ Qullaawu Maxaafi “Mimmitiˈne ledo seekkitine baxamme” yee amaalannonke. (1 Phe. 4:8) Togoo baxille leellisha dandiineemmo doogga giddo mitte, koffi assitinonkere gatona yaatenna kuˈu koˈoye cince heeˈrate. Qoleno songote giddo noorira baalaho, wole agurina koffi assitinonkerira nafa shaqqille leellinsheemmo faro hasiˈneemmo; hattono baalanka  wosinimma adhineemmo. (Efesooni Sokka 4:32 nabbawi.) Mimmitoho togoo baxille leellinsheemmoha ikkiro, addu Kiristaana ikkinoommota mannu afanno gede assineemmo.

15. Hundi Kiristaani faale haˈneemmoti wole doogga hiikkuriiti?

¹⁵ Hundi Kiristaani faale haˈneemmoti wole dooggano no. Lawishshaho, dirijjitenke qinaabbinohu hundi Kiristaani qinaawino garinniiti. Hakkawari Kiristaaninte gede ninkerano songotenni songo hadhanni roduuwa towaattannori, cimeeyyenna songote soqqamaano noonke. (Fil. 1:1; Tit. 1:5) Qoleno insante gede ninkeno Maganu siimu xaadooshshinna adhamate daafira, hattono mundeete qullaambe daafira fushshino seera ayirrinseemmo; qoleno cubbo loosse maaro eˈannokkiri songo gawajjitannokki gede agarreemmo.—Soq. 15:28, 29; 1 Qor. 5:11-13; 6:9, 10; Ibi. 13:4.

16. Efesooni Sokka 4:4-6 noo hedonni maa ronseemmo?

¹⁶ Yesuusi, ninke rosaanosiiti yaannohu batinyu manni heeˈrannotanna iso halaalunni harunsitannori kayinni gama calla ikkitinota coyiˈrino. (Mat. 7:21-23) Qoleno Qullaawu Maxaafi, goofimarchu barra batinyu manni “Magano magansiˈrannoha lawanno” yee balaxe masaalino. (2 Xim. 3:1, 5) Ikkirono, Maganu Qaali Magano hagiirsiissannoti “mitte ammaˈna” calla ikkitinota xawise kulanno.—Efesooni Sokka 4:4-6 nabbawi.

17. Xaa yannara Yesuusi hoode hadhanni noorinna mitte addu ammaˈno harunsitanni noori ayeooti?

¹⁷ Xaa yannara noota mitte halaalu ammaˈno harunsitanni noori ayeooti? Taje maa leellishshannoro laˈnoommo. Yesuusi Magano ma garinni magansiˈrinoronna hundi Kiristaanino isi faale haˈrinohu hiittoonniitiro ronsoommo. Konni daafira, Magano halaalunni magansidhanni noori Yihowa Farciˈraasine callaati. Maganu manna ikkanke, hattono Yihowa halaalenna isi albillitte assannore afanke ninkera lowo ayirrinyeeti! Konnira halaalu giddo heeˈnoommota huluullammummokki konne halaale cuˈmiˈne heeˈno.