DIRU kiiro, batinyu muxxe geˈreewi wirro Kiristaanu songo higanno. Insa mittu mittunku songo higganno woyite, “gordoho lowo hagiirre [ikkannota]” heda dandiineemmo! (Luq. 15:7, 10) Atino wirro songo higoottoha ikkiro, Yesuusi, sokkaasinenna Yihowa umisi higootto daafira lowo geeshsha hagiidhitannota addaxxa dandaatto. Ikkollana, Yihowa ledo noohe jaalooma wirro kaajjishiˈrate woˈnaalatto woyite, qarra ikkannori tuncu yaahera dandaanno. Qarra ikkahera dandaannori maati? Togoo qarra qeelatto gede mayi kaaˈlahera dandaanno?

Batinyu roduuwi songo higguhu gedensaanni nafa hexxo mudhitanno. Moote Daawiti qarri miteekke aterano leellahera dandaanno. Isi Yihowa cubbosi gatona yiisihu gedensaanni nafa, “Cubbu amadeennae laˈˈa hoogoommo” yiino. (Far. 40:12; 65:3) Mittu manchi Yihowawa higihu gedensaanni, gaabbonna saalu lowo diro qarrisasira dandaanno. Isaabeeli bohante 20 saˈˈanno diro keeshshitino. * Ise togo yitino: “Yihowa cubboˈya maarinoe yee ammana lowo geeshsha qarra ikkitinoe.” Hexxo mudhittoro, ayyaanaamittetenni wirro wolqiweelatto. (Law. 24:10) Togoori ikkahera wodhitooti.

Mitootu kayinni, ‘Yihowa ledo wirro muli jaalooma kalaqiˈrate assa hasiissannore baalare asse afeemmokka?’ yite yaaddanno. Antooni bohame higihu gedensaanni togo yiino: “Alba Yihowa Farciˈraasincho ikke noommo waro rosoommoha woy asseemmoha roore coye hawe aguroommo.” Mitootu togoo hedo macciishshantannonsa daafira, ayyaanaamittete coyira diinaggaawate hobbi ruxxi yitanno.

Lawishshaho, mittu manchi minesi hombobalatte baasa gawajjituro, hakkonne mine wirro minate mageeshshi wolqanna yanna hasiissannoro hedanno woyite baasa yaadara dandaanno. Hatteente gede, jawa cubbo loosseenna Yihowa ledo noohe jaaloomi  daafaminoha ikkiro, konne jaalooma wirro kaajjishiˈrate lowore assa hasiissannoheti leeltinoheha ikkara dandaanno. Ikkirono kaaˈlannoheri no.

Yihowa “Amme hanni mala hansona!” yee koyisinonke. (Isa. 1:18) ‘Mala hasate’ woy coye biddi assate wonanni lowore assite kaootto. Yihowa tenne assoottohura lowo geeshsha baxannohe. Hanni tenne hedi: Yihowawa higootto daafira, isi ate widoonni Sheexaanu kaphaancho ikkinota leellisha dandaanno!—Law. 27:11.

Yihowawa higootto daafira isiwa shiqa hanafootto; konnira isino atewa shiqeemmo yee qaale eino. (Yai. 4:8) Songo higge wirro songote miili gede ikkite kiiramakki hagiirsiissannote; kayinni hakkiinni sainore assa hasiissannohe. Annikkinna Jaalikki Yihowara noohe baxilli lexxanni haˈranno gede assiˈra hasiissannohe. Tenne assa dandaattohu hiittoonniiti?

Wonshiˈra dandaatto mixo fushshiˈrate woˈnaali. Yihowa daafira rosootto halaalenna isi Gannatete daafira uyino hexxo xaano qaagattoha ikkara dandaanno. Ikkollana, wirro ayyaanaamittete coye ganyite assa rosa hasiissannohe; lawishshaho, ganyite dancha duduwo sabbaka hattono ammanate roduuwikkiwa aana hasiissannohe. Hanni aante noo mixo laˈno.

Yihowa woˈmanka woyite hasaawisi. Annikki Yihowa loosootto cubbira tiiˈˈikki bushiishanni waadannoheha ikkiro, huuccatto assiˈra qarra ikkitannoheta afino. (Rom. 8:26) Ikkirono, Yihowara isi jaala ikka lowo geeshsha hasiˈrattota kulte ‘jaatte huucciˈri.’ (Rom. 12:12) Andire albita qaage togo yiino: “Aneneeto baasa bushiishoommo hattono saaloommo. Ikkirono huuccatto assiˈrummo kiiro woyyimma afiˈreemmo. Albinni roore giddoyidi keere afiˈroommo.” Mayite huucciˈrattoro afa hoogittoro cubbo loose maaro einohu Moote Daawiti Faarso 51 nna 65te huucciˈrino huuccatto laˈˈa dandaatto.

Qullaawa Maxaafa ganyite xiinxalli. Tenne assakki ammanakki kaajjitanno gedenna Yihowara noohe baxilli lexxanno gede kaaˈlitannohe. (Far. 19:7-11) Felippe togo yiino: “Wonanni ayyaanaamittetenni daafureemmo gedenna Yihowa dadilliseemmo gede assitinoeti, ganye Qullaawa Maxaafa nabbawanna xiinxalla hoogaˈyaati. Wirro Yihowa dadillisa hasiˈroommokki daafira Qullaawa Maxaafa ganye xiinxallate murciˈroommo.” Atino hatto assa dandaatto. Hojju xiinxallokkira malino birxicho afiˈrate, mittu ayyaanaamittetenni gikki yiino rodii kaaˈlannohe gede kuˈla dandaatto.

Ammanate roduuwikki ledo wirro jaalooˈmi. Bohame songo higinohu mitu roduuwi wolootu ninke daafira gara ikkinokkire heddanno yee yaadanno. Laarisa yinanni rodoo togo yite noore maaxxukkinni coyidhino: “Lowo geeshsha saaloomma. Roduuwa lowo geeshsha dadillisoomma yee hedoomma. Togo yee hedanni lowo yanna keeshshoomma.” Cimeeyyenna wolootu ayyaanaamittetenni gikki yitino roduuwi Yihowa ledo wirro jaalooˈmatto gede kaaˈlitahera hasidhannota huluullantooti. (“ Cimeeyye Assa Dandiitannore” yitanno saaxine lai.) Insara ati Yihowawa higootto daafira tashshi yaannonsa; qoleno hagiirraamo ikkattora hasidhanno.—Law. 17:17.

Songote roduuwiwa albinni roore shiqatto gede mayi kaaˈlahera dandaanno? Ganyite ammanate roduuwikki ledo gamba yite Yihowa magansiˈri hattono insa ledo soqqami. Tini kaaˈlitannohehu hiittoonniiti? Filikisi yinanni rodii togo yiino: “Roduuwu ani songo higeemmo yanna quqquxante agarte no. Insa baxxannoeta huwatoommo. Insa baalunku wirro songote miila ikkoommota, Yihowa gatona yiinoetanna isira soqqamanni heeˈra dandeemmota huwateemmo gede kaaˈlitinoe.”—“ Maa Assa Dandaatto?” yitanno saaxine lai.

Yihowa ledo noohe jaalooma wirro kaajjishiˈrate sharramatto woyite, Sheexaanu hombobalattete gedeehu addi addi qarri amadannohe gede assa diaguranno. (Luq. 4:13) Yihowa ledo noohe jaalooma kaajjishidhe iillannohe qarrira xaanni qixxaawi.

Yihowa geˈreewisi daafira coyiˈranni togo yiino: “Bainore hasiˈreemmo; billaallinore gamba assiˈreemmo; hiiqqaminore sisseemmo. Dhiwaminore xagiseemmo.” (Hiz. 34:16) Yihowa batinyu roduuwi isi ledo noonsa jaalooma wirro kaajjishidhanno gede kaaˈlinonsa. Isi atino isi ledo noohe jaalooma wirro kaajjishidhanni haˈratto gede kaaˈlahera hasiˈrannota huluullantooti.