1. Ayyaanaamittete hasattonke maati? Tini hagiirru ledo xaadooshshe afidhinohu hiittoonniiti?

 ADDU hagiirri yannate geeshsha calla afiˈnanni hagiirre diˈˈikkino. Heeshshonke diro woˈma togoo hagiirre afiˈra dandiineemmo. Hiittoonni? Yesuusi Ilaalu Sibikatesi yannara, “Ayyaanunni buxxinori baˈraadhinoreeti; gordu gashshooti insahona” yiino. (Mat. 5:3) Yesuusi mannaho kalaqamunni Kalaqaanchonsa Magano Yihowa afatenna magansiˈrate hasatto noonsata afino. Ayyaanaamittete hasattonke yaa tenneeti. Qoleno Yihowa ‘hagiirraamo Magano’ ikkino daafira, iso magansidhannorino hagiirraamma ikka dandiitanno.—1 Xim. 1:11, NW.

2-3. (a) Yesuusi yiino garinni hagiirraamma ikka dandiitannori wolootu ayeooti? (b) Konni birxichira maa xiinxallineemmo? Hatto assa hasiissannohu mayiraati?

² Hagiirraamma ikka dandiineemmohu baalunkuri injiinkero callaati? Deeˈni. Yesuusi Ilaalu Sibikatesi yannara dhagge ikkannore coyiˈrino. Isi loossino soˈronni kainohunni woy iillinonsa qarrinni “yaaddannori” hagiirraamma ikka dandiitannota coyiˈrino. Qoleno “Keeraanchimmate daafira xiiwantannori” woy Kiristoosi harunsaano ikkitino daafira ‘xonnanninsari’ hagiirraamma ikka dandiitannota coyiˈrino. (Mat. 5:4, 10, 11) Ikkina togoo qarri iillanni heeˈreennanni addu hagiirre afiˈra dandiinannihu hiittoonniiti?

³ Yesuusi addu hagiirre afiˈneemmohu baalunkuri qiniinkero ikkikkinni ayyaanaamittete hasattonke wonshiˈnummoronna Maganunniwa shiqqi yinummoro ikkinota rosiisanni no. (Yai. 4:8) Tenne assa dandiineemmohu hiittoonniiti? Konni birxichira  addu hagiirre afiˈneemmo gede kaaˈlannonkeha sase qara coye laˈneemmo.

4. Addu hagiirre afiˈrate assa hasiissannonkehu umi coyi maati? (Faarso 1:1-3)

⁴ Umihunni, addu hagiirre afiˈrate ayyaanaamitte sagale sagaˈla hasiissannonke. Mannahono saadateno sagale hasiissanno. Kayinni ayyaanaamittete sagale hasiissannohu mannaho callaati. Yesuusi “Mannu Maganu afiinni fulanno qaali baalunni ikkinnina, sagale callatenni diheeˈranno” yiinohu iseraati. (Mat. 4:4) Hakko daafira ayyaanaamittete sagale sagaˈlinummokkinni yaano Maganu Qaale nabbambummokkinni mitto barrano saˈˈa dihasiissannonke. Faarsaasinchu togo yee borreessino: ‘Kaaliiqi Seerinni hagiidhannohu Seerasino hashshanna barra buuxanni qaagannohu hagiirraamoho.’—Faarso 1:1-3 nabbawi.

5-6. (a) Qullaawu Maxaafinni maa ronseemmo? (b) Qullaawa Maxaafa nabbawa kaaˈlitannonkehu hiitte doogganniiti?

⁵ Yihowa baxannonke daafira hagiirru noo heeshsho heeˈrate maa assa hasiissannonkero Qullaawu Maxaafi giddo kulinonke. Isi ninkera hedinori maatiro ronseemmo. Isiwa shiqa dandiineemmo garanna cubbinkera maaro afiˈra dandiineemmo gara ronseemmo. Qoleno dhagge ikkitannote albillitte afiˈneemmo hexxo daafira ronseemmo. (Erm. 29:11) Qullaawa Maxaafa xiinxalline ronseemmohu kuni halaali wodaninke hagiidhanno gede assanno!

⁶ Qoleno anfummonte gede, Qullaawu Maxaafi giddo barru barrunku heeshshonkera kaaˈlitannoti lowo amaale no. Tenne amaale harunsinummoro hagiirraamma ikkineemmo. Iillinohe qarrinni kainohunni hexxo mudhittoro, albinni roore Yihowa Qaale nabbawi  hattono hiinci. Yesuusi “Maassantinori [“hagiirraammu,” NW] Maganu qaale macciishshite hajajantannoreeti” yiino.—Luq. 11:28.

7. Maganu Qaale nabbabbine roore hoˈro afiˈrate kaaˈlannoˈneri maati?

⁷ Maganu Qaale nabbabbinanni woyite nabbabbinoonnire hiincate yanna gaaˈme. Hanni mittu manchi baxxinanni sagale qishinoˈne yine hendo. Ikkollana muddantinoonni woy wodaniˈne wolewa noo daafira sagale coommitinorono coommitinokkirono affinikki rakkine ittine guddini. Guddinihu gedensaanni muddantine heedhine ittinoonnita wodanchitini; hakkiinni mayi coommillese badanni sununnilla ito yitini. Hatteente gede Qullaawa Maxaafa muddantine heedhine nabbabbinanni sokkasi hiincitinikki gattine egentinoonni? Maganu Qaale nabbabbine hiincate yanna gaaˈme; dhaggete giddo kulloonnire laˈˈate, huuro macciishshatenna nabbabbinanni heedhinoonnire hedate woˈnaalle. Konni garinni nabbawaˈne hagiirriˈne lexxanno gede assitannoˈne.

8. “Ammanaminohunna wodanaamu borojjichi” uyinoonnisi looso loosanni noohu hiittoonniiti? (Lekkaalliidi qaagiishshano lai.)

⁸ Yesuusi ayyaanaamittete sagale hasiissanno yannara shiqishanno gede ‘ammanaminohanna wodanaamo borojjicho’ shoomino; qoleno ayyaanaamittete sagale dancha gede sagaˈlinanni heeˈnoommo. * (Mat. 24:45, NW) Ammanamino borojjichi qixxeessanno coyi baalu xintaminohu Maganu ayyaaninni borreessaminohu Qullaawu Maxaafi aanaati. (1 Tes. 2:13) Tini ayyaanaamittete sagale Qullaawu Maxaafi giddo kulloonnita Yihowa hedo anfeemmo gede kaaˈlitaanke. Agarooshshu Shaenna Baqqi Yiiyye yitanno metseetuwa hattono jw.org aana fultanno birxichuwa nabbambeemmohu iseraati. Kiristaanu Heeshshonna Soqqansho Gambooshshiranna Sambatu barri gambooshshira qixxaambeemmo. Qoleno aganu kiiro fultannota JW Biroodikaaste laˈneemmo. Ayyaanaamittete sagale dancha gede sagaˈlanke, addu hagiirre afiˈneemmo gede kaaˈlannonkeha layinki coye assate kaˈneemmo gede assitannonke.

9. Addu hagiirre afiˈneemmo gede assannonkehu layinki coyi maati?

⁹ Layinkihunni, addu hagiirre afiˈrate Yihowa biddishshi garinni heeˈra hasiissannonke. Faarsaanchu togo yee borreessino: “Kaaliiqa ayirrissannorinna hajajosi agadhitannori, baˈraadhinoreeti.” (Far. 128:1) Yihowa waajjate yaa iso lowo geeshsha ayirrinseemmo daafira iso dadillisannoha aye coyeno assineemmokki gede qorophate yaate. (Law. 16:6) Hakko daafira Yihowa Qullaawu Maxaafi giddo garanna gara ikkinokkiri daafira kulino biddishsha harunsate woˈmanka woyite sharrammeemmo. (2 Qor. 7:1) Yihowa baxannore banxeemmohanna isi giwannore gimbeemmoha ikkiro hagiirraamma ikkineemmo.—Far. 37:27; 97:10; Rom. 12:9.

10. Roomu Sokka 12:2 kultanno garinni assa hasiissannonkeri maati?

¹⁰ Roomu Sokka 12:2 nabbawi. Mittu manchi garanna gara ikkinokkiri daafira biddishsha fushshate silxaane noosihu Yihowa ikkinota afinoha ikkara dandaanno; ikkirono Maganu biddishshi garinni heeˈrateno maahoyye yaa hasiissannosi. Lawishshaho mittu manchi makeenna ooffannori quwa saˈe ooffannokki gede biddishsha fushshannohu gashshoote ikkinota afinoha ikkara dandaanno. Ikkollana isi konne biddishsha harunsate maahoyye yaa hoogara dandaanno. Hakko daafira isi quwa sae oofanno. Yihowa biddishsha harunsa baalunkurinni woyyitinota ikkitinota ammanneemmota leellinsheemmohu amanyootinkenniiti.  (Law. 12:28) Daawiti Yihowa daafira aane noore yiinohu iseraati: “Heeshshote doogo leellishoottoena, ledokki heeˈraˈya hagiirrunni wonshitannoe; qiniitekkiinni heeˈra hegere hagiirre uyitannoe.”—Far. 16:11.

11-12. (a) Yaandeemmo woy hexxo mudhineemmo woyite maa qoropha hasiissannonke? (b) Filiphisiyusi Sokka 4:8 boohaarsha doodhineemmo woyite kaaˈlitannonkehu hiittoonniiti?

¹¹ Yaachishannori woy hexxo mudhineemmo gede assannori iillannonke woyite konne coye hooˈlate mitore assa hasiissannonke yine hendeemmoha ikkara dandaanno. Hatto yee heda nooreentilla; ikkirono Yihowa giwannore assineemmokki gede qoropha hasiissannonke.—Efe. 5:10-12, 15-17.

¹² Soqqamaasinchu Phaawuloosi Filiphisiyusi heeˈranno Kiristaanira borreessino sokkara ‘taalo ikkinore . . . minshanniri nookkirenna baxille’ harunsa agurtannokki gede jawaachishinonsa. (Filiphisiyusi Sokka 4:8 nabbawi.) Phaawuloosi koye coyiˈranni noohu boohaarshu daafira ikka hoogirono isi kulinonkeri doodhineemmo boohaarshi daafirano kulannonkeri no. Hanni togo assate woˈnaali: Qummeeshshu aana isi kulinori bayicho, “muuziiqa,” “filme,” “maxaaffa,” woy “viidiyote godoˈle” worate woˈnaali. Hatto assakki Magano hagiirsiisannohunna hagiirsiisannokki boohaarshi hiikkoyetiro badde afatto gede kaaˈlitannohe. Yihowahu taalle nookki biddishshi garinni heeˈra hasiˈneemmo. (Far. 119:1-3) Togo assiˈneemmoha ikkiro, addu hagiirre afiˈneemmo gede assannoha aananno coye xalalu tiiˈˈinni assa dandiineemmo.—Soq. 23:1.

13. Addu hagiirre afiˈneemmo gede assannonkehu sayikki coyi maati? (Yohaannisi 4:23, 24)

¹³ Sayikkihunni, heeshshoˈne giddo Yihowa magansiˈra balaxisiissinanni heedhinoonnironna teˈee buuxidhe. Kalaqaanchonke ikkino daafira Yihowa magansiˈra hasiissannonke. (Aju. 4:11; 14:6, 7) Hakko daafira isi hasiˈranno garinni yaano “ayyaanunninna halaalunni” magansiˈra hasiissannonke. (Yohaannisi 4:23, 24 nabbawi.) Qaalisi giddo noo halaali garinni Yihowa magansiˈrate qullaawu ayyaanisi massagannonke gede assiˈra hasiissannonke. Loosonke hoolloonni woy agamboonni gobbara heeˈneemmoha ikkiro nafa, Yihowa magansiˈra balaxisiisa hasiissannonke. Xaa yannara Yihowa Farciˈraasine ikkitino daafira calla 100 saˈanno roduuwanke usurroonninsa. * Ikkirono insa hagiirrunni huucciˈrate, xiinxallatenna Maganu Mangiste daafira wolootaho kulate dandiiture baala assitanni no. Mannu xoninkerono xiiwinkerono Yihowa ledonke noota anfoommo daafira hagiirraamma ikka dandiineemmo.—Yai. 1:12; 1 Phe. 4:14.

14. Taajikistaanete heeˈrannohu wedellichu rodiira mayi iillinosi? Mayira?

¹⁴ Mitu roduuwinkera lowo qarri iillinonsa; ikkirono insa aleenni laˈnummoha sasenka coye assitino daafira addu hagiirre afiˈra dandiitino. Hanni Taajikistaanete heeˈrannohu Jovidooni Bobojonoov yinannihu 19 diri wedellichi woˈnaalsha laˈno; isi olaho haˈra giwino. Iso Birra 4, 2019nni minisinni giddeessine haaˈne haˈne boode agana usurroonnisi; hattono jaddo loosinohu gede beebba assiˈnoonnisi. Hakkiinni iso beebba assiˈnoonnita batinye gobbuwara odootenni kulloonni. Olanto iso olamate qaale eanno gedenna olantote uduunne uddiˈranno gede giddeessitanni gantinosita odootenni kulloonni. Hakkunni gedensaanni jaddo loosino yine usuramanno gede assinoonni; jeefote hatte gobba pirezidaantichi iso maare tidhamanno gede  assinosi. Kuni baalu qarri iillisirono Jovidooni minshe noosikkiha ikkino; hattono hagiirrisi baikkinni heeˈrino. Isi tenne assanno gede kaaˈlinosiri maati? Woˈmanka woyite ayyaanaamittete coye assasiiti.

15. Jovidooni usuru mine noo yannara ayyaanaamittete sagale sagaˈlinohu hiittoonniiti?

¹⁵ Jovidooni usurame noo yannara Qullaawu Maxaafi woy borruwanke noosikkiha ikkirono, ayyaanaamittete sagale sagaˈla diagurino. Hiittoonni? Qooxeessaho noo roduuwi sagale massitannosi woyite sagale worroonni uduunnichira barru qummeeshsha borreessite massitanno. Isi konni garinni barru baala Qullaawa Maxaafa nabbawanno hattono hiincanno. Isi usurunni tidhamihu gedensaanni xaa geeshsha lowo qarri iillinonsakki roduuwa togo yee amaalino: “Nooˈne yanna Maganu Qaalenna dirijjitesi qixxeessitino borro nabbabbine Yihowa daafira nooˈne egenno lexxitanno gede assiˈrate horoonsidhe.”

16. Jovidooni maa illachishino?

¹⁶ Rodiinke Yihowa biddishshi garinni heeˈrino. Isi gara ikkinokkire dihedino woy bushare diassino; hatteentenni Yihowanna Yihowa baxannore illachishino. Jovidooni Maganu kalaqo dhagge assiˈrino. Isi soodo goxinowiinni kaˈˈanno woyite, woˈmanka woyite ceate huuro macciishshanno. Qoleno hashsha hashsha  agananna beeddahe laˈˈanno. Isi, “Tini Yihowa elto hagiidheemmonna jawaateemmo gede assitinoe” yiino. Yihowa ayyaanaamittetennino maalaamittetennino assinonkerira galanteemmosiha ikkiro, wodaninke hagiidhanno; tini qolte qarra dandiineemmo saˈneemmo gede wolqa ikkitannonke.

17. Umi Pheexiroosi 1:6, 7 Jovidoonira iillino gedee qarri iillinonsare kaaˈlitannonsahu hiittoonniiti?

¹⁷ Qoleno Jovidooni Yihowa magansiˈra balaxisiisino. Isi halaalaanchu Maganira ammanaminoha ikke heeˈra hasiissannota ikkitinota afino. Yesuusi “Mootichu Maganikkira calla kumbuuli! Iso calla magansiˈri” yiino. (Luq. 4:8) Olantote hajajaanonna olanto Jovidooni ammanasi kaadara hasidhino. Isi kayinni hexxo mudhannokki gedenna ammaname heeˈranno gede kaaˈlasira Yihowa barrano hashshano huucciˈrino. Beebba assiˈnisirono Jovidooni ammaname heeˈrino. Xa isi lowo geeshsha hagiirraamoho; korkaatuno xa noosi ammana gannasiranna usurrasira albaanni noositenni roorete.—1 Pheexiroosi 1:6, 7 nabbawi.

18. Hagiirrinke baˈˈannokki gede assiˈra dandiineemmohu hiittoonniiti?

¹⁸ Yihowa addu hagiirre afiˈrate mayi hasiisannonkero afino. Addu hagiirre afiˈneemmo gede assannoha sasenka coye harunsitiniro, qarru iilliˈnero nafa hagiirriˈne baikkinni heeˈra dandiitinanni. Hakkiinni kiˈneno “Kaaliiqi Maganonsa ikkino manni baˈraaˈrinoho [“hagiirraammaho,” NW]” yaa dandiitinanni.—Far. 144:15.