Hundi Waro Heedhino Israeele Ola Olantino; Ninke Olammeemmokkihu Mayiraatiyya?
UMIHU Alamete Oli yannara mittu Naazi gobbahu olantote hajajaanchi Yihowa Farciˈraasine, “Kiˈne giddonni mittuno Faransayete woy Ingilaandete kaaˈlame olama giwiro shinanni” yee waajjishiishino. Massaara qodhitinori Naazi olanto Yihowa Farciˈraasine doyissite nooha ikkirono, roduuwinke giddonni tennera waajje anga uyinohu mittuno dino. Insa assitinori worbuulle ikkitinota leellishanno! Kuni, Yihowa Farciˈraasine ola olantannokkita leellishannoho kaajja lawishshaati; tenne alame olira anga diwodhineemmo. Shinanninketa kulle waajjishiinshinkero nafa, tenne alame hajora anga diwodhineemmo.
Ikkirono ninke Kiristaanaho yaannohu baalunku manni tennera sumuu yaanno yaa diˈˈikkino. Batinyu manni mittu Kiristaanchi gobbasira gaarama dandaanno woy gaarama hasiissannosi yee ammananno. Insa, ‘Hunda heeˈrinohu Israeelete manni Maganu mannaati. Ikkirono insa ola olamino; xaa yannara noo Kiristaani olamannokkihu mayiraatiyya?’ yite heddara dandiitanno. Ati tennera mayyaatto? Hundi waro heedhino Israeelenna xaa yannara noohu Maganu manni noo gari mitto diˈˈikkino yite qolattora dandaatto. Hanni hundi waro heedhino Israeelenna xaa yannara noohu Maganu manni noo gari mitto diˈˈikkino yineemmo gede assannonkeha onte coye laˈno.
1. BAALANKAWA HEEˈRANNOHU MAGANU MANNI MITTE GOSAATI
Hundi waro, Yihowa Israeelete manna mitte gosa asse doodhino. Isi Israeele, “baatto baalate aana noo manniwiinni baxxitine kiˈne ane manna ikkitinanni” yiinonsa. (Ful. 19:5) Qoleno Maganu insa wole dagawiinni baxxite heedhanno gede baatto uyinonsa. Hakko daafira Maganu Israeele wole daga ledo olantanno gede hajajanno woyite insa ledonsa Yihowa magansiˈranno manna dishitanno. *
Xaa yannara noohu Yihowa halaalunni magansiˈranno manni, ‘gosa baalatenni, gaˈre baalatenninna . . . addi addi afoo coyiˈranno manni giddonni’ gamba yiinoho. (Aju. 7:9) Maganu manni ola olamannoha ikkiro, ammanate roduuwansa qasara wole agurina shaara nafa dandaanno.
2. YIHOWA ISRAEELETE MANNI OLA OLAMANNO GEDE HAJAJINO
Hundi waro Yihowa Israeele olaho haˈra hasiissannonsahu maamooteetironna mayiraatiro kulinonsa. Lawishshaho Maganu Israeele Kanaˈˈaani manni ledo olante isi hedinore wonshitanno gede hajajinonsa; Kanaˈˈaani manni agaaninte magansiˈratenni, foorretenninna qaaqquulle kakkalo assatenni egennaminoho. Yihowa konne busha coye assanno manna gundanni gede hajajinohu, Israeeleno konni manni lawishsha harunsite busha coye assitannokki gedeeti. (Lew. 18:24, 25) Israeele Hexxote Gobba ragidhuhu gedensaanni, Maganu insa diinnansa gawajjitannonsata gargadhate olantanno gede fajjino woyiti no. (2 Sam. 5:17-25) Ikkirono Yihowa Israeele uminsanni kaˈe olantara difajjino. Insa uminsanni kaˈe olanturo duucha woyite bushu coyi iillannonsa.—Kir. 14:41-45; 2 Dud. 35:20-24.
Xaa yannara, mannu ola olamanno gede fajjannohu Yihowa diˈˈikkino. Yannankera mannu ola olamannohu Maganu hedinore wonshate ikkikkinni, uminsa hasatto wonshiˈrateeti. Insa ola olantannohu, gashshootensa halashshiˈrate, roore miinja afiˈrate woy poletiku hasattonsa wonshiˈrate yite ikkara dandaanno. Magansiˈrankera gaaramate woy Maganu diinna hunate, Maganu suˈminni olammeemmo yitannorina? Yihowa halaalunni magansidhannosire agaranno hattono diinnasi albillitte Armagedooni olinni hunanno. (Aju. 16:14, 16) Konne ola olantannori iimi olantosiiti ikkinnina uullate aana nooha iso magansiˈranno manna diˈˈikkino.—Aju. 19:11-15.
3. ISRAEELETE MANNI AMMANA NOONSATA LEELLISHSHINORE DIHUNINO
Yihowa Iyyaarkote katama huni woyite Reaabinna maatese gatisi gede yannankera noohu ola olamanno manni ammana noonsata leellishino manna gatisanno?
Hundi waro Israeelete olanto ammana noonsata leellishshinore maartino hattono Yihowa shinanni gede hajajinore calla shitino. Hanni lame lawishsha laˈno. Yihowa Iyyaarkote katama hunnara hajajinoha ikkirono, Israeelete manni Reaabi ammana nooseta leellishshino daafira isenna maatese gatisino. (Iya. 2:9-16; 6:16, 17) Gedensoonni, Gebaooni manni Magano waajjannota leellishino daafira Gebaooni katamira heeˈranno manni baalu gatino.—Iya. 9:3-9, 17-19.
Xaa yannara noo manni olamanno woyite ammana noonsata leellishshinore dimaaranno. Mito woyite mannu insa insanaawa olamanno woyite beebbaataamu manni reyanno.
4. ISRAEELE MAGANU OLU DAAFIRA FUSHSHINO SEERA HARUNSA HASIISSANNONSA
Hundi waro Yihowa Israeelete olanto olantanno woyite isi fushshino biddishsha harunsitanno gede kulinonsa. Lawishshaho Maganu mito woyite insa mitto katama qasate hadhanno yannara balaxxe hakko katamira heeˈranno manni ‘keerunni anga aanno gede assitara’ hajajino. (Mar. 20:10) Qoleno Yihowa Israeelete olanto bisunnino ikko amanyootunni xuru noonsakkire ikkitanno gede kulinonsa. (Mar. 23:9-14) Qooxeessinsara noo daga duucha woyite olante qeeltino katamira noo meento bushiishshanno; Yihowa kayinni Israeele hatto assitannokki gede hoolinonsa. Isinni, insa qafadde abbitino mancho adha hasidhuro adha dandiitannohu katama qeeltuhunni mittu agani gedensaanniiti.—Mar. 21:10-13.
Xaa yannara duucha gobbuwa ola olammeemmo woyite mite wodho ayirrinseemmo yite sumuu yitino. Insa hatto yitinohu beebbaataamu manni reyannota hoolate yite ikkirono, duucha woyite tenne wodho diigganno.
5. MAGANU MANNISIRA OLAMINO
Yihowa Iyyaarkote katamira Israeelete olami gede yannankera noo gosara olamanno?
Hundi waro Yihowa Israeelete olame duucha hige dhagge ikkitanno qeelle uyinonsa. Lawishshaho Yihowa Israeelete manni Iyyaarkote katama horranno gede kaaˈlinonsahu hiittoonniiti? Yihowa kulino garinni, Israeele “lowo qoonqonni roqonsitanna, katamu huxxi [diigamino]”; hakkiinni insa katama eˈe amada dandiitino. (Iya. 6:20) Qoleno insa Amoonoota qeeltinohu hiittoonniiti? “Kaaliiqi gordunni lowiddaanna kaade dirrisi. Kunnira, Israeelootu shitinorinni roore kaade shitinori kiiro lowo geeshsha batidhu.”—Iya. 10:6-11.
Xaa yannara Yihowa uullate aana noote aye dagarano diolamanno. Yesuusi Moote ikke gashshannohu Maganu Gashshooti “tenne gobbaha [“alameha,” NW] diˈˈikkino.” (Yoh. 18:36) Tenne alame gashshaano baala massagannohu kayinni Sheexaaneho. Tenne alamera noohu waajjishanno oli isi bunshe leellishannoho.—Luq. 4:5, 6; 1 Yoh. 5:19.
ADDU KIRISTAANI KEERE KALAQANNOHO
Xaa geeshsha laˈnummonte gede, ninke heeˈneemmo gari hundi Israeele heedhino garinni lowo geeshsha baxxanno. Ikkirono ola olammeemmokki gede assannonkehu aleenni laˈnummo coye calla diˈˈikkino. Wolu coyino no. Lawishshaho, Maganu goofimarchu barra isiwiinni rosanno manni ola olamannota agurina ‘olaho qixxaawannokkita’ woy ola rosannokkita balaxe masaalino. (Isa. 2:2-4) Qoleno Kiristoosi rosaanosi ‘tenne gobbare ikkitinokkita’ coyiˈrino; insa tenne alame hajora anga diwodhitanno.—Yoh. 15:19.
Hakkiinni saeno Kiristoosi rosaanosi kawiinni sainore assitanno gede jawaachishinonsa. Isi insa hanqitanno gede, koma amaddanno gedenna olantanno gede assannonsa coye assitannokki gede rosiisinonsa. (Mat. 5:21, 22) Qoleno isi rosaanosi ‘araarsitannore’ woy keere kalaqqannorenna diinnansa baxxannore ikkitanno gede rosiisinonsa.—Mat. 5:9, 44.
Ninke hatto assa dandiineemmohu hiittoonniitiyya? Ninke ola olama hasiˈneemmokkiha ikkara dandaanno; kayinni songote giddo gaance woy babbadooshshu kalaqamanno gede assannohu bushu akati giddonke nookka? Hatto ikkiro togoo hedo giddonkenni buqqinse hunate sharrama agurroonke.—Yai. 4:1, 11.
Olaho dikarsammeemmo; hatteentenni mereeronke keerunna baxillu heeˈranno gede assate sharrammeemmo. (Yoh. 13:34, 35) Yihowa ola hegerera huna geeshsha poletiku hajora anga wodhinummokki heeˈrate murciˈno.—Far. 46:9.
^ Mito woyite Israeelete gaˈre insa insanaawa olantino; ikkirono tini Yihowa dihagiirsiissino. (1 Mot. 12:24) Ikkollana mite gaˈre iso hanqissino daafira woy wole jawa cubbo loossino daafira insa insanaawa oltanno gede fajjino woyiti no.—Eje. 20:3-35; 2 Dud. 13:3-18; 25:14-22; 28:1-8.
Kurino Lai
DUUCHU MANNI XAꞌMANNO XAꞌMO
Yihowa Farciꞌraasine Olaho Hadhannokkihu Mayiraati?
Yihowa Farciꞌraasine olaho hadhannokkita alamete aana duuchu manni afino. Olama gimbeemmohu mayiraatiro afate nabbawi.
