Hakko diro dirijjite Qullaawu Maxaafi rosaano albinni roore mitto ikkitanno gede kaaꞌlannoha mito coye biddi assitino. Lamalate kiiro assiꞌnanni Huuccatto daafira, Yihowa Guwisiꞌrate daafiranna Soqqanshote gambooshshiwa Horoonsiꞌnanni Qummeeshshuwa daafira xawissanno hedo Agarooshshu Shaera fula hanaffino. Qoleno Qullaawu Maxaafi rosaano lamalate kiiro gambooshshunniwa nabbambanni qummeeshshuwa, hattono hojju xiinxallonna maatete magansiꞌra yannara faarsinanni faarso leellishshanno kalaandere qixxeessitino.

Qullaawu Maxaafi rosaano gambooshshunniwa soqqantanni afidhino woꞌnaalsha kultanno, Yihowa galattanno gede assinonsare coyidhanno, faarso faarsitanno hattono huuccatto assidhanno. Iiva Barneyi yinanniti 1923nni 15 dirisenni cuuantino rodoo togo yitino: “Gambooshshunniwa hedokki coyiꞌra hasiꞌrittoro kaꞌe uurrite ‘Mootichu assinoehu danchu coyi baalaho iso galata hasiꞌreemmo’ yite hanafatto.” Mitu roduuwi lowore coyiꞌra baxxanno. Rodoo Iiva Barneyi ledde togo yitino: “Mittu Godiwiini yinannihu jawu rodiira Mooticha galaxxanno gede assannosihu lowo coyi noosi. Kayinni minaamasi isi coyiꞌranni keeshsheenna massaganno rodii caaccaawinota laꞌanno woyite kootesi amadde goshooshshanno; hakkiinni isi agure ofollanno.”

Mitte mittenti songo aganunni mitte higge baxxino garinni huuccatto assidhanno, Yihowa guwisidhanno hattono soqqanshote gambooshshe assidhanno. Dotteessa 1, 1923ti Agarooshshu Shae tenne hajo daafira xawissanni togo yitino: “Gambooshshunnita darate yanna soqqanshote ledo xaadooshshe afiꞌrinore shiqishatenna soqqantanno roduuwa jawaachishate horoonsiꞌra hasiissanno. . . . Konni garinni mitteenni magansiꞌra roduuwu albinni roore mimmitunniwa shiqqanno gede assitanno yine hexxineemmo.”

Kanaadaho Vankuuveri yinanniwa heeꞌrannoho Charlesi Martiini yinanniha 19 diri wedellicha kuni gambooshshi lowo geeshsha kaaꞌlinosi. Isi hakkawarita qaage togo yiino: “Minunni mine haꞌre soqqameemmo woyite mayyeemmoro umo rosoommohu konni gambooshshiwaati. Duucha woyite roduuwu minunni mine hadhe soqqante afidhino woꞌnaalsha kultanno. Tini soqqansho fuleemmo woyite manna magarinni hasaawiseemmoronna mannu macciishsha giwe coyiꞌrannohu addi addi coyiꞌra dawaro ma garinni qoleemmoro wodancheemmo gede kaaꞌlitinoe.”

Qoleno “soqqanshote gaammoonni barruwa” roduuwu albinni roore mittooꞌmitanno gede kaaꞌlitino. Dotteessa 1, 1923te Agarooshshu Shaera togo  yaanno egensiishshi no: “Baalunku konne looso mitteenni loosa dandiineemmo gede . . . Onkoleessa 1, 1923 Maakisanyote barri soqqanshonniha ikkanno gede gaammoonni. Hakkunni gedensaanni aganu kiiro umi Maakisanyo soqqanshote barra ikkitanno. . . . Mitte mittente songo giddo noohu mittu mittunku halashshaanchi konni garinni soqqama hasiissannosi.”

Wedellu Qullaawu Maxaafi rosaano nafa soqqansho fultanno. Hazeeli Berfordi yinanniti hakkawaro 16 diro ikkannoseti mitte rodoo hakkawarita qaagge togo yitino: “Buleetiini yinanni metseetera manna mayine hasaawinseemmoro leellishshanno hedo fultanno. (xaa yannara lawishsha ikkanno hasaawa yinannihu gede yaate) a Hakkawaro ahaahiꞌya ledo soqqansho fule diinaggaawe soqqameemma.” Ikkirono tini rodoo mittu rodii sabbaka hasiissannosekkita kuliseta dhagge assidhino. Ise ledde togo yitino: “Mittu jawu rodii horo manna hasaawisa hasiissannoekkita kulinoe. Hatte yannara mitu roduuwi, labballunna meyaari wedellu roduuwi hattono baalanti Qullaawu maxaafi rosaano bayira Kalaqaanchonke guwisate looso loosa hasiissannonsata dihuwattino.” (Far. 148:12, 13) Ikkirono Rodoo Hazeeli Berfordi sabbaka diagurtino. Ise gedensoonni layinkihu Giiliyaadi Rosi Mine eꞌe rossino hattono Panamaho misiyoone ikkite soqqantino. Gedensoonni kuri roduuwi soqqansho fula lainohunni wedellu daafira heddannore biddi assidhino.

Jajjabba gambooshshuwano roduuwu mittooꞌmitanno gede kaaꞌlitino. Batinye jajjabba gambooshshuwa assiꞌnanni yannara soqqanshote gaammoonni barri heeꞌranno; lawishshaho togoo gambooshshe Kanaadaho Winipegi yinanniwa assinoonni. Gambooshshe dayino manna baala Badheessa 31nni hakko katamira sabbakanno gede koyinsoonni. Togoohu soqqanshote barri roduuwu lowo manna hasaawissanno gedenna dancha guma afidhanno gede assino. Woxawaajje 5nni hakko katamira assinoonnihu wolu gambooshshira 7,000 meddi yaanno manni gamba yiino. Hakkuyira albaanni Kanaadaho assinoonni gambooshshira hakkeeshshi manni daye diegennino.

Kaalforniyaho Loosi Anjelesi 1923nni Woxawaajje 18-26 Yihowa manni assiꞌrino gambooshshi lowo geeshsha baxxinoho. Gambooshshu hanafara  albaanni noo lamalara gambooshshu daafira kultanno egensiishshuwa gaazeexxate aana fultino; hattono Qullaawu Maxaafi rosaano 500,000 saꞌꞌannoha koyishshu woraqata mannaho iillishshino. Qoleno egensiishshuwa manna hogobbanno makeennaranna mini makeennara gannoonni.

Qidaame Woxawaajje 25nni Roduu Raazerfordi “Geꞌreewonna Meꞌꞌe” yaanno birxicho afidhino lallawo shiqishino; isi “geꞌreewoho” yinoonnihu gannate ikkitino uullara heeꞌrannoha gara ikkitinoti wodanu dooꞌꞌo noonsa manna ikkinota xawise kulino. Hattono “Qorowishsha” yaanno qaagiishsha kulino. Kuni qorowishshi kaphu ammaꞌno xawo fushshinohonna suwashshu wodani noonsa manni “Bayira Baabiloone” giddonni fulanno gede jawaachishannoho. (Aju. 18:2, 4) Yannate gedensaanni alamete doyichora noori diinaggaabbe soqqantannori Qullaawu Maxaafi rosaano konne qaagiishsha amaddinota lowo miliyoone ikkitanno tiraaktuwa mannaho iillishshino.

Gambooshshunnihu jeefote barra Roduu Raazerfordi “Baalanti Daga Armagedooniwa Higge Hadhanni No; kayinni Xaa Yannara Noohu Lowo Miliyoone Ikkanno Manni Horo Direyanno” yitanno lallawo shiqishino; tenne lallawo 30,000 saꞌꞌanno manni macciishshino. Qullaawu Maxaafi rosaano lowo manni daannota hedde haarote minnoonnita loosi Anjelesi noo Istaadiyeeme karaayyaꞌino. Roduuwu baalunku manni macciishsha dandaanno gede istaadiyeemenniha huurote uduunne horoonsidhino; kuni uduunnichi hatte yannara haarote dayinoho. Wolu batinyu manni tenne pirogiraame raadoonetenni macciishshino.

Sabbakate loosi 1923nni Afirikaho, Awuroppaho, Hindetenna Wodiidi Ameerikira lowo geeshsha halaꞌlino. Hindete gobbara minaamasinna 6 oososi ledo heeꞌrannohu Adavimanatu Jooseefi yinanni rodii no; isi maatesi towaaxxanni heeꞌrenni Hindete, Taamili, Teelugunna Urdu afiinni borruwanke qixxeessate looso kaaꞌlino.

Seraaliyonete heedhannori Alferdi Jooseefinna Leenaardi Bilaakimani yinanniri Qullaawu Maxaafi rosaano Niwu Yorkete noote qara biirora borrote sokka sokke kaaꞌlannonsa manna sonkanninsa gede xaꞌmidhino. Hakkiinni Dotteessa 14, 1923nni xaꞌmidhino xaꞌmora dawaro qolloonninsa. Alferdi, “Mitto barra Qidaamete hashsha hedeweelcho silke dowwolloonnie” yiino. Hakkiinni mittu manchi duꞌma huuronni, “Qara biirora borrote sokka sokke sabbakanno manna sonkanni gede xaꞌmoottohu ateeti?” yiisi. Alferdino “Ee aneeti” yee qoli. Hakkiinni manchu “Insa ane sokkinoe” yiisi. Dowwolinohu Wiiliyaami Birawuni yinanni rodooti. Roduu Wiiliyaami Birawuni minaamasi Antoniyanna lame shiimaadda oososi yaano Luuwisinna Luusi ledo Karibiyani giddichonni kae Seraaliyone iillinohu hakko barraati.  Roduuwu haarote daggino sawaakooti ledo xaadate lowo yanna agadha dihasiissinonsa.

Alferdi lede togo yiino: “Layinki barra soodo aninna Leenaardi lamalannita Qullaawu Maxaafi xiinxallo assiꞌnanna mittu hojjaameessu manchi waalchunniwa shiqqi yee dayi. Kuni manchi Rodoo Wiiliyaami Birawuniiti. Isi halaale diinaggaawe sabbakannoho hattono aananno barra lallawo shiqisha hasiꞌrino.” Mitto agana woꞌmitinokki yanna giddo Roduu Birawuni adhe dayino borro baala mannaho ele gudino. Hakkiinni mulenni 5,000 ikkitanno maxaaffa sonkisi. Hatte maxaaffano gude wole maxaaffa sonkannisi gede xaꞌmiꞌrino. Ikkirono mannu Rodoo Birawuni laꞌꞌannosihu maxaaffa hiranno manchi gede asse diꞌꞌikkino. Yihowara diinaggaawe soqqaminohu lowo diri giddo lallawo shiqishanno woyite duucha woyite Qullaawa Maxaafa qummi assanno daafira mannu Bayibili Birawuni yee woshshannosi.

Hakkiinni Jarmanete Barmeeni yinanniwa nooti sinu biiro loosanno mannira ruukkitino daafira insa hakkiinni fula hasidhino; qoleno katama Faransayete olanto doyissitino. Qullaawu Maxaafi rosaano Maagidibergi yinanniwa borro attamate injaanno hintsa afidhino. Ella 19nni roduuwu borro attammannihanna wole uduunnensa adhite haarote minnoonnita Maagidibergi noo Beeteele hadhu. Roduuwu haaro Beeteele hadhinota qara biirora egensiissuhu gedensaanni layinki barra Faransayete olanto Barmeeni katama horritinota kulanno duduwi gaazeexaho fulino. Roduuwu hakkiinni haꞌransa, Yihowa atooti agarooshshe ikkinonsata leellishshanno taje gede assite laꞌino.

Qoleno Biraazilete dancha duduwo halashshate lowo doogo haꞌrinohu Jorji Yungi yinanni rodii haaro sinu biiro fane Porchugaalete afiinni Agarooshshu Shae attama hanafino. Isi shiimu agani giddo 7,000 saꞌanno borro elino. Roduu Jorji Yungi Biraazile haꞌrasi Saara Ferguseni yinanni rodoora dancha faro fantinose. Ise 1899nni hanaffe Agarooshshu Shae nabbabbanni keeshshitinoha ikkirono heeshshose Yihowara sayisse uyitinota wayinni cuuante leellishshanno faro diafidhino. Boodu agani gedensaanni Rodoo Saaranna shoole oosose cuuantino.

Hakko diri jeefora Sadaasa 15, 1923ti Agarooshshu Shae songote gambooshshi, soqqanshotenna jajjabbu gambooshshi daafira biddi assinoonnihu mitu coyi Qullaawu Maxaafi rosaano kaaꞌlino gara kultanni togo yitino: “Songuwa ayyaanaamittetenni dancha gede lophitinota leellishshanno taje no . . . Aananno dirono hallonke usudhine Maganoho diinaggaambenna hagiirrunni soqqammeemmo.”

Hakkiinni aaninohu yaano 1924 Qullaawu Maxaafi Rosaanora baxxino dirooti. Hatte yannara Beeteelete soqqantanno roduuwi Birukiliini noote qara biironni lowo geeshsha xeertidhukkinni noote Istaateni yinanni giddichora hirroonni baattora haammata agana mine mintanni keeshshitino. Konne mine minne gundoonnihu 1924 hanaforaati; kuni loosi roduuwu mereero noo mittimma kaajjitanno gedenna danchu duduwi albinni roore halaꞌlanno gede kaaꞌlino.