1. Mittu sokkaasinchi mayyee coyiꞌranni no? Tini ma assineemmo gede assitannonke?

 SOKKAASINCHU coyishiishoommehero isi yaannohere macciishshatto? Xaa yannara sokkaasinchu ‘gosa, gaꞌrenna addi addi afiinni coyiꞌranno manna baala’ coyishiishanni no. Isi mayyaanni no? “Magano waajje; ayirrinyeno uuyyesi. Gordonna baatto . . . kalaqinoha magansidhe!” yaanni no. (Aju. 14:6, 7) Baalunku magansiꞌra hasiissannohu halaalaancho Magano Yihowa callaati. Bayiru ayyaanaamittennihu qullaawu mini giddo iso magansiꞌneemmo faro faninonke daafira Yihowa lowo geeshsha galanteemmosi!

2. Yihowahu ayyaanaamittennihu qullaawu mini maati? (“ Ayyaanaamittennihu Qullaawu Mini Maa Diꞌꞌikkino?” yitanno saaxine lai.)

² Ayyaanaamittennihu qullaawu mini maati? Konni mini daafira kulanno xawishsha afiꞌra dandiineemmohu hiikkiinniiti? Ayyaanaamittennihu qullaawu mini illete leellannoha diꞌꞌikkino. Kuni Yihowa Yesuusite wodote kakkalo widoonni Iso hagiirsiisanno garinni magansiꞌneemmo gede qixxeessino qixxaawooti. Soqqamaasinchu Phaawuloosi umi xibbi diro, Yihudaho heeꞌrinohu Ibiraawootu Kiristaanira borreessino sokkara tenne qixxaawo daafira xawise kulino. b

3-4. Phaawuloosi Yihudaho heeꞌrannohu Ibiraawootu Kiristaani daafira yaadinohu mayiraati? Isi insa kaaꞌlinohu ma garinniiti?

³ Soqqamaasinchu Phaawuloosi Yihudaho heeꞌrannohu Ibiraawootu Kiristaanira sokka borreessinohu mayiraati? Borreessinohu lamu korkaatinni ikkikkinni digatino. Umihunni insa jawaachishateeti. Insa giddo rooru Kiristaana ikkitara albaanni Ayihudete ammaꞌno harunsitannoreeti. Insa Kiristaana ikkitino  daafira albiri ammaꞌnote murrootinsa qacifattansara dandiitanno. Mayira? Korkaatuno Kiristaanaho magansiꞌrate haꞌrannohu hoola yinoonnihu qullaawu mini, Maganoho kakkalo shiqinshannihu kakkalote bayichinna kakkalaano ikkite soqqantannori dinonsa. Kuri coyibba Yesuusi rosaano hexxo mudhitanno gedenna ammanansa shoshshoggitanno gede assara dandaannoho. (Ibi. 2:1; 3:12, 14) Mitootu isinni albite Yihudu ammaꞌnonsa widira higate heddinoha nafa ikkara dandaanno.

⁴ Layinkihunni, Phaawuloosi Ibiraawootu Kiristaani Maganu Qaali giddo noota “kaajjado sagale” itate yaano haaro woy hawa gede huwantannikkiha ayyaanaamittete roso huwatate sharraminokkita xawisino. (Ibi. 5:11-14) Mitootu isinni Muse Seera harunsa diagurtino. Ikkirono Phaawuloosi Muse Seeri garinni shiqinshanni kakkalo woꞌmunni woꞌma cubbu maaro afiꞌnanni gede assitannokkita xawisino. Hakko daafira “albi hajajo . . . hoolloonni. Konnira Phaawuloosi insara hawa gede huwantannikkiha mito halaale rosiisinonsa. Isi ammanate roduuwisira Yesuusite wodote kakkalo widoonni addinta ‘Maganunniwa shiqate’ kaaꞌlitannota “woyyitino hexxo” kulinonsa.—Ibi. 7:18, 19.

5. Ibiraawootu maxaafa huwatate maa assa hasiissannonke? Mayira?

⁵ Phaawuloosi Ibiraawootu Kiristaanira xa Yihowa magansidhanni noo gari alba Yihudu ammaꞌno harunsitanno waro magansidhannohunni roorannoha ikkinota xawise kulinonsa. Muse Seeri garinni magansiꞌnanni gari “albillitte daara noo coyira caalu gedeeti; halaalu leellannohu kayinni Kiristoosinniiti.” (Qol. 2:17) Caaleho yaa mittu coyi hincilaallooti ikkinnina hakkonne coye diꞌꞌikkino. Hatteente gede hundi waro Yihudu manni magansiꞌranno garino albillitte daara noo coyira caaleho. Yihowa hagiirsiisanno garinni magansiꞌra dandiineemmo gede, isi cubbinkera maaro afiꞌneemmo gede qixxeessino qixxaawo huwata hasiissannonke. Hanni Ibiraawootu maxaafi giddo xawinsoonniha ‘caalenna’ (Yihudu manni magansiꞌranno gara) ‘albillitte daara noo coye’ (Kiristaanu magansiꞌranno gara) heewisiinse laꞌno. Togo assanke ayyaanaamittennihu qullaawu mini daafira albinni roore huwanteemmo gedenna ninkeno konni mini wido ikkinoommohu ma garinniitiro afate kaaꞌlitannonke.

6. Xaadooshshu dukkana horoonsiꞌnoonnihu ma garinniiti?

⁶ Yihudu manni magansiꞌranno gara. Phaawuloosi borreessinohu 1512 K.A. Muse seekkinoha  xaadooshshu dukkana kaima asseeti. (“Yihudu Manni Magansiꞌranno Garanna Kiristaanu Magansiꞌranno Gara” yitanno sanxarazhe lai.) Israeele bayichunni bayicho hadhanno woyite konne xaadooshshu dukkana adhite hadhanno. Insa konne dunkaana 500 diro meddi yitanno yanna yaano Yerusaalamete qullaawa mine minni yanna geeshsha horoonsidhanni keeshshitino. (Ful. 25:8, 9; Kir. 9:22) Kuni xaadooshshu dukkani Israeele Maganunniwa shiqate, kakkalo shiqishiꞌratenna iso magansiꞌrate gamba yitannoho mereerima bayichooti. (Ful. 29:43-46) Ikkirono xaadooshshu dukkani Kiristaanaho albillitte daannoha hakkiinni roorino coyeno riqiwannoho.

7. Ayyaanaamittennihu qullaawu mini xawe leellinohu mamooteeti?

⁷ Kiristaanu magansiꞌranno gara. Hundihu xaadooshshu dukkani ‘gordoho noo coyira caaleho’ hattono Yihowahu bayiru ayyaanaamittennihu qullaawu mini lawishshaati. Phaawuloosi “kuni coyi [woy xaadooshshu dukkani] xaa yannara lawishshaho” yiino. (Ibi. 8:5; 9:9) Hakko daafira isi Ibiraawootu Kiristaanira tenne sokka borreessi yannara ayyaanaamittennihu qullaawu mini Kiristaanaho xawe leelle no. Kuni qullaawu mini xawe leella hanafinohu 29 M.D. Hakko diro Yesuusi cuuamino hattono qullaawu ayyaaninni buuramino; qoleno ayyaanaamittennihu qullaawu mini giddo “jawa Qeesootu Qara [kakkalaanote biilo]” ikke Yihowara soqqama hanafino. c—Ibi. 4:14; Soq. 10:37, 38.

8-9. Ibiraawoota 7:23-27 kultanno garinni Israeelete kakkalaanote biilo ikkite soqqantannorinna qaru Kakkalaanote Biili Yesuusi Kiristoosi mereero noo badooshshi maati?

⁸ Yihudu manni magansiꞌranno gara. Kakkalaanote biilo ikkite soqqantannori manna riqibbe Maganu albaanni shiqate qoosso noonsa. Israeelennihu umihu kakkalaanote biili Aarooniiti; Yihowa iso shoominohu xaadooshshu dukkana maassiinsi woyiteeti. Ikkirono Phaawuloosi togo yee xawisino: “Reyanno daafira mittu qeesichi [kakkalaanchi] soorramikkinni loosisi aana hegere geeshsha heeꞌra didandiino; kunnira albi qeesooti kiiro batinyeho.” d (Ibiraawoota 7:23-27 nabbawi.) Kakkalaanote biilo ikkite soqqantannori guuntete xeꞌne noonsare ikkitino daafira, uminsa cubbi daafirano kakkalo shiqishiꞌra hasiissannonsa. Israeelennihu kakkalaanote biilinna qaru Kakkalaanote Biili Yesuusi Kiristoosi mereero lowo badooshshi no.

⁹ Kiristaanu magansiꞌranno gara. Kakkalaanote Biilonke ikkinohu Yesuusi Kiristoosi “gordoho halaalaanchu dukkanira” soqqamanni no. Konne dukkana qasinohu, Mooticha Maganoho ikkinnina dimannaho.” (Ibi. 8:1, 2) Phaawuloosi “Yesuusi kayinni hegerera heeꞌrannoha ikkino daafira qeesimmasira gawalo dino” yiino. Phaawuloosi lede Yesuusi ‘minshe nookkiha cubbaataammuwiinni baxxinoha’ ikkinotanna Israeelenniri kakkalaanote biilo ikkite soqqantannori gede ‘umisi cubbira barru baala kakkalo shiqisha hasiissannosikkita’ coyiꞌrino. Hanni xa Yihudu manninna Kiristaanu shiqishiꞌranno kakkalonna kakkalote bayichi mereero noo badooshshe laꞌno.

10. Camotenni loonsoonnihu kakkalote darga shiqqanno kakkalo maa leellishshanno?

¹⁰ Yihudu manni magansiꞌranno gara. Xaadooshshu dukkana eꞌnanniwa gobbaanni Yihowara saadate kakkalo shiqinshannihu camotenni seekkinoonnihu kakkalote bayichi no. (Ful. 27:1, 2; 40:29) Ikkirono hatti kakkalo mannu  woꞌmunni woꞌma cubbinsara maaro afiꞌranno gede assa didandiitino. (Ibi. 10:1-4) Xaadooshshu dukkanira woꞌmanka woyite shiqinshanniti saadate kakkalo mannu ooso woꞌmunni woꞌma cubbinsara maaro afidhanno gede assitanno kakkalora caaleho.

11. Yesuusi isonooto kakkalo asse shiqishinohu kakkalote bayichi maati? (Ibiraawoota 10:5-7, 10)

¹¹ Kiristaanu magansiꞌranno gara. Yesuusi Yihowa iso uullara soyinohu heeshshosi mannu oosora kakkalo asse shiqishara ikkinota afino. (Mat. 20:28) Hakko daafira Yesuusi cuuami yannara Yihowa hasiꞌrannore assate isonooto shiqishino. (Yoh. 6:38; Gal. 1:4) Yesuusi lawishshunnihu kakkalote bayicho isonooto kakkalo asse shiqishino; kuni kakkalote bayichi Maganu guuta Beettosi mannu oosora kakkalo asse shiqishate maahoyye yaasi leellishannoho. Yesuusi ‘lendannikkita mitte kakkalo’ shiqishe Kiristoosa ammantannota loosunni leellishshannori baalu cubbinsara hegere maaro afidhanno faro fanino. (Ibiraawoota 10:5-7, 10 nabbawi.) Hanni aanchine xaadooshshu dukkani giddo noo coyi daafira laꞌno.

12. Xaadooshshu dukkani giddo nooha mitto mittonka bayicho ea dandaannohu ayeti?

¹² Yihudu manni magansiꞌranno gara. Xaadooshshu dukkaninna gedensoonni Yerusaalamete minnoonnihu qullaawu mini mittu gariho. Lamunku mini giddo dukkanu hoccinni bandoonnihu ‘Qullaawu Darginna Qullaawu Holgi’ no. (Ibi. 9:2-5; Ful. 26:31-33) Qullaawa Bayicho caabbicho worrannihu culkunni seekkinoonni uduunnichi, hixaana wiliishshinannihu  kakkalote bayichinna tima worranni xarapheessi no. Konne darga eꞌe qullaawa loosonsa loossanno gede fajjinoonniri ‘qeesimmate [kakkalote] soqqanshora bande buurroonnire’ callaati. (Kir. 3:3, 7, 10) Qullaawa Holge Yihowa hakko noota leellishannohu culkunni seekkinoonnihu gondooru taawooti no. (Ful. 25:21, 22) Hakkira Cubbo Agursiisate Barra dirunni mitte hige kakkalaanote biili calla eanno gede fajjinanni. (Lew. 16:2, 17) Isi diru kiiro umisi cubbonna Israeelete cubbo agursiisate saadate mundee haaꞌre hakkiira eanno. Yihowa gedensoonni qullaawu ayyaanisinni kuni xaadooshshu dukkani maa leellishannoro bande anfanni gede assino.—Ibi. 9:6-8.

13. Xaadooshshu dukkani giddo noohu qullaawu bayichinna qullaawu holgi Kiristaanaho maa riqiwanno?

¹³ Kiristaanu Magansiꞌranno gara. Kiristoosi rosaano giddonni boodu manni qullaawu ayyaaninni buuramanno; insara Yihowa ledo baxxino jaaloomi heeꞌrannonsa. Kuni 144,000 manni iima Yesuusi ledo kakkalaano ikke soqqamanno. (Aju. 1:6; 14:1) Xaadooshshu dukkanihu Qullaawu Bayichi insa Maganu ooso ikkite uullate aana heedhino gara riqiwanno. (Rom. 8:15-17) Xaadooshshu dukkanihu Qullaawu Holgi Yihowa heeꞌrannoha iima riqiwanno. Xaadooshshu dukkanira nooha qullaawa bayichonna qullaawa holge badannohu ‘dakkanu hocci’ Yesuusi uullate aana maalunni heeꞌrino heeshsho riqiwanno; Yesuusi konni maalinni heeꞌre qara Kakkalaanote Biilo ikke ayyaanaamittennihu qullaawu minira ea yaano iimira haꞌra didandaanno. Yesuusi manna ikke heeꞌrino heeshshosi mannu oosora kakkalo asse buuramino Kiristaani baalu iimira haꞌranno faro fanino. Insa iimi baꞌraaꞌra adhate maalunni heedhanno heeshshonsa agura hasiissannonsa. (Ibi. 10:19, 20; 1 Qor. 15:50) Yesuusi reyotenni kaihu gedensaanni ayyaanaamittennihu Qullaawa Holge eino; gedensoonni buuramino Kiristaani baaluno hakkiira eanno.

14. Ibiraawoota 9:12, 24-26 kultanno garinni Yihowa qixxeessinoti ayyaanaamittennihu qullaawu mini qixxaawo baalanta roortannohu ma garinniiti?

¹⁴ Tini, Yihowa Yesuusite wodote kakkalonna Yesuusi kakkalaanote biilo ikke soqqamanno gede asse qixxeessinoti xalala magansiꞌra qixxaawo baalantenni roortinota ikkitinota leellishshanno. Israeelenniri kakkalaanote biilo ikkite soqqantannori saadate mundee haadhe eꞌannohu Qullaawu Holgi mannu loosinoho; Yesuusi kayinni Yihowa albaanni leellara baalunkunni roore qullaawa ikkino bayicho “gordo eino.” Isi hakkiicho manna ikke heeꞌrinota guuta heeshshosi waaga Maganu albaanni shiqishino; tenne assinohu “cubbo hunate isonoo kakkalo asse” shiqisheeti. (Ibiraawoota 9:12, 24-26 nabbawi.) Yesuusi kakkalo cubbo woꞌmunni woꞌma huntannote taalle nookki kakkalooti. Kowiinni aanchine laꞌneemmonte gede hexxonke iimira haꞌra woy uullate aana heeꞌrano ikkituro, ninke baalunku ayyaanaamittennihu qullaawu mini giddo Yihowa magansiꞌra dandiineemmo.

15. Xaadooshshu dukkani hoowe giddo soqqantannori ayeooti?

¹⁵ Yihudu manni magansiꞌranno gara. Xaadooshshu dukkaniwa kakkalaano loosonsa loossannohu huxxinoonnihu halaꞌladu bayichi no. Camotenni loonsoonnihu jawu kakkalote bayichi noohu hakko hoowete giddoonniiti; qoleno hakkiicho kakkalaano qullaawa loosonsa loossara albaanni hayishshidhannohu camotenni loonsoonnihu waa worroonni uduunnichi no. (Ful. 30:17-20; 40:6-8) Gedensoonni minnoonnihu qullaawu minira kayinni kakkalaano ikkinokki manni uurre Magano magasiꞌrannoti gobbayidi hoowe no.

16. Mitte mittente ayyaanaamittennihu qullaawu mini hoowe giddo soqqantannori ayeooti?

¹⁶ Kiristaanu magansiꞌranno gara. Uullate aana gattinori Yesuusi roduuwi iima hadhe  isi ledo kakkalaano ikkite soqqantara albaanni uullate aana noohu ayyaanaamittennihu qullaawu minite giddoyidi hoowera ammanante soqqantanno. Xaadooshshu dukkanira jawu uduunnichira worroonni wayi baalunku Kiristaani amanyootunninna ayyaanaamittetenni xuru nookkire ikke heeꞌra hasiissannonsata leellishanno. Ikkina buurantinore Yesuusi roduuwa ammanante kaaꞌlitannori “lowo manni” [“lowo daga”] magansidhannohu hiikkootiyya? Soqqamaasinchu Yohaannisi insa ‘ayirradu barcimira albaanni uurrite’ noore laino. Kuni bayichi uullayidita gobbayidi hoowe leellishannoho; insa hakkiicho “hashshanna barra qullaambesi mine [Maganoho] soqqantanno.” (Aju. 7:9, 13-15) Yihowahu bayiru ayyaanaamittennihu qullaawu mini giddo isira soqqamate qoosso afiꞌra ninkera lowo ayirrinyeeti!

17. Yihowara hiittee kakkalo shiqishiꞌrate qoosso noonke?

¹⁷ Xaa yannara baalunku Kiristaanira yannansa, wolqansanna woxensa horoonsiꞌre Maganu Mangiste balaxisiise Yihowara kakkalo shiqishiꞌrate qoosso noonsa. Soqqamaasinchu Phaawuloosi Ibiraawootu Kiristaanira kulinonte gede ninkeno “woꞌma woyite galatu kakkalo Maganoho shiqinsho. Tini kakkalo suumenkenni, ‘Isi Mootichankeeti’ yine uyineemmote.” (Ibi. 13:15) Yihowara kakkalo shiqishiꞌrate dandiinummore baala assine iso magansiꞌrate qoossonke naandeemmota leellisha dandiineemmo.

18. Ibiraawoota 10:22-25 kultanno garinni horo deanna hawa hasiissannonkekki coyi maati?

¹⁸ Ibiraawoota 10:22-25 nabbawi. Soqqamaasinchu Phaawuloosi Ibiraawootu Kiristaanira borreessino sokka jeefora Yihowa magansiꞌrate assineemmoha dea hasiissannonkekkiha duucha coye kulino. Kuri giddo gamu huuccatto assiꞌrate, hexxonke daafira wolootaho kulate, gambooshshe haꞌratenna ‘Yihowa barri gamba yiinota qaanganni mimmitonke albinni roore jawaachishate.’ Yihowa sokkaasinchi Ajuujate maxaafi jeefora Yihowa magansiꞌra hasiissannota luphi asse kulanni “Maganoho kumbuuli!” yiino. (Aju. 19:10; 22:9) Yihowahu bayiru ayyaanaamittennihu qullaawu mini daafira ronsoommo halaalenna bayira Maganonke Yihowa magansiꞌrate afiꞌnoommo qoossonke dea dihasiissannonke!