XIINXALLOTE BIRXICHO 42
FAARSO 103 Cimeeyye Elto Ikkitino Labballooti
‘Elto Ikkitino Labballo’ Naaddinannita Leellishshe
“Gordo fuli woyite . . . labballono elto asse uyi.”—EFE. 4:8, NW.
GUULCHO HEDO
Songote soqqamaano, songote cimeeyyenna woradu aliidi laꞌꞌaano kaaꞌlitannonkehu hiittoonniitironna kuri ammanantino labballi loossanno looso naandeemmota leellisha dandiineemmo gara ronseemmo.
1. Yesuusi uyinonketi mite elto hiittenneeti?
YESUUSI gedeehu shaqqadu manchi dino. Isi uullate aana noo waro, maalale loosate wolqasi horoonsiꞌre manna kaaꞌlino. (Luq. 9:12-17) Isi heeshshosi ninkera sayise oye taalle nookki elto uyinonke. (Yoh. 15:13) Yesuusi reyotenni kaihu gedensaannino shaqqille leellisha diagurino. Isi qaale einonte gede, rosiisannonkehanna sheshifachishannokeha qullaawa ayyaanasi aannonke gede Yihowa huuccino. (Yoh. 14:16, 17, lekkaalliidi qaagiishsha; 16:13) Qoleno Yesuusi songote gambooshshi widoonni, uullate aana noo manna rosaano assineemmo gede qajeelsanni noonke.—Mat. 28:18-20.
2. Efesooni Sokka 4:7, 8 kulloonniri ‘elto ikkitino labballi’ giddo gamu ayeooti?
2 Hanni Yesuusi uyinonketa wole elto laꞌno. Soqqamaasinchu Phaawuloosi Yesuusi iimira haꞌrihu gedensaanni, ‘labballo elto asse’ uyinota borreessino. (Efesooni Sokka 4:7, 8 (NW) nabbawi. a) Phaawuloosi Yesuusi tenne elto uyinohu songo addi addi doogganni kaaꞌlitara ikkinota kulino. (Efe. 1:22, 23; 4:11-13) Xaa yannara kuri ‘elto ikkitino labballi’ giddo gamu, songote soqqamaanooti, songote cimeeyyeetinna woradu aliidi laꞌꞌaanooti. b Hige kuri labballi guuntete xeꞌne noonsa daafira soꞌro loossanno. (Yai. 3:2) Ikkirono Mootichinke Yesuusi Kiristoosi ninke kaaꞌlate insa horoonsiꞌranno; insa isi uyinonke eltooti.
3. Ninke baalunku ‘elto ikkitino labballi’ loossanno looso kaaꞌla dandiineemmo gara leellishanno lawishsha kuli.
3 Yesuusi kuri ‘elto ikkitino’ labballo uyinohu songo dhaabbanno gedeeti. (Efe. 4:12) Kayinni ninke baalunku insa konne lowo geya hasiisanno looso loossanno woyite kaaꞌla dandiineemmo. Lawishshaho, ninke giddo mitootu Magano magansiꞌnanni mine mineemmo. Wolootu kayinni konne looso loossannorira sagale qishshe woy wolere assite konni loosira kaaꞌlantanno. Hatteente gede ninke baalunku, songote soqqamaano, songote cimeeyyenna woradu aliidi laꞌꞌaano coyiꞌneemmorinninna assineemmorinni kaaꞌla dandiineemmo. Hanni insa diinaggaabbe loossanno loosi kaaꞌlannonkehu hiittoonniitiro hattono insanna kuri ‘elto ikkitino labballo’ uyinonkeha Yesuusa naandeemmota leellisha dandiineemmohu hiittoonniitiro laꞌno.
SONGOTE SOQQAMAANO ‘MANNA KAAꞌLANNORE’ ASSITANNO
4. Songote soqqamaano umi xibbi diro loossinohu mitu ‘kaaꞌlanno’ loosi hiikkonneeti?
4 Umi xibbi diro mito labballo songote soqqamaano assine shoommoonni. (1 Xim. 3:8) Phaawuloosi kulinoha ‘manna kaaꞌlanno’ looso loossinori insa ikkitukki digattino. (1 Qor. 12:28) Songote cimeeyye rosiisate loosonna roduuwa towaata illachishshanno gede, songote soqqamaano wole hasiisanno looso loosa kaaꞌlitinoha ikkara dandaanno. Lawishshaho, songote soqqamaano Qullaawa Borro galcha woy Qullaawa Borro galchate hasiisannore hira kaaꞌlitinoha ikkara dandaanno.
5. Songote soqqamaano xaa yannara loossannohu mitu kaaꞌlanno loosi hiikkonneeti?
5 Hanni songote soqqamaano songoꞌne giddo loossannoha mito kaaꞌlanno looso laꞌno. (1 Phe. 4:10) Insa songote woxe shallagganno gede woy soqqanshote qoqqowo qineessitanno gede, borrote kifilera soqqantanno gede, huurote kifilera loossanno gede, gambooshshunniwa soqqamaano ikkite loossanno gede woy Gambooshshu Addaraashe gatamara kaaꞌlitanno gede gaammansara dandiinanni. Songo qinaabbinota ikkitanno gede kuni baalunku loosi hasiisannoho. (1 Qor. 14:40) Qoleno mite songote soqqamaano Kiristaanu Heeshshonna Soqqansho gambooshshiwanna Sambatu barri gambooshshiwa lallawo shiqishshanno. Hakkiino sae mittu songote soqqamaanchi gaamote aliidi laꞌꞌaanchira kaaꞌlaancho ikkara dandaanno. Mito woyite, dandoo noonsari songote soqqamaano songote cimeeyye ledo roduuwa towaattara dandiitanno.
6. Diinaggaabbe loossannore songote soqqamaano naandeemmo gede assannonkehu mitu korkaati hiikkonneeti?
6 Songote soqqamaano loossanno loosi songo kaaꞌlannohu hiittoonniiti? Boliiviyaho heedhannoti Beberilii c yinanni rodoo togo yitino: “Songote soqqamaano kaaꞌlitannonke daafira, gambooshshunni woꞌma horo afiꞌreemma. Insa diinaggaabbe loossanno daafira faarso faarsa, gambooshshunniwa dawaro qola, lallawo macciishsha hattono viidiyonna misile lae rosa dandeemma. Insa gambooshshe daanno manna gawajjannorinni agartanno; qoleno gambooshshe daa dandiitinokkiri viidiyote widoonni macciishshitanno gede assitanno. Gambooshshu gedensaanni insa, albisa ikkite Gambooshshu Addaraashe fiitanno, fushshote saaxinera worroonni woxe gamba assitanno hattono hasiissanno borro afiꞌneemmo gede kaaꞌlitannonke. Tennera insa lowo geeshsha galaxxeemmansa!” Kolombiyaho heedhannoti Lesili yinanniti songote cimeessi minaama togo yitino: “Minaanniꞌya songote soqqamaano kaaꞌlitannosi daafira uyinannisiha addi addi looso loosa dandaanno. Insa kaaꞌla hooggoommesiro isira loosu batiꞌrannosi; songote soqqamaano diinaggaabbe uminsa fajjonni loossanno daafira lowo geeshsha galaxxeemmansa.” Kiꞌneno songote soqqamaano galata hasidhinanniti dihuluullissannote.—1 Xim. 3:13.
7. Songote soqqamaano naandeemmota leellisha dandiineemmohu hiittoonniiti? (Misileno lai.)
7 Songote soqqamaano wodaninkenni galanteemmoha ikkara dandaanno; ikkollana Qullaawu Maxaafi insa galanteemmota leellisha hasiissannonketano kulanno. (Qol. 3:15) Finlaandete heeꞌrannohu Kiristoofi yinanni cimeessi songote soqqamaano galatate maa assannoro kulanni togo yiino: “Galateemmonsata leellishshanno kaarde woy qummeeshsha borreesse soyeemmo; hattono mittu songote soqqamaanchi jawaachishinoe gara woy soqqanshosi naadeemmohu mayiraatiro bade kule galateemmo.” Niwu Kaledooniyaho heeꞌrannori Paaskaalinna Yaaeeli yinanni minaanninna minaama songote soqqamaanora bade kule huuccanno. Paaskaali togo yiino: “Hakko iso muli yanna kawa, Yihowa songote soqqamaano uyinonke daafira iso duucha hinge galanteemmo; hattono kaaꞌlannonsa gede huuccinanni heeꞌnoommo.” Yihowa togoo huuccatto macciishshanno; hattono songo woꞌma horo afidhanno.—2 Qor. 1:11.
SONGOTE CIMEEYYE NINKERA YITE ‘DAAFURTANNO’
8. Phaawuloosi umi xibbi diro heedhino cimeeyye diinaggaabbe loossanni ‘daafurtinota’ kulinohu mayiraati? (1 Teselonqe 5:12, 13)
8 Umi xibbi diro heedhino cimeeyye songo kaaꞌlate diinaggaabbe loossino. (1 Teselonqe 5:12, 13 nabbawi; 1 Xim. 5:17) Insa albisa ikkite gambooshshe massagganno; hattono songo kaaꞌlannoha mito coye murtanno. Qoleno songote giddo noo roduuwi ammanatenni kaajjite heedhanno gede, baxillunni amaaltannonsa. (1 Tes. 2:11, 12; 2 Xim. 4:2) Hige kuri labballi maatensara hasiisannore shiqishatenna ayyaanaamittensa kaajjishiꞌrateno diinaggaabbe loossanno.—1 Xim. 3:2, 4; Tit. 1:6-9.
9. Xaa yannara songote cimeeyye loossannohu mitu loosi hiikkonneeti?
9 Xaa yannara songote cimeeyyera loosu batiꞌrannonsa. Insa sabbakate looso loossanno. (2 Xim. 4:5) Songote cimeeyye albisa ikkite qanchoho soqqantanno, sabbakate looso qineessitanno hattono dancha gede sabbankeemmonna rosiinseemmo gede qajeelsitannonke. Qoleno insa maartannorenna mallaaddannokki daanyoota ikkite soqqantanno. Mittu Kiristaanchi jawa cubbo loosiro, isi Yihowa ledo noosi jaalooma haaroonsiꞌranno gede kaaꞌlate sharrantanno. Qoleno songo xuru nookkita ikkite heedhanno gede kaaꞌlitanno. (1 Qor. 5:12, 13; Gal. 6:1) Insahu qaru loosi Yihowa manna allaalate. (1 Phe. 5:1-3) Insa lallawo dancha gede qixxaabbe shiqishshanno, songote giddo nooha mitto mittonka seekke egennate sharrantanno hattono roduuwa towaattanno. Mite songote cimeeyye wole looso loossannotano agurranna, Gambooshshu Addaraashe minanna gatamara kaaꞌlitanno, qoqqowu gambooshshe qineessitanno hattono Hospitaalete Ledo Xaadissanno Komite giddonna Dhiwantinore Laꞌanno Gaamo giddo soqqantanno. Addanko cimeeyye ninke daafira diinaggaabbe loossanno!
10. Diinaggaabbe loossannore songote cimeeyye naandeemmo gede assannonkehu mitu korkaati hiikkonneeti?
10 Yihowa, allaalaasine dancha gede towaattannonketanna ninkeno ‘waajjinummokkinna mansummokki’ heeꞌneemmota balaxe kulino. (Erm. 23:4) Finilaandete heedhannoti Johaana yinanni rodoo amase buuto dhiwantu yannara tini halaale ikkase huwattino. Ise togo yitino: “Giddoꞌyata wolootaho hasaapha qarra ikkitinoeha ikkirono, hakkeya egennoommakkihu mittu cimeessi hasaaphanna cince macciishshinoe, ledoꞌya huuccatto assiꞌrino hattono Yihowa baxannoeta buuxisinoe. Isi hakka woyite ane jawaachishate mayinoro qaageemmakkiha ikkirono, wodanaaꞌmoomma gara kayinni dihaweemma. Yihowa hasiisse nooe yannara ane kaaꞌlara iso soyinota ammanoomma.” Songokkira noo cimeeyye ate kaaꞌlitinohehu hiittoonniiti?
11. Songote cimeeyye naandeemmota leellisha dandiineemmohu hiittoonniiti? (Misileno lai.)
11 Yihowa, ‘loossanno loosira’ songote cimeeyye lowo geeshsha galantammonsara hasiꞌranno. (1 Tes. 5:12, 13) Finlaandete heedhannoti Heniriita yinanni rodoo togo yitino: “Songote cimeeyye woloota uminsa fajjonni kaaꞌlitanno; hatto yaa kayinni insara wolootunni roore lowo yannanna wolqa noonsa yaa woy qarra ikkannori dinonsa yaa diꞌꞌikkino. Mito woyite insara, ‘Kiꞌne addinta worbuulle cimeeyyeeti; tenne affinara hasiꞌreemma’ yeemma.” Turkiyete d heedhannoti Siira yinanni rodoo togo yitino: “Songote cimeeyye loosonsa loosa agurtannokki gede jawaante hasiissannonsa. Hakko daafira insara galanteemmonsata leellishshanno kaarde borreessine soya, sagale koyisa woy ledonsa soqqansho fula dandiineemmo.” Diinaggaawe loosanno loosira galata hasiꞌratto cimeessi no? Hatto ikkiro, galatattota leellishatto faro hasiꞌri.—1 Qor. 16:18.
Shoomantino roduuwi loosonsa loosa agurtannokki gede kaaꞌlannore assa dandiitinanni (Gufo 7, 11, 15 lai)
WORADU ALIIDI LAꞌꞌAANO SONGO DHAABBANNO
12. Umi xibbi diro songo dhaawate qixxeessinoonni qixxaawo hiittenneeti? (1 Teselonqe 2:7, 8)
12 Yesuusi songote wolu garinni soqqantannore ‘elto ikkitino labballo’ uyino. Isi uyino biddishshi garinni, Yerusaalamete heedhanno cimeeyye Phaawuloosinna Barnabaasi aliidi laꞌꞌaano ikkite soqqantara sokkino. (Soq. 11:22) Mayira? Songote soqqamaanonna songote cimeeyye gede insano songo dhaabbanno gedeeti. (Soq. 15:40, 41) Kuri labballi uminsa horo agurtino; wole agurina woloota rosiisatenna jawaachishate yite heeshshonsa qarru giddo nafa tuggino.—1 Teselonqe 2:7, 8 nabbawi.
13. Woradu aliidi laꞌꞌaano loossannohu mitu loosi hiikkonneeti?
13 Woradu aliidi laꞌꞌaano woꞌmanka woyite bayichunni bayicho hadhanno. Mitu woradu aliidi laꞌꞌaano mitte songonni wole songo iillate lowo kiilomeetire hadhanno. Mittu woradu aliidi laꞌꞌaanchi lamalate kiiro, duucha lallawo shiqishanno, roduuwa towaatanno hattono suwisaanote, songote cimeeyyenna qanchu soqqansho gambooshshe massaganno. Isi duucha lallawo qixxaawanno hattono woradunna qoqqowu gambooshshe qineessanno. Qoleno, suwisaanote rosi mine rosiisanno, hakko woradira assinanniha baxxinoha suwisaanote gambooshshe qineessanno; hattono wole looso lawishshaho sinu biiro uyitannosiha ranke loosa hasiissanno looso loosanno.
14. Diinaggaabbe loossannore woradu aliidi laꞌꞌaano naandeemmo gede assannonkehu mitu korkaati hiikkonneeti?
14 Elto ikkitinori woradu aliidi laꞌꞌaano songo kaaꞌlitannohu hiittoonniiti? Woradu aliidi laꞌꞌaano towaanyo kaaꞌlitinosi gara kulanni Turkiyete heeꞌrannohu mittu rodii togo yiino: “Woradu aliidi laꞌꞌaanchi towaatinke kiiro tini ammanate roduuwaꞌya albinni roore kaaꞌleemmo gede assitannoe. Duucha woradu aliidi laꞌꞌaano ledo xaadoommo; ikkirono shiqe hasaawisate huxuxxi yeemmo gede woy loosu batiꞌrannosi yee hedeemmo gede assinoehu mittuno dino.” Aleenni kulliti Johaana mittu woradu aliidi laꞌꞌaanchi ledo soqqansho fultino; kayinni insa mitto manchono mine diafino. Ise togo yitino: “Ikkirono hakko barrita dihaweemma. Lamenti roduuwiꞌya wole qooxeessa haꞌrino daafira insa lowo geya qalli yoomma. Woradu aliidi laꞌꞌaanchi Yihowara soqqammanni mimmituwiinni xeertiꞌne heeꞌneemmohu, yannate geeshsha calla ikkinotanna haaro alamera hegerera mitteenni heeꞌneemmota huwateemma gede kaaꞌlinoe.” Ninke giddo batinyu woradu aliidi laꞌꞌaano qaangeemmo woyite assitinonkere lowo geeshsha naandeemmo.—Soq. 20:37–21:1.
15. (a) Sayikki Yohaannisi 5-8 kultanno garinni, woradu aliidi laꞌꞌaano naandeemmota leellisha dandiineemmohu hiittoonniiti? (Misileno lai.) (b) Shoomantino labballi minaamuwira hendeemmota leellisha hasiissannonkehu mayiraati? Tenne assa dandiineemmohu hiittoonniiti? (“ Minaamuwansa Qaagge” yitanno saaxine lai.)
15 Soqqamaasinchu Yohaannisi, Gayiyoosi songo towaattara dagganno roduuwa wosinsiꞌranno gedenna ‘Maganu hagiidhanno garinni doogonsara kaaꞌlannonsa’ gede kulino. (3 Yohaannisi 5-8 nabbawi.) Ninkeno tenne assa dandiineemmoti mitte doogo woradu aliidi laꞌꞌaano sagalete koyisate. Wole doogo qole woradu aliidi laꞌꞌaanchi towaanyo yannara qanchu soqqansho haꞌrate. Aleenni kulliti Lesili galatu nooseta wole dooggannino leellishshino. Ise togo yitino: “Yihowa hasiisannonsare oye towaatannonsa gede huucceemma. Aninna minaanniꞌya insara borrote sokka borreessine towaanyonsa mageeshshi geeshsha kaaꞌlitinonkero kulleemmonsa.” Woradu aliidi laꞌꞌaano ninkente gedeere ikkitinota deꞌnoonke. Mito woyite insa dhibbu waadannonsa, yaaddo amaddannonsa, wole agurina hexxo mudhitanno. Coyidhinannihu danchu qaali woy uyitinanninsahu shiimu coyi, Yihowa kaaꞌlannonsa gede huuccidhino huuccattora dawaro ikkara dandaanno!—Law. 12:25.
‘ELTO IKKITINO LABBALLI’ HASIISSANNONKE
16. Lawishsha 3:27 kultanno garinni, labballu roduuwi insaneeto hiikkuri xaꞌmuwa xaꞌmitara dandiitanno?
16 Alamete doyichora ‘elto ikkitinori’ lowo labballi hasiissanno. Ati cuuamootto rodootiro, woloota ‘kaaꞌla dandaatto’? (Lawishsha 3:27 nabbawi.) Songote soqqamaancho ikkate mixo fushshiꞌrate maahoyye yaatto? Songote soqqamaancho ikkoottoha ikkiro, songote cimeessa e ikkate mixo fushshiꞌra dandaatto? Maganu Mangiste Sawaakooti Rosi Minira forme wonshate heeshshokki gara biddi assiꞌra dandaatto? Kuni rosu mini albinni roore Yesuusi hajajinohere wonshate qixxaawoottoha ikkatto gede kaaꞌlannohe. Ikkado diꞌꞌikkoommo yite hedattoha ikkiro, kaaꞌlannohe gede Yihowa huucciꞌri. Uyinannihe looso umo fushshatto gede kaaꞌlannoheha qullaawa ayyaana afiꞌrate, Yihowa huucciꞌri.—Luq. 11:13; Soq. 20:28.
17. Mootenke Yesuusi ‘elto ikkitino labballo’ shoomasi maa leellishshanno?
17 Yesuusi ‘elto ikkitino labballo’ shoomasi, tenne goofimarchu barruwa giddo massaganni noonketa leellishshanno. (Mat. 28:20) Mootenke baxillaancho, shaqqadohonna hasiisannonkere afinoho; hattono isi towaattannonkere labballo roduuwa uyinonke; togoo Moote afiꞌranke dihagiirsiissannonke? Kuri diinaggaabbe loossanno labballo naaddinannita leellishshinanni faro hasidhe. Qoleno “dancha eltonna woꞌmu atooti baalu” Buicho ikkinoha Yihowa galata deꞌnoonke.—Yai. 1:17.
FAARSO 99 Kiirre Tunqannikki Roduuwa
a Efesooni Sokka 4:7, 8 NW: “Qoleno mittu mittunkura elto uyinoonninke; tenne elto adhinoommohu Kiristoosi mulla beehinonke garinniiti. Korkaatuno togo yaanno: Gordo fuli woyite, qafado adhi; labballono elto asse uyi.”
b Aliidi Bisi miilla ikkite soqqantanno cimeeyye, Aliidi Bisi kaaꞌlaano, Sinu Biiro Komite miillanna wolu gari looso loossanno roduuwino ‘elto ikkitino labballooti.’
c Mite suꞌmuwa soorrinoonni.
d Alba Turke yinanni.
e Songote soqqamaancho woy songote cimeessa ikkite soqqamate maa assa dandaattoro afate, Bocaasa 2024 Agarooshshu Shaera fulinoha, “Labballo Roduuwa—Songote Soqqamaano Ikkate Sharrantinanni Heedhinoonni?” yaannohanna “Labballo Roduuwa—Songote Cimeeyye Ikkitine Soqqamate Sharrantinanni Heedhinoonni?” yaanno birxicho lai.
