XIINXALLOTE BIRXICHO 43
FAARSO 90 Mimmito Jawaachishshe
Huluullo Qeela Dandiinanni Gara
“Baalanka coye fonqoltine laꞌe.”—1 TES. 5:21.
GUULCHO HEDO
Yihowara soqqamate doodhinoommo doorshi gara ikkinota huluullammummoro maa assa dandiineemmoro xiinxallineemmo.
1-2. (a) Mite Yihowa soqqamaano mayite huluullantara dandiitanno? (b) Konni birxichira maa xiinxallineemmo?
AJANO akkalano ninke baalanka mito woyite huluullisannonke a coyi heeꞌranno. Hanni Yihowa addinta isi daafira hedannoronna teꞌee huluullaminoha mitto wedellicha hendo. Isi cuuamate hobbi ruxxi yaannoha ikkara dandaanno. Woy wedellichu heeꞌre maalaamittete looso agure Maganu Gashshoote balaxisiisa doodhinoha mitto rodoo hendo. Isi maatesira hasiisanno woxi ajanni haꞌrita doodhino doorshi garahoronna teꞌee huluullama hanafi. Qoleno hanni dhuku anje amaddinoseta mitte jawa rodoo hendo. Ise alba assitanno geeshshire assa dandiitinokki daafira hexxo mudhitannoha ikkara dandaanno. Aante noo gedee xaꞌmuwa ateneeto xaꞌmite egennootto? ‘Isi addinta Yihowa ane afinoe? Isira soqqamate yee assoommori waaga afiꞌrino? Xaano isi ane horoonsiꞌrannoe?’
2 Togoo xaꞌmuwara dawaro afiꞌra hoongummoro ammananke shoshshoggitaranna Yihowara soqqama agurrammora dandiineemmo. Konni birxichira aane noo coyi daafira huluullammeemmoha ikkiro Qullaawu Maxaafiha xintu seera illachisha kaaꞌlitannonkehu hiittoonniitiro ronseemmo. (1) Yihowa ninke daafira hedannoronna teꞌee (2) alba doodhinoommo doorshi gara ikkasinna teꞌee hattono (3) Yihowa xaano horoonsiꞌrannonkeronna teꞌee.
HULUULLO QEEꞌLATE KAAꞌLANNONKERI MAATI?
3. Huluullo qeeꞌlate kaaꞌlitannonketi mitte doogo hiittenneeti?
3 Huluullo qeeꞌla dandiineemmoti mitte doogo xaꞌmuwankera dawaro afiꞌrate Maganu Qaale xiinxallate. Hatto assineemmoha ikkiro jawaante afiꞌneemmo, ayyaanaamittetenni lophineemmo hattono ‘ammanatenni kaajjine uurrate’ qixxaamboommore ikkineemmo.—1 Qor. 16:13.
4. ‘Baalanka coye fonqolle laꞌꞌa’ dandiineemmohu hiittoonniiti? (1 Teselonqe 5:21)
4 Umi Teselonqe 5:21 nabbawi. Qullaawu Maxaafi ‘baalanka coye fonqolle laꞌneemmo’ gede jawaachishannonketa qaango. Tenne assa dandiineemmohu hiittoonniiti? Ammanneemmo coyi garahoronna teꞌee Qullaawu Maxaafi rosi ledo heewisiinse buuxiꞌra dandiineemmo. Hanni lawishshaho Maganu albaanni waagu noosironna teꞌee huluullamino wedellichi daafira hendo. Isi tenne huluullosi sammi yee agura hasiissannosi? Dihasiissannosi. Isi tenne daafira Yihowa hedo afate ‘baalanka coye fonqole laꞌꞌa’ hasiissannosi.
5. Yihowa xaꞌmuwankera dawaro qolanna ‘macciishsha’ dandiineemmohu hiittoonniiti?
5 Qullaawa Maxaafa nabbambeemmo woyite Yihowa hasaawisannanke ‘macciishshinanni’ heeꞌnoommohu gedeeti. Kayinni xaꞌmuwankera dawaro afiꞌrate Qullaawa Maxaafa nabbawatenni sainore assa hasiissannonke. Qullaawa Maxaafa nabbambeemmo woyite, ninkera huluullinonke coyi ledo xaadooshshe afiꞌrino gafa nabbawa hasiissannonke. Tenne assate Yihowa dirijjite qixxeessitinoha xiinxallate kaaꞌlanno uduunne horoonsiꞌne xiinxalla dandiineemmo. (Law. 2:3-6) Yihowa xiinxallineemmo woyite kaaꞌlannonke gedenna huluullinonke coyi daafira isi hedo maatiro anfeemmo gede kaaꞌlankera huuccatto assiꞌra dandiineemmo. Hakkiinni ninke hajo ledo sumuu yaannoha Qullaawu Maxaafiha xintu seeranna kaaꞌlitanno hedo afiꞌrate sharrama dandiineemmo. Qoleno ninkera iillinonke gedee coyi iillinonsahu Qullaawu Maxaafi giddo kulloonni manni xagge xiinxalla kaaꞌlitankera dandiitanno.
6. Gambooshshu huluullo qeeꞌlineemmo gede kaaꞌlannonkehu hiittoonniiti?
6 Gambooshshunniwano Yihowa hasaawisannanke ‘macciishshineemmo.’ Gambooshshe ganyine haꞌneemmoha ikkiro, lallawo shiqinshanni woyite woy roduuwu dawaro qoltanno woyite huluullo qeeꞌlate hasiisse noonke hedo macciishshinammora dandiineemmo. (Law. 27:17) Hanni xaano mite huluullo qeeꞌla dandiineemmohu hiittoonniitiro laꞌno.
YIHOWA ATE DAAFIRA HEDANNOTA HULUULLAMATTO WOYITE
7. Mitu manni mayyee xaꞌmara dandaanno?
7 ‘Yihowa addinta ane afinoe?’ yite hedde egennootto? Ani ditidhoommoho yite hedattoha ikkiro, kalqete Kalaqaanchi ledo jaala ikka dandiinannikkire woy ikkannokkire lawahera dandaanno. Moote Daawitino hatto yee hedinoha ikkara dandaanno. Isi, Yihowa mannu ooso daafira nafa hedannota dhagge assiꞌre togo yiino: “Kaaliiqaꞌya, kageeshshi geeshsha mitiiꞌmattosihu isi mannu maati? Kageeshshi geeshsha qarramattosihu isi mannu maati?” (Far. 144:3) Tenne xaꞌmora dawaro afiꞌra dandaattohu mamiinniiti?
8. Umi Saamueeli 16:6, 7, 10-12 kultanno garinni Yihowa laꞌꞌanno coyi maati?
8 Qullaawu Maxaafi Yihowa mannu woffi asse agurino manna laꞌꞌannota kulanno. Lawishshaho Yihowa, Saamueeli Isseyi minira haꞌre Isseyi ooso giddonni albillitte Israeelete Moote ikkannoha buuranno gede hajajinosi. Isseyi sette oososi giddonni lamalu Saamueeliwa dagganno gede woshshino; maaꞌne beettosi Daawiti kayinni diwoshshino. b Yihowa doorinohu kayinni Daawitiiti. (1 Saamueeli 16:6, 7, 10-12 nabbawi.) Yihowa Daawitita giddoyidi ayimma yaano kuni wedellichi ayyaanaamittete coye lowo geeshsha naadannota afino.
9. Yihowa ate daafira hedannota addaxxattohu mayiraati? (Misileno lai.)
9 Hanni Yihowa ate afinoheta leellishino gara hedi. Isi atera hasiissannohe amaale bade kulinohe. (Far. 32:8) Isi ate seekke afa hoogoommero tenne assannoni? (Far. 139:1) Yihowa aannohe amaale loosu aana hosiisittoronna tini amaale kaaꞌlitannohe gara huwatittoro isi ate daafira hedannota dihuluullamatto. (1 Dud. 28:9; Soq. 17:26, 27) Yihowa isira soqqamate assattore baala laꞌꞌanno. Isi dancha akattakkino laꞌꞌanno hattono ate jaala ikka hasiꞌranno. (Erm. 17:10) Atino jaalasi ikkate maahoyye yiittoro isi lowo geeshsha hagiidhanno.—1 Yoh. 4:19.
“Isiwa gamba yiittoro, isino atewa gamba yaannohe.”—1 Dud. 28:9 (Gufo 9 lai) c
ALBA DOODHOOTTO DOORSHI GARA IKKASINNA TEꞌEE HULUULLAMATTO WOYITE
10. Alba doodhinoommo doorshi daafira hendeemmo woyite ninkeneeto mayine xaꞌminammora dandiineemmo?
10 Yannate gedensoonni mitu manni alba doodhino doorshi gara ikkasinna teꞌee huluullamara dandaanno. Insa Yihowara albinni roore soqqamate yite lowo woxe baantanninsa looso woy daddalonsa agurtinoha ikkara dandaanno. Insa tenne assa doodhitinohu lowo diri albaanni ikkara dandaanno. Qoleno insa maalaamittete looso loosanni xa qawaaxxaame heeshsho heeꞌranni noohu affino manni heeꞌrara dandaanno. Hakko daafira insa togo yite heddara dandiitanno: ‘Yihowara soqqamate assoommori waaga afiꞌrinonso woluri gate bainoeri no?’
11. Faarso 73te borreessaanchira qarra ikkinosiri maati?
11 Ateno togoo hedo waaddannoheha ikkiro Faarso 73te borreessaanchi xagge xiinxalli. Isi Yihowara soqqantannokkiri dhiwantannokkita hattono qawaaxxaamenna qarru nookki heeshsho heedhannota laino. (Far. 73:3-5, 12) Isi insa qawaaxxidhe heedhannota laiti Yihowara soqqamate assinori waaga afiꞌrinokkihu gede asse hedino. Iso tini gara ikkitinokki hedo ‘barra woꞌma shetissinosi.’ (Far. 73:13, 14) Isi tenne gara ikkitinokki hedo qeeꞌlinohu hiittoonniiti?
12. Faarso 73:16-18 kultanno garinni faarsaanchu gara ikkitinokki hedo qeeꞌla dandiinohu hiittoonniiti?
12 Faarso 73:16-18 nabbawi. Faarsaanchu keere afiꞌnanniwa Yihowaha qullaawa mine haꞌrino. Hakkiicho isi garunni heda dandaanno. Isi mitu manni heeꞌranno heeshsho qawaaxxaame labburono insara albillittete hexxo noonsakkita huwatino. Isi tenne huwatino daafira ayyaanaamittete coye balaxisiisa, baalanka rooranno doorsha ikkitinota wodanchino; tini qolte giddoyidi keere afiꞌranno gede assitinosi. Hakko daafira isi Yihowara soqqamanni heeꞌrate murciꞌrino.—Far. 73:23-28.
13. Alba doodhootto doorshi gara ikkasinna teꞌee huluullamittoro giddoyidi keere afiꞌra dandaattohu hiittoonniiti? (Misileno lai.)
13 Maganu Qaali atino giddoyidi keere afiꞌratto gede kaaꞌlannohe. Hiittoonni? Xa noohe coye lawishshaho, Yihowara soqqante afiꞌratto atoote Yihowara soqqantannokkiri tenne alamewiinni afidhanno coyi ledo heewisiisi. Insara albillittete hexxo noonsakki daafira woꞌmunni woꞌma illachishshannohu xa heedhannota qawaaxxaame heeshsho callaati. Kayinni Yihowa atera hedoottohunni aleenni lowo atoote aahera qaale eino. (Far. 145:16) Hanni tenneno hedi: Yihowara soqqama doodha hoongoommoro xa heeshshonke hiittoota ikkitannoro afa dandiineemmo? Huluullammeemmokkihu mittu coyi no: Mitto coye doodhineemmohu Maganonna manna banxeemmo daafira ikkiro, horontanni dancha coye dihoongeemmo.
Albillitte afiꞌrattoha Yihowa qaale eino atoote hedi (Gufo 13 lai) d
YIHOWA HOROONSIꞌRANNONKETA HULUULLAMMEEMMO WOYITE
14. Mite Yihowa soqqamaanora qarra ikkannonsari maati? Insaneeto mayite xaꞌmitannoha ikkara dandaanno?
14 Mite Yihowa soqqamaano dhibbu, geedhimma woy bisu xeꞌne waaddannonsa. Tini, ditidhinoommoreeti yite heddanno gede assitansara dandiitanno. Insa ‘Yihowa xaano ane horoonsiꞌrannoe?’ yite insaneeto xaꞌmitannoha ikkara dandaanno.
15. Faarso 71te borreessaanchi maa addaxxino?
15 Faarso 71te borreessaanchono togoo hedo yaachishshinosi. Isi “wolqa gooffannoe waro agurtootie” yee huucciꞌrino. (Far. 71:9, 18) Ikkirono faarsaanchu Yihowara ammaname soqqamiro Yihowa massagannositanna kaaꞌlannosita addaxxino. Faarsaanchu dhuku anje noonsari Yihowara soqqamate dandiiture baala assitannoha ikkiro isi insanni hagiidhannota huwatino.—Far. 37:23-25.
16. Geerra roduuwa Yihowa horoonsiꞌrannonsahu hiittoonniiti? (Faarso 92:12-15)
16 Geerra roduuwa, kiꞌneneeto Yihowa laꞌꞌannoꞌne garinni laꞌe. Dhuku anje waaddannoꞌneha ikkiro nafa Yihowa ayyaanaamittetenni lattinanni gede kaaꞌlannoꞌne. (Faarso 92:12-15 nabbawi.) Assa dandiitinannikkire ikkikkinni assa dandiitinannire illachishshe. Lawishshaho kaajju lawishshiꞌnenna wolootaho heddinannita leellishaꞌne insa jawaachishshara dandiitanno. Lowo diro Yihowa kaaꞌlinoꞌne garanna isi uyino hexxora nooꞌnete kaajjado ammana daafira kultinansara dandiitinanni. Qoleno wolootu daafira huuccitinanni huuccatto insa lowo geeshsha kaaꞌlitannonsata deꞌinoonte. (1 Phe. 3:12) Heeꞌnoommo gari ikkihano ikkiro ninke baalunku Yihowaranna wolootaho uyineemmori no.
17. Ninkeneeto wolootu ledo heewisiisa qoropha hasiissannonkehu mayiraati?
17 Yihowara hasiꞌrootto geeshsha soqqama dandoottokki daafira dadilloottoha ikkiro, Yihowa isira soqqamate assattori ikki geeshshireno ikkiro isi tenne lowo geeshsha naadannota addaxxa dandaatto. Ati assattore wolootu assitannori ledo heewisiisattoha ikkara dandaanno. Togo assa qorophi! Mayira? Korkaatuno Yihowa ninke assineemmore wolootu assitannori ledo diheewisiisanno. (Gal. 6:4) Lawishshaho Maariyaami lowo woxita kaajja shitto Yesuusira uyitino. (Yoh. 12:3-5) Mitte buxicho gunnitte kayinni shiima waaga afidhinota lame saante qullaawu minira fushshaate assite uyitino. (Luq. 21:1-4) Ikkirono Yesuusi lamenti mancho assinori ammana noonsata leellishannota coyiꞌrino. Assattori atera shiimare lawiherono Yihowa iso magansiꞌratenna iso baxatto daafira assattoha aye coyeno lowo geeshsha naadanno.
18. Huluullo qeeꞌlineemmo gede kaaꞌlannonkeri maati? (“ Yihowa Qaali Huluullo Qeeꞌlatto Gede Kaaꞌlannohe” yitanno saaxineno lai.)
18 Ninke baalunku huluullammeemmo woyiti no. Kayinni xaa geeshsha xiinxallinummonte gede, halaalunnihunna addaxxinannihu Maganu Qaali huluullo qeeꞌlineemmo gede kaaꞌlannonke. Hakko daafira huluullisannohe coyira dawaro afiꞌrate dandiittore baala assi. Hatto assittoro huluullisannohe coyi diheeꞌranno. Yihowa ninke mitto mittonka afinonke. Isira soqqamate assattore naadanno hattono baꞌraasahera qaale eino. Yihowa baalanta ammanantino soqqamaanosi baxannotanna insa daafira hedannota addaxxa dandaatto.
FAARSO 111 Hagiidhineemmo Gede Assannonkere
a HARANCHO XAWISHSHA: Konni birxichira, Yihowara muxxe diꞌꞌikkinoommo woy konni albaanni doodhinoommo doorshi digaraho yine hendeemmo gede assitannonke huluullo daafira ronseemmo. Tini huluullo Yihowanna isi uyino hexxo ammana hoogatenni daggannota diꞌꞌikkitino.
b Qullaawu Maxaafi Yihowa Daawiti doori yannara isira meꞌꞌe diro ikkannoro dikulanno; isi hatte yannara wedellicha ikkikki digatino.—Wocawaaro 1, 2011 Agarooshshu Shae (Amaaru Afoo) qoola 29 gufo 2 lai.
