XIINXALLOTE BIRXICHO 41
FAARSO 13 Kiristoosi Lawishshankeeti
Yesuusi Uullate Aana Heeꞌrinohu Jeefonnihu 40 Barri Giddo Assinorinni Ronseemmore
“Shoyilloo barra woꞌma insara leellanni Maganu Gashshooti daafira kulinonsa.”—SOQ. 1:3.
GUULCHO HEDO
Yesuusi uullate aana heeꞌrinohu jeefonnihu 40 barri giddo assinore xiinxalline isi lawishsha harunsa dandiineemmo gara ronseemmo.
1-2. Lame Yesuusi rosaano Eemahuusi hadhanna ikkinori maati?
YANNA Niisaani 16, 33 MD. Yesuusi rosaano lowo geeshsha dadillitino hattono waajjitino. Insa giddonni lamu Yerusaalamete fulte, 11 kiilo meetire xeertiꞌre nooha Eemahuusi yinanni qacha hadhanni no. Insa harunsitanni nooha Yesuusa shinoonni daafira lowo geeshsha xissiisidhino. Insa Buuraminohu lowore assanno yite hexxitino; ikkirono isi reyino. Kayinni hendoonnikki coyi ikkino.
2 Insa egentinokkihu mittu doogaanchi ledonsa haꞌra hanafi. Rosaano isira, Yesuusira iillinosirinni dadillitino gara kultusi. Hakkiinni kuni doogaanchi insa horonta habbannokki coye kulinsa. Isi, “Musenna masaalaano baalatenni kayise” Buuraminohu qarra adhanna reya hasiissannosihu mayiraatiro xawise kulinsa. Eemahuusi iillituti ledonsa haꞌranni noo manchi reyotenni kainoha Yesuusa ikkinota huwattu! Insa Yesuusi reyotenni kainota affuti mageeshshi geeshsha hagiidhitinoro heda dandiineemmo!—Luq. 24:13-35.
3-4. Yesuusi rosaano hiitto ikkitino? Konni birxichira maa xiinxallineemmo? (Soqqamaasinete Looso 1:3)
3 Yesuusi uullate aana heeꞌrinohu jeefonnihu 40 barri giddo rosaanosira duucha hige leellino. (Soqqamaasinete Looso 1:3 nabbawi.) Hatte yannara, lowo geeshsha dadillitenna waajjite noori Yesuusi rosaano baasa hagiidhitino; hattono mitte giddorenna worbuulle Maganu Gashshootire sabbakkannorenna rosiissannore ikkitino. a
4 Yesuusi tenne yannara assinore xiinxalline horo afiꞌra dandiineemmo. Konni birxichira, Yesuusi tenne yannasi horoonsiꞌre (1) rosaanosi jawaachishino gara, (2) Qullaawa Borro seekkite huwattanno gede kaaꞌlinonsa garanna (3) albillitte loossanno loosira qajeelsinonsa gara ronseemmo. Yesuusi assinoha konne mitto mittonka coye xiinxallineemmo woyite isi lawishsha harunsa dandiineemmo gara laꞌneemmo.
WOLOOTA JAWAACHISHSHE
5. Yesuusi rosaanora jawaante hasiissinonsahu mayiraati?
5 Yesuusi rosaanora jawaante hasiissinonsa. Mayira? Mitootu iso harunsate yite minensa, maatensanna loosonsa agurtino. (Mat. 19:27) Woloota qole, Yesuusi rosaano ikkitino daafira miincoonninsa. (Yoh. 9:22) Insa konni garinni uminsa horo agurtinohu Yesuusi daanno yine qaale eꞌnoonniha Buuraminoha ikkinota ammantino daafiraati. (Mat. 16:16) Kayinni Yesuusa shinita insa lowo geeshsha dadillitino hattono hexxo mudhitino.
6. Yesuusi reyotenni kaihu gedensaanni ma assino?
6 Yesuusi reyihu gedensaanni rosaanosi dadillansa garankolla; tini ammana ajjinonsata leellishshannota diꞌꞌikkitino. Yesuusi tenne afinoti dihuluullissannote. Hakko daafira isi reyotenni kai barranni jaallasi jawaachisha hanafino. Lawishshaho Yesuusi iso waammoonniwa heedhe wiꞌlitanni noote Megidelitte Maariyaamira leellino. (Yoh. 20:11, 16) Qoleno hanafote kullirira lame rosaanosira leellino. Hakkiinni saeno soqqamaasinchu Pheexiroosira leellino. (Luq. 24:34) Yesuusi lawishshinni maa ronseemmo? Hanni isi umo Megidelitte Maariyaamira leelli woyite ikkinore laꞌno.
7. Yohaannisi 20:11-16 kultanno garinni, Yesuusi Niisaani 16nni soodo Maariyaami ma assitanna laino? Tini isi ma assanno gede kakkayissinosi? (Misileno lai.)
7 Yohaannisi 20:11-16 nabbawi. Niisaani 16nni soodo boodu ammanamino meenti Yesuusi waammawa haꞌrino. (Luq. 24:1, 10) Hanni insa giddo mittete yaano Megidelitte Maariyaamira mayi tuncu yiinosero laꞌno. Maariyaami waammanniwa martanno woyite giddo noori dino. Ise doddanni marte tenne Pheexiroosiranna Yohaannisira kulteenna insa doddanni waammanniwa martu; iseno insa ledo hadhu. Waammate giddo noori nookkita affuti Pheexiroosinna Yohaannisi agurte qaera hadhu. Maariyaami kayinni dihadhino. Ise wiꞌlitanni hakko gattino. Ise Yesuusi laꞌꞌanni noosete diaffino. Isi, tini ammanantino mancho hindiiddo giggishshidhanna laino daafira sheshifachishasera hasiꞌrino. Hakko daafira isi Maariyaamira leellino hattono lowo geeshsha jawaachishannosere assino. Yesuusi ise hasaawisino; hattono reyotenni kainota roduuwisira kultanno gede asse lowo geeshsha hasiisanno looso uyinose.—Yoh. 20:17, 18.
Ammanate roduuwinkera iillanni noonsa qarra afate woꞌnaalle hattono insa jawaachishate dandiinummore baala assine Yesuusi lawishsha harunsino (Gufo 7 lai)
8. Yesuusi lawishsha harunsa dandiineemmohu hiittoonniiti?
8 Yesuusi lawishsha harunsa dandiineemmohu hiittoonniiti? Yesuusi lawishsha harunsine ammanate roduuwinke qarra afate sharrammeemmohanna shaqqillunni hasaawinseemmonsaha ikkiro insa Yihowara soqqama agurtannokki gede kaaꞌla dandiineemmo. Hanni Jooseliini yinanni rodoo woꞌnaalsha laꞌno; isera rodoose danotenni reyitino. Ise, “Lowo agana baasa xissiisiꞌroomma” yitino. Kayinni mittu minaanninna minaama mininsara koyisinose; ise hasaaphitanna shaqqillunni macciishshinose hattono Yihowara muxxe ikkitinota buuxisinose. Jooseliini togo yitino: “Dambalu shafanno baari giddo xiꞌmote tunsichira noommahu gede asse hedoomma; kayinni Yihowa kuri minaanninna minaama widoonni hakkiinni gatise fushshinoe. Insa galagale Yihowara soqqamanni heeꞌrate hasatto heedhannoe gede kaaꞌlitinoe.” Giddonsata fushshite hasaaphitanno woyite seekkine macciishshinenna shaqqillunni hasaawinse ninkeno woloota kaaꞌla dandiineemmo. Tini insa Yihowara soqqantanni heeꞌrate jawaante afidhanno gede kaaꞌlitannonsa.—Rom. 12:15.
WOLOOTU MAGANU QAALE HUWATTANNO GEDE KAAꞌLENSA
9. Yesuusi rosaanora qarra ikkinonsari maati? Yesuusi kaaꞌlinonsahu hiittoonniiti?
9 Yesuusi rosaano Maganu Qaale ammante adhitino; hattono loosu aana hosiisate dandiiture baala assitino. (Yoh. 17:6) Ikkirono insa Yesuusa jaddo loosinohu gede haqqu aana sunte shinoonni daafira gurchaabbino. Yesuusi harunsaanosira ammana noonsatanna Yihowa baxxannota afino; ikkirono Qullaawa Borro albinni roore seekkite afa hasiissannonsata wodanchino. (Luq. 9:44, 45; Yoh. 20:9) Hakko daafira isi Qullaawa Borro seekkite huwattanno gede kaaꞌlinonsa. Hanni isi Eemahuusi hadhanni noorira lame rosaanosira leelli woyite tenne assinohu hiittoonniitiro laꞌno.
10. Yesuusi rosaanosira isi addinta Buuraminoha ikkinota buuxisinonsahu hiittoonniiti? (Luqaasi 24:18-27)
10 Luqaasi 24:18-27 nabbawi. Yesuusi kuri lamente rosaanora ayimmasi bayichonkonni kulinokkita wodanchi. Hatteentenni isi xaꞌmo xaꞌminonsa. Mayira? Isi surrensaranna wodaninsara noore fushshite coyidhara hasiꞌrinoha ikkara dandaanno. Insano fushshite coyidhino. Insa isira, Yesuusi Israeele kade gashshinohu Roomu gashshooti giddonni fushshanno yite hexxitinota kultinosi. Insa yaaddonsa xawisse kultuhu gedensaanni, Yesuusi batinye masaalo woꞌmitino gara huwattanno gede insa kaaꞌlate Qullaawa Borro horoonsiꞌrino. b Isi hatte hawarronni wole rosaanosi ledo xaade konne halaale huwattanno gede assinonsa. (Luq. 24:33-48) Ninke tenne xaggenni maa ronseemmo?
11-12. (a) Yesuusi Qullaawu Maxaafi halaale rosiisino doogonni ninke maa ronseemmo? (Misillano lai.) (b) Qullaawu Maxaafi rosiisaanchisi Norteyi kaaꞌlinosihu hiittoonniiti?
11 Yesuusi lawishsha harunsa dandiineemmohu hiittoonniiti? Umihunni, Qullaawa Maxaafa rosiissinanni woyite, rosaanoꞌne wodaninsanna surrensa giddo noore fushshite coyidhanno gede assitanno xaꞌmuwa hayyotenni xaꞌme. (Law. 20:5) Giddonsata affinihu gedensaanni, loosu aana hosiisa dandiitanno qummeeshsha afidhanno gara leellishshensa. Maa assa hasiissannonsaro kiꞌne kultinoonte. Hatteentenni Qullaawa Borro seekkite huwattanno gedenna Qullaawu Maxaafiha xintu seera loosu aana hosiissanno gara wodanchitanno gede kaaꞌlensa. Hanni Gaanaho heeꞌrannohu Norteyi yinanni rodii woꞌnaalsha laꞌno.
12 Norteyi Qullaawa Maxaafa xiinxalla hanafinohu 16 dirihu heeꞌreeti. Ikkirono mulenni maatesi gibbinosi. Isi kaajje uurranno gede kaaꞌlinosiri maati? Hakkuyira albaanni Qullaawu Maxaafi rosiisaanchisi Maatewoosi fooliishsho 10 horoonsiꞌre addu Kiristaani xiiwamannota xawise kulinosi. Norteyi togo yiino: “Qarru iilla hanafieta halaale afiꞌroommota huwatoommo.” Qoleno rosiisaanchisi maatesi ledo ammaꞌnote hajo kayise hasaawanno woyite qorophannohanna manna ayirrisannoha ikkanno gede Maatewoosi 10:16 yitannore wodanchanno gede kaaꞌlinosi. Norteyi cuuamihu gedensaanni suwisaancho ikka hasiꞌrino; annisi kayinni yuniversite eara hasiꞌranno. Rosiisaanchisi Norteyi hiittee doodhannoro kulantenni giddosita fushshe coyiꞌranno gede assitanno xaꞌmuwa xaꞌminosi; hattono Qullaawa Borroha xintu seera heeshshi gotti asse hedanno gede kaaꞌlinosi. Tini mayi guma abbituyya? Norteyi woꞌma yanna soqqansho hanafa doodhino. Annisi mininni fulanno gede kulinosi. Hakkawoyite Norteyi hiitto ikkiyya? Isi, “Doodhoommo doorshi gara ikkinota dihuluullamoommo” yiino. Ninkeno wolootu Qullaawa Borro hiincitanno gede jawaachinsheemmo woyite, kaajjado ammana heedhannonsa gedenna Yihowara soqqama agurtannokki gede kaaꞌlinanni heeꞌnoommonsa.—Efe. 3:16-19.
Wolootu Qullaawa Borro huwattanno gede kaaꞌlitine Yesuusi lawishsha harunse (Gufo 11 lai) f
LABBALLU RODUUWI ‘ELTO’ IKKITANNO GEDE QAJEELSE
13. Yesuusi Annisi uyinosi looso woꞌmanka woyite loonsanni gede maa assino? (Efesooni Sokka 4:8)
13 Yesuusi uullate aana noo yannara Annisi uyinosi looso guutu garinni loosino. (Yoh. 17:4) Ikkirono Yesuusi Annisi uyinosi looso loosa dandaannohu iso calla ikkinohu gede asse dihedino. Isi uullate aana sase dironna darate soqqami yannara wolootuno konne looso loossanno gede qajeelsino. Yesuusi iimira haꞌrara albaanni Yihowaha muxxe geꞌreewo towaattanno gede hattono sabbakatenna rosiisate looso albisa ikkite loossanno gede rosaanosira hadara uyino; insa giddo mitu 20 diri balla ikkannonsare ikkitukki digatino. (Efesooni Sokka 4:8 (NW) nabbawi. c) Yesuusi uullate aana heeꞌrinohu jeefonnihu 40 barri giddo, insaneeto sayisse uyitinori ammanantinorinna diinaggaabbe loossannori kuri ‘elto ikkitino labballi’ ikkadoota ikkitanno gede qajeelsinohu hiittoonniiti?
14. Yesuusi uullate aana heeꞌrinohu jeefonnihu 40 barri giddo rosaanosi ayyaanaamittetenni lophitanno gede kaaꞌlinohu hiittoonniiti? (Misileno lai.)
14 Yesuusi rosaanosi xawise kayinni shaqqillunni amaalinonsa. Lawishshaho, insa giddo mitu huluullantannore ikkitinota huwatino daafira amaalinonsa. (Luq. 24:25-27; Yoh. 20:27) Qoleno isi maalaamittete loosinni roore Yihowa manna towaata illachishshanno gede kulinonsa. (Yoh. 21:15) Qoleno Yihowara soqqamate assitannore wolootu assitannori ledo heewisiissannokki gede qaagiissinonsa. (Yoh. 21:20-22) Insa Maganu Gashshooti daafira noonsata gara ikkitinokki hedo biddi assidhanno gedenna dancha duduwo duduwate looso illachishshanno gede kaaꞌlinonsa. (Soq. 1:6-8) Songote cimeeyye Yesuusi lawishshinni maa rossanno?
Labballu roduuwi albinni roore soqqamate ikkadda ikkitanno gede kaaꞌlitine Yesuusi lawishsha harunse (Gufo 14 lai)
15-16. (a) Songote cimeeyye Yesuusi lawishsha harunsa dandiitannohu hiitte doogganniiti? Xawisi. (b) Paatiriki amaalloonnisi amaalenni horo afiꞌrinohu hiittoonniiti?
15 Songote cimeeyye Yesuusi lawishsha harunsa dandiitannohu hiittoonniiti? Insa labballo roduuwanna wedella, songote giddo albinni roore soqqamate ikkadda ikkitanno gede qajeelsanna kaaꞌla hasiissannonsa. d Songote cimeeyye, qajeelsitanno roduuwi guuta ikka hasiissannonsa yite diheddanno. Insa wedellu roduuwi umonsa heeshshi assa, ammanamanna wolootaho uminsa fajjonni soqqama hasiissannonsata huwattanno gede baxillunni amaala hasiissannonsa.—1 Xim. 3:1; 2 Xim. 2:2; 1 Phe. 5:5.
16 Hanni Paatiriki yinanni rodoo uyinoonnisi amaale kaaꞌlitinosi gara laꞌno. Isi wedellichu noo waro wolootaho ayirrinye xeinore coyiꞌranno; meya roduuwira nafa gara ikkinokkire assanno. Mittu woꞌnaalshu noosi cimeessi Paatiriki laanfe huwatino daafira baxillunni kayinni xaaddote amaalinosi. Paatiriki togo yiino: “Isi amaalinoe daafira hagiidhoommo! Wolootu ani afiꞌra hasiꞌreemmo qoosso afidhanno woyite, dadilleemmo. Kayinni kuni rodii amaalinoe amaale, songote giddo mite qoosso afiꞌrate illachishantenni umoꞌya heeshshi asse wolootaho soqqama hasiissannota ikkitinota huwateemmo gede kaaꞌlitinoe.” Tini Paatiriki 23 dirisinni songote cimeessa ikke soqqamanno gede kaaꞌlitinosi.—Law. 27:9.
17. Yesuusi rosaanosi ammanannonsata leellishinohu hiittoonniiti?
17 Yesuusi rosaanosira sabbakkanno gede calla ikkikkinni rosiissanno gedeno kulinonsa. Rosaanosi konne looso loosate ikkadda ikkitinokkihu gede assite heddinoha ikkara dandaanno. Ikkirono Yesuusi insa konne looso loosa dandiitannota dihuluullamino; qoleno tenne xawise kulinonsa. Insa konne looso loossannota woꞌmunni woꞌma addaxxe togo yiinonsa: “Anniꞌya ane soyie gede, anino kiꞌne soyemmoꞌne.”—Yoh. 20:21.
18. Songote cimeeyye Yesuusi lawishsha harunsa dandiitannohu hiittoonniiti?
18 Songote cimeeyye Yesuusi lawishsha harunsa dandiitannohu hiittoonniiti? Woꞌnaalshu noonsa cimeeyye wolootaho looso uyitanno. (Fil. 2:19-22) Lawishshaho songote cimeeyye wedellu Gambooshshu Addaraashe fiitannonna gatamartanno gede assa dandiitanno. Cimeeyye labballu roduuwira looso uyitannonsa, ma garinni loossannoro qajeelsitannonsa hattono uyitinonsa looso garunni loossannota ammantanno. Maatiwu yinannihu haarote shoomamino cimeessi uyinoonnisi looso seekke loosanno gede qajeelsitinosirenna dancha gede loosannota ammantinosire woꞌnaalshu noonsa cimeeyye naadannota coyiꞌrino. Isi togo yiino: “Insa soꞌro looseemmo woyite soꞌroꞌyanni roseemmo gedenna woyyeessiꞌreemmo gede kaaꞌlitannoe.” e
19. Maa assate murciꞌra hasiissannonke?
19 Yesuusi uullate aana heeꞌrinoha jeefonniha 40 barra woloota jawaachishate, rosiisatenna qajeelsate horoonsiꞌrino. Ninkeno isi lawishsha seekkine harunsate murciꞌno. (1 Phe. 2:21) Isi tenne assineemmo gede kaaꞌlannonke. Korkaatuno togo yee qaale einonke: “Alamete gumulo geeshsha barru baala ani kiꞌne ledo noommo.”—Mat. 28:20.
FAARSO 15 Yihowaha Bayira Beetto Guwinso!
a Wongeelluwanna Qullaawu Maxaafiti wole maxaaffa Yesuusi reyotenni kae wolootaho duucha hige leellinota kultanno; lawishshaho isi Megidelitte Maariyaamira (Yoh. 20:11-18); wolu meentira (Mat. 28:8-10; Luq. 24:8-11); lame rosaanosira (Luq. 24:13-15); Pheexiroosira (Luq. 24:34); Toomaasi nookkiwa rosaanosira (Yoh. 20:19-24); Toomaasi noowa rosaanosira (Yoh. 20:26); lamala rosaanosira (Yoh. 21:1, 2); 500 saꞌanno rosaanosira (Mat. 28:16; 1 Qor. 15:6); rodiisi Yaiqoobira (1 Qor. 15:7); baalante soqqamaasinesira (Soq. 1:4); hattono rosaanosira Biitaaniyu mule leellino. (Luq. 24:50-52) Yesuusi rosaanosira wole yannarano leellinoha ikkara dandaanno; kayinni Qullaawu Maxaafi tenne daafira kulannori dino.—Yoh. 21:25.
b Buuraminohu daafira kultanno masaalo ledde afate, jw.org aana nooha “Mesihichu Daafira Kultanno Masaalo Yesuusi Mesihicha Ikkinota Leellishshanno?” yaanno birxicho lai.
c Efesooni Sokka 4:8 (NW): “Korkaatuno togo yaanno: Gordo fuli woyite, qafado adhi; labballono elto asse uyi.”
d Mito woyite dirinsa 25-30 geeshsha ikkannori songote cimeeyye woradu aliidi laꞌꞌaano ikkitara dandiitanno. Ikkirono togoo roduuwi balaxxe songote cimeeyye ikkite soqqante woꞌnaalsha afiꞌra hasiissannonsa.
e Wedellu labballu roduuwi albinni roore soqqamate ikkadoota ikkitanno gede kaaꞌlinanni gara ledde afate, Woxawaajje 2018 Agarooshshu Shae qoola 11-12 gufo 15-17 hattono Dotteessa 1, 2015 Agarooshshu Shae qoola 8-18 lai.
f MISILETE XAWISHSHA: Mittu Qullaawu Maxaafi rosaanchi Qullaawa Borro yitannore huwatihu gedensaanni, Ganna ayirrisate qixxeessiꞌrinore hunanni no.
