XIINXALLOTE BIRXICHO 40
FAARSO 30 Annaꞌya, Maganoꞌyanna Jaalaꞌya
Yihowa “Wodana Hiiqqantinore Dhaawannonsa”
“[Yihowa] wodana hiiqqantinore dhaawannonsa, madansarano gaga gananno.”—FAR. 147:3.
GUULCHO HEDO
Yihowa wodana hiiqqantinorira lowo geeshsha hedanno. Konni birxichira, Yihowa xissiisiꞌneemmo woyite sheshifachishannonke garanna woloota sheshifachinsheemmo gede kaaꞌlannonke gara ronseemmo.
1. Yihowara soqqamaanosi daafira mayi macciishshamannosi?
YIHOWA soqqamaanosira iillannonsa coye baala laꞌꞌanno. Isi hagiirrenkeno dadillenkeno afanno. (Far. 37:18) Lowo geeshsha xissiisiꞌneemmo gede assanno coyi heeꞌrirono, Yihowa isira soqqamate dandiinummore baala assinanna laꞌꞌanno woyite lowo geeshsha hagiidhanno! Hakkiino sae isi ninke kaaꞌlatenna sheshifachishate quqquxamanno.
2. Yihowa wodana hiiqqantinorira ma assanno? Isi towaanyonni horo afiꞌra dandiineemmohu hiittoonniiti?
2 Faarso 147:3 Yihowa wodana hiiqqantinorira ‘madansara gaga ganannota’ kultanno. Konni qummeeshshira Yihowa lowo geeshsha xissiisidhinore shaqqillunni towaatannota kulloonni. Yihowa towaanyonni horo afiꞌrate ninke maa assa hasiissannonke? Hanni mitto lawishsha laꞌno. Mittu dandoo noosi akimichi madiꞌrino manchi huranno gede kaaꞌlate lowore assanno. Ikkirono madiꞌrino manchi hurate akimichu kulannosire seekke harunsa hasiissannosi. Konni birxichira, Yihowa lowo geeshsha xissiisidhinore kaaꞌlate Qaalisi giddo mayinoronna isi uyinonketa baxillu amaale loosu aana hosiisa dandiineemmo gara ronseemmo.
YIHOWA ISIRA MUXXE IKKINOOMMOTA BUUXISINONKE
3. Mitu manni tidhinokkihu gede asse hedannohu mayiraati?
3 Heeꞌnoommohu mannu mimmito baxannokki alameraati; hakko daafira tini batinyu manni ditidhinoommoreeti yee hedanno gede assitino. Heleni a yinanni rodoo togo yitino: “Lophoommahu baxillu nookki maate giddooti. Anninke hanqaaleessaho; hakko daafira isi barru baala tidhinoommokkiri gede asse coyiꞌranno.” Ateno Heleni gede miincoonniheha, duucha hinge qacifantoonniheha woy baxannoehu dino yite hedatto gede assinoonniheha ikkara dandaanno. Togoo coyi iillinoheha ikkiro, addinta ate daafira hedannohu noota ammana qarra ikkitahera dandiitanno.
4. Faarso 34:18 Yihowa ma assannonketa buuxissanno?
4 Wolootu miiccinoheha ikkiro nafa Yihowa baxannohetanna naadannoheta addaxxa dandaatto. Isi “dadillunni hiiqqantinorira mule noonsa.” (Faarso 34:18 nabbawi.) ‘Hexxo hoogoottohu’ gede assite hedattoha ikkiro, Yihowa wodanikki giddo nooha dancha coye lainotanna isiwa abbinoheta qaagi. (Yoh. 6:44) Ati isira muxxe ikkootto daafira woꞌmanka woyite kaaꞌlahera qixxaawinoho.
5. Yesuusi mannu woffi assannore towaatino gara kultanno xaggenni maa ronseemmo?
5 Yesuusi assinore xiinxalline, Yihowara ninke daafira mayi macciishshamannosiro huwata dandiineemmo. Yesuusi uullate aana soqqamanni noo yannara, mannu woffi assannore shaqqillunni towaatinonsa. (Mat. 9:9-12) Buutote dhibbi waadannoseti mitte mancho hureemma yite hexxite uddanosi kissuta Yesuusi sheshifachishinose hattono ammanase daafira galatinose. (Maq. 5:25-34) Yesuusi Annisi akatta guutu garinni leellishanno. (Yoh. 14:9) Hakko daafira Yihowa naadannoheta, dancha akattakki laꞌꞌannota hattono ammanakkinna isira noohe baxille afannota addaxxa dandaatto.
6. Ditidhoommoho yite hedattoha ikkiro maa assa dandaatto?
6 Ditidhoommoho yite hedattoha ikkiro maa assa dandaatto? Yihowara muxxe ikkoottota leellishshanno qummeeshshuwa nabbawi hattono hiinci. b (Far. 94:19) Mixokki wonshiꞌra hoogittoro woy wolootu assitino geeshshire assa hoogittoro quwa saꞌe ateneeto bushiishshooti. Yihowa assa dandaattokkire assi diyaannohe. (Far. 103:13, 14) Konni albaanni lowo geeshsha miincoonniheha ikkiro, miicinohe manchi assinoherira ateneeto bushiishshooti. Tini ate soꞌro diꞌꞌikkitino! Yihowa woloota miiccannore xaꞌmannonsa; miicantinore kayinni kaaꞌlannonsa. (1 Phe. 3:12) Qaaqqo heedheenna beebba assiꞌnoonniseti Saandira yinanni rodoo togo yitino: “Gara ikkitino hedo heedhannoe gedenna aneneeto Yihowa laꞌꞌannoe garinni laeemma gede kaaꞌlaera iso ganye huucciꞌreemma.”
7. Alba iillinonke qarri Yihowara soqqamate kaaꞌlankera dandaannohu ma garinniiti?
7 Yihowa woloota kaaꞌlatto gede horoonsiꞌrahera dandaannota horo huluullantooti. Yihowa isi ledo sabbakate looso loosatto gede asse ayirrisinohe. (1 Qor. 3:9) Alba iillinohe qarri woloota mararatto gedenna qarrinsa leellannohe gede kaaꞌlahera dandaanno. Insa kaaꞌlate lowore assa dandaatto. Aleenni qummi assinita Heleni wolootu kaaꞌlitinose; hattono xa ise woloota dancha gede kaaꞌla dandiitino. Ise togo yitino: “Konni albaanni ditidhoommate yee hedeemma; kayinni Yihowa muxxe ikkoommatanna kaaꞌleemmari noota huwateemma gede assinoe.” Heleni xa woꞌma yanna suwisaancho ikkite hagiirrunni soqqantanni no.
YIHOWA MAAROSI MAAHOYYE YINE ADHINAMMORA HASIꞌRANNO
8. Isayaasi 1:18 Yihowa mayinonke?
8 Mite Yihowa soqqamaano cuuantara albaanni woy cuuantu gedensaanni loossino soꞌrora quwa saꞌe insaneeto busha assitanno. Kayinni Yihowa lowo geeshsha baxannonke daafira wodo qixxeessinonketa qaaga hasiissannonke. Isi tenne eltosi maahoyye yine adhinammora hasiꞌrannoti dihuluullissannote. Yihowa isi ledo ‘mala hanse’ c maaro eꞌnummohu gedensaanni, alba loonsoommo soꞌrora galagale xaꞌmannonkekkita buuxisinonke. (Isayaasi 1:18 nabbawi.) Yihowa albi soꞌronke qaaga hoogasi lowo geeshsha hagiirsiissannote! Ikkirono isi assinoommoha dancha coye horo dihawanno.—Far. 103:9, 12; Ibi. 6:10.
9. Alba loonsoommo soꞌro agurre xaanna albillitte assineemmore illachishate sharrama hasiissannonkehu mayiraati?
9 Alba loosootto soꞌro gaabbissanni waaddinoheha ikkiro, albi soꞌrokki agurte xaa yannaranna albillitte assatto coye illachishate sharrami. Hanni soqqamaasinchu Phaawuloosi lawishsha laꞌno. Isi alba Kiristaana xiiwanni beebba assiꞌrinotera gaabbino; kayinni Yihowa gatona yiinosita afino. (1 Xim. 1:12-15) Hakkunni gedensaanni isi alba loosino soꞌro calla hedanni heeꞌrinoni? Phaawuloosi alba ayirrinsannisi Farisicha ikkate assinore calla hedanni keeshshinokkinte gede, alba loosino soꞌrono hedanni keeshshinokkiti dihuluullissannote. (Fil. 3:4-8, 13-15) Hatteentenni isi diinaggaawe soqqamino hattono albillittete yanna illachishino. Atino Phaawuloosi gede alba ikkinore soorra didandaatto. Kayinni xa Yihowa ayirranno gede assanna isi uyinota dhagge ikkitannota albillittete hexxo illachisha dandaatto.
10. Alba loosootto soꞌro woloota gawajjitinoha ikkiro ma assa dandaatto?
10 Alba loosootto soꞌro woloota gawajjitino daafira lowo geeshsha yaadoottoha ikkara dandaanno. Hatto ikkiro kaaꞌlannoheri maati? Baino coye biddi assate dandiittore baala assi; hattono godowinta maaro xaꞌmiꞌri. (2 Qor. 7:11) Loosootto soꞌro gawajjitino manna kaaꞌlanno gede Yihowa huucci. Yihowa atenna ati loosootto soꞌro gawajjitino manna, isira soqqantinanni heedhinanni gedenna keere afidhinanni gede kaaꞌlannoꞌne.
11. Masaalaanchu Yoonaasi lawishshinni maa ronseemmo? (Aaniidi qoolira noo misileno lai.)
11 Alba loosootto soꞌronni rosi; hattono Yihowa isi hasiꞌrino garinni horoonsiꞌrahera maahoyye yii. Hanni masaalaanchu Yoonaasi lawishsha laꞌno. Isi, Maganu hajajinosiwa soojjaati raga noota Nennewe haꞌra agure galchimi raga noota Terseesi xooqino. Yihowa Yoonaasi seejjinosi; Yoonaasino bangage higino. (Yon. 1:1-4, 15-17; 2:7-10) Yihowa Yoonaasi masaalaancho asse soqqa diagurino. Isi Yoonaasi Nennewe haꞌranno gede layinkimeeshsho kulinosi; Yoonaasino bayichonkonni hajajamino. Isi, albi soꞌrosi Yihowa uyinosi looso loosannokki gede assitasira diwodhino.—Yon. 3:1-3.
Yoonaasi jawu qulxuꞌmichi giddonni gate fulihu gedensaanni, Yihowa galagale Nennewe haꞌre sokkasi duduwanno gede hajajinosi (Gufo 11 lai)
YIHOWA QULLAAWU AYYAANISI WIDOONNI SHESHIFACHISHANNONKE
12. Yihowa lowo geeshsha dadilline xissiisiꞌneemmo woyite keere aannonkehu hiittoonniiti? (Filiphisiyusi Sokka 4:6, 7)
12 Yihowa lowo geeshsha dadilline xissiisiꞌneemmo woyite qullaawu ayyaanisi widoonni sheshifachishannonke. Hanni Rooninna Kaarooli yinanni minaanninna minaama woꞌnaalsha laꞌno. Beettinsa hedeweelcho reyita lowo geya xissiisiꞌrino. Insa togo yitino: “Hige konni albaanni lowo qarri iille egenninonke; kayi togo xissiisanno qarri iille diegenninonke. Duucha hashsha goxicho hoongoommo daafira kaaꞌlannonke gede Yihowa huucciꞌnoommo; hakkiinni Filiphisiyusi Sokka 4:6, 7 kulloonni keere afiꞌnoommo.” (Qummeeshsha nabbawi.) Aterano buutote qarri iillanni nooheha ikkiro, duucha higge hasiꞌrootto yanna geeshsha giddokkita gudisse kulte Yihowa huucciꞌra dandaatto. (Far. 86:3; 88:1) Yihowa qullaawa ayyaanasi aannohe gede marro marro higge huucciꞌri. Isi horonta huuccattokki lashshi diassanno.—Luq. 11:9-13.
13. Qullaawu ayyaani Yihowara ammanamme soqqammanni heeꞌneemmo gede kaaꞌlannonkehu hiittoonniiti? (Efesooni Sokka 3:16)
13 Iillinohehu buutote qarri horo wolqa baꞌꞌatto gede assinohe? Qullaawu ayyaani Yihowara ammanante soqqama agurattokki gede jawaante ikkannohe. (Efesooni Sokka 3:16 nabbawi.) Hanni Filoora yinanni rodoo woꞌnaalsha laꞌno. Isenna minaannise misiyoone ikke soqqamanni noo yannara minaannise foorino; hakko daafira adhamansa diigantino. Ise togo yitino: “Tennera lowo geeshsha xissiisiꞌroomma; hattono wolere heda didandoomma. Kaajje uurreemma gede qullaawa ayyaanasi aaera Yihowa huucciꞌroomma. Yihowano sheshifachishinoe; hattono umi qara dandiinannikkire lawierono isi kaaꞌlinoe daafira jawaante afiꞌroomma hattono dandee saoomma.” Filoora Yihowa albinni roore iso addaxxitanno gede kaaꞌlinoseta huwattino; albillitteno kaaꞌlannoseta addaxxitino. Ise ledde togo yitino: “Faarso 119:32 Yihowa ane kaaꞌlino gara dancha gede assite xawissanno; qummeeshshu, ‘Roore wodancha aattoe daafira, hajajokki jaate wonsheemmo’ yaanno.”
14. Maganu ayyaani kaaꞌlannonke gede assiꞌra dandiineemmohu hiittoonniiti?
14 Yihowa qullaawa ayyaanasi aannohe gede huuccatto assiꞌrittohu gedensaanni ma assa hasiissannohe? Maganu ayyaana ledde afiꞌrate kaaꞌlannohere assi. Kuri giddo gamu gambooshshe haꞌratenna wolootaho dancha duduwo duduwate. Qullaawa Maxaafa barru baala nabbawi; tini Yihowa hedo maatiro hiincatto gede kaaꞌlitannohe. (Fil. 4:8, 9) Qullaawa Maxaafa nabbawatto woyite, qarru iillinonsa manni lawishsha borreessite amaxxi; hattono Yihowa dandiite saꞌanno gede kaaꞌlinonsa gara hiinci. Aleenni qummi assinitera Saandirara, gamete aana gamitokke yinannihu gede buutote qarri aana aanaho iillinose. Ise togo yitino: “Yooseefi xagge lowo geeshsha jawaachishshinoe. Isi iillinosi fonqolinna taashshote xeꞌne Yihowa ledo noosi jaalooma huntasira diwodhino.”—Kal. 39:21-23.
YIHOWA AMMANATE RODUUWINKE WIDOONNI SHESHIFACHISHANNONKE
15. Shesho ayeoowinni afiꞌra dandiineemmo? Insa kaaꞌlitannonkehu hiittoonniiti? (Misileno lai.)
15 Qarru iillannonke woyite ammanate roduuwinke ‘jawaachishshannonke.’ (Qol. 4:11) Yihowa baxillesi leellishannonketi mitte doogo tenneeti. Ammanate roduuwinke hasaaphineemmo woyite seekkite macciishshite woy ninke ledo yanna sayisse sheshifachishshankera dandiitanno. Insa jawaachishanno qummeeshsha kultankera woy ledonke huuccatto assidhara dandiitanno. d (Rom. 15:4) Mito woyite mittu rodii woy mitte rodoo Yihowa hedo huwanteemmo gede assitankera dandiitanno; tini qarra dandiine saꞌneemmo gede kaaꞌlitannonke. Qoleno ammanate roduuwinke qarru amadannonke woyite mitore assite lawishshaho sagale abbite kaaꞌlitankera dandiitanno.
Addaxxinannihunna ayyaanaamittetenni gikki yiino jaali lowo geeshsha sheshifachishankeranna kaaꞌlankera dandaanno (Gufo 15 lai)
16. Wolootu kaaꞌlitannonke gede ma assa hasiissannonke?
16 Wolootu kaaꞌlitannonke gede mito woyite insa kaaꞌlo xaꞌmiꞌra hasiissannonkeha ikkara dandaanno. Ammanate roduuwinke baxxannonke hattono ninke kaaꞌla hasidhanno. (Law. 17:17) Kayinni insa heeꞌnoommo gara woy hasiisannonkeri maatiro afa hooggara dandiitanno. (Law. 14:10) Lowo geeshsha xissiisiꞌroottoha ikkiro xissokki ayyaanaamittetenni gikki yitino jaallakkira hasaaphi. Insa maa assite kaaꞌlitannohero kulinsa. Roore shiqattohu mittu woy lamu songote cimeessira hasaapha dandaatto. Mitu meya roduuwi, gikki yiinori meya roduuwira hasaapha shota ikkitannonsata huwatino.
17. Wolootuwiinni jawaante afiꞌneemmokki gede assankera dandaannohu mitu qarri maati? Konne qarra qeela dandiineemmohu hiittoonniiti?
17 Wolootunniwa gambo gibbooti. Mito woyite lowo geeshsha xissiisiꞌrootto daafira wolootunniwa gamba yaa qarra ikkitahera dandiitanno. Mito woyite ammanate roduuwikki nootto gara afa hooggara woy gara ikkinokkire coyidhara dandiitanno. (Yai. 3:2) Togoori hasiissannohe jawaante afiꞌrattokki gede assahera wodhitooti. Quwa saꞌino yaaddo waaddannosihu mittu Gaviini yinannihu songote cimeessi togo yiino: “Mito woyite roduuwunniwa shiqeemmohu jeefote asseemmore hoogummoro callaati.” Ikkirono Gaviini togoo hedo qeeltasira diwodhino; isi wolootunniwa gamba yee horo afiꞌrino. Amii yinanni rodoo togo yitino: “Konni albaanni iillinoeri manna addaxxa qarra ikkitannoe gede assino. Kayinni Yihowa gede ammanate roduuwaꞌya baxanna addaxxa rosanni noomma. Tini Yihowa hagiirsiissannosi; aneno hagiidheemma gede assitannoe.”
YIHOWA UYINOTI ALBILLITTETE HEXXO SHESHIFACHISHSHANNONKE
18. Quqquxamme agadhineemmo coyi maati? Xa maa assa dandiineemmo?
18 Yihowa xissiisiꞌneemmo gede assanno coye baala muli yanna giddo hunannota anfoommo daafira hatte yanna quqquxamme agadhineemmo. (Aju. 21:3, 4) Hatte yannara, xa iillanni noonke qarra ‘horontanni diqaangeemmo.’ (Isa. 65:17) Konni birxichira ronsummonte gede, Yihowa xaa yannara nafa ‘madankera gaga gananno.’ Yihowa ate sheshifachishatenna fooliishshiishate baxillunni qixxeessino qixxaawo seekkite horoonsiꞌri. Isi atere ‘malannota’ horonta huluullantooti.—1 Phe. 5:7.
FAARSO 7 Yihowa, Jawaantenke
a Suꞌmuwa soorrinoonni.
b “ Ati Yihowara Muxxete” yitanno saaxine lai.
c Loonsoommo soꞌrora Yihowa ledo ‘mala hasate’ isi gatona yaannonke gede huuccatto assiꞌnenna akatanke biddi assiꞌne maaro eꞌnoommota leellisha hasiissannonke. Jawa cubbo loonsoommoha ikkiro kayinni, songote cimeeyye kaaꞌlo xaꞌmiꞌrano hasiissannonke.—Yai. 5:14, 15.
