HUNDI Israeele budira muuziiqu qara coyeeti. Qullaawu Maxaafi Israeelete manni muuziiqu uduunne ganannotanna faarso faarsannota duucha bayicho kulanno. Isinni Qullaawa Borro giddo tonne anga faarsote; lawishshaho Faarso, Faarso Roore Faarsonna Ermiyaasi Qurto faarsote maxaaffaati. Hundi xagge odeessannohu mittu maxaafi kulanno garinni, Qullaawu Maxaafi ‘Israeelete daga addi addi dilgonsa assidhanno woyite muuziiqa horoonsidhannota’ xawise kulanno. —Miyuziki ini Bayibili Layifi.

Muuziiqa addi addi dilgora. Israeelete manni dadillensanna hagiirrensa xawisate muuziiqa gaꞌnanno. (Isa. 30:29) Meentu mootoolla moohinsanni woyite, ayyaana ayirrinsanni woyitenna ola qeellanni woyite dibbe gananni hagiirrunni faarsannonna sirbanno. (Eje. 11:34; 1 Sam. 18:6, 7; 1 Mot. 1:39, 40) Qoleno Israeelete manni mittu manchi reyanno woyite dadillensa leellishate kiire wiꞌlanno. (2 Dud. 35:25) Addanko, mittu Insayikilopiidiyi yaannonte gede, “Ibiraawootu muuziiqa lowo geeshsha baxxanno.”—Maykilintokinna Istrongi Sayikilopiidiya.

Muuziiqa mootoollate qaera. Israeelete mootoolla muuziiqa lubbora baxxanno. Moote Saaooli muuziiqa ganannosi gede Daawiti isiwa woshshiishiꞌrino. (1 Sam. 16:18, 23) Gedensoonni Daawiti umisi moote ikkiti, muuziiqu uduunne seekkino, maccate coommitanno faarso borreessino hattono Yihowahu qullaawu mini giddo faarsitanno faarsaano qineessino. (2 Dud. 7:6; Amo. 6:5) Moote Salamoonirano minesi faarsitanno labballinna meenti noosi.—Ros. 2:8.

Muuziiqa Yihowa magansiꞌrate. Roore anga Israeelete manni muuziiqa horoonsiꞌrannohu Yihowa magansiꞌrateeti. Isinni Yerusaalamete noohu qullaawu mini giddo muuziiqa ganannohu 4,000 manni no. (1 Dud. 23:5) Insa tsinaatsilenna bagana gantanno hattono xurumba ufuuffanno. (2 Dud. 5:12) Kayinni muuziiqunni magansidhannori kuri muuziiqa ganate dandoo noonsare calla diꞌꞌikkitino. Batinyu Israeelete manni dirunni mitte hinge ayirrinsanni ayyaana ayirrisate Yerusaalame haꞌranno woyite, Iimallittete Faarso faarsanno. (Far. 120-134) Qoleno Yihudu borro kultanno garinni Israeelete manni Faasiku Ayyaana ayirrisanno woyite Haleeli Faarso a faarsanno.

Xaa yannara noohu Maganu mannino muuziiqa lowo geeshsha baxanno. (Yai. 5:13) Yihowa magansiꞌneemmo woyite iso guwisate faarso faarsineemmo. (Efe. 5:19) Muuziiqu ammanate roduuwinkewa gamba yineemmo gede assannonke. (Qol. 3:16) Qarru iillannonke woyite jawaante afiꞌneemmo gede kaaꞌlannonke. (Soq. 16:25) Muuziiqu Yihowara noonke ammananna baxille leellinsheemmote kaajja doogooti.