Gafo qullaawu mini giddo Qullaawu Dargira eꞌnanni farooti. Haaro Alame Tiro 2023 albaanni attammoonniti, “Minu albaanni noo gafo seendille 20 cigileeti; kunino minu godowi ledo taaloho; hojja qole 120 ikkitanno” yitanno. (2 Dud. 3:4) Wole Qullaawu Maxaafi tirono gafo hojja “120 cigile” ikkitannota kultanno; hatto yaano 53 meetire (175 haꞌruma) ikkitanno yaate.

Ikkollana, 2023 attammoonniti Haaro Alame Tiro Salamoonihu qullaawu mini gafo daafira kultanni, “Hojja 20 cigile” woy honse meetire balla ikkitannota kultanno. a Hanni tenne taashshinoonnihu mayiraatiro mito korkaata laꞌno.

Umi Mootoolla 6:3 gafote hojja daafira dikultanno. Konni qummeeshshira Ermiyaasi gafote seendillenna halaꞌlinye ikkinnina hojja dikulino. Hakkiinni aante noo fooliishshora isi qullaawu miniha wole dhagge ikkanno coye tittire kulino; konni giddo gamu camotenni seekkinoonnite Baaraho yinanni gawateeti, tonne gaareeti hattono gafote gobbaanni uurrinsoonniho lame camote mokkollichooti. (1 Mot. 7:15-37) Gafo addinta hojja 50 meetire balla ikkitannohanna qullaawa mine saꞌe iimaanni fulte leeltannoha ikkoommero, Ermiyaasi hojjase qummi assikkinni agurannoni? Lowo xibbi diri gedensaanni nafa, Ayihudootu xaggete borreessaano Salamoonihu qullaawu mini gafo hojja qullaawa mine roortannokkita xawissino.

Egennaammu qullaawu mini girgiddi, hojja 120 cigile ikkitanno gafo duhe uurra dandaannota huluullantanno. Hundi waro kinnatenninna xuubetenni minnanniti seeddaanna kinchu minna, lawishshaho Gibitsete nooti qullaawu mini waalchuwa woriido lowo geeshsha halaꞌlite aliido ruukkitanni hadhannote. Salamoonihu qullaawu mini kayinni hattooha diꞌꞌikkino. Egennaammu konni mini girgiddi duꞌmille 6 cigile woy 2.7 meetire saꞌꞌannokkita kultanno. Teyodori Businki yinannihu mine minnanni gara xiinxallanno egennaami togo yiino: “[Qullaawu mini] girgiddi duꞌmille hendiro, gafo hojja 120 cigile diꞌꞌikkitanno.”

Layinki Duduwo 3:4 galchinoonni gari soꞌro ikkara dandaanno. Angatenni galchinoonniti mite hundi borro konni qummeeshshira “120” cigile yitannoha ikkirono, wole addaxxinanni borro lawishshaho ontikki sanira qixxeessinoonniti Koodeksi Aleksaandirineesinna leekki saniti Koodeksi Ambirosiyaneesi “20 cigile” yitanno. Borro galchi manchi soꞌre “120” cigile yee borreessinohu mayira ikkara dandaanno? Ibiraawootu afiinni “xibbe” nna “cigile” yaanno qaali mitto garaati. Hakko daafira galchi manchi “cigile” yaantenni “xibbe” yaanno qaale borreessinoha ikkara dandaanno.

Hige konne mitto mittonka coye huwatatenna Salamoonihu qullaawu mini daafira gara ikkinore xawisate sharrammeemmoha ikkirono, roore illachinsheemmohu kuni qullaawu mini caale ikkinoha bayira ayyaanaamittenniha qullaawa mineeti. Yihowa konni qullaawu minisi giddo magansiꞌneemmosi gede baalanta soqqamaanosi koyisinonke daafira lowo geeshsha galaxxineemmosi!—Ibi. 9:11-14; Aju. 3:12; 7:9-17.