SHOOSHANQETENNI assinanniri hagiirsiisanno hattono sheshifachishanno. Mannu ninkera hedannota afanke hagiirsiissannonke. Wolootu shooshanqe leellishshannonke woyite hagiidhineemmoha ikkina, ninke konne baxisanno akata lossiꞌra dandiineemmohu hiittoonniiti?

Shooshanqe woy shaqqillu assootinkenninna coyiꞌneemmorinni wolootaho hendeemmota leellishate. Shooshanqe mitte hinge leellinshe agurranniha dancha akata calla diꞌꞌikkitino. Addu shooshanqe leellinshanni gede kakkayisannohu baxillehonna mararrote. Hakkiinni saeno, shooshanqe Kiristaanu lossiꞌranno gede kulloonninsate Maganunnite qullaawu ayyaani laalooti. (Gal. 5:22, 23) Shooshanqe lossiꞌra hasiissannonke daafira, hanni Yihowanna Beettisi lawishsha harunsa dandiineemmo gede insa konne akata leellishshino gara xiinxallino.

Yihowa baalunkura, wole agurina “galata afidhinokkiriranna bushuulleho nafa” shooshaqahonna hedannoho. (Luq. 6:35) Lawishshaho, Yihowa “bushuullehonna danchuulleho arrishsho fushshanno; keeraanotenna cubbaataammaho xeena gananno.” (Mat. 5:45) Kalaqaanchonsa ikkinoha Yihowa ammantannokkiri nafa isi heeshshotenni heeꞌrate shooshanqetenni qixxeessino coyibbanni horo afidhanno.

Yihowa Addaaminna Heewanira assinori shooshanqete daafira taalle nookki lawishsha ikkannonke. Addaaminna Heewani cubbo loossu gedensaanni, “balasete haqqicho daro xaadisse gobbe qodhite teedansa” diphitino. Ikkollana Yihowa, Edenete gobbaanni yaano, “utanna kokkoꞌle fushshitanno” gede rumantino baattora heeꞌrate uddano hasiissanonsata afino. Konnira Yihowa shooshanqetenni hasiissannonsata, “gogu uddano” seekkinsa.—Kal. 3:7, 17, 18, 21.

Yihowa “bushuullehonna danchuulleho” shooshaqa ikkirono, roorenkanni ammanantino soqqamaanosira tenne shooshanqe leellisha hasiꞌranno. Lawishshaho masaalaanchu Zakkaariyaasi waro mittu sokkaasinchi wirro minnanni heeꞌnoonniha Yerusaalamete nooha qullaawa mine doogo agurrita lae lowo geeshsha dadillino. Yihowa sokkaanchu yaaddo macciishshe, “hagiirsiisannonna jawaachishanno qaalinni” dawaro qolinosi. (Zak. 1:12, 13) Yihowa masaalaanchu Eeliyaasirano hatto assino. Kuni masaalaanchi lowo geeshsha yaadino daafira Yihowa reyo huucciꞌrino woyiti no. Yihowa Eeliyaasi qarri leellinosi daafira, sokkaasincho soye jawaachishinosi. Roorenkanni Maganu Eeliyaasi callichosi ikkinokkita kule sheshifachishinosi. Eeliyaasi tenne shooshanqete qaallanna hasiissannosi kaaꞌlo afiꞌrihu gedensaanni loososi loosanni keeshsha dandiino. (1 Mot. 19:1-18) Ikkina Maganu soqqamaano giddo dhagge ikkannoha Yihowaha shooshanqete  akata leellishatenni baalunkunni roore dancha lawishsha ikkannonkehu ayeti?

Yesuusi uullate aana soqqami yannara shooshanqetenninna mannaho hedatenni egennaminoho. Isi kaajjado diꞌꞌikkino, hattono mannu isi hasiꞌrinore assanno gede digiddeessanno. Isi shaqqillunni, “Kiꞌne daafurtinoonniri, duhu ayirrinoꞌneri baalu anewa amme! Ani fooliishshiisheemmoꞌne” yiino. (Mat. 11:28-30) Yesuusi shooshaqa ikkino daafira, mannu harunsinosi. Yesuusi insa “lae marare” sagale itisinonsa, dhiwantinore hursino, hattono Annisi daafira “lowo coye” rosiisinonsa.—Maq. 6:34; Mat. 14:14; 15:32-38.

Yesuusi mannu qarra afino daafira, insa shooshanqetenninna hedannonsata leellishanno garinni dhaawinonsa. Yesuusi fooliishshira hasiꞌrino yannara nafa mannu diinaggaawe hasiꞌrisita shooshanqetenni kaaꞌlinonsa. (Luq. 9:10, 11) Hanni mundee duꞌnantanni keeshshitinose manchora iillinosere hedi. Ise hura hasidhino daafira Yesuusi uddano kissino. Ikkollana Muse Higge garinni ise lagaabbinota ikkitino daafira, konne assa dihasiissannose. Ikkina Yesuusi ma assiyya? Isi dihanqinose. (Lew. 15:25-28) Hatteentenni massinota laino, hattono 12 diro qarrantanni keeshshitino daafira marare, “Beettoꞌya, ammanakki gatissinohena keerunni haꞌri! Dhibbikkinni hurte heeꞌri!” yiinose. (Maq. 5:25-34) Tini dhagge ikkitanno shooshanqeeti!

Aleenni laꞌnummo lawishshuwa addu shooshanqe loosunni leellinshannita xawissanno. Yesuusi togo assa hasiissannota kulate shaqqadu Samaarichi daafira kulanno lawishsha coyiꞌrino. Samaariyunna Yihudu manni mimmito giwannoha ikkirono, lawishshu giddo kulloonni Samaarichi mulqiꞌnenna ganne gawajjine reyonna heeshshote mereero hunne doogote tungoonni manchira mararinosi. Shooshanqe madiꞌrino mancho kaaꞌlate kakkayissinosi. Samaarichu hakko manchi mada xagise, wosinu fooliishshiꞌranno minira masse worinosi. Samaarichu manchi, minu annira madiꞌrino mancho towaatannosi gede woxe baatinosi; hattono isira fushshanno woxe baala nafa baatate qaale einosi.—Luq. 10:29-37.

Shooshanqe assineemmorinni calla ikkikkinni coyiꞌneemmorinnino wolootaho hedate hattono jawaachinsheemmore ikkate kakkayissannonke. Qullaawu Maxaafi, “Wodanu yaaddo dadille abbitanno; danchu hasaawi kayinni hagiirsiisanno” yaanno. (Law. 12:25) Shooshanqetenninna danchummatenni kaꞌne coyiꞌneemmori woloota jawaachisharanna kiara dandaanno. a Shooshanqetenni coyiꞌneemmori mannaho hendeemmota leellishanno. Jawaachinsheemmonsa mannira, heeshshonsa giddo iillannonsa qarra qeela shota ikkitannonsa.—Law. 16:24.

Mannu baalu Maganu “daninni” kalaqamino daafira shooshanqete akata leellishate dandoo noonsa. (Kal. 1:27) Lawishshaho, soqqamaancho Phaawuloosi Rooma haaꞌre haꞌranno gede kulloonnisihu Roomunnihu xibbu hajajaanchi Yuliyoosi, Sidoonu katamira heedheenna “Phaawuloosi mararino daafira, jaallasiwa mare Phaawuloosira hasiisannosire kaaꞌlitannosi gede” fajjinosi. (Soq. 27:3) Shiima yanna gedensaanni, markaawe hiiqqanteenna Maalta yinanni giddicho hadhuta hakko heedhanno mannooti Phaawuloosinna woloota ledosi noore ‘dhaggeeffantanni garinni wosinchimma haadhinonsa.’ Tenne giddichora heedhanno mannooti giwaadhanno gede giira nafa giirtinonsa. (Soq. 28:1, 2) Kuri mannooti dancha coye assitino. Ikkollana, Yihowa hagiidhannohu saꞌne saꞌne calla ikkikkinni woꞌmanka woyite shaqqadda ikkinummorooti.

Magano hagiirsiisate, heeshshonke diro woꞌma shooshanqe leellisha hasiissannonke. Konni daafira, Yihowa shooshanqe ‘uddiꞌneemmo’ gede kulinonke. (Qol. 3:12) Ikkollana, konne Magano  hagiirsiisanno akata heeshshonke kifile assiꞌra shota diꞌꞌikkitino. Mayira? Shooshanqe leellishate badhera hingeemmohu waajjineemmohura, gimbanninkehura, hattono ninkeneeto banxeemmo daafira ikkara dandaanno. Ikkollana, qullaawa ayyaana afiꞌrate huucciꞌneemmohanna Yihowa lawishsha harunsate sharrammeemmoha ikkiro, Isi addinta shaqqadda ikkineemmo gede kaaꞌlannonke.—1 Qor. 2:12.

Albinni roore shaqqille leellisha hasiissannonke doogga bande afa dandiineemmohu hiittoonniiti? Ninkeneeto togo yine xaꞌma hasiissannonke: ‘Mannu coyiꞌranna mararrotenni macciishsheemmo? Wolootaho mayi hasiisannonsaro seekke illachisheemmo? Muli yannara maateꞌya miila woy jaalaꞌya ikkinokkihura shaqqille leellishoommohu mamooteeti?’ Balanxe qooxeessinkera heeꞌranno manni, roorenkanni Kiristaanu songo giddo noo roduuwi daafira roore afate mixo fushshiꞌra dandiineemmo. Hatto ikkiro qarransanna hasiisannonsare seekkine huwata dandiineemmo. Hakkiinni, mannu assahera hasiꞌrattore atino wolootaho shooshanqetenni assate sharrami. (Mat. 7:12) Jeefoteno, kaaꞌlannohe gede Yihowa huucciꞌri, hatto ikkiro isi shooshaqa mancho ikkatto gede kaaꞌlannohe.—Luq. 11:13.

Soqqamaanchu Phaawuloosi Maganu soqqamaancho ikkinota leellishshanno coyibba xawisi woyite “shooshanqe” qummi assino. (2 Qor. 6: 3-6) Phaawuloosi coyiꞌrannorinninna assootunni shooshanqe leellishino daafira, mannu isi rosiisannore macciishshino. (Soq. 28:30, 31) Ninkeno, isinte gede shooshanqe leellinsheemmoha ikkiro, wolootu halaalunniwa dagganno gede kaaꞌla dandiineemmo. Woꞌmunku mannira, hattono gibbannonkerira shooshanqe leellinsheemmoha ikkiro, hanqo agurte shaqqadda ikkitanno gede kaaꞌlineemmo. (Rom. 12:20) Hatto ikkiro, Qullaawu Maxaafi sokka macciishsha hasidhara dandiitanno.

Baatto Gannate ikkitanno woyite baalunku mimmitoho shooshaqa ikkineemmo. Reyotenni kaꞌannore shooshanqetenni kaaꞌlineemmo; insa giddo mitootaho alba heeshshonsa giddo shaqqille leellinshe egenninoonninsakkiha ikkara dandaanno. Tini insano shooshaqa ikkitanno gede kakkayissannonsa. Hatte yannara heeꞌrannohu aye manchino shooshanqe leellishannokkihanna woloota kaaꞌlannokkiha ikkiro Gannatete giddo hegerera heeꞌra didandaanno. Maganu hegerera heedhanno gede fajjinonsari mimmitoho shooshanqenna baxille leellishshannoreeti. (Far. 37:9-11) Hatti harshammonna salaame woꞌmitino alameeti! Ikkollana, tini hagiirsiissanno yanna dagga geeshsha, xa shooshanqe leellishatenni hoꞌro afiꞌra dandiineemmohu hiittoonniiti?

Qullaawu Maxaafi, “Wolootaho shaqqa meessanaa kaaꞌlitanno” yaanno. (Law. 11:17) Mannu shooshaqu manchiwa aana baxanno, hattono insano isira shooshaqa ikkitara dandiitanno. Yesuusi, “Woleho safartine uyitinanni safaraanchinni safarranniꞌne” yiino. (Luq. 6:38) Konni daafira shooshaqu manchi dancha jaalla afiꞌranno hattono jaaloomisi geedonniha ikkanno.

Soqqamaanchu Phaawuloosi Efesooni songora noorira “Mimmitiꞌnera shaqqaddanna shooshaqoota ikke. . . . Mimmitiꞌne sao agurre” yiino. (Efe. 4:32) Songote giddo noohu baalunku shooshaqanna shaqqado ikkiro, songo lowo horo afidhanno. Togoo roduuwi mimmitoho gawajjannore dicoyiꞌranno, suꞌma dihunanno, hattono kuꞌu koꞌoye coyinni dikisanno. Insa arrawonsa hemete ikkikkinni woloota kiate horoonsidhanno. (Law. 12:18) Hatto ikkiro, songo jawaattanno, hattono hagiirrunni Yihowara soqqantanno.

Ee, coyiꞌneemmorinninna assineemmorinni shooshanqe leellisha dandiineemmo. Shooshaqoota ikkinummoro shaqqadu Maganinke Yihowa lawishsha harunsineemmo. (Efe. 5:1) Tini songonke jawaattanno gede assitanno, hattono wolootu Yihowara soqqantanno gede kakkayissanno. Konni daafira, shooshanqetenni egennammoommore ikkate sharrammo!