1-3. (a) Qullaawu Maxaafi halaale ma garinni laˈˈa hasiissannonke? Lawishsha kuli. (Hanafote noo misilla lai.) (b) Konni birxichira hiikkuri xaˈmuwa xiinxallineemmo?

YANNANKERA hidhinoonni uduunne qola rosaminore ikkitino. Mite gobbara xibbunni 9 anga ikkanno manni hidhino uduunne qolanno yine hendanni. Uduunne interneete widoonni hidhanno manni giddo xibbunni 30 anga ale ikkannohu qolanno. Kunni manni uduunne qolannohu uduunnu hedino geeshsha ikka hooginohura, xeˈne afiˈrinohura woy baxisinonsakki daafira ikkara dandaanno. Konni daafira insa hakko uduunne soorriˈranno woy hirinsa manchi woxe qolannonsa gede xaˈmiˈranno.

² Hidhinoommo uduunne qolle woxe adha dandiineemmoha ikkirono, ‘afiˈnoommoha’ Qullaawu Maxaafi “halaale” qola woy ‘huˈna’ dihasiˈneemmo. (Lawishsha 23:23 nabbawi; 1 Xim. 2:4) Sai birxichira, halaale rosate yine facci assine agurroommo coyibba laˈnoommo. Qoleno halaale afiˈrate yine, lowo woxe abbanno looso, mitu manni ledo aanate, mite hedonkenna amanyoote, hattono Qullaawu Maxaafi ledo sumuu yaannokki bude agurroommoha ikkara dandaanno. Ikkollana afiˈnoommo atoote hendiro agurroommo coyibba garita diˈˈikkitino.

 ³ Yesuusi Maganu Mangiste halaali mageeshshi geeshsha muxxe ikkinoro xawisate, dancha inqu hidha hasiˈrino daddalaanchi lawishsha kulino. Kuni daddalaanchi hasiˈrino inqu afiˈrino. Tini inqu lowo waaga afidhino daafira, kuni daddalaanchi “noosire baala hire” hatte inqu hidhino. (Mat. 13:45, 46) Ninkeno Maganu Mangiste halaalenna Maganu Qaali giddo nooha muxxe halaale baala ronsummo woyite konne halaale afiˈrate yine bayichonko uminke fajjonni lowo coyibba facci assine agurroommo. Konne halaale lowori gede assine laˈneemmoha ikkiro, ‘dihuˈnineemmo’ woy dihirreemmo. Ikkollana mitu Kiristaani rosino halaali mageeshsha muxxe ikkinoro deino daafira, konne halaale huˈnino; tini dadillissannote. Ninke kayinni hatto assa dihasiˈneemmo! Halaale naandeemmotanna hirreemmokkita leellishate, ‘halaalunni heeˈneemmo.’ (3 Yohaannisi 2-4 nabbawi.) Halaalunni heeˈrate yaa, heeshshonke giddo halaale balaxisiisatenna halaalunni qaafate. Konni birxichira aante noo xaˈmuwa xiinxallineemmo: ‘Mitootu halaale huˈnitinohu woy hirtinohu mayiraati? Togo assitinohu hiittoonniiti? Ninke togoo soˈro loonseemmokki gede qoropha dandiineemmohu ma garinniiti? Albinni roore ‘halaalunni heeˈrate’ murciˈra dandiineemmohu hiittoonniiti?’

4. Umi xibbi diro mitootu halaale ‘huˈnitinohu’ mayiraati?

⁴ Umi xibbi diro Yesuusi rosiisino halaale macciishshe adhino manni giddo mitu halaalu giddo heeˈra didandiino. Lawishshaho, Yesuusi maalaletenni lowo manna itisi gedensaanni mannu isi ledo Galiilu Baara tayise saino. Yesuusi kayinni insara masisannore kulinonsa; togo yiinonsa: “Manchi Beetti maala ita hoogginiro, mundeesino aga hoogginiro heeshsho dinoˈne.” Insa Yesuusi konne coye xawisannonsa gede xaˈma agurte togo yitino: “Kuni coyi kaajjadoho; ayi dandee macciishshanno?” Konni daafira, “Rosaanosi giddo batinyu badhera higgu. Hatte yannanni kayisse Yesuusi hoode dihadhino.”—Yoh. 6:53-66.

5, 6. (a) Yannankera mitootu halaalu mininni xeertidhannohu mayiraati? (b) Mittu manchi sunu sununni halaalu mininni fongogara dandaannohu hiittoonniiti?

⁵ Yannankerano mitootu halaale cuˈmidhe heeˈra hooggino; tini dadillissannote. Insa giddo mitu biddi assinoonnihu Qullaawu Maxaafi rosinni woy egennamino rodii coyiˈrinorinni woy assinorinni gufidhino. Mitootu qolte Qullaawu Maxaafi amaale uyinoonninsa daafira woy ammanate rodiinsa ledo coyi kawa kaˈaa higinonsahura halaalu mininni fultino. Wolootu kayinni kaadaasinenna ammananke gibbannore harunsitino. Konninni kainohunni insa Yihowawiinninna dirijjitesiwiinni ‘badantino.’ (Ibi. 3:12-14) Insa soqqamaasinchu Pheexiroosi gede Yesuusa addaxxite ammanansa huˈnitukki heedhoommero ma danchi baino! Wolu manni Yesuusa agure haˈri yannara Yesuusi soqqamaanosino haˈra hasidhannoro xaˈminsata Pheexiroosi bayichonko togo yiino: “Mootichaˈya, ayenkewa haˈneemmo? Atera hegere heeshsho qaali noohe.”—Yoh. 6:67-69.

⁶ Mitootu halaalu mininni fultinohu sunu sununniiti; tini insa uminsara leeltinonsakkiha ikkara dandaanno. Halaalu mininni sunu sununni badheeganno manchi lagu qaccenni sunu sununni xeertidhanno yowolo gedeeti. Qullaawu Maxaafi togoo ikkito ‘shalaqate’ yaanno. (Ibi. 2:1) Halaalu mininni afanni heeˈre xeertiˈranna hendikkinni shalaqa babbaxxinoreeti. Ikkollana hedikkinni halaalu mininni fongogino  manchirano Yihowa ledo noosi jaaloomi baˈˈara dandaanno. Ninkera togoori iillannonkekki gede qoropha dandiineemmohu hiittoonniiti?

7. Halaale huˈnineemmokki gede mayi kaaˈlannonke?

⁷ Halaalu giddo millisate, Yihowa kulannonkere baala macciishshanna hajajama hasiissannonke. Heeshshonke giddo balaxisiisa hasiissannonkere balaxisiisanna Qullaawu Maxaafihu xintu seeri garinni heeˈra hasiissannonke. Moote Daawiti Yihowa huucciˈranni “halaalikkinni qaafeemmo” yiino. (Far. 86:11) Daawiti halaalunni heeˈrate murciˈrino. Ninkeno isinte gede Maganu halaali giddo millisate murciˈra hasiissannonke. Hatto assa hoongummoro, halaaleho yine facci assine agurroommo coyibba heda hananfammoranna kuri coyibba wirro afiˈrate woˈnaallammora dandiineemmo. Ikkollana woˈmanka halaale seekkine cuˈmira hasiissannonke. Mito halaale harunsinanni mito agura didandiineemmo. Qoleno ‘halaalu baalunku’ garinni millisa hasiissannonke. (Yoh. 16:13) Konninni aanchine halaaleho yine agurroommota onte coyibba hiincineemmo. Hatto assanke agurre dangoommo coyiwa higa hoogate murciˈnoommo gedeenni heeˈrate kaaˈlitannonke.—Mat. 6:19.

8. Yanna hayyotenni horoonsiˈra hooga mittu Kiristaanchi halaaluwiinni xeertiˈranno gede assitara dandiitannohu hiittoonniiti? Lawishsha kuli.

⁸ Yanna. Halaalu mininni xeertiˈneemmokki gede, yannanke garunni horoonsiˈra hasiissannonke. Qoropha hoongummoro boohaarshunni, interneete fanfannanni woy televizhiine laˈnanni lowo yanna guxxinammora dandiineemmo. Kuri coyibba assa soˈro ikka hooggurono, hojju xiinxallo assiˈratenna wole ayyaanaamittete coye assate gaaˈminoommo yanna moorantara dandiitanno. Hanni Eema * yinanni rodoora iillinosere laˈno. Eema anjesenni kayisse farado baxxanno. Ise tunceenya afidhanno yanna baalantera farado guluffanno. Ikkollana ise gedensoonni konne assitanni lowo yanna guddanno daafira gaabba hanaffino. Konnira ise boohaarsha balaxisiisa agurtino. Qoleno alba faradu qolchansho qolchantannote Koorii Welsi yinanni rodoo woˈnaalshino kaaˈlinose. * Eema xa roore yanna sayissannohu Yihowara soqqantanniiti; hattono ammanate roduuwisenna jaallase ledo yanna sayissanno. Ise xa albinni roore Yihowawa shiqqino; hattono yannase hayyotenni horoonsidhanni noota affino daafira hagiirraamete.

9. Mittu manchira maalaamittete coyira noosi baxilli, ayyaanaamittete coye dulli assanno gede assasira dandaannohu hiittoonniiti?

⁹ Maalaamittete coye. Halaalu mine heeˈra hasiˈnummoro, maalaamittete coye balaxisiisa dihasiissannonke. Halaale ronsummo yannara, Yihowara soqqama maalaamittete coye roortannota huwantoommo. Qoleno halaalu giddo millisate maalaamittete coye hagiirrunni facci assine agurroommo. Ikkollana galle honse wolootu yannate dayino uduunnicho hidhitanna woy wole maalaamittete qiniite afidhinota laˈnammora dandiineemmo. Hatte yannara gate bainori noonkeha lawankera dandaanno. Noonkerinni kassi yaa agurre, ayyaanaamittete coye dulli assine maalaamittete coye gamba assiˈrate kabbi facci yaa hananfammora dandiineemmo. Deemaasi yinanni rosaanchino hatto assino. Isi “tenne gobba baxe” soqqamaasinchu Phaawuloosi  ledo soqqama agurino. (2 Xim. 4:10) Deemaasi Phaawuloosi agure haˈrinohu mayiraati? Isi hatto assinohu ayyaanamittete coyinni roorse maalaamitte qiniite hasiˈrino daafiraati ikka? Woy Phaawuloosi ledo soqqamate yee malaamittete injo agura hasiˈrinokkihuraati ikka? Qullaawu Maxaafi tenne daafira kulannori dino. Ninkeno qoropha hoongummoro maalaamittete coyira noonke baxilli lexxe halaaleho noonke baxille hunara dandaanno.

10. Halaalu giddo heeˈrate, maa qoropha hasiissannonke?

¹⁰ Mannu ledo aante. Halaalu giddo qaanfanni heeˈrate, Yihowara soqqamannokki manni hunannonkekki gede qoropha hasiissannonke. Umo halaale ronsummo yannara, Yihowa Farciˈraasine ikkitinokki jaallankenna maatenke ledo noonke aante biddi assiˈnoommo. Insa giddo mitootu ammananke ayirrissannoha, wolootu kayinni gibbannoha ikkara dandaanno. (1 Phe. 4:4) Maatenke miilla ayirrinseemmohanna shaqqille leellinsheemmonsaha ikkirono, insa hagiirsiisate yine Yihowa seera diingeemmokki gede qoropha hasiissannonke. Umi Qorontoosi 15:33te noo qorowishshi leellishanno garinni, muli jaalooma kalaqiˈra hasiissannonkehu Yihowa baxanno manni ledo callaati.

11. Qullaawu Maxaafi ledo sumuu yaannokki assootiwiinni xeertiˈra dandiineemmohu hiittoonniiti?

¹¹ Maganu giwanno assootenna hedo. Halaalunni qaaffannori baalu qullaawoota ikka hasiissannonsa. (Isa. 35:8; 1 Pheexiroosi 1:14-16 nabbawi.) Halaalu minira dangummo woyite, Qullaawu Maxaafiha xalala seera harunsate yine heeshshonke giddo mito coye biddi assiˈnoommo. Ninke giddo mitootu isinni lowo coye biddi assiˈra hasiissinonsa. Ikkihano ikkiro, qullaawa heeshsho heeˈra agurre, maaeela heeshshowa hingeemmokki gede qoropha hasiissannonke. Togoori iillannonkekki gede qoropha dandiineemmohu hiittoonniiti? Yihowa qullaawa heeshsho heeˈneemmo gede maa uyinonkero hedi. Isi muxxe Beettosi Yesuusa kakkalo asse uyinonke. (1 Phe. 1:18, 19) Yihowa albaanni qullaawoota ikkine heeˈrate, Yesuusiti wodote kakkalo mageeshshi geeshsha muxxe ikkitinoro woˈmante yannara heda hasiissannonke.

12, 13. (a) Ayyaanna Yihowa laˈˈanno garinni laˈˈa hasiissannonkehu mayiraati? (b) Konninni aanchine maa xiinxallineemmo?

¹² Magano hagiirsiisannokki rosichonna assoote. Maatenke miilla, ledonke loossannori woy rossannori ayyaanna ledonsa ayirrinseemmo gede koyissankera dandiitanno. Yihowa hagiirsiisannokki rosichonna ayyaanna ayirrinseemmo gede xixxiimbanninke yannara qeelammeemmokki gede mayi kaaˈlannonke? Kuri ayyaanna Yihowa hagiirsiissannokkihu mayiraatiro woˈmante yannara heda tennera kaaˈlitannonke. Mite ayyaanna ayirrisa hananfoonni gara borronke giddo xiinxalla dandaatto. Kuri ayyaanna ayirrisa hasiissannonkekkihu mayiraatiro Qullaawu Maxaafinni buunxummoro, “Mooticha hagiirsiisanno” garinni heeˈra dandiineemmo. (Efe. 5:10) Yihowanna Qaalesi addaxxanke, ‘manna waajjineemmokki’ gede kaaˈlitannonke.—Law. 29:25.

¹³ Halaalunni heeˈra hegere geeshsha assineemmoreeti. Halaalu giddo millisate murciˈnoommo gedeenni heeˈra dandiineemmohu hiittoonniiti? Hanni tennera kaaˈlannonkeha sase coye laˈno.

14. (a) Agurrummokkinni halaale hasiˈranke, halaale huˈnineemmokki gede kaaˈlitannonkehu hiittoonniiti? (b) Hayyo, seejjonna wodancha kaaˈlitannonkehu hiittoonniiti?

¹⁴ Umihunni, Maganu Qaali giddo nooha  muxxe halaale xiinxallanna hiinca agurtooti. Qullaawu Maxaafi halaale ganyite sagaˈlakki halaale hirte hunattokki gede kaaˈlitannohe. Hatto assakki halaale albinni roore naadattonna huˈnattokki gede qorophate kaaˈlitannohe. Lawishsha 23:23, halaale calla ikkikkinni “egenno [woy, hayyo] afanna wodanchano” hidhineemmo woy afiˈneemmo gede kultannonke. Egenno afiˈra calla tirtannori dino. Tenne egenno heeshshonke giddo loosunni leellisha hasiissannonke. Wodancha, ronsoommore konni albaanni anfoommori ledo xaadinse hedate kaaˈlitannonke. Hayyo ronsoommore loosunni leellinsheemmo gede kakkayissannonke. Mito woyite halaalu heeshshonke giddo biddi assiˈra hasiissannonkere kule seejjannonke. Konnira tenne seejjo bayichonko harunsa hasiissannonke. Qullaawu Maxaafi seejjannonke seejjo birra roorete.—Law. 8:10.

15. Halaalu qawatto agarooshshe ikkitannonkehu hiittoonniiti?

¹⁵ Layinkihunni, barru baala rosootto halaali ledo sumuu yite heeˈrate murciˈri. Hallikkira halaale sinnaaru woy qawattote gede assite qodhi. (Efe. 6:14) Hunda olamaasine qodhitanno qawatto diinu hallonsanna wole giddoyidita bisinsa kifilla gawajjannokki gede kaaˈlitannonsa. Ikkollana mittu olamaanchi qawatto agarooshshe ikkitasira hasiˈriro duure usudha hasiissannosi. Shabbi calla assinoonni qawatto kaaˈlitannori dino. Halaalu qawattote gede agarooshshe ikkannonkehu hiittoonniiti? Qullaawu Maxaafi halaale woˈmante yannara mulinkenni fafisiˈneemmokkiha ikkiro, gara ikkitinokki hedowiinni xeertiˈneemmonna dancha doorsha doodhineemmo gede kaaˈlannonke. Fonqolu iillannonke woyite, Qullaawu Maxaafi halaali gara ikkinore assineemmo gede xixxiiwannonke. Mittu olamaanchi qawatto qodhikki olaho haˈrannokkinte gede, ninkeno woˈmante yannara Qullaawu Maxaafi halaale heeshshonke giddo harunsa hasiissannonke. Qawatto olamaasine bise suxxitanno gedeno kaaˈlitannonsa. Hanni ninkeno hatto assa dandiineemmo gara laˈno.

16. Wolootaho halaale rosiisa halaalu giddo millinsanni heeˈrate kaaˈlitannonkehu hiittoonniiti?

¹⁶ Sayikkihunni, dandiitto deerrinni wolootaho Qullaawu Maxaafi halaale rosiisi. Hatto assakki ayyaanaamittete bise ikkinoha “Maganu qaale” seekkite cuˈmirate kaaˈlitannohe. (Efe. 6:17) Ninke baalunku “halaalu qaale taashshine coyiˈrate” yaano rosiisate dandoonke woyyeessiˈrate sharrama dandiineemmo. (2 Xim. 2:15) Qullaawa Maxaafa horoonsiˈne wolootaho halaale rosiinseemmo woyite halaale albinni roore huwanteemmo hattono banxeemmo. Konni garinni halaalu giddo qaanfanni heeˈra dandiineemmo.

17. Halaale muxxe jiro gede assite laˈˈattohu mayiraati?

¹⁷ Halaalu Yihowa uyinonkete muxxe eltooti. Kuni halaali, iimi Anninke ledo jaalooma kalaqiˈneemmo gede assinonke. Heeshshonke giddo kawiinni saˈino jiro dino! Yihowa konni kaˈa rosiisannonkehu lowo coyi no! Isi hegere geeshsha rosiiseemmoˈne yee qaale eino. Konni daafira halaale fila culkanni roorsite lai. Halaale “afiˈri ikkinnina huˈnitooti.” Hatto ikkiro Daawiti gede Yihowara “Halaalikkinni qaafeemmo” yaa dandaatto.—Far. 86:11.