1. Baalunkura shesho hasiissannonkehu mayiraati?

 NINKE baalunkura shesho hasiissannonke. Heeshshonke giddo yaaddo, hexxo mudhineemmo gede assannorinna qarru woꞌminoha ikkara dandaanno. Geedhimma, dhibbu woy shiirotenni kainohunni baasa dadillinoommoha ikkara dandaanno. Qoleno mitoota mannu baasa giwannonsaha ikkara dandaanno. Yannankera finqille baasa lexxitanni no. Ee, tini yanna ‘qarrissannotenna goofimarcho’ ikkitinota dihuluullammeemmo; hattono hashshe soodi kiiro haaro alamewa gamba yinanni heeꞌnoommo. (2 Xim. 3:1) Ikkollana Yihowa eino qaali woꞌmannota laꞌꞌate lowo yanna agadhine keeshshinoommoha, hattono qarru batiꞌranni noonkeha ikkara dandaanno. Ikkina shesho afiꞌra dandiineemmohu mamiinniiti?

2, 3. (a) Imbaaqoomi daafira anfoommori maati? (b) Imbaaqoomi maxaafa xiinxallineemmohu mayiraati?

² Hanni tenne xaꞌmora dawaro afiꞌrate Imbaaqoomi maxaafa xiinxallino. Qullaawu Maxaafi Imbaaqoomi heeshsho daafira tittire kulannokkiha ikkirono, suꞌmisinni borreessinoonni maxaafi jawaantete buicho ikkannoho. Imbaaqoomi yaa “Rimmi Asse  Hanqafa” yitanno tiro afiꞌrinoha ikkara dandaanno. Tini Yihowa magansidhannosire hanqafe sheshifachishannota woy qaaqqu annasi cuꞌmiꞌrannohu gede soqqamaanosi Iso seekkite cuꞌmidhanno gara leellishshanno. Imbaaqoomi Magano mite xaꞌmuwa xaꞌmino. Imbaaqoomi kuri xaꞌmuwa xaꞌminohu ninke riqiweeti yaa dandiinanni; korkaatuno Yihowa Imbaaqoomi ledo hasaawino hasaawi ninkerano kaaꞌlannonketa afino daafira, qullaawu ayyaaninni borreessinanni gede assino.—Imb. 2:2.

³ Qullaawu Maxaafi giddo noohu kuni yaadino masaalaanchinna Yihowa hasaabbino hasaawi Imbaaqoomi daafira kulannonke. “Qullaawa Maxaaffa widoonni afiꞌneemmo cincanna jawaante hexxo” uyitannonke gede, Imbaaqoomi maxaafi “umo assine” borreessinoonnihu Maganu Qaali wido ikkino. (Rom. 15:4) Mitti mittinke Imbaaqoomi maxaafinni horo afiꞌra dandiineemmohu hiittoonniiti? Kuni Maxaafi Yihowa addaxxate yaa mayyaatero huwanteemmo gede kaaꞌlannonke. Qoleno Imbaaqoomi maxaafi qarrunna shetto iillitunkerono, giddiidi harshammo afiꞌra dandiineemmota buuxisannonke. Hanni Imbaaqoomi maxaafa seekkine xiinxallino.

4. Imbaaqoomi lowo geeshsha yaadinohu mayiraati?

⁴ Imbaaqoomi 1:2, 3 nabbawi. Imbaaqoomi heeꞌrinohu qarrunna shetto batidhino yannaraati. Hakkawaro bushunna finqilu manni batiꞌrino daafira isi lowo geeshsha yaadino. Imbaaqoomi togo yee xaꞌmino: ‘Tini bunshe baꞌannohu mamooteeti ikka? Yihowa bunshe xaa geeshsha huninokkihu mayiraati?’ Imbaaqoomi umisi gaꞌre ikkinohu Israeelete manni mimmito beebba assiꞌrannanna miicanna laꞌino. Tennera isi hexxo mudhino. Konni daafira isi tenne quuxxote yannara Yihowa konne coye biddi assanno gede huucciꞌrino. Imbaaqoomi Yihowa mannisira heda agurino yee heda hanafinoha ikkara dandaanno. Atino hatto yite hedde egennootto?

5. Imbaaqoomi maxaafinni hiikkonne kaajja roso ronseemmo? (Hanafote noo misile lai.)

⁵ Ikkina Imbaaqoomi Yihowa addaxxanna Isi eino qaale wonshannota ammana agurinoni? Diagurino! Isi qarrasinna yaaddosi mannaho ikkikkinni Yihowara kuꞌlasi Iso addaxxa agurinokkita leellishanno. Imbaaqoomi dadillinohu, Maganu hakko qarra hunanno yannanna qarru iillannosi gede fajjinohu mayiraatiro buuxa hoogino daafiraati. Yihowa Imbaaqoomi yaachishinosire qullaawu ayyaaninni borreessanno gede assasi, ninkeno yaachishinonkerenna huluullinonkere Yihowara kuꞌla waajja hasiissannonkekkita buuxissannonke. Yihowa qarranke baala huuccattotenni isira hasaaphinammora koyisinonke. (Far. 50:15; 62:8) Lawishsha 3:5 togo yite jawaachishshannonke: “Woꞌmu wodanikkinni Kaaliiqa addaxxi ikkinnina, umikki egennora irkidhooti.” Imbaaqoomi konne qaale afikki digatino; qoleno heeshshosi giddo harunsino.

6. Huuccatto assiꞌra hasiissannote yineemmohu mayiraati?

⁶ Imbaaqoomi Annasinna ammanamino Jaalasi ikkinoha Yihowa addaxxino, hattono isiwa shiqino. Imbaaqoomi qarrisi daafira quwa sae diyaadino; qoleno iillinosi fonqolo umisinni tirate diwoꞌnaalino. Hatteentenni macciishshantannosi huluullonna yaaddo Yihowara kuꞌlino; tini ninkera dancha lawishsha ikkitannonke. Huuccatto macciishshanno Magani Yihowa, qarranke huuccattotenni isira hasaaphine Iso addaxxineemmota leellinshammora koyisinonke. (Far. 65:2, 3) Togo assinummoro Yihowa huuccattonkera dawaro qolanno gara laꞌneemmo. Isi sheshonna biddishsha  oye jawaachishannonke woyite rimmi asse hanqafanni noonketi leeltannonke. (Far. 73:23, 24) Baxi qarri iillinkerono hedosi anfeemmo gede kaaꞌlannonke. Giddonkenni assiꞌneemmo huuccatto Magano addaxxineemmota leellishshanno.

7. Imbaaqoomi yaaddosi daafira huucciꞌrita Yihowa dawaro qolinosihu hiittoonniiti?

⁷ Imbaaqoomi 1:5-7 nabbawi. Imbaaqoomi yaaddosinna qarrasi Yihowa aana tuqqi gedensaanni, Yihowa ma garinni qolannosiro hedikki digatino. Baxillaanchunna wodanchanno Anni Yihowa Imbaaqoomi suwashshu wodaninni kae xaꞌmino xaꞌmora dihanqinosi. Yihowa Imbaaqoomi qarraminotanna kaaꞌlote huucciꞌranni noota afino daafira, ammanaminokkihu Yihudu manni aana muli yanna giddo mayi ikkannoro kulinosi. Yihowa hakkonne finqila manna hunanno yanna gambissinota kulinosihu umi manchi Imbaaqoomi ikkikki digatino.

8. Yihowa Imbaaqoomira qolino dawaro hibbo ikkitinosihu mayiraati?

⁸ Yihowa Imbaaqoomira bunshe hunate qixxaawe noota leellishinosi. Hatti bushanna finqila ilama qorichishamase digattanno. Yihowa “yannaꞌnera” yaasi, yoo abbannohu Imbaaqoomi woy hakka waro noo Israeele yannara ikkinota leellishano. Yihowa Imbaaqoomira dawaro qolinohu isi hedinokki garinniiti. Ikkina tini raaresiꞌra dawaro ikkitanno? Yihowa Yihudu mannira qarru batiꞌrannonsata kulinosi. Baabiloonete manni kaajjaddahonna mararro noonsakkireeti. Insa Yihowa biddishsha afinohu Isiraeelete manninni roore finqilaasinete. Yihowa dagasi qorichishate mararro noonsakkirenna Magano magansidhannokki daga horoonsiꞌrinohu mayiraati? Ati Imbaaqoomi ikkoottoro mayi macciishshamannohe?

9. Imbaaqoomi isonooto hiikkuri xaꞌmuwa xaꞌminoha ikkara dandaanno?

⁹ Imbaaqoomi 1:12-14, 17 nabbawi. Imbaaqoomi, Yihowa hakka waro nooha bushare assanno manna qorichishate Baabiloonete daga horoonsiꞌrannota afinoha ikkirono, isira xaano coyi gurchaawinosi. Ikkollana isi umosi heeshshi assannoha ikkino daafira Yihowa addaxxa agura hoogate murciꞌrino. Isinni Imbaaqoomi Magano ‘Golosi’ assiꞌrannota coyiꞌrino. (Mar. 32:4; Isa. 26:4) Imbaaqoomi Maganu baxillaanchonna shaqqado ikkinota addaxxino daafira, xaano Yihowa xaꞌmo xaꞌma diwaajjino. Isi togo yee xaꞌminoha ikkara dandaanno: ‘Yihowa Yihudu manni roore qarramanno gede fajjinohu mayiraati? Isi konne qarra rahe huninokkihu mayiraati? Woꞌmanka dandaannohu “sammi” yiinohunna baalankawa bunshe heedhanno gede fajjinohu mayiraati? Isi ‘qullaawaho;’ hattono illesi “lowo geeshsha keeraancho ikkitinohura busha coye dilaꞌanno.”’

10. Mito woyite Imbaaqoomi gede ikke macciishshamankera dandaannohu hiittoonniiti?

¹⁰ Mito woyite ninkerano Imbaaqoomi gede ikke macciishshamankera dandaanno. Yihowa macciishshineemmo. Iso addaxxineemmo; qoleno hexxonke kaajjishiꞌrate Qaalesi nabbambeemmo, hattono xiinxallineemmo. Dirijjitesi uyitannonke biddishshi widoonni isi eino qaali daafira lowore ronseemmo. Ikkollana, ‘Qarrammanni heeꞌneemmohu mamooti geeshshaati?’ yine hendeemmoha ikkara dandaanno. Imbaaqoomi aane assinorinni maa rosa dandiineemmo?

11. Imbaaqoomi Yihowa macciishshihu gedensaanni ma assate murciꞌrino?

¹¹ Imbaaqoomi 2:1 nabbawi. Imbaaqoomi Yihowa ledo hasaawasi giddiidi harshammo afiꞌranno gede assitinosi. Konnira isi  Yihowa kalaqamino qarra biddi assa geeshsha cince agadhate murciꞌrino. Ikkollana Isi cincinohu shiima yanna geeshsha calla diꞌꞌikkino; Imbaaqoomi gedensoonni “cince agadheemmo” yee coyiꞌrasi, aye geeshshi yannano ikkituro cincate murciꞌrinota leellishshanno. (Imb. 3:16) Wole ammanantinoti Maganu soqqamaasineno isinte gede cincite agadhitino; insa lawishshi hexxo mudhinummokki Yihowa cincine agadhineemmo gede jawaachishshannonke.—Mik. 7:7; Yai. 5:7, 8.

12. Imbaaqoomi assinorinni maa ronseemmo?

¹² Imbaaqoomi lawishshinni maa ronseemmo? Umihunni, baxi qarri iillinkerono Yihowa huucciꞌra agura dihasiissannonke. Layinkihunni, Yihowa Qaalisinna dirijjitesi widoonni kulannonkere macciishsha hasiissannonke. Sayikkihunni, Yihowa yannasira fooliishshiishannonketa addaxxine iso cincine agadha hasiissannonke. Imbaaqoominte gede Yihowawa shiqanke agura hoongummoronna Iso macciishshineemmoha ikkiro, giddiidi harshammo afiꞌneemmo; tini qolte kaajjine heeꞌrate kaaꞌlitannonke. Hexxonke cincine heeꞌratenna baxi qarri iillinkerono hagiirraamma ikkate kaaꞌlitannonke. Iimi Anninke baalanka coye biddi assannota dihuluullameemmo.—Rom. 12:12.

13. Yihowa Imbaaqoomi jawaachishinosihu hiittoonniiti?

¹³ Imbaaqoomi 2:3 nabbawi. Yihowa Imbaaqoomi Iso cince agadhino daafira hagiidhinoti dihuluullissannote. Woꞌmanka Dandaanno Magani Imbaaqoomira iillinosi qarra seekke afino. Konni daafira Maganu, Imbaaqoomi suwashshu wodaninni xaꞌmino xaꞌmora dawaro qolannosita baxillunninna shaqqillunni kule sheshifachishinosi. Imbaaqoomi qarrisi baalunkunni fooliishshiꞌranno yanna muleeti. Maganu Imbaaqoomira togo yiinosihu gedeeti: “Cincite ane addaxxi. Keeshshoommoha lawiherono dawaro qoleemmohe!” Yihowa dinyino yannara eino qaale wonshannota qaagiissinosi. Isi hedosi wonsha geeshsha agaranno gede Imbaaqoomi amaalinosi. Qoleno Imbaaqoomi Yihowa addaxxasinni diꞌꞌirraawino.

14. Qarru iillannonke woyite maa assate murciꞌra hasiissannonke?

¹⁴ Ninkeno Yihowa coye biddi assa geeshsha cincine agadhanna kulannonkere macciishsha, Iso addaxxineemmonna baxi qarri iillinkerono giddiidi harshammo afiꞌneemmo gede kaaꞌlitannonke. Yesuusi, Yihowa coyiꞌrinore yannasira wonshannota addaxxineemmo gedenna Maganu kulinonkekki ‘yannanna diri’ aana illachinsheemmokki gede jawaachishinonke. (Soq. 1:7) Konni daafira, hexxo mudhinummokkinni umonke heeshshi assine, ammanatenninna cincatenni, gattino yanna dandaaminke deerrinni Yihowara soqqamate horoonsiꞌno.—Maq. 13:35-37; Gal. 6:9.

15, 16. (a) Imbaaqoomi maxaafinni mayi hexxo afiꞌra dandiineemmo? (b) Tini hexxo maa rosiissannonke?

¹⁵ Yihowa Iso addaxxitannori keeraano mannira togo yee qaale eino: “Keeraanchu kayinni ammanatenni heeshsho afiꞌranno” hattono “Kaaliiqi ayirrinye afano baatto woꞌmitanno.” (Imb. 2:4, 14) Ee, cincatenni Magano addaxxitannori heeshshote baraarsha afidhanno.

¹⁶ Imbaaqoomi 2:4te noo hexxo hanni hedi. Tini hexxo lowo geeshsha hasiissannota ikkitino daafira soqqamaanchu Phaawuloosi sokkasi giddo sase hige qummi assino! (Rom. 1:17; Gal. 3:11; Ibi. 10:38) Keeraanchu manchira qarru iillisirono, ammanatenninna Magano addaxxe heeꞌratenni Isi eino qaale wonshannota laꞌꞌanno. Yihowa hexxonke aana illachinshammora hasiꞌranno.

17. Yihowa iso addaxxinummoro ma assannonketa buuxisinonke?

 ¹⁷ Tenne goofimarchu yannara heeꞌnoommori Imbaaqoomi maxaafinni dancha roso ronseemmo. Yihowa iso addaxxitannorira keeraanote hegere heeshsho aansara qaale eino. Konni daafira, ninke baalunku baxi qarrino ikko yaachishanno coyi iillinkerono ammananke kaajjishiꞌranna Magano addaxxa agurroonke. Imbaaqoomi maxaafi widoonni Yihowa ninkeno kaaꞌlankeranna gatisankera qaale eino. Yihowa addaxxineemmosinna Mangistesi uulla gashshitanno yanna cincatenni agadhineemmo gede jawaachishinonke. Hatte yannara, uullate aana salaame baxannohunna hagiirraamu Yihowa magansiꞌranno manni woꞌmanno.—Mat. 5:5; Ibi. 10:36-39.

18. Yihowa qaali Imbaaqoomi hedosi biddi assiꞌranno gede kaaꞌlinosihu hiittoonniiti?

¹⁸ Imbaaqoomi 3:16-19 nabbawi. Yihowa qaali Imbaaqoomi hedosi biddi assiꞌranno gede assinosi. Imbaaqoomi Yihowa alba mannisira assinoha dhagge ikkanno coye hiincino. Isi albinni roore Yihowa addaxxino. Isi Yihowa muli yanna giddo qarra hoolannota afino! Yihowa qarrasi bayichonko haare hoolinokkiha ikkirono, tenne afasi sheshifachishshinosi. Imbaaqoomi huluullama agure Yihowata gatisate wolqa woꞌmunni woꞌma addaxxino. Isinni Imbaaqoomi kiiro 18te aana coyiꞌrinori isi Yihowa lowo geeshsha addaxxannota leellishshanno. Mite fullahaano 18^ki kiiro noo gedeenni tirriro, “Hagiirrunni Mootichaho kubbeemmo; tashshi yaannae Maganoho sirbeemmo” yaate yite heddanno. Kiiro 16-19 geeshsha noo hedo lowo geeshsha sheshifachishshannote! Yihowa dhagge ikkitanno hexxo uyinonkeha calla ikkikkinni, eino qaale wonshannota buuxisinonke.

19. Imbaaqoomi gede shesho afiꞌra dandiineemmohu hiittoonniiti?

¹⁹ Yihowa addaxxate daafira Imbaaqoomi maxaafinni lowore ronseemmo. (Imb. 2:4) Ninkeno Yihowa addaxxatenna isi ledo noonke jaalooma kaajjishiꞌrate, (1) yaaddonkenna huluullinonkere agurrummokkinni huuccattotenni Yihowara kuꞌla; (2) Yihowa Qaalisinna dirijjitesi widoonni aannonke biddishsha illachinshe harunsa; (3) ammanamatenninna cincatenni Yihowa agadha hasiissannonke. Imbaaqoomino hatto assino. Isi Yihowa ledo hasaawa hanafi woyite lowo geeshsha yaadinoha ikkirono, goofimarchoho kayinni jawaatino, hattono hagiirraamo ikkino. Imbaaqoomi lawishsha harunsineemmoha ikkiro, iimi Anninke Yihowa hanqafe sheshifachishannonke! Tenne busha alamera heeꞌne kawiinni saꞌino shesho mamiinni afiꞌra dandiineemmo?