Isi togo yiinonsa: “Tenne gobba moottoolla mannu aana roorre afidhino. Gashshaanono mannaho danchare assitannoreeti yinanninsa. Kiꞌne kayinni insa gede ikka dihasiissannoꞌne.”—Luq. 22:25, 26.

Yesuusi, mannaho danchare assitannoreeti yiinori ayeooti? Hundi misilla, saantuwanna borruwa leellishshanno garinni Giriiketenna Roomu daga, maccaha ikkino mannanna gashshaano Yuwerjetiisi woy mannaho danchare assitannoreeti yite ayirrisate rosichi noonsa. Mannu insa ayirrisannohu dagate kaaꞌlannore assitino daafiraati.

Mannaho danchare assitannoreeti yaanno suꞌma afidhinori batinye mootoolla no. Kuri giddo Gibitsete gashshaano Tolomi Sayikkihonna Tolomi Settikkiho; Roomu gashshaano Juuliyesi Qeesaarinna Awugisxoosira, hattono Yihudu moote Bayiriidi Heroodiisira konne suꞌma uyinoonninsa. Heroodiisi konne suꞌma afiꞌrinohu mannu hudiꞌrannokki gede wole gobbanni sinde abbisiisinohuranna buxanete uduunne uyinohura ikkikki digatino.

Jarmanennihu Qullaawu Maxaafi fullahaanchi Adoolfi Dismaani, mannaho danchare assitannoreeti yaanno suꞌmi gobba baala tuqinota coyiꞌrino. Isi togo yiino: “Tenne [konne suꞌma horoonsiꞌnannita] leellishshannota xibbunni kiirranni mashalaqqe hundi borronni hasiꞌni gede afiꞌra dandiinanni.”

Ikkina Yesuusi rosaanosi, “Kiꞌne kayinni insa gede ikka dihasiissannoꞌne” yiinohu mayiraati? Yesuusi manna kaaꞌlitannokki gede woy danchare assitannokki gede kulanni noonsa yaateni? Deeꞌni. Yesuusi mannaho danchare assate kakkayisannori daafira coyiꞌranni nooha lawanno.

Yesuusi waro, dureeyye dancha suꞌma afiꞌrate yite mannu laꞌꞌanni boohaarannore, ispoortete bayicho, paarke, magansiꞌnanni basenna wole togoore loosiisate woxe fushshitanno. Ikkollana insa konne assitinohu maccaha ikkate, mannu naadansara woy dooransara yiteeti. Mitte borro, “Insa giddo shaqqillunni kaꞌe uyitannori nooha ikkirono, mitootu togo assitannohu poletiku hasattonsa wonshateeti” yitino. Yesuusi harunsaanosi togoo halchonna hasatto qorophitanno gede jawaachishinonsa.

Shiimu diri gedensaanni, soqqamaanchu Phaawuloosino mannaho aate kakkayisanno coyi daafira halaale coyiꞌrino. Isi Qorontoosi heeꞌranno Kiristaanira togo yee borreessino: “Maganu hagiidhe aannoha baxanno daafira, mittu mittunku wodanisinni baxe hagiidhanni oo ikkinninna, lamu wodaninni woy baxikkinni qarrame oonke.”—2 Qor. 9:7.