YESUUSI, “Adhannonkunni aannohu baˈraaˈrinoho” yiino. (Soq. 20:35) Konne xintu halaale harunsa Yihowa ledo noonke jaalooma kaajjishshanno. Hiittonni? Yihowa hagiirraamma ikkineemmo gede kiire gundannikki aamamooshshe uyinonke; ninkeno Yihowara aamamooshshe uyine roore hagiirre afiˈra dandiineemmo. Ikkina Yihowara maa aa dandiineemmo? Lawishsha 3:9, “Jirokki aaninni . . . fushshaate assite aatenni Kaaliiqa ayirrisi” yitanno. ‘Jirote’ yaa yannankeeti, dandoonkeeti, wolqankeetinna woxenkeeti. Tenne jironke addu magansiˈra halashshate horoonsiˈneemmo woyite, Yihowara aamamooshshe uyinanni heeˈnoommo yaate; tini qolte lowo hagiirre afiˈneemmo gede assitannonke.

Jironkenni Yihowara aamamooshshe aate badhera hingeemmokki gede kaaˈlannonkeri maati? Soqqamaanchu Phaawuloosi Qorontoosira heeˈranno Kiristaani “mittu mittunku noosi woxi aaninni” fushsho fushshanno gede kulinonsa. (1 Qor. 16:2) Qooxeessikkira fushsho fushshinanni gari daafira roore mashalaqqe afiˈrate ma assa dandaatto? Aante noo saaxine lai.

Interneetete widoonni fushsho fushsha dandiinannihu baalante gobbara diˈˈikkino. Ikkirono wole doogonni fushsho fushshate webisayitete aana mashalaqqe afiˈra dandaatto. Mite gobbara, fushsho fushshate daafira duucha hinge xaˈminoonni xaˈmuwara tenne webisayite aana dawaro qolloonni.