1-2. (a) Efesooni Sokka 6:16 kultanno garinni ‘ammanate wonqo’ hasiissannonkehu mayiraati? (b) Konni birxichira hiikkuri xaꞌmuwara dawaro afiꞌneemmo?

 ‘AMMANATE wonqo’ nooꞌne? (Efesooni Sokka 6:16 nabbawi.) Nooꞌneti dihuluullissannote. Wonqo mittu olamaanchira rooriidita bisisi kifile agartannonte gede ammanankeno tenne busha alame giddo ikkitote maaeellenni, finqilletenna wolu Maganu giwanno coyinni battaambeemmokki gede agartannonke.

² Heeꞌnoommohu ‘goofimarchu barri’ giddo ikkino daafira barru baala ammananke fonqolannori tuncu yaannonke. (2 Xim. 3:1) Ammananke wonqo kaajjite nootanna teꞌee layiꞌra dandiineemmohu hiittoonniiti? Ammanate wonqonke kaajjishiꞌra dandiineemmohu ma garinniiti? Hanni kuriuu xaꞌmuwa dawaro laꞌno.

3. Olanto wonqonsa ma assa hasiissannonsa? Mayira?

³ Hundi waro olantote goga aanaho gomboonni wonqo heedhannonsa. Olanto wonqonsara gogu taꞌꞌannokki gedenna siwiilu cilannokki gede aanaho zayite buurtanno. Mittu olamaanchi wonqosi gawajjantinota afiro rahe haaroonsiꞌranno; konni garinni isi woꞌmanka woyite aane olamanno olira qixxaawinoha ikkanno. Kuni lawishshi ammananke ledo xaadannohu hiittoonniiti?

4. Ammananke layiꞌra hasiissannonkehu mayiraati? Hatto assa dandiineemmohu hiittoonniiti?

⁴ Hundi wari olanto gede, ninkeno ganyine ammananke  wonqo layiꞌranna haaroonsiꞌra hasiissannonke; hatto assinummoro woꞌmanka woyite olaho qixxaambe heeꞌnoommo yaate. Kiristaana ikkinoommo daafira ayyaanaamittete ola olammanni heeꞌnoommo; diinnanke qolte busha ayyaannaati. (Efe. 6:10-12) Aye manchino ammananke wonqo haaroonsankera didandaanno. Iillannonke fonqolo dandiine saꞌꞌate qixxaamboommota buuxiꞌra dandiineemmohu hiittoonniiti? Umihunni Maganu kaaꞌlo afiꞌrate huucciꞌra hasiissannonke. Hattono, ninkeneeto Maganu laꞌꞌannonke garinni layiꞌneemmo gede kaaꞌlankera Qaalesi horoonsiꞌra hasiissannonke. (Ibi. 4:12) Qullaawu Maxaafi togo yaanno: “Woꞌmu wodanikkinni Kaaliiqa addaxxi ikkinninna, umikki egennora irkidhooti.” (Law. 3:5, 6) Tenne wodana wodhitine muli yanna giddo mayi tuncu yiinoꞌneronna hakko coye dandiitine saꞌꞌate maa asstinoonniro mayira wirro dilayidhinanni? Lawishshaho, miinju anje buuto qarrissinoꞌne? Yihowa Ibiraawoota 13:5 aana “horo diagureemmohe; dicallachisheemmohe” yee eino qaali qulli yinoꞌne? Kuni qaali Yihowa kaaꞌlannoꞌneta addaxxitinanni gede diassinoꞌne? Hatto ikkoro, ammanate wonqoꞌne danchu garinni amaxxitine heedhinoonni yaate.

5. Ammanaꞌne layidhinanni woyite maa huwattinara dandiitinanni?

⁵ Ammanaꞌne seekkitine layidhiniro dhagge ikkannore affinara dandiitinanni. Konni albaanni wodanchitinoonnikki laanfe nooꞌneta huwattinara dandiitinanni. Lawishshaho, hasiissannokki yaaddo, kaphunna hexxo mudha ammanaꞌne gawajjitanni noota huwattinara dandiitinanni. Togoori ammanaꞌne gawajjanni nooha ikkiro, ammanaꞌne roore daafannokki gede gargadha dandiitinannihu hiittoonniiti?

6. Dancha yaaddoha mito lawishsha kuli?

⁶ Mite yaaddo danchate. Lawishshaho, Yihowanna Yesuusa hagiirsiisate yaada danchate. (1 Qor. 7:32) Shota ikkinokki cubbo loonsummoro, Maganu ledo noonke jaalooma wirro haaroonsiꞌrate yaandeemmo. (Far. 38:18) Qoleno, galtenke hagiirsiisate, hattono maatenkenna ammanate roduuwanke towaatate yaandeemmo.—1 Qor. 7:33; 2 Qor. 11:28.

7. Lawishsha 29:25 kultanno garinni manna waajja hasiissannonkekkihu mayiraati?

⁷ Wole widoonni kayinni hasiissannokki yaaddo ammananke gawajjitara dandiitanno. Lawishshaho, gari sagalenna uddano afiꞌrate barru baala yaandammora dandiineemmo. (Mat. 6: 31, 32) Togoo yaaddo maalaamittete jiro afiꞌrate calla illachinsheemmo gede assitankera dandiitanno. Woxu baxilli nafa amadankera dandaanno. Togoo coyi amadankera wodhinummoro, Yihowara noonke ammana laaffaranna ayyaanaamittetenni buuto gawajjammammora dandiineemmo. (Maq. 4:19; 1 Xim. 6:10) Woy wolu gariti hasiissannokki yaaddo amadankera dandiitanno, lawishshaho, mannu naadankera hasiꞌne quwa saꞌne yaandammora dandiineemmo. Qoleno Yihowa dadillisa waajjatenni roore mannu mishannonketa woy darte waajjinammora dandiineemmo. Iillannonke qarra dandiine saꞌne togoo gawajjonni ninkeneeto agadha dandiineemmo gede, Yihowa ammananna worbimma aannonke gede huucciꞌra hasiissannonke.—Lawishsha 29:25 nabbawi; Luq. 17:5.

8. Mittu manchi kapho hasaawa hanafinkero maa assa hasiissannonke?

⁸ ‘Kaphu anna’ ikkinohu Sheexaanu Yihowanna ammanate roduuwinke daafira kapho  tuqisate isi gashshe noo manna horoonsiꞌranno. (Yoh. 8:44) Lawishshaho, kaadaasine Yihowa dirijjite daafira webisayitete, televizhiinetenna wolu tuqu xaadooshshi widoonni qolte kapho tuqissanno. Kuni kaphi Sheexaanunnihu ‘giirate gede wala yaanno koottali’ widooti. (Efe. 6:16) Mittu manchi togoo kapho hasaawa hanafinkero, maa assa hasiissannonke? Macciishsha dihasiissannonke. Mayira? Korkaatuno Yihowa ammanneemmo hattono ammanate roduuwanke dihuluullammeemmo. Ayino woy aye coyino wole agurina, kultannonkere afate quqquxamme nafa insa ledo hasaawa woy heewisama dihasiissannonke.

9. Hexxo mudha gawajjitankera dandiitannohu hiittoonniiti?

⁹ Hexxo mudha ammananke laafa ikkitanno gede assitara dandiitanno. Mite yannara qarru iillannonke woyite, hexxo mudhinammora dandiineemmo; qoleno iillinonke qarra lashshi assa dihasiissannonke. Ikkollana, yanna baala qarrinke daafira calla heda dihasiissannonke. Yanna baala qarrinke daafira calla hendeemmoha ikkiro, Yihowa aankera qaale einoti dhaggete hexxo dahaabbankera dandiitanno. (Aju. 21:3,  4) Qoleno, hexxo mudha wolqa baꞌne Yihowara soqqama agurreemmo gede assitankera dandiitanno. (Law. 24:10) Ikkollana togoo coyi iillannonkekki gede assa dandiineemmori no.

10. Mitte rodoo borreessitino sokkanni maa ronseemmo?

¹⁰ Hanni Ameerikaho heedhannoti mitte rodoo buuto xiwamino minaannase dhiwansiisidhanni heedhe ammanase kaajjado ikkitanno gede assidhino gara laꞌno. Ise qara biirora togo yite borreessitino: “Heeꞌnoommo gari yaachishannoho, hattono mito woyite wolqa baꞌneemmo; ikkirono, hexxonke kaajjadote. Yihowa ammananke kaajjishatenna ninke jawaachishate batinyere qixxeessino daafira lowo geeshsha galaxxeemmasi. Tini amaalenna jawaante lowo geeshsha hasiissannonkete. Togoo amaalenna jawaante Sheexaanu ninke gawajjate abbanno qarra dandiine Yihowara soqqammanni heeꞌneemmo gede kaaꞌlitinonke.” Tini rodoo coyidhinorinni hexxo mudhineemmo  gede assanno qarra qeele saꞌꞌa dandiineemmota ronseemmo. Hiittoonni? Qarru iillanni noonkehu Sheexaanu fonqolannanke ikkinota dea dihasiissannonke. Yihowa sheshote buicho ikkinota ammana hasiissannonke. Hattono shiqishannonketa ayyaanaamittete sagale naada hasiissannonke.

11. Ammananke noo gara layiꞌrate ninkeneeto hiikkuri xaꞌmuwa xaꞌma hasiissannonke?

¹¹ Ammanate wonqoꞌne haaroonsiꞌra hasiissannoꞌne ragi noota afidhini? Saꞌute boode aganna giddo hasiissannokki yaaddo hooꞌlitinoonni? Kaadaasine tuqissanno kapho macciishshanna insa ledo heewisama gibbinoonni? Hexxo mudhitinanni gede assannoꞌne qarra cincitine saꞌinoonni? Hatto ikkiro, ammanaꞌne danchu garinni no yaate. Ikkirono, Sheexaanu ninke gawajjate horoonsiꞌrannohu wolu massaarino noosi daafira woꞌmanka woyite baqqi yine agadha hasiissannonke. Hanni konni massaari giddo mitto laꞌno.

12. Jirote baxilli maa assankera dandaanno?

¹² Jirote baxilli hedonke bebbeeharanna ammanate wonqonke lashshi assine agurreemmo gede assankera dandaanno. Soqqamaasinchu Phaawuloosi togo yiino: “Olaho fulanno manchi hajajaanchosi hagiirsiisara qixxaawa hasiissannosi ikkinnina wole hajo giddora dieanno.” (2 Xim. 2:4) Roomu olanto wolu loosi giddora eꞌara difajjinanninsa. Mittu olamaanchi tenne giwe wolu loosi giddora eiro mayi ikkara dandaanno?

13. Mittu olamaanchi wolu loosi giddora eannokkihu mayiraati?

¹³ Hanni tenne ikkito hedde. Mitte olantote gaamo soodo bisensa amadde olaho qajeeltanni no; insa giddonni mittu kayinni qaajeelara dihaꞌrino. Isi katamaho sagalete mine sagale hiꞌranni kabbi facci yaanni no. Hawarro olanto olu uduunnensa layidhanno, hattono bisensa gamaxidhanno. Sagalete mini noosi olamaanchi kayinni layinki barra hiranno sagale qixxeessiꞌranni no. Layinki barra kayinni hedeweelcho diinu daye buuto siꞌꞌi. Ikkina, roore gara ikkinore assinohunna hajajaanchosi hagiirsiisinohu hiikkonne olamaanchoti? Ati olu yannara mulekki uurrara hasiꞌrattohu hiikkonne olamaanchooti? Qixxaawe  agadhinohonso, sagale hiꞌranni kabbi facci yiiho?

14. Kiristoosi olanto ikkinoommo daafira roorsine laꞌneemmo coyi maati?

¹⁴ Dancha olanto gede, ninkeno roorsine laꞌneemmo coyi hajajaanonke Yihowanna Kiristoosa hagiirsiisate. Insa hagiirsiisa Sheexaanu alame uyitannonke coyi baalunkunni roorsine laꞌneemmo. Yihowara soqqamate, ammanate wonqonke layiꞌratenna wole ayyaanaamittete massaaranke danchu garinni amaxxineemmo yannanna wolqa noonketa buuxiꞌra hasiissannonke.

15. Phaawuloosi mayyee qorowisiisinonke? Mayira?

¹⁵ Woꞌmanka woyite baqqi yine agadha hasiissannonke. Mayira? Soqqamaasinchu Phaawuloosi “dureeyye ikka hasidhannori jifante ubbanno” yee qorowisiisino. (1 Xim. 6:9, 10) “Ubbanno” yaanno qaali hasiissannokki jiro afiꞌrate yine hedonke bebbeehantanno gede assiꞌnammora dandiineemmota leellishanno. Qoleno, haafanna gawajjitanno yorto wodaninke giddo lophitanno gede assiꞌnammora dandiineemmo. Togoo yorto wodaninke giddo lophitara wodha agurre gawajjannonke massaari gede assine laꞌꞌa hasiissannonke.

16. Maarqoosi 10:17-22 noo xagge hiikkuri xaꞌmuwa hiincineemmo gede assitannonke?

¹⁶ Batinye maalaamittete coye hidhineemmo  woxi noonke yine hendo. Ikkina mittu coyi hakkeeshshi geeshsha hasiisannonkekkiha ikkirono, baxisinonke daafira calla hidhanke soꞌro afidhinoni? Diafidhino. Ikkollana hanni aante noo xaꞌmuwa hiincino: Hakko uduunnicho hidhate woxu noonkeha ikkirono, iso horoonsiꞌratenna towaatate yannanna wolqa nooe? Qoleno maalaamittete coye quwa saꞌne banxeemmo? Maalaamittete jirora noonke baxilli Maganoho albinni roore soqqamara Yesuusi koyiseennasi agure badhera higi wedellichi gede assitanni noonke ikka? (Maarqoosi 10:17-22 nabbawi.) Lowo geeshsha hasiisanno coyi heeshshonke bikkunnita assiꞌne muxxe yannankenna wolqanke Maganu fajjo wonshate horoonsiꞌrate.

17. Maa dea dihasiissannonke?

¹⁷ Olammanni heeꞌnoommotanna olaho barru baala qixxaawa hasiissannonketa horo dea dihasiissannonke. (Aju. 12:17) Roduuwinke ninkera ammanate wonqonke diamaddannonke. Ammananke kaajjishiꞌra hasiissannonkeri ninke umonkeeti.

18. Hundi waro olanto wonqonsa seekkite amaxxa hasiissannonsahu mayiraati?

¹⁸ Hundi waro olu basera worbimma leellishino olamaanchi ayirrinye afiꞌranno. Kayinni wonqosi olu bayicho hune dayino olamaanchi lowo geeshsha saalanno. Tasiteesi yinannihu mittu Roomu xagge borreessaanchi “mittu olamaanchi wonqosi olu bayicho hune higa lowo shollinyeeti” yee borreessino. Olamaanno wonqonsa seekkite amaxxa hasiissannonsahu mittu korkaati konneeti.

19. Ammanate wonqonke kaajjishiꞌra dandiineemmohu hiittoonniiti?

¹⁹ Kiristaanu gambooshshe ganyine haꞌne, Yihowa suꞌmanna Mangistesi daafira wolootaho farciꞌne, ammanate wonqonke seekkine amaxxa dandiineemmo. (Ibi. 10:23-25) Qoleno barru baala Maganu Qaale nabbawanna giddosi noo amaale loosunni leellisha hasiissannonke. (2 Xim. 3:16, 17) Hatto assinummoro, Sheexaanu aye massaarano horoonsiꞌre hegerera gawajjankera didandaanno. (Isa. 54:17) ‘Ammanate wonqonke’ agartannonke. Ammanate roduuwinke ledo kaaꞌlamme kaajjine uurrineemmo. Hattono barru baala olammeemmo olira qeelle afiꞌneemmotano agurranna, albillitte Yesuusi Sheexaanunna harunsaanosi ledo olame qeelanno woyite Yesuusi wido ikkineemmo.—Aju. 17:14; 20:10.