1. Yihowa maa assineemmo gede fajjinonke?

YIHOWA heeshshonke giddo doorsha doodhineemmo gede fajjinonke. Isi dancha doorsha doodhineemmo gede rosiisannonke, hattono iso hagiirsiisanno doorsha doodhineemmo woyite hendoommori qinaannonke gede kaaˈlannonke. (Far. 119:173) Maganu Qaali giddo noo hayyo harunsinummoro, roore dancha doorsha doodha dandiineemmo.—Ibi. 5:14.

2. Mitto coye doodhinummohu gedensaanni, mayi qarra ikkankera dandaanno?

² Dancha doorsha doodhinummoro nafa, hananfoommore umo fushsha qarrissankera dandiitanno. Hanni mito lawishsha laˈno: Mittu wedellichu rodii, Qullaawa Maxaafa nabbawe gudate murciˈrino. Isi boode lamala geeshsha dancha gede nabbawinoha ikkirono, mitu korkaatinni nabbawa agurino. Mitte rodoo, woˈma yanna suwisaancho ikkate murcidhino; ikkollana, techo gaˈa yitanni suwisaancho ikkitukki keeshshitino. Cimeeyyete bisi, songote giddo noo halashshaano albinni roore towaatate murino; ikkollana lowo aganna gedensaannino towaanyo dihanafino. Tini ikkito babbaxxitinota ikkiturono, mitto assannonsari no. Insa heddinore umo difushshitino. Umi xibbi dirira heedhinori Qorontoosi Kiristaanirano konne lawanno qarri iillinonsa. Insa lawishshinni maa ronseemmoro hanni laˈno.

3. Qorontoosi Kiristaani maa assate murino? Ikkollana insa maa diassitino?

³ Qorontoosira heeˈranno Kiristaani 55 M.D. balla mitto dancha coye assate murino. Insa Yerusaalametenna Yihudaho heedhanno roduuwa qarrunna buxima amaddinonsatanna wole songuwa kuri roduuwa kaaˈlate woxe fushshitanni noota affino. Qorontoosira heedhanno Kiristaanino shaqqillunni kaˈe roduuwansa kaaˈlate heddino; konnira ma garinni kaaˈlitannoro afate soqqamaasincho Phaawuloosi xaˈmitino. Hakkiinni Phaawuloosi songote  biddishsha soyino, hattono woxe gamba assa kaaˈlanno gede Tiito shoomino. (1 Qor. 16:1; 2 Qor. 8:6) Boodu agani gedensaanni kayinni, Phaawuloosi Qorontoosi Kiristaani roduuwa kaaˈlate woxe fushshitinokkita macciishshino. Insa fushshitanno woxi wole songuwa fushshitino woxi ledo Yerusaalame haaˈre haˈrate qixxaawinokkiha ikkara dandaanno.— 2 Qor. 9:4, 5.

4. Layinki Qorontoosi 8:7, 10, 11 kultanno garinni, Phaawuloosi Qorontoosi Kiristaana maa assanno gede jawaachishino?

⁴ Qorontoosi Kiristaani assate murinori danchareeti; qoleno Phaawuloosi insara kaajja ammana noonsahuranna shaqqille leellishate hasatto noonsa daafira galatinonsa. Hattono hanaffinore umo fushshitanno gede jawaachishinonsa. (2 Qorontoosi 8:7, 10, 11 nabbawi.) Insara tuncu yiinonsa coyinni, ammanamino Kiristaani nafa dancha coye assate muriro hakko coye wonsha qarra ikkitansara dandiitannota ronseemmo.

5. Hiikkuri xaˈmuwara dawaro afiˈneemmo?

⁵ Qorontoosi Kiristaani gede, ninkerano assate hendoommo coye umo fushsha qarra ikkitankera dandiitanno. Mayira? Korkaatuno, guuntete xeˈne noonke daafira, techo gaˈa yinanni badhera hingammora dandiineemmo. Woy hedeweelcho ikkito tuncu yite hendoommore wonshineemmokki gede guficho ikkitankera dandiitanno. (Ros. 9:11; Rom. 7:18) Doodhinoommo coye wirro layiˈranna hasiisannoha ikkiro biddi assiˈra dandiineemmohu hiittoonniiti? Hendoommore danchu garinni wonsha dandiineemmohu hiittoonniiti?

6. Doodhinoommo coye biddi assiˈra hasiissannonkehu mayira ikkara dandaanno?

⁶ Mitu doorshi horo soorra hasiissannonkekkiho. Lawishshaho, Yihowara soqqamate doodhinoommo doorshinni kaajjine heeˈranna galtenkera ammanamate eˈnoommo qaale agadha hasiissannonke. (Mat. 16:24; 19:6) Wole doorsha kayinni biddi assiˈra hasiissankera dandiitanno. Mayira? Korkaatuno mitu coyi soorramara dandaanno. Ikkina dancha doorsha doodhate kaaˈlitannonke coyibba hiikkuriiti?

7. Maa afiˈrate huucciˈra hasiissannonke? Mayira?

⁷ Hayyo afiˈrate huucciˈri. Yaiqoobi qullaawu ayyaaninni togo yee borreessino: “Kiˈne mereero hayyo ajjinosihu heeˈriro, Magano marro marro hige huucciˈro; korkaatuno Maganu mishikkinni baalunkura shaqqillunni aanno.” (Yai. 1:5) Ninke baalunkura mite doogonni ‘hayyo ajjannonke.’ Konnira, mitto coye doodhineemmo woyiteno ikko doodhinoommore wirro layiˈneemmo woyite Yihowa addaxxa hasiissannonke. Hatto assinummoro, isi hayyotenni doodha dandiineemmo gede kaaˈlannonke.

8. Mitto coye doodhinammora albaanni maa assa hasiissannonke?

⁸ Seekkite xiinxalli. Amaale afiˈrate Maganu Qaale xiinxalli, Yihowa dirijjite qixxeessitino borro nabbawi, hattono ammanatto manna amaaˈli. (Law. 20:18) Loosonke soorriˈnammora, wolewa haˈne heeˈnammora, woy Yihowara soqqamate hasiisannonkere afiˈneemmo gede kaaˈlannonke roso doodhinammora albaanni kuri coyibba assa hasiissannonke.

9. Mitto coye assate kaˈnoommohu mayiraatiro ammanamme layiˈranke kaaˈlitannonkehu hiittoonniiti?

⁹ Mitto coye doodhatto gede assinoheri maatiro hedi. Yihowa mitto coye assate kaˈnoommohu mayiraatiro afa hasiˈranno. (Law. 16:2) Isi baalunkurinni ammanammoommore ikkinammora hasiˈranno. Hakko daafira, mitto doorsha doodhate kaˈneemmo gede assinonkeri maatiro ammanamme layiˈra hasiissannonke. Hatto assa hoongummoro, doodhinoommo doorshinni kaajje uurra qarra ikkitankera dandiitanno. Lawishshaho, mittu wedellichu rodii woˈma yanna suwisaancho ikkate doodhara dandaanno. Ikkollana boode yanna gedensaanni isira suwisaano soqqantanno geeshshi saate soqqama  qarra ikkitinosi; qoleno soqqanshosinni hagiirre hoogino. Isi ‘Suwisaancho ikkeemmo gede kakkayisinoehu qaru coyi Yihowa hagiirsiisate nooe hasattooti’ yee hedinoha ikkara dandaanno. Ikkollana isi suwisaancho ikkanno gede assinosihu qaru coyi, annasinna amasi woy wole baxanno mancho hagiirsiisate noosi hasattolla ikkita?

10. Mitto coye biddi assiˈrate mayi kaaˈlannonke?

¹⁰ Hanni mittu Qullaawu Maxaafi rosaanchi sijaara aga agurate murciˈrino yine hendo. Isi umi qara ikkita ikke mitte woy lame lamala geeshsha sijaara agurinoha ikkirono, wirro agate higino. Jeefote kayinni isi sijaara woˈmunni woˈma agurino! Yihowara noosi baxillinna iso hagiirsiisate noosi hasatto konne busha rosicho qeeˈlanno gede kaaˈlitinosi.—Qol. 1:10; 3:23.

11. Mixo fushshiˈra hasiissannonkehu mayiraati?

¹¹ Mixo fushshiˈri. Mixo fushshiˈrittoro, hanafoottore umo fushsha diqarrissannohe. Lawishshaho, Qullaawa Maxaafa barru baala nabbawate murciˈroottoha ikkara dandaanno. Hatto assate pirogiraame fushshiˈra hoogittoro kayinni, hedoottore wonsha qarra ikkitahera dandiitanno. * Woy songote cimeeyye hoshsha albinni roore ganyite towaatate murtinoha ikkara dandaanno; ikkollana insa yannate gedensaannino hatto assa dihanaffino. Cimeeyye heddinori qinaannonsa gede insaneeto aante noo xaˈmuwa xaˈma dandiitanno: “Roore towaanyo hasiissannonsa roduuwi ayeootiro bandoommo? Kuri roduuwa towaanteemmo barra murroommo?”

12. Maa assa hasiissannonkeha ikkara dandaanno? Mayira?

¹² Quwa saˈooti. Hasiˈrinore baala assate ikkitanno yanna, jajji, woy wolqa noosi manchi dino. Konnira quwa saˈˈattokkihanna dhukakki afoottoha ikki. Assate hedoottore umo fushsha dandaattokkita huwatittoro, doorshakki biddi assiˈra hasiissannoheha ikkara dandaanno. (Ros. 3:6) Wole widoonni kayinni, doodhoottore taxxi yite hedde, biddi assiˈra hasiissannoheri heeˈriro biddi assidhe, hedoottore assate qixxaawattora dandaatto. Hanni hanafoottore umo fushshate kaaˈlannoheha onte coye laˈno.

13. Hendoommore umo fushshate wolqa afiˈra dandiineemmohu hiittoonniiti?

¹³ Hedoottore wonshate jawaante afiˈrate huuccatto assiˈri. Maganu assate hedoottore umo fushshatto gede wolqa aahera dandaanno. (Fil. 2:13) Konnira Yihowa qullaawu ayyaanisi widoonni hasiissannohe wolqa aannohe gede huucciˈri. Huuccattokkira bayichonko dawaro afiˈroottokkiha lawihero nafa huucciˈra agurtooti. Yesuusi yino garinni, qullaawa ayyaana ‘uyinannihe’ gede ganyite huucciˈri.—Luq. 11:9, 13.

14. Lawishsha 21:5 noohu xintu seeri assate hendoommore umo fushshate kaaˈlannonkehu hiittoonniiti?

¹⁴ Assattore balaxxe muri. (Lawishsha 21:5 nabbawi.) Hanafootto looso umo fushshate, balaxxe loosattore mura hasiissannohe. Hakkiinni murootto garinni loosokki loosa hasiissannohe. Hatteente gede, mitto coye assate murciˈrittoro, hakko coye umo fushshate assa hasiissannohe coyibba borreessite amaxxi. Qoleno shota ikkinokki loosi heeˈriro bebbeekke kaˈe shiima shiima loosakki, mageeshsha loosoottoro afate kaaˈlitannohe. Phaawuloosi, Qorontoosi Kiristaani isi dayi gedensaanni woxe fushshate kachaachamantenni, lamalate giddo umi umi barra fushshitanno gede jawaachishinonsa. (1 Qor. 16:2) Looso bebbeenke shiima shiima loosa, loosu wolqankera aleenni higino yine yaandeemmokki gedeno kaaˈlitannonke.

15. Assattore muritto gedensaanni, maa assa dandaatto?

¹⁵ Assate hendoommore borreessine amaxxanke, hendoommore loosu aana hosiisate kaaˈlitannonke. (1 Qor. 14:40) Lawishshaho  cimeeyye gambooshshe assidhanno woyite insa giddo mittu cimeessi insa assate murtinore baala borreesse amadanno gede biddishsha uyinoonninsa; kuni rodii mitto looso loossanno gede worroonni roduuwi, loosonsa mamooti geeshsha loosse guddannorono borreessanno. Cimeeyye konne biddishsha harunsitannoha ikkiro, assate murtino coye roorenka umo fushsha dandiitanno. (1 Qor. 9:26) Ati umikki hajono konni garinni wonshiˈra dandaatto. Lawishshaho, barru giddo assate hedoottorira pirogiraame fushshiˈranna balaxxe loosate hedoottore umi adda borreessiˈra dandaatto. Hatto assakki, hanafoottore umo fushshate calla ikkikkinni, shiima yanna giddo lowo looso loosateno kaaˈlitannohe.

16. Hendoommore umo fushshate maa assa hasiissannonke? Roomu Sokka 12:11 tennera kaaˈlitannonkehu hiittoonniiti?

¹⁶ Diinaggaabbe loosi. Hedoottore loosu aana hosiisatenna hanafoottore umo fushshate sharrama hasiissannohe. (Roomu Sokka 12:11 nabbawi.) Phaawuloosi, Ximootewoosi rosiisate dandoosi woyyeessiˈrate sharramannonna ‘jaate’ loosanno gede kulinosi. Wole ayyaanaamittete mixo wonshiˈrateno tenne amaale harunsa dandiineemmo.—1 Xim. 4:13, 16.

17. Efesooni Sokka 5:15, 16 hendoommo coye umo fushshate kaaˈlitannonkehu hiittoonniiti?

¹⁷ Yannakki hayyotenni horoonsiˈri. (Efesooni Sokka 5:15, 16 nabbawi.) Hedoottore loosu aana hosiisatto yanna doori; hakkiinni hedoottore murootto yannara loosi. Hedoottore wonshate baaluri injaahe geeshsha agadhitooti; korkaatuno baaluri injaa hoogahera dandaanno. (Ros. 11:4) Hakkeeshshi geeshsha hasiisannokki coyi, lowo geeshsha hasiisannore loosatto yannanna wolqa gudahera wodhitooti. (Fil. 1:10) Dandaamannoheha ikkiro, hedokki billaallisannori batiˈrannokki saate doodhi. Wolootaho anga mitiiˈmite noottota kuli. Silkekki cufanna sonkoonnihe sokka woy dagoomittete webisayite loosokki guditto gedensaanni laˈˈa dandaatto. *

18-19. Dancha doorsha doodhitto gedensaanni guficho ikkannore qeelate mayi kaaˈlahera dandaanno?

¹⁸ Afiˈratto guma illachishi. Mitto doorsha doodhinummo gedensaanni afiˈneemmo gumi, doogo haˈne iillineemmo base gedeeti. Hedoottowa iilla hasiˈrittoro, doogo cunfoonniha ikkiro nafa, wole widoonni higge haˈra hasiissannohe. Hatteente gede, mitto doorsha doodhinummoro afiˈneemmo guma illachishanke, guficho ikkannori tuncu yaannonke woyite ranke hexxo mudhineemmokki gede kaaˈlitannonke.—Gal. 6:9.

¹⁹ Dancha doorsha doodha shota diˈˈikkitino; doodhinoommo coye assano qarra ikkitankera dandiitanno. Ikkollana Yihowa irkonni, hanafoottore umo fushshate kaaˈlitannohe hayyonna jawaante afiˈra dandaatto.