1-2. Xaa yannara Kiristaanu Leewaawootu maxaafa quqquxame xiinxalla hasiissannonsahu mayiraati?

 SOQQAMAASINCHU Phaawuloosi wedellichu jaalisi Ximootewoosira, “Qullaawa Borro baala Maganunnihu Qullaawu Ayyaani kulanna borreessinoonnitenna kaaꞌlitannote” yee qaagiissinosi. (2 Xim. 3:16) Tenne maxaaffa giddo mittu Leewaawootu maxaafati. Ati konne maxaafa laꞌꞌattohu hiittoonniiti? Mitu yannankera kaaꞌlitannori nookkita batinye wodho amadino maxaafi gede assite laꞌanno; addu Kiristaanira kayinni baxxitino lao noonsa.

² Leewaawootu maxaafa borreessinoonnihu mitu 3,500 diri albaanniiti; ikkirono, Yihowa “rosiisankera” baikkinni keeshshanno gede assino. (Rom. 15:4) Leewaawootu maxaafi Yihowa hedo afate kaaꞌlannonke daafira quqquxamme xiinxalla hasiissannonke. Konni qullaawu ayyaaninni borreessinoonni maxaafinni batinye roso rosa dandiineemmo. Hanni kuri giddo shoole laꞌno.

3. Cubbo Diwate Barra kakkalo shiqinshannihu mayiraati?

³ Umi roso: Yihowa kakkalonke adhanno gede iso hagiirsiisa hasiissannonke. Cubbo Diwate Barra Israeelete daga mitteenni dagge saadate kakkalo shiqishshanno. Tini kakkalo Israeelete daga cubbinsanni keeraaꞌma hasiissannonsata qaagate kaaꞌlitannonsa. Kayinni kakkalaanote biili hakko barra kakkalote shiqqino mundee haaꞌre Qullaawa Holge eara albaanni balaxe assa hasiissannosiri no; hakkawote isi assannori dagate cubbo agursiisatenni roore hasiisanno coyeeti.

4. Leewaawoota 16:12, 13 kultanno garinni kakkalaanote biili Cubbo Diwate Barra umo Qullaawa Holge eanno woyite maa assanno? (Aaniidi qoolira noo misile lai.)

 ⁴ Leewaawoota 16:12, 13 nabbawi. Hanni Cubbo Diwate Barra ikkannore hendo: Kakkalaanote biili dunkaanu giddora eanno. Isi hakko barra Qullaawa Holge sase hige eannote giddo tini umite. Isi mitte anganni uduunnichoho suꞌnaanno hixaana, mitte anganni qole kashilu nooha culkunni loonsoonni uduunnicho haaꞌranno. Isi Qullaawa Holge baddanno dukko albaanni shiima geeshsha uurranno. Hakkiinni isi lowo ayirrinyinni Qullaawa Holge eꞌꞌe gondooru taawooti albaanni uurranno. Isi lawishshu yaattonni Maganu Yihowa albaanni uurrinohu gedeeti! Kakkalaanchu qorophe qullaawa hixaana kashilu aana woranno; hakkiinni holgu suꞌniillunni tanni yaanno. b Gedensaanni isi cubbo agursiisate shiqqinota mundeete kakkalo haaꞌre wirro Qullaawa Holge eanno. Isi cubbo agursiisate shiqqannota mundeete kakkalo haaꞌre eara albaanni balaxe hixaana wiliishshannota wodanche.

5. Cubbo Diwate Barra hixaana wiliishsha maa rosiissannonke?

⁵ Cubbo Diwate Barra hixaana wiliishsha maa rosiissannonke? Qullaawu Maxaafi ammaname Yihowa magansiꞌranno manni huuccatto hixaanu gede ikkitinota kulanno. (Far. 141:2; Aju. 5:8) Kakkalaanote biili Yihowa albaanni hixaana haaꞌre shiqannohu lowo ayirrinyinni ikkinota wodanche. Hatteente gede ninkeno Yihowa albaanni huuccattote shinqeemmo woyite lowo ayirrinyinni shiqa hasiissannonke. Kalqete alame Kalaqaanchi qaaqqu annisiwa shiqannohu gede isiwa shinqammoranna jaallasi ikkinammora fajjinonke daafira lowo geeshsha galanteemmosi. (Yai. 4:8) Isi jaallasi ikkinammora fajjinonke. (Far. 25:14) Tenne qoosso lowo geeshsha naandeemmo daafira, iso dadillisa dihasiꞌneemmo.

6. Kakkalaanote biili kakkalo shiqishara albaanni balaxe hixaana wiliishshasinni maa ronseemmo?

⁶ Kakkalaanote biili hixaana wiliishshannohu kakkalo shiqishara albaanni ikkinota qaango. Konni garinni, isi Magano hagiirsiisinotanna teꞌee buuxiꞌranno. Tennenni maa ronseemmo? Yesuusi uullate aana noo yannara heeshshosi kakkalo asse shiqishara albaanni balaxe mannu ooso gatonni roore lowo geeshsha hasiisannore assino. Roore hasiisannore yiniri maati? Yesuusi minshe nookkihanna ammanaminoha ikke Yihowa kakkalosi adhanno gede assiꞌrino. Yesuusi konni garinni, mitto coye Yihowa hasiꞌranno garinni assa heeshshonke giddo gara ikkino coye ikkitinota leellishino. Yesuusi Annisi aliidimma woy gashshanno gari garanna taashsho nooha ikkinoti xabbe leeltanno gede assino.

7. Yesuusi uullate aana heeꞌrino heeshsho baalatenni Annasi hagiirsiisinohu hiittoonniiti?

⁷ Yesuusi uullate aana heeꞌri yanna baalantera Yihowahu keeraanchu biddishshira guutu garinni hajajamino. Fonqolu woy qarru wole agurina isi albillitte buuto qarrame reyannota afinoha ikkiro nafa, tini Annisi aliidimma irkisannota dihooltinosi. (Fil. 2:8) Yesuusira fonqolu iillisi woyite “qoonqosi naggi asse wiꞌle huucciꞌrino.” (Ibi. 5:7) Isi giddosinni huucciꞌrino huuccatto ammanamenna Yihowara hajajamanni heeꞌranno gede assitinosi. Yesuusi huuccatto, Yihowara tanni yee suꞌnaanno hixaani gedeeti. Yesuusi heeꞌrino heeshsho baalatenni Annasi lowo geeshsha hagiirsiisino, hattono aliidimmasi xabbe leeltanno gede assino.

8. Yesuusi lawishsha harunsa dandiineemmohu hiittoonniiti?

 ⁸ Ninkeno minshe nookkire ikkinenna Yihowa biddishshiranna seerisira ammanamme heeꞌrate dandiinummore baala assine Yesuusi lawishsha harunsa dandiineemmo. Fonqolu tuncu yaannonke woyite Yihowa hagiirsiisa hasiꞌneemmo daafira kaaꞌlankera iso giddonkenni huucciꞌneemmo. Konni garinni, Yihowa gashshanno gari taalo ikkinota ammanneemmota leellinsheemmo. Yihowa giwannore assinummoro isi huuccattonke macciishshannokkita anfoommo. Yihowa biddishshi garinni heeꞌneemmoha ikkiro kayinni, giddonkenni huucciꞌneemmo huuccatto isi albaanni tanni yee suꞌnaanno hixaani gedeeta ikkitannota dihuluullammeemmo. Qoleno, minshe nookkire ikkankenna ammanamme hajajamanke iimi Annanke hagiirsiissannota anfoommo.—Law. 27:11.

9. Hundi Israeele mittimmate kakkalo shiqishshannohu mayiraati?

⁹ Layinki roso: Yihowara soqqammeemmohu iso galantammoraati. Hanni Yihowara soqqammeemmohu mayiraatiro xawisate, hundi waro addu magansiꞌra giddo lowo geeshsha hasiissannota ikkitinota Israeele shiqishidhannota mittimmate kakkalo laꞌno. c Leewaawootu maxaafinni Israeele mittimmate kakkalo shiqishidhannohu Yihowa ‘galatate’ ikkinota ronseemmo. (Lew. 7:11-13, 16-18) Mittu Israeelaawichi tenne kakkalo shiqishiꞌrannohu hatto assa hasiissannosi daafira calla ikkikkinni baxillunniiti. Isi tenne kakkalo shiqishiꞌrannohu Maganosi Yihowa baxanno daafiraati. Mittu  manchi togoo kakkalo shiqishiꞌranno woyite maatesinna kakkalaano, kakkalate gorrinoonni saada maala ittanno. Kayinni kakkalote gorrinoonni saadaha mito maala Yihowara calla shiqinshanni. Yihowara calla shiqinshannihu hiittoo malaati?

10. Leewaawoota 3:6, 12, 14-16 xawinsoonnite mittimmate kakkalonni Yesuusi Annisi fajjo wonshanno gede assinosiri daafira maa ronseemmo?

¹⁰ Sayikki roso: Baxillunni kaꞌne Yihowara dooraminoha uyineemmo. Yihowa saadate maali giddonni cooma dooraminohu gede asse laꞌꞌanno. Qoleno, isi mite saadate bisi kifile lawishshaho, mule baxxino garinni laꞌꞌannota coyiꞌrino. (Leewaawoota 3:6, 12, 14-16 nabbawi.) Hakko daafira Israeele uminsa fajjonni dooramino maalanna cooma kakkalo assite shiqishshanno woyite Yihowa baxxino garinni hagiidhanno. Togoo kakkalo shiqishiꞌranno Israeelaawichi Maganoho dooraminoha aara hasiꞌrannota leellishanno. Hatteente gede Yesuusino Yihowa baxanno daafira woꞌma lubbosinni soqqame umisi fajjonni Yihowara dooraminoha uyino. (Yoh. 14:31) Yesuusa Maganu fajjo wonsha hagiirsiissannosi; isi Maganu seera lowo geeshsha baxanno. (Far. 40:8) Yihowa Yesuusi umisi fajjonni soqqamanna laꞌꞌanno woyite lowo geeshsha hagiidhanno.

11. Soqqanshonke mittimmate kakkalo gede ikkitinohu hiittoonniiti? Tini sheshifachishshannonkehu ma garinniiti?

¹¹ Mittimmate kakkalo gede, uminke fajjonni Yihowara soqqammeemmo soqqansho iso lowo geeshsha banxeemmota leellishshanno. Yihowa woꞌmu wodaninkenni banxeemmo daafira isira dooraminoha uyineemmo. Yihowa lowo miliyoone ikkanno manni isonna biddishshasi baxanno daafira uminsa fajjonni isira soqqamanna laꞌꞌanno woyite lowo geeshsha hagiidhannoti dihuluullissannote! Yihowa assineemmore calla ikkikkinni hakko coye assineemmohu mayiraatirono laꞌꞌannota qaaganke sheshifachishshannonke. Lawishshaho, lophinyu amadinoheha ikkiro hasiꞌrootto geeshsha isira soqqama hoogattora dandaatto, ikkirono Yihowa assite afattokkiri noota afinota huluullantooti. Yihowara oye afeemmori gariri dinoe yite hedattora dandaatto, ikkirono isi baxillunni kaꞌe wolqakki assitu geeshsha assattore laꞌꞌanno. Isi wolqakki assitu deerrinni dooraminoha uyittoro hagiidhe adhanno.

12. Yihowa mittimmate kakkalo laꞌꞌanno garinni maa ronseemmo?

¹² Mittimmate kakkalonni maa ronseemmo? Kakkalote gorrinoonni saadaha dooramino maala xiniinsiniro wiliile iima higge fultanno; tennenni Yihowa hagiidhanno. Hakko daafira Yihowa umikki fajjonni woꞌma lubbokkinni soqqamattosi woyite hagiidhannota huluullantooti. (Qol. 3:23) Tenne yannara Yihowara lowo geeshsha tashshi yaannosita heda dandaatto! Yihowa isira soqqamate baxillunni kaꞌe assattori lowohano shiimano ikkiro, isiwa noohe jiro gede asse hegere geeshsha qaaganno.—Mat. 6:20; Ibi. 6:10.

13. Leewaawoota 9:23, 24 kultanno garinni Yihowa kakkalaanote qixxaawonni hagiidhinota leellishinohu hiittoonniiti?

¹³ Shoolki roso: Yihowa dirijjitesita uullayidi kifile maassiꞌranni no. Hanni 1512 K.A. Siina Ilaali hunda dunkaana qansi woyite ikkinore laꞌno. (Ful. 40:17) Hakko barra Aarooninna oososi kakkalaano ikkite shoomantu yannara tenne qixxaawo massaginohu Museeti. Israeelete daga kakkalaano mite yite saadate kakkalo shiqishshanna laꞌara daggino. (Lew. 9:1-5) Yihowa tenne haaro kakkalaanote qixxaawonni hagiidhinota leellishinohu hiittoonniiti? Aarooninna Muse manna maassidhuta, Yihowa iiminni giira dirrise kakkallanni bayicho noo kakkalo baala ittanno gede assino.—Leewaawoota 9:23, 24 nabbawi.

14. Yihowa Aarooni sircho ikkitino kakkalaanonni hagiidhasi xaa yannara ninkera hasiissannota ikkitinohu mayiraati?

 ¹⁴ Kakkalaanote biilo shoommi yannara Yihowa assinori maa leellishanno? Yihowa hagiidhinotanna Aarooninna oososi kakkalaano asse doorinota leellishshanno. Israeele Yihowa kakkalaano kaaꞌlanni noota leellishshanno taje laꞌino daafira, insano kakkalaano woꞌmunni woꞌma kaaꞌlitanno gede assannonsahu ikkaddu korkaati noonsa. Tennenni ninke maa ronseemmo? Hundi Israeele waro noo kakkalaano bayiru kakkalaanchira caaleho. Bayiru Kakkalaanote Biilira Kiristoosira isi ledo iima soqqantannori 144,000 kakkalaano noosi.—Ibi. 4:14; 8:3-5; 10:1.

15-16. Yihowa “ammanaminohanna wodanaamo borojjicho” maassiꞌranni noota leellishinohu hiittoonniiti?

¹⁵ Yesuusi 1919 ayyaanunni buurantinota shiima gaamo “ammanaminohanna wodanaamo borojjicho” asse shoomino. Kuni borojjichi sabbakate looso massaganno, hattono Kiristoosi harunsaanora ‘sagale yannatenni aanno.’ (Mat. 24:45, NW) Maganu ammanaminohunna wodanaamu borojjichinni hagiidhinota leellishshanno taje laootto?

¹⁶ Sheexaanunna alamesi ammanaminohanna wodanaamo borojjicho loosanno looso hoolate lowore assitino; Yihowa kaaꞌla hoogoommero mannu wolqanni konne looso loosa didandiinanni. Lamu alamete oli kainoha, alame woꞌma miinju qarri amadinoha, roduuwaho taashsho xeꞌinore assinoonninsahanna dartu iillinonsaha ikkirono, ammanaminohunna wodanaamu borojjichi Kiristoosi harunsaanora ayyaanaamittete sagale shiqisha diagurino. Hanni 900 saꞌꞌanno afiinni qixxaabbinota woxe bantummokkinni afiꞌneemmota falakkinota ayyaanaamittete sagale hendo. Tini Maganu kaaꞌlanni noota leellishshanno  tajeeti. Hanni Yihowa maassiꞌranni noonketa wole doogo laꞌno: Sabbakate loosino Yihowa maassiꞌranni noota leellishanno. Dancha duduwo “gosa baalate” sabbankanni heeꞌnoonni. (Mat. 24:14) Yihowa xaa yannara dirijjitesi massaganninna shaqillunni maassiꞌranni nooti dihuluullissannote.

17. Yihowa horoonsiꞌranni noo dirijjite kaaꞌlineemmota leellisha dandiineemmohu hiittoonniiti?

¹⁷ Konnira ‘Yihowa dirijjite miila ikkate qoosso afiꞌraꞌyanni iso galaxxeemmo?’ yine ninkeneeto xaꞌma hasiissannonke. Yihowa Musenna Aarooni waro giira dirrisihu gede, xaa yannarano dirijjitesi massaganni noota leellishshannoti gari taje noonke. Addanko, Yihowa galanteemmo gede assannonkehu lowo korkaati noonke! (1 Tes. 5:18, 19) Ikkina Yihowa horoonsiꞌranni noo dirijjite kaaꞌlineemmota leellisha dandiineemmohu hiittoonniiti? Qullaawu Maxaafi aana xintantino borronkera fulannoha hattono songotenna jajjabba gambooshshuwawa afiꞌneemmo biddishsha harunsatenniiti. Qoleno, sabbakatenna rosiisate looso dandaaminke deerrinni jawaante loonse, Yihowa dirijjite kaaꞌlineemmota leellisha dandiineemmo.—1 Qor. 15:58.

18. Maa assate murciꞌrootto?

¹⁸ Leewaawootu maxaafinni ronsoommore loosunni leellishate murciꞌno. Yihowa kakkalonke adhanno gede iso hagiirsiisa hasiꞌneemmo. Yihowara soqqammeemmohu iso galata hasiꞌneemmo daafiraati. Yihowa woꞌmu wodaninkenni banxeemmo daafira isira dooraminoha aa diagurreemmo. Xaa yannara Yihowa maassiꞌranni noo dirijjite woꞌma giddonkenni kaaꞌlineemmo. Hatto assinummoro Yihowa, Farciꞌraasinesi ikkine isira soqqammammora uyinonke qoosso lowo geeshsha naandeemmota leellinsheemmo!