XIINXALLOTE BIRXICHO 45
Qullaawu Ayyaani Kaaꞌlannonkehu Hiittoonniiti?
‘Tini jawa wolqa Maganunnite ikkinnina ninketa diꞌꞌikkitino.’—2 QOR. 4:7.
FAARSO 104 Maganu Elto Ikkinoha Qullaawa Ayyaana
GUULCHO a
1-2. (a) Iillannonke qarra barru baala cince saꞌꞌate mayi kaaꞌlannonke? Xawisi. (b) Konni birxichira maa ronseemmo?
“IILLINOE qarra qaageemmo woyite umiꞌya wolqanni cince saꞌꞌa dandeemmokkita afoommo.” Ati hatto yite hedde egennootto? Ninke giddo duuchaho togoo hedo macciishshantannonke. Hatto yitine coyidhinoonnihu buutote dhibba woy shiiro cincitine saꞌinihu gedensaanni ikkara dandaanno. Iillinoꞌne qarra qaagginanni woyite barru baala cincitine saꞌinoonnihu Yihowa qullaawu ayyaanisinni ‘jawa wolqasi’ uyinoꞌne daafira ikkinota huwattinanni.—2 Qor. 4:7-9.
2 Tini busha alame gawajjitannonketa gargadhateno qullaawu ayyaani kaaꞌlo hasiissannonke. (1 Yoh. 5:19) Qoleno ‘busha ayyaanna’ ledo olammanni heeꞌnoommo. (Efe. 6:12) Hanni kuni qarru baalu heeꞌrirono qullaawu ayyaani kaaꞌlannonketa lame doogga laꞌno. Hakkiinni qullaawu ayyaaninni woꞌmunni woꞌma kaaꞌlo afiꞌrate maa assa hasiissannonkero ronseemmo.
QULLAAWU AYYAANI WOLQA AANNONKE
3. Yihowa qarra cincine saꞌneemmo gede kaaꞌlannonketi mitte doogo maati?
3 Qarru heeꞌrirono, Yihowa ayyaani uyinoonninke looso umo fushsha dandiineemmo gede wolqa woy jawaante aannonke. Soqqamaasinchu Phaawuloosira qarru iillinosiha ikkirono, “Kiristoosi wolqa” addaxxino daafira isi Yihowara ammaname soqqaminota coyiꞌrino. (2 Qor. 12:9) Isi misiyoone ikke layinkimeeshsho haꞌri yannara sabbakate looso diinaggaawe loosinoha calla ikkikkinni hasiisannosire afiꞌrateno umisi loosono loosino. Isi Qorontoosi katami giddo Aqiilanna Phirisqila yinanniri mine heeꞌrino. Insa dunkaana gowannoreeti. Phaawuloosino dunkaana gowa rosino daafira mito barra insa ledo dunkaana gowanno. (Soq. 18:1-4) Qullaawu ayyaani Phaawuloosi hasiisannosire afiꞌrate umisi looso loosannonna sabbakanno gede wolqa uyinosi.
4. Layinki Qorontoosi 12:7-9 kultanno garinni Phaawuloosi waadino qarri maati?
4 Layinki Qorontoosi 12:7-9 nabbawi. Phaawuloosi konni qummeeshshira “mannimmaꞌya utu gede qasanno qarri” waadinoe yiinohu mayyaara hedeeti? Utichu qase egenninoheha ikkiro, buuto xissinoheha ikkara dandaanno. Hakko daafira Phaawuloosi xissanni waadannosihu mitu qarri noosita kulanni no. Isi konne qarra “runkute” qarrisannoeho ‘Sheexaanu sokkaanchooti’ yiino. Sheexaanunna agaanintesi Phaawuloosira mannimmasi utu gede qasanni waadanno qarra xaaddote abbitinokkiha ikkara dandaanno. Ikkirono, busha ayyaanna Phaawuloosira qasanno ‘utichi’ noosita affe giddo qolte xiibbe xisso lexxitannosi gede assate woꞌnaaltinoha ikkara dandaanno. Phaawuloosi maa assiyya?
5. Yihowa Phaawuloosi huuccattora dawaro qolinohu hiittoonniiti?
5 Phaawuloosi umo Yihowa ‘uticho’ hoolasira hasiꞌrino. Isi togo yiino: “Kuni coyi . . . aaniꞌyanni hoꞌlanno gede Mooticha [Yihowa] sase hige huucciꞌroommo.” Phaawuloosi huucciꞌrinoha ikkirono mannimmasi qasanno utichi dihoꞌlinosi. Hatto yaa kayinni Yihowa Phaawuloosi huuccattora dawaro diqolino yaateni? Hatto yaa diꞌꞌikkino. Isi huuccattosira dawaro qolinosi. Yihowa qarrasi hoolinokkiha ikkirono, cince saꞌꞌanno gede wolqa uyinosi. Yihowa iso “Ane wolqa guutte leeltannohu ate wolqiweelle” aanaati yiinosi. (2 Qor. 12:8, 9) Maganu kaaꞌlonni Phaawuloosi hagiirrenna giddoyidi keere afiꞌre heeꞌrino.—Fil. 4:4-7.
6. (a) Yihowa huuccattonkera dawaro qolannohu hiittoonni ikkara dandaanno? (b) Tenne gufo giddo noo qummeeshshuwara Yihowa ate jawaachishate mayyee qaale eino?
6 Atino Phaawuloosi gede Yihowa qarrakki hoolahera huuccidhe egennootto? Giddokkinni huucciꞌroottoha ikkirono qarrikki hoꞌlinokkiha isinni baasanni haꞌrinoha ikkara dandaanno; kuni iillanni nooehu Magano hagiirsiisa hoogoommo daafiraati yite yaaddoottoni? Hatto ikkiro Phaawuloosi lawishsha qaagi. Yihowa Phaawuloosi huuccattora dawaro qolinte gede ate huuccattorano dawaro qolannohe. Yihowa qarrakki hoolinokkiha ikkara dandaanno. Kayinni qullaawu ayyaanisi widoonni qarrakki cincite saꞌꞌatto wolqa aannohe. (Far. 61:3, 4) Xiiwamoottoha ikkirono Yihowa tuge diagurannohe.—2 Qor. 4:8, 9; Fil. 4:13.
QULLAAWU AYYAANI YIHOWARA SOQQAMMANNI HEEꞌNEEMMO GEDE KAAꞌLANNONKE
7-8. (a) Qullaawu ayyaani bubbete gedeeti yineemmohu ma doogonniiti? (b) Pheexiroosi qullaawu ayyaani loosanno gara xawisinohu hiittoonniiti?
7 Qullaawu ayyaani kaaꞌlannonketi wole doogo hiitteeti? Dambalu kae noo baari giddo heedhannote dancha bubbe gede, qullaawu ayyaani qarru dambali giddoonni hinge Maganu abbeemmo yee qaale einota haaro alame eate kaaꞌlannonke.
8 Soqqamaasinchu Pheexiroosi qulxuꞌme woshshaadannoha ikkino daafira, baaru aana markaawe hadhannohu hiittoonniitiro seekke afino. Pheexiroosi qullaawu ayyaani loosanno gara xawisate, baaru aana markaawe hadhanno gara xawisanno yine hendanni qaale horoonsiꞌrinohu iseraati. Isi togo yee borreessino: “Aye himanino mannu fajjonni didayino; ikkollana himana qullaawu ayyaani massagino manni Maganuwiinni adhe coyiꞌrino.”—2 Phe. 1:21.
9. Pheexiroosi ‘massaga’ yaanno qaale horoonsiꞌrinohu maa hedeeti?
9 Pheexiroosi “massaga” yaanno qaale horoonsiꞌrinohu maa hedeeti? Soqqamaasinete Loosi maxaafi borreessaanchi Luqaasino markaawe “bubbe xiibbanna” hadhinota xawisate hakkonne Giriikete Afii qaale horoonsiꞌrino. (Soq. 27:15) Mittu Qullaawu Maxaafi fullahaanchi Pheexiroosi Qullaawa Maxaafa borreessiture qullaawu ayyaani ‘massaginonsata’ xawisate markaawe baaru aana hadhanno gara horoonsiꞌrinota coyiꞌrino. Pheexiroosi markaawe bubbe hadhe hadhannonte gede, Qullaawu Maxaafi masaalaanonna borreessaano loosonsa umo fushshitanno gede qullaawu ayyaani massaginonsa yiinohu gedeeti. Kuni fullahaanchi lede, “markaawe laaqanno manchi markaawe hadhara tire agurannonte gede, Qullaawu Maxaafi borreessaanono qullaawu ayyaani kulannonsare loosate qixxaabbino” yino. Yihowa loosa hasiissannosire loosino. Isi “bubbe” woy ayyaanasi uyino. Qullaawu Maxaafi borreessaanono assa hasiissannonsare assitino. Insa qullaawu ayyaani biddishshi ledo sumuu yaanno garinni loossino.
(1): Ayyaanaamittete coye ganyitine asse
(2): Ayyaanaamittete coye loosate dandiitinannire baala asse (Gufo 11 lai) c
10-11. Qullaawu ayyaani massaganni noonketa buuxiꞌrate assa hasiissannonkehu lamu coyi maati? Lawishsha kuli.
10 Xaa yannara Yihowa qullaawa ayyaanasi horoonsiꞌre Qullaawa Maxaafa diborreessiisanno. Ikkirono qullaawu ayyaani Maganu mannira xaa geeshsha wolqa aanni no. Yihowa xaano kaaꞌlanni noonke. Qullaawu ayyaaninni woꞌmunni woꞌma kaaꞌlo afiꞌra dandiineemmohu hiittoonniiti? Ninke assa hasiissannonkere assinanni heeꞌnoommoronna teꞌee buuxiꞌra hasiissannonke. Hatto assa dandiineemmohu hiittoonniiti?
11 Hanni konne lawishsha hendo. Mittu markaawe laaqanno manchi bubbe markaawe haadhe hadhara hasiꞌriro, lame coye assa hasiissannosi. Umihunni markaawe bubbe bubbissanni noo widira qola hasiissannosi. Bubbe bubbissanni nooha ikkirono, markaawe malkatenni kayisa hoogiro markaawe alba higge dihadhanno. Layinkihunni, laaqanno manchi shara gudise diriirsa hasiissannosi. Markaawe alba higge hadhannohu bubbe bubbissanno woyite bubbe sharu giddora eꞌurooti. Hatteente gede ninkeno cincine Yihowara soqqammanni heeꞌra dandiineemmohu qullaawu ayyaani kaaꞌlinkero callaati. Qullaawu ayyaaninni kaaꞌlo afiꞌrate ninkeno lame coye assa hasiissannonke. Umihunni, Maganu ayyaani soqqamaanosi assitara kulannore assa hasiissannonke. Layinkihunni lawishshu yaattonni “sharanke kayisa” yaano dandiinummo deerrinni qullaawu ayyaani assinammora hasiꞌrannore baala assa hasiissannonke. (Far. 119:32) Kuri coyibba assinummoro, qullaawu ayyaani dartu dambalinna qarru giddoonni ammanamme Maganu abbannota haaro alame eꞌneemmo gede kaaꞌlannonke.
12. Kawiinni aanchine maa ronseemmo?
12 Qullaawu ayyaani kaaꞌlannonketa lame doogo ronsoommo. Qullaawu ayyaani wolqa aannonke hattono qarra dandiine ammanamme heeꞌneemmo gede kaaꞌlannonke. Qoleno qullaawu ayyaani massagannonke hattono Yihowa loonsammora hasiꞌranno looso loonseemmo gedenna qarra cincine hegere heeshsho afiꞌneemmo gede kaaꞌlannonke. Kawiinni aanchine qullaawu ayyaaninni woꞌmunni woꞌma kaaꞌlo afiꞌrate assa hasiissannonkeha shoole coye laꞌneemmo.
QULLAAWU AYYAANINNI WOꞌMUNNI WOꞌMA KAAꞌLO AFIꞌRATE MAA ASSA HASIISSANNONKE?
13. Layinki Ximootewoosi 3:16, 17 kultanno garinni Qullaawa Borro maa assate kaaꞌlitannonke? Ninke kayinni maa assa hasiissannonke?
13 Umihunni, Maganu Qaale xiinxallino. (2 Ximootewoosi 3:16, 17 nabbawi.) “Qullaawu ayyaani kulanna” yaannohu Giriikete Afii qaali noo gedeenni tirriro “Maganu foolinoha” yitanno tiro afiꞌrino. Maganu qullaawa ayyaanasi horoonsiꞌre hedosi Qullaawa Maxaafa borreessitu manni surre giddo worino. Qullaawa Maxaafa nabbambeemmonna hiincineemmo woyite Maganu biddishshi surrenkenna wodaninke giddora eanno. Tini Maganu hedo fajjosi ledo sumuu yaanno garinni heeꞌneemmo gede kaaꞌlitannonke. (Ibi. 4:12) Qullaawu ayyaaninni woꞌmunni woꞌma kaaꞌlo afiꞌrate kayinni yanna gaaꞌmine Qullaawa Maxaafa ganyine nabbawanna hiinca hasiissannonke. Hatto assinummoro, coyiꞌneemmorinna assineemmori baalu Maganu fajjo ledo sumuu yaannoha ikkanno.
14. (a) Kiristaanu gambooshshinkewa qullaawu ayyaani no yineemmohu mayiraati? (b) Gambooshshunniwa qullaawu ayyaaninni kaaꞌlo afiꞌrate maa assa hasiissannonke?
14 Layinkihunni, Magano mitteenni magansiꞌno. (Far. 22:22) Kiristaanu gambooshshinkewa Yihowa ayyaani no. (Aju. 2:29) Hatto yineemmohu mayiraati? Korkaatuno, ammanate roduuwinke ledo magansiꞌnammora gamba yineemmo woyite, qullaawa ayyaana afiꞌrate huucciꞌneemmo, Maganu Qaali aana xintantinota Maganu Mangiste faarso faarsineemmo, hattono qullaawu ayyaaninni shoomantino roduuwi rosiissanna Qullaawu Maxaafi aana xintamino roso ronseemmo. Kuni ayyaani meya roduuwino qixxaawe kifilensa shiqishanno gede kaaꞌlannonsa. Qullaawu ayyaaninni woꞌmunni woꞌma kaaꞌlo afiꞌrate kayinni, dancha gede qixxaambe haꞌne gambooshshunniwa dawaro qola hasiissannonke. Gambooshshe qixxaambe haꞌneemmoha ikkiro, “shara diriirsine agurroonni markaawe” bubbe afidhannonte gede ninkeno qullaawu ayyaaninni kaaꞌlo afiꞌneemmo.
15. Qullaawu ayyaani sabbakate loosiꞌra kaaꞌlannonkehu hiittoonniiti?
15 Sayikkihunni, sabbakate looso loonso. Qullaawa Maxaafa horoonsiꞌne sabbankeemmonna rosiinseemmo woyite soqqanshonkera qullaawu ayyaani kaaꞌlannonke gede assiꞌnanni heeꞌneemmo. (Rom. 15:18, 19) Hakko daafira qullaawu ayyaaninni woꞌmunni woꞌma kaaꞌlo afiꞌrate ganyine sabbakanna dandaamannoha ikkiro, woꞌmanka woyite Qullaawa Maxaafa horoonsiꞌra hasiissannonke. Soqqanshonkenni roore dancha guma afiꞌrate kaaꞌlitannonketi mitte doogo Kiristaanu Heeshshonna Soqqansho—Xiinxallote Maxaafichora fulannoha lawishsha ikkanno hasaawa horoonsiꞌrate.
16. Qullaawa ayyaana afiꞌneemmoti qara doogo hiitteeti?
16 Shoolkihunni, Yihowa huucciꞌno. (Mat. 7:7-11; Luq. 11:13) Qullaawa ayyaana afiꞌneemmoti qara doogo Yihowa huucciꞌneeti. Aye coyino, lawishshaho usuru mini, wole agurina Sheexaanu nafa Yihowa huuccattonke macciishshannota woy qullaawa ayyaanasi aannonketa hoola didandaanno. (Yai. 1:17) Qullaawu ayyaaninni woꞌmunni woꞌma kaaꞌlo afiꞌrate hiittoonni huucciꞌra hasiissannonke? Tenne xaꞌmora dawaro afiꞌrate hanni Luqaasi Wongeeli giddo calla huuccattote daafira borreessinoonniha mitto lawishsha laꞌno. b
JAATTINE HUUCCIDHE
17. Yesuusi huuccattote daafira Luqaasi 11:5-9, 13 kulino lawishshinni maa ronseemmo?
17 Luqaasi 11:5-9, 13 nabbawi. Yesuusi coyiꞌrino lawishshi qullaawa ayyaana afiꞌrate ma garinni huucciꞌra hasiissannonkero leellishanno. Yesuusi lawishshunni kulino manchi hasiꞌrinore afiꞌrinohu huucciꞌranni “qarrisino daafiraati.” Isi yanna hashshu taalo ikkiturono, jaalisi kaaꞌlasira huucciꞌra disaalfatino. (Maaja 2018 Xiinxallote Maxaafichora noota xiinxallote kaaꞌlitanno borro qoola 6 lai.) Yesuusi konni lawishshinni rosiisara hasiꞌrinori maati? Isi togo yiino: “Huuccidhe, uyinanniꞌnena. Hasidhe, afidhinannina. Waalcho ganganne fannanniꞌnena.” Ikkina, konni lawishshinni maa ronseemmo? Qullaawu ayyaani kaaꞌlankera hasiꞌnummoro jaante huucciꞌra hasiissannonke.
18. Yesuusi coyiꞌrino lawishshi garinni Yihowa qullaawa ayyaanasi aannonketa huluullammeemmokkihu mayiraati?
18 Yesuusi coyiꞌrino lawishshi Yihowa qullaawa ayyaanasi aannonkehu mayiraatiro afateno kaaꞌlannonke. Yesuusi lawishshunni kulino manchi minisira dayino wosincho danchu garinni wosinsira hasiꞌrino. Kuni manchi hashshu taalo minisira dayino manchira itanno sagale aasira hasiꞌrino; ikkollana mine sagale dinosi. Yesuusi manchu huucciꞌranni waadinosi daafira olliichisi daabbo uyinosi yiino. Yesuusi rosiisara hasiꞌrinori maati? Guuntete xeꞌne noosi manchi olliichisi huucciꞌranni waadinosi daafira aannosiha ikkiro, shaqqadu iimi Anninke qullaawa ayyaana afiꞌrate jaatte huuccidhannorira hiitto roore diaanno! Hakko daafira Yihowa qullaawa ayyaanasi aannonke gede huucciꞌneemmo huuccattora dawaro qolannota huluullammummokkinni huucciꞌra dandiineemmo.—Far. 10:17; 66:19.
19. Kaajjine uurra dandiineemmota huluullammeemmokkihu mayiraati?
19 Sheexaanu woꞌmanka woyite qeelankera sharramannoha ikkirono, iso qeelleemmota horo dihuluullammeemmo. Mayira? Korkaatuno qullaawu ayyaani lame doogonni kaaꞌlannonke daafiraati. Umihunni, qarra dandiine saꞌneemmota wolqa aannonke. Layinkihunni, Maganu abbannota haaro alame eꞌnammo geeshsha Yihowara soqqammanni heeꞌneemmo gede kaaꞌlannonke. Qullaawu ayyaaninni woꞌmunni woꞌma kaaꞌlo afiꞌrate murciꞌno!
FAARSO 41 Ballo Huuccattoꞌya Macciishshi
a Konni birxichira qullaawu ayyaani iillannonke qarra cincine saꞌneemmo gede kaaꞌlannonkehu hiittoonniitiro ronseemmo. Qoleno qullaawu ayyaaninni woꞌmunni woꞌma kaaꞌlo afiꞌrate maa assa hasiissannonkero xiinxallineemmo.
c MISILLATE XAWISHSHA:(1): Roduuwu gambooshshu Addaraashe marte no. Insa ammanate roduuwinsa ledo mitteenni gamba yite Yihowa ayyaana afidhannore assitanni no. (2): Insa gambooshshunniwa dawaro qolate qixxaabbe no. Aleenni kulliti lamenti coyibba, konni birxichira kulloonnite wole ayyaanaamittete millimmora lawishshaho, Maganu Qaale xiinxallate, sabbakatenna Yihowa huucciꞌrateno loosannote.
