XIINXALLOTE BIRXICHO 45
FAARSO 138 Awuuwete Biinfille
Ammanantino Labballi Geedhimmansa Yannara Coyidhinorinni Rosse
“Egenno geerruwiinni afiꞌnanni; wodanchano seeda diro heeꞌratenni dagganno.”—IYO. 12:12.
GUULCHO HEDO
Maganu Yihowara hajajama xaa yannara atoote albillitte qole hegere heeshsho afiꞌnanni gede assitanno.
1. Geedhitinoriwiinni rosa hasiissannonkehu mayiraati?
NINKE baalunkura, dancha doorsha doodhate biddishshu hasiisannonke. Togoo biddishsha songote cimeeyyewiinninna ayyaanaamittetenni gikki yiinohu wolu Kiristaaniwiinni afiꞌra dandiineemmo. Insa diro ninkenni lowo geeshsha roortannoha ikkiro, uyitannonke amaale xaa yannara kaaꞌlitannori dinoote yine misha dihasiissannonke. Yihowa geedhitino roduuwiwiinni ronsammora hasiꞌranno. Insa ninkenni roore seeda yanna heedhino daafira, woꞌnaalshu, wodanchanna hayyo noonsa.—Iyo. 12:12.
2. Konni birxichira maa xiinxallineemmo?
2 Hundi waro, Yihowa mannasi jawaachishatenna massagate geedhitinore ammanantino labballo horoonsiꞌrino. Hanni lawishshaho Muse, Daawitinna soqqamaasinchu Yohaannisi daafira laꞌno. Insa heedhinohu addi addi yannaraati; heeshshonsa garino lowo geeshsha babbaxxinoho. Insa geedhimmansa yannara, wedellaho lowo geeshsha kaaꞌlitanno amaale uyitino. Kuri mittu mittunku geedhitino labballi Maganoho hajajama hasiissannota ikkitinota luphi assite coyidhino. Yihowa insa coyidhinoti kaaꞌlitanno amaale Qullaawu Maxaafi giddo borreessante heedhannonke gede assino. Wedella woy geedhinoommore ikkinummorono, insa amaale xiinxalline horo afiꞌra dandiineemmo. (Rom. 15:4; 2 Xim. 3:16) Konni birxichira geedhitinori kuri sasu labballi coyidhinore xiinxallineemmo; hattono insa coyidhinorinni maa ronseemmoro laꞌneemmo.
“SEEDA DIRO HEEDHINANNI”
3. Muse soqqaminohu hiitte doogganniiti?
3 Muse heeshshosi diro woꞌma Yihowara diinaggaawe soqqamino. Isi masaalaancho, daanya, hajajaanchonna xaggete borreessaancho ikke soqqamino. Musera lowo woꞌnaalshi noosi! Isi Israeelete daga Gibitsete borojjimmanni massage fushshino; hattono Yihowa batinye maalale loosanna laino. Yihowa, Muse umita onte Qullaawu Maxaafi maxaaffanna Faarso fooliishsho 90 borreessanno gede asse horoonsiꞌrinosi; faarso 91 borreessinohuno iso ikkara dandaanno. Qoleno Iyyoobi maxaafa borreessinohu iso ikkikkinni digatino.
4. Muse ayeoo jawaachishino? Mayira?
4 Muse reyara shiimu dirira albaanni 120 dirihu heeꞌre, Israeelete daga baala woshshe gamba asse laꞌinorenna Yihowa assinonsare qaagiissinonsa. Konni manni giddo gamu, wedellu noo yannara Yihowa batinye maalale loosannanna Gibitsete daga qorichishanna laino. (Ful. 7:3, 4) Insa Duumu Baari lamewa beehameenna tayisse saꞌino; hattono Feriooni olanto baꞌanna laꞌino. (Ful. 14:29-31) Insa halallaho noo yannara Yihowa agarinonsa hattono towaatinonsa. (Mar. 8:3, 4) Israeelete daga Hexxote Gobba eꞌara kaꞌe heedheenna Muse geedhimmasi yannara insa jawaachishino. a
5. Muse geedhimmasi yannara coyiꞌrinoti Marro 30:19, 20 noo hedo Israeelete dagara maa buuxissinonsa?
5 Muse mayino? (Marro 30:19, 20 nabbawi.) Israeelete dagara albillitte dhagge ikkitanno hexxo noonsa. Yihowa maassiꞌrannonsa daafira Israeelete daga isi aansara qaale eino gobbara seeda diro heeꞌra dandiitanno. Tini gobba baxissannotenna addi addi laalo noote! Muse hatte gobba daafira kulanni togo yiino: “Hakkiicho kiꞌne miꞌnitinoonnikkire jajjabbanna biifadda katamma, umiꞌneta ikkitinokkita danchu coyi baalu woꞌmino minna, uꞌmitinoonnikkita wayi balla, kaasidhinoonnikkiha woyinete kaashshonna ejersu haqqe [aannoꞌne]” yiino.—Mar. 6:10, 11.
6. Yihowa wole daga Israeele qeeltara fajjinohu mayiraati?
6 Muse Israeelete mannira qorowishshano kulinonsa. Insa biifado gobbara heeꞌrate Yihowa hajajo agadha hasiissannonsa. Muse, insa Yihowa yaannore macciishshitenna isira ‘ammanantinore ikkite heeshsho doodhitanno’ gede kulinonsa. Ikkirono Israeele Yihowara dihajajantino. Hakko daafira Yihowa, insa Asooru manni horranno gedenna gedensaanni qole Baabiloonete manni qafade haaꞌre haꞌranno gede assino.—2 Mot. 17:6-8, 13, 14; 2 Dud. 36:15-17, 20.
7. Muse coyiꞌrinorinni maa ronseemmo? (Misileno lai.)
7 Ninke maa ronseemmo? Hajajama heeshsho afiꞌnanni gede assitanno. Hexxote Gobba eꞌara kaꞌe noote Israeelete daga gede, ninkeno Maganu abbannota haaro alame eꞌnammora kaꞌne heeꞌnoommo; hakkiicho uulla gannatete widira soorrantanna laꞌneemmo. (Isa. 35:1; Luq. 23:43) Daawuloosinna agaanintesi diheedhanno. (Aju. 20:2, 3) Mannu Yihowawiinni xeertiꞌranno gede assitannoti kaphu ammaꞌno diheedhanno. (Aju. 17:16) Manna gadachannohu mannu gashshooti diheeꞌranno. (Aju. 19:19, 20) Qoleno Gannatete giddo finqilu manni diheeꞌranno. (Far. 37:10, 11) Baalankawa heeꞌranno manni mittimmanna keeru heeꞌranno gede assannohu, Yihowahu keeraanchu seerira hajajamanno. Hakko daafira mannu mimmito baxanno hattono ammananno. (Isa. 11:9) Tini dhagge ikkitanno hexxooti! Hakkiino sae, Yihowara hajajammeemmoha ikkiro, gannate ikkitino uullara lowo xibbe diro calla ikkikkinni hegerera heeꞌneemmo.—Far. 37:29; Yoh. 3:16.
Yihowara hajajammeemmoha ikkiro, gannatete lowo xibbe diro calla ikkikkinni hegerera heeꞌneemmo (Gufo 7 lai)
8. Hegere heeshsho hexxo misiyoone ikke seeda yanna soqqaminoha mitto rodoo kaaꞌlitinosihu hiittoonniiti? (Yihuda 20, 21)
8 Maganu uyinonketa hegere heeshsho hexxo woꞌmanka woyite hendeemmoha ikkiro, iillannonke fonqoli ikkihano ikkiro isira ammanamme heeꞌneemmo. (Yihuda 20, 21 nabbawi.) Tini hexxo laanfenke qeeꞌlineemmo gedeno jawaante ikkitannonke. Laanfesi waaddannosihu Afirikaho seeda diro misiyoone ikke soqqaminohu mittu rodii togo yiino: “Yihowara hajajameemmokkiha ikkiro Gannatete hegerera heeꞌreemmokkita wodanchaꞌya, iillannoe fonqolo qeelate woꞌmanka woyite sharrameemmo gedenna albinni roore Yihowa eeggifate huucciꞌreemmo gede kaaꞌlitinoe. Yihowa kaaꞌlinoe daafira fonqolo qeela dandoommo.”
“QINAANNOHE”
9. Daawitira iillinosi fonqoli maati?
9 Daawiti worba mooteeti. Isi muuziiqa ganannoho, gixima woy kiiro borreessannoho, olamaanchohonna masaalaanchoho. Isira lowo fonqoli iillinosi. Daawiti mitu diri geeshsha Moote Saaooliwiinni xooqanni keeshshino. Daawiti moote ikkihu gedensaannino beettisi Abeseloomi gashshootesi adhate woꞌnaali yannara, lubbosi gatisiꞌrate xooqa hasiissinosi. Togoo qarri iillinosihanna umisi laanfe waaddinosiha ikkirono, Daawiti jeefote geeshsha Yihowara ammanaminoha ikkasi leellishino. Yihowa iso ‘giddoꞌya baxxinoho’ yiinosi. Daawiti amaalino amaale macciishsha hasiissannote!—Soq. 13:22; 1 Mot. 15:5.
10. Daawiti isinni aane moote ikkannoha beettosi Salamooni amaalinohu mayiraati?
10 Hanni Daawiti isinni aane moote ikkannoha beettosi Salamooni amaalino amaale laꞌno. Yihowa kuni wedellichi xalala magansiꞌra halashshanno gedenna isi ayirranno gede assannoha qullaawa mine minanno gede doorino. (1 Dud. 22:5) Salamoonira coyi shota diꞌꞌikkannosi. Daawiti isira mayinosi? Hanni laꞌno.
11. Umi Mootoolla 2:2, 3 kultanno garinni, Daawiti Salamoonira maa buuxisinosi? Daawiti coyiꞌrinori woꞌminohu hiittoonniiti? (Misileno lai.)
11 Daawiti mayino? (1 Mootoolla 2:2, 3 nabbawi.) Daawiti, beettisi Yihowara hajajamannoha ikkiro qinaannosita kulinosi. Qoleno lowo diro Salamoonira coyi qiniinosi. (1 Dud. 29:23-25) Isi hoola yinoonniha qullaawa mine minino hattono mite Qullaawu Maxaafi maxaaffa borreessino; qoleno isi coyiꞌrinore wole haammata Qullaawu Maxaafi maxaaffa giddo borreessinoonni. Salamooni hayyotenninna jirotenni egennaminoha ikkino. (1 Mot. 4:34) Kayinni Daawiti yiinonte gede, Salamoonira qinaannosihu Yihowara hajajamiro callaati. Hige ma assinayi, gedensoonni isi wole maganna magansiꞌrate higino. Salamooni Yihowa hagiirsiisinokki daafira taashshe hattono keeraanchimmatenni gashsha didandiino.—1 Mot. 11:9, 10; 12:4.
Daawiti reyara kae heeꞌre beettisira Salamoonira kulinori, Yihowara hajajammeemmoha ikkiro isi dancha doorsha doodhineemmo gede kaaꞌlitanno hayyo aannonketa leellishanno (Gufo 11-12 lai) b
12. Daawiti coyiꞌrinorinni maa ronseemmo?
12 Ninke maa ronseemmo? Hajajama qinaannonke gede assitanno. (Far. 1:1-3) Hige Yihowa ninkera Salamooni gede jironna ayirrinye aannonketa kule qaale dieino. Kayinni Maganinkera hajajammeemmoha ikkiro isi dancha doorsha doodhineemmo gede kaaꞌlitanno hayyo aannonke. (Law. 2:6, 7; Yai. 1:5) Looso, roso, boohaarshanna woxe lainohunni mitto doorsha doodhineemmo woyite, isi aanno amaale kaaꞌlitannonke. Yihowa aannonke amaale harunsa, isi ledo noonke jaaloomi baꞌꞌannokki gedenna hegere heeshsho afiꞌneemmo gede kaaꞌlitannonke. (Law. 2:10, 11) Dancha jaalla heedhannonke. Hattono maatenke hagiirru noota ikkitanno gede kaaꞌlanno biddishsha afiꞌneemmo.
13. Karmeeni yinanni rodoora qiniinosehu hiittoonniiti?
13 Moozaambikete heedhannoti Karmeeni yinanni rodoo qinaannonke gede assiꞌrate qaru coyi yuniversite ea ikkinohu gede assite heddino. Hakko daafira ise mine minnanni gara rosate yuniversite eꞌino. Ise togo yite borreessitino: “Rosanni noommare baxoomma. Kayinni lowo yannanna wolqa guxxoomma. Rosu minira soodo 1:30 eꞌꞌe hawarro 12:00 fuleemma. Tini gambooshshe haꞌrate yanna hoogeemma gede assitinoe daafira ayyaanaamitteꞌya shoshshogitino. Lamu Mootichira soqqamate woꞌnaalanni noommata wodanchoomma.” (Mat. 6:24) Ise giddoseta kulte Yihowa huuccidhino; hattono borruwanke seekkite xiinxallitino. Ise ledde togo yitino: “Ayyaanaamittetenni gikki yitino roduuwinna amaꞌya amaaltinoeta kaajja amaale macciishshe adhummati, Yihowara woꞌma yanna soqqamate yuniversitete roso agurate murciꞌroomma. Tini heeshshoꞌya giddo dancha doorsha doodheemma gede kaaꞌlitinoe; hattono digaabbeemma.”
14. Musenna Daawititi qara sokka maati?
14 Musenna Daawiti Yihowa baxxanno; hattono isira hajajama hasiissannota ikkitinota affino. Insa geedhimmansa yannara, wolootu insa lawishsha harunsitanno gedenna Maganinsa Yihowara ammanantanno gede jawaachishshino. Qoleno insa lamunku Yihowa agurtannori, iso hagiirsiisa dandiitannokkitanna isi aansara qaale eino atoote hooggannota kulte qorowisiissino. Insa amaale xaa yannara ninkeno kaaꞌlitannonke. Lowo xibbi diri gedensaannino mittu Yihowa soqqamaanchi Yihowara ammanama lowo geeshsha hasiissannota ikkitinota coyiꞌrino.
‘KONNINNI ROORANNO HAGIIRRI DINO’
15. Soqqamaasinchu Yohaannisi heeshshosinni lainori maati?
15 Yohaannisi, Yesuusi Kiristoosi baxanno soqqamaasinchooti. (Mat. 10:2; Yoh. 19:26) Yesuusi uullate aana noo yanna baalantera Yohaannisi isi ledo soqqamino, maalale loosanna laino hattono qarru yannara nafa isira ammaname heeꞌrino. Isi Yesuusa shinanna laino; reyotenni kaihu gedensaannino laino. Qoleno isi umi xibbi diro shiima ammanantino gaamonni hanafe danchu duduwi “kalqe baalate” halaꞌlanna laino.—Qol. 1:23.
16. Yohaannisi borreessino sokkanni horo afidhinori ayeooti?
16 Yohaannisi seeda diro heeꞌrihu gedensaanni geedhimmasi yannara, qullaawu ayyaani massageennasi Maganu Qaale borreessate qoosso afiꞌrino. Isi maalale ikkitannota ‘Yesuusi Kiristoosi ajuuja’ borreessino. (Aju. 1:1) Yohaannisi suꞌmisinni woshshamanno Wongeella borreessino. Qoleno qullaawu ayyaani massageennasi sase sokka borreessino. Isi sayikki sokka borreessinohu baxannohunna ayyaanaamittete beettisi gede asse laꞌꞌannohura ammanamino Kiristaanchira Gayiyoosiraati. (3 Yoh. 1) Kayinni Yohaannisi ayyaanaamittete oososi gede asse laꞌꞌannori batinyu Kiristaani nooti dihuluullissannote. Kuni ammanamino geerchi borreessinori xaa yanna geeshsha noore Yesuusi harunsaano jawaachishino.
17. Sayikki Yohaannisi 4 kultanno garinni, lowo geeshsha hagiirsiisannori maati?
17 Yohaannisi borreessinori maati? (3 Yohaannisi 4 nabbawi.) Yohaannisi Maganoho hajajama abbitanno hagiirri daafira borreessino. Isi sayikki sokka borreessi yannara mitootu kaphu roso tareessitanni babbadooshshe kalaqqanni no. Ikkirono wolootu “halaalaancho heeshsho heedhanni” no. Insa ‘Maganu hajajo wonshitino.’ (2 Yoh. 4, 6) Kuni ammanamino Kiristaani Yohaannisi calla ikkikkinni Yihowano hagiirsiisino.—Law. 27:11.
18. Yohaannisi coyiꞌrinorinni maa ronseemmo?
18 Ninke maa ronseemmo? Ammanama hagiidhinanni gede assitanno. (1 Yoh. 5:3) Lawishshaho, Yihowa hagiirsiinsoommota afa hagiidhineemmo gede assitannonke. Yihowa gara ikkinokkire assa gimbe isira hajajammeemmo woyite lowo geeshsha hagiidhanno. (Law. 23:15) Iima noori wolootuno hagiidhitanno. (Luq. 15:10) Ninkeno ammanate roduuwinke iillannonsa qarranna fonqolo dandiite, ammanante heedhanna laꞌneemmo woyite hagiidhineemmo. (2 Tes. 1:4) Tini busha alame baꞌanno woyite, tenne Sheexaanu annatino alame giddo heeꞌne nafa, Yihowara ammanammoommota anfeemmo woyite harshammi yineemmo.
19. Reecheli yinanni rodoo wolootaho halaale rosiisate daafira mayitino? (Misileno lai.)
19 Roorenkanni wolootaho halaale kulleemmo woyite lowo geeshsha hagiidhineemmo. Doominiku Rippaabilikera heedhannoti Reecheli yinanni rodoo dhagge ikkanno Maganinke daafira wolootaho kula taalle nookki qoosso ikkitinota coyidhino. Ise ayyaanaamittete oosose daafira togo yitino: “Qullaawa Maxaafa xiinxallisoommari Yihowa baxxanna, iso addaxxitannanna iso hagiirsiisate heeshshonsa biddi assidhanna laꞌꞌa mageeshsha hagiirsiissannoro coyiꞌre kula nafa qarra ikkitannoe. Kuni hagiirri insa rosiisate yee assoommare baala rooranno.”
Wolootu Yihowa baxxannonna isira hajajantanno gede rosiinse hagiirre afiꞌneemmo (Gufo 19 lai)
AMMANANTINO LABBALLI GEEDHIMMANSA YANNARA COYIDHINORINNI HORO AFIꞌRA
20. Muse, Daawitinna Yohaannisi ledo mitto assannonkeri maati?
20 Muse, Daawitinna Yohaannisi lowo diri albaanni heedhinoreeti; qoleno insa heeshshonna ninke heeshsho gari babbaxxinoho. Kayinni mitto assannonkeri lowori no. Insa halaalaanchu Maganira soqqantino; ninkeno isira soqqammeemmo. Insante gede ninkeno Yihowa huucciꞌneemmo, iso addaxxineemmo hattono biddishshasi hasiꞌneemmo. Kuri hunda heedhino labballinte gede, ninkeno Yihowa hajajantannosire lowo geeshsha maassiꞌrannonsata dihuluullammeemmo.
21. Muse, Daawitinna Yohaannisi kultino amaale harunsitannori albillitte afidhanno atooti maati?
21 Hakko daafira Yihowa hajajo wonshine kuri geedhitino labballi uyitino amaale harunsino. Hatto ikkiro assineemmo coyi baalunku qinaannonke. Heeshsho afiꞌneemmo hattono ‘seeda diro heeꞌneemmo’; addanko, hegerera heeꞌneemmo! (Mar. 30:20) Qoleno baxillaancho iimi Annanke hagiirsiinse lowo hagiirre afiꞌneemmo; isi eino qaale baala ninke hendoommohunni roorse wonshanno.—Efe. 3:20.
FAARSO 129 Kaajjine Uurrineemmo
a Yihowa Duumu Baariwa maalale loosanna lainohu rooru Israeelete manni Hexxote Gobba dieino. (Kir. 14:22, 23) Yihowa 20 dironna hakkuyi ale ikkannonsa manni baalu halalla reye goofannota kulino. (Kir. 14:29) Ikkirono Iyyaasu, Kaaleebinna batinye aja dume hattono Leewi gaꞌre, Israeele Yordaanoosi Laga tayisse Kanaani gobba eꞌu yannara lubbotenni gatte Yihowa eino qaale wonshanna laꞌino.—Mar. 1:24-40.
b MISILLATE XAWISHSHA : Guraanni: Daawiti reyara kae heeꞌre beettosi Salamooni amaalanni no. Qiniiteenni: Roduuwu Suwisaanote Soqqansho Rosi Mine rossanni no.
