QULLAAWA MAXAAFA ganyite xiinxalla qarra ikkitinohe? Qullaawa Maxaafa xiinxalla ceeꞌmishe egenninohe? Ninke baalanka ceeꞌmishannonke woyiti no. Kayinni hanni ganyine assineemmoha wole coye lawishshaho biso hayishshiꞌrate daafira hedi. Biso hayishshiꞌrate yannanna sharro hasiissanno; kayinni hayishshiꞌne kaꞌniro lowo geeshsha hagiidhinanni! ‘Qaalisi widoonni wayinni hayishshiꞌrano’ lowo geya hagiirsiissanno. (Efe. 5:26) Hanni tennera kaaꞌlitannota mite hedo laꞌno:

• Pirogiraame fushshiꞌri. Mittu Kiristaanchi lashshi assa hasiissannosikkihu ‘woyyanno’ woy roore hasiisanno coyi giddo mittu Qullaawa Maxaafa xiinxallate. (Fil. 1:10) Fushshiꞌrootto pirogiraame harunsa dandaatto gede, pirogiraamekki leellanno bayicho lawishshaho minu girgiddira woy firiijete aana gaꞌna dandaatto. Woy xiinxallatto yanna qaagiissitannohe gede, elektirooniksete uduunnichikkira alaarme wodha kaaꞌlitahera dandiitanno.

• Woyyannohere hedi. Hedokki billaachaabbukkinni seeda saate nabbawa dandaattonso duucha higge boode boode saate xiinxalla woyyitannohe? Hiitti woyyitannohero ati afootto. Atera injaannohe garinni xiinxallate pirogiraame fushshiꞌri. Xiinxallatto yanna iillitanno woyite ceeꞌmishannoheha ikkiro, tonne daqiiqano ikkiro xiinxallate murciꞌri. Boode daqiiqa nafa xiinxalla horo xiinxalla hoogatenni woyyitanno. Qoleno mitte higgella nabbawa hanafittoro aguri assa hoogahera nafa dandaanno.—Fil. 2:13.

• Xiinxallattore balaxxe doodhi. Xiinxalla hanafattora kaꞌe heedhe, maa xiinxallo yite hedattoha ikkiro, yannakki danchu garinni horoonsidhanni nootto yaa didandiinanni. (Efe. 5:16) Xiinxalla hasiꞌrootto birxicho woy hajo borreessiꞌri. Xiinxallatto woyite huluullisannoheri heeꞌriro borreessite amaxxi. Xiinxallite guditto kiiro, xiinxalla hasiꞌrattoha wole coyeno borreessiꞌra dandaatto.

• Biddi assiꞌra hasiissannohere biddi assiꞌri. Fushshiꞌrootto pirogiraame biddi assiꞌra hasiissuhero biddi assiꞌrate sharrami; lawishshaho xiinxallatto yanna woy xiinxallatto coye biddi assa dandaatto. Qaru coyi mamoote, mageeshshi yanna woy maa xiinxallattoro ikkikkinni ganyite xiinxallate.

Addanko, ganyine xiinxalla kaaꞌlitannonke. Hatto assinummoro, Yihowawa roore shinqeemmo, mitto coye hayyotenni assa ronseemmo hattono lowo geya hagiidhineemmo.—Iya. 1:8.