1. Soqqamaasinchu Phaawuloosira songote soqqamaano daafira mayi macciishshamannosi?

 SONGOTE soqqamaano songote giddo lowo geeshsha hasiisanno looso loossanno. Soqqamaasinchu Phaawuloosi kuri ammanantino labballo naadannota xawise kulino. Lawishshaho, isi Filiphisiyusi heeꞌranno Kiristaanira sokka borreessi yannara, songote cimeeyyera keere soyi woyite songote soqqamaanorano soyino.—Fil. 1:1.

2. Luwiisi yinanni rodii songote soqqamaancho ikke loosanno looso ma garinni laꞌꞌanno?

² Wedella woy jajjabbano ikkituro batinye cuuantinore labballo roduuwa, songote soqqamaano ikke soqqama lowo geeshsha hagiirsiissannonsa. Lawishshaho, Devaani yinanni rodii songote soqqamaancho ikkinohu 18 dirihu heeꞌreeti. Luwiisi yinanni rodii kayinni songote soqqamaancho ikkinohu 50 dirihu heeꞌreeti. Isi togo yiino: “Roorenkanni songote giddo noori baalunku lowo geeshsha baxxannoeta hedeemmo woyite, songote soqqamaancho ikke soqqamate qoossoꞌya lowo geya naadeemmo; batinye songote soqqamaano tenne hedora sumuu yitanno!”

3. Hiikkuri xaꞌmuwa xiinxallineemmo?

³ Cuuamoottoha kayinni songote soqqamaancho ikkoottokkiha ikkiro, songote soqqamaancho ikkate mixo fushshiꞌra dandaatto? Songote soqqamaancho ikkatto gede kakkayisannoheri maati? Songote soqqamaancho ikkate wonsha hasiissannoheti  Qullaawa Borro guunte hiittenneeti? Konni birxichira kuri xaꞌmuwara dawaro qollanni. Kayinni hanni balanxe songote soqqamaano loossanno loosi maatiro laꞌno.

SONGOTE SOQQAMAANO LOOSSANNO LOOSI MAATI?

4. Songote soqqamaano maa maa loossanno? (Misileno lai.)

⁴ Songote soqqamaanchi, songote giddo lowo geeshsha hasiisanno looso loose songote cimeeyye kaaꞌlannoho qullaawu ayyaaninni shoommoonniho cuuamino rodooti. Mite songote soqqamaano, halashshaano hasiisannonsaha soqqanshote qoqqowonna soqqanshote horoonsidhanno borro afidhanno gede assitanno. Wolootu qolte Gambooshshu Addaraashe feyanna gatamara kaaꞌlitanno. Songote soqqamaano gambooshshunniwa owaattanno woy soqqantanno; hattono huurote kifilera loossanno. Songote soqqamaano lowo geeshsha kaaꞌlannoha batinye looso loossanno. Ikkirono, songote soqqamaano wolu baalunkunni roore ayyaanaamittetenni gikki yitinore ikka hasiissannonsa; insa Yihowa baxxanno hattono isihu keeraanchu seeri garinni heedhanno. Qoleno ammanate roduuwansa lowo geeshsha baxxanno. (Mat. 22:37-39) Cuuantinori labballu roduuwi songote soqqamaano ikkate sharrama dandiitannohu hiittoonniiti?

5. Songote soqqamaancho ikkate sharramate yaa mayyaate?

⁵ Qullaawu Maxaafi, songote soqqamaano ikkite shoomantannori wonsha hasiissannonsa guunte tittire kulanno. (1 Xim. 3:8-10, 12, 13) Kuri Qullaawa Borro guunte daafira xiinxallitenna tenne guunte wonshate diinaggaabbe loosse tenne qoosso afiꞌra dandaatto. Kayinni balaxxe, songote soqqamaancho ikkate sharramattohu mayiraatiro seekkite heda hasiissannohe.

SONGOTE SOQQAMAANCHO IKKATE SHARRAMATTO GEDE KAKKAYISANNOHERI MAATI?

6. Baalunku gari looso loosse ammanate roduuwakki kaaꞌlatto gede kakkayisannoheri maati? (Maatewoosi 20:28; qoolira noo misileno lai.)

⁶ Yesuusi Kiristoosi taalle nookki lawishshankeeti; isi baalankare assannohu Annasinna manna baxannohuraati. Kuni baxilli isi diinaggaawe loosanno gedenna wolootu woffi  assitanno looso loosanno gede kakkayisinosi. (Maatewoosi 20:28 nabbawi; Yoh. 13:5, 14, 15) Atino songote soqqamaancho ikkate mixo fushshiꞌratto gede kakkayisannohehu baxille ikkiro, Yihowa maassiꞌrannohe hattono songote soqqamaancho ikkate ikkado ikkatto gede kaaꞌlannohe.—1 Qor. 16:14; 1 Phe. 5:5.

7. Mittu rodii silxaanete wojji yaannokki gede qoropha hasiissannosihu mayiraati?

⁷ Tenne alamera, insaneeto bokkeessanno manna duucha woyite ayirrinsanni. Yihowa dirijjite giddo kayinni coyi dihattooti. Yesuusi gede baxillu kakkayisinosi rodii silxaanete wojji diyaanno; hattono wolootaho annata woy aliidiha ikka dihasiꞌranno. Silxaanete wojji yaanno manchi shoomamiro, Yihowaha muxxe geꞌreewo towaatate hasiisannoha mannu woffi assannoha mito looso loosa giwara dandaanno. Togoo loosi isira malinokkihu gede asse hedara dandaanno. (Yoh. 10:12) Yihowa naaxxannohu woy silxaanete wojji yaanno manchi assannore dimaassiꞌranno.—1 Qor. 10:24, 33; 13:4, 5.

8. Yesuusi soqqamaasinesi mayyee amaalino?

⁸ Yesuusiti muli jaallasi nafa gara ikkitinokki hedonni kaꞌe qoosso afiꞌrate sharrantino woyiti no. Hanni mitte yannara Yesuusiti lame soqqamaasine Yaaqoobinna Yohaannisi assitinore laꞌno. Insa Yesuusi Gashshootisira ayirrado bayicho aannonsa gede xaꞌmidhino. Yesuusi insa togoo bayicho xaꞌmiꞌransa garaho diyiino. Hatteentenni isi tonaalamente soqqamaasinesira togo yee xawise kulinonsa; “Mereeroꞌne rooriidiha ikka hasiꞌrannohu baalu soqqamaanchoꞌne ikka hasiissannosi; mereeroꞌne albiidiha ikka hasiꞌrannohu baaluno, woꞌmunkura borojjicho ikka hasiissannosi.” (Maq. 10:35-37, 43, 44) Danchare hedde yaano wolootaho soqqamate yite songote soqqamaano ikka hasidhanno roduuwi songote atoote ikkitanno.—1 Tes. 2:8.

MIXOꞌNE WONSHIꞌRATE HASATTO LEXXITANNO GEDE KAAꞌLANNOꞌNERI MAATI?

9. Ammanate roduuwiꞌnera soqqamate hasattoꞌne lexxitanno gede assiꞌra dandiitinannihu hiittoonniiti?

⁹ Yihowa baxxinannitinna ammanate roduuwiꞌnera soqqama hasidhinanniti dihuluullissannote. Ikkirono, songote soqqamaano loossanno looso loosate hasattoꞌne ajjara dandiitanno. Hasattoꞌne lexxitanno gede assiꞌra dandiitinannihu hiittoonniiti? Ammanate roduuwiꞌnera soqqantine afidhinanni hagiirre heda dandiitinanni. Yesuusi, “Adhannonkunni aannohu roore hagiirraamoho” yiino. (Soq. 20:35) Isi konni xintu seeri garinni heeꞌrino. Yesuusi wolootaho soqqame addu hagiirre afiꞌrino; kiꞌneno afiꞌra dandiitinanni.

10. Yesuusi wolootaho soqqama hagiirsiissannosita leellishinohu hiittoonniiti? (Maarqoosi 6:31-34)

¹⁰ Hanni Yesuusi wolootaho soqqama hagiirsiissannosita leellishino gara laꞌno. (Maarqoosi 6:31-34 nabbawi.) Mitte yannara Yesuusinna soqqamaasinesi daafurte no. Insa shiima geeshsha fooliishshiꞌrate mannu nookkiwa hadhanni no. Kayinni lowo manni Yesuusi rosiisannonke yee hexxino daafira insa balaxe hakkira haꞌri. Yesuusi xa “dirosiiseemmoꞌne” yaa dandaanno. Qoleno Yesuusiranna ledosi noorira “sagale ittanno faro nafa” dinonsa. Woy Yesuusi mannaho shiimare calla rosiise hadhe yaa dandaanno. Kayinni isi manna baxanno daafira, ‘lowore rosiisinonsa.’ Hattono isi ‘yanna hashshita’ geeshsha rosiisinonsa. (Maq. 6:35) Isi manna rosiisinohu hatto assa gidde ikkitinosi daafira ikkikkinni ‘mararinonsahuraati.’ Yesuusi insa rosiisa hasiꞌrinohu insa baxanno daafiraati. Yesuusi wolootaho soqqame lowo hagiirre afiꞌrino.

11. Yesuusi rosiisanno mannira kaaꞌlannonsare assinohu hiittoonniiti? (Misileno lai.)

¹¹ Yesuusi lowo mannira soqqami woyite rosiise calla diagurino. Isi maalaamittete hasiisannonsare  asseno towaatinonsa. Isi maalaletenni sagale qixxeesse rosaanosi tuqissanno gede assino. (Maq. 6:41) Tenne asse rosaanosi wolootaho soqqantanno gara rosiisinonsa. Qoleno isi songote soqqamaano loossanno loosi hasiisannoha ikkinota leellishino. Hanni soqqamaasine ‘baalunku manni ite duuwa’ geeshsha Yesuusi ledo sagale tuqisate looso loosse hagiidhitino gara hedi! (Maq. 6:42) Hige Yesuusi umisi qiniite agure mannu hasatto balaxisiisino yanna tenne calla diꞌꞌikkitino. Isi uullate aana heeꞌrino yanna baalate mannaho soqqamino. (Mat. 4:23; 8:16) Yesuusi manna rosiisenna shaqqillunni hasiisannonsare wonshe hagiirrenna harshammo afiꞌrino. Atino umikki horo agurte songote soqqamaancho ikkate sharramittoro lowo hagiirre afiꞌrattoti dihuluullissannote.

12. Ninke giddo songo kaaꞌlate dandoo noosikkihu dino yineemmohu mayiraati?

¹² Dandoo dinoe yite hedattoha ikkiro hexxo mudhitooti. Songo kaaꞌla dandaatto gede assitannohe akatta nooheti dihuluullissannote. Phaawuloosi 1 Qorontoosi 12:12-30 borreessinore huuccatto assidhe nabbawakki kaaꞌlitahera dandiitanno. Phaawuloosi coyiꞌrinori atino wole Yihowa soqqamaanonte gede, songote giddo hasiisannohanna kaaꞌlanno looso loosa dandaattota leellishanno. Xaa yannara songote soqqamaancho ikkate ikkado ikkoottokkiha ikkiro hexxo mudhitooti. Hatteentenni Yihowaranna ammanate roduuwikkira soqqamate assa dandaattore baala assi. Songote cimeeyye dandookki laꞌe loosa dandaatto looso uyitannoheta addaxxa dandaatto.—Rom. 12:4-8.

13. Songote soqqamaancho ikkate ikkado ikka qarrissannota diꞌꞌikkitino yineemmohu mayiraati?

¹³ Hanni songote soqqamaancho ikkite soqqamate sharrama hasiissannoheha wole korkaatano laꞌno: Roore guunte baalunku Kiristaani wonsha dandaannote. Isinni baalunku Kiristaani Yihowawa shiqa, wolootaho uyine afiꞌnanni hagiirre afiꞌranna Yihowa hagiirsiisanno garinni heeꞌra hasiissannonsa. Kayinni hanni mittu rodii songote soqqamaancho ikkate wolere maa assa dandaannoro laꞌno.

MIXOKKI WONSHIꞌRATE SHARRAMA DANDAATTOHU HIITTOONNIITI?

14. ‘Ayirrado’ woy miqichaamo ikkate yaa mayyaate? (1 Ximootewoosi 3:8-10, 12)

¹⁴ Hanni xa 1 Ximootewoosi 3:8-10, 12 kulloonnita mite guunte laꞌno. (Qummeeshsha nabbawi.) Songote soqqamaanchi ‘ayirrado’ ikka’ hasiissannosi. Tenne yaatto, “miqichaamo” woy “ayirrinsanni gede ikkannoha” yineno tira dandiinanni. Togo yaa kayinni osoꞌla  woy haariima horo dihasiissannosi yaa diꞌꞌikkitino. (Ros. 3:1, 4) Ikkirono, uyinannihe looso baala diinaggaabbe loosa hasiissannohe. Ammannannihanna addaxxinanniha ikkittoro, songo ayirrissannohe.

15. ‘Yitinowa hossannorenna woxeho hagaaggannokkire’ yaa mayyaate?

¹⁵ “Yitinowa hossannore” yaa noore coyidhannorenna ammannannire ikka hasiissannonsa yaate. Coyiꞌroottore wonsha hasiissannohe; hattono woloota awaawura dihasiissannohe. (Law. 3:32) “Woxeho hagaaggannokkire” yaa daddaꞌlatto woyitenna woxe lainohunni ammanamoottoha ikka hasiissannohe yaate. Ammanate roduuwikki ledo nooheha dancha jaalooma horoonsidhe gara ikkitinokki doogonni woxe afiꞌrate woꞌnaala dihasiissannohe.

16. (a) “Woyinete xajjera saankaabbannokkire” yaa mayyaate? (b) ‘Keeraancho tiia’ afiꞌrate yaa mayyaate?

¹⁶ “Woyinete xajjera saankaabbannokkire” yaa ago quwa saꞌe aga woy dimbannoho yinanni gede ikka dihasiissannohe yaate. ‘Keeraancho tiia’ afiꞌrate yaa Yihowa biddishshi garinni heeꞌra hasiissannohe yaate. Guuntete xeꞌne nooheha ikkittorono, Maganu ledo dancha jaalooma kalaqiꞌne afiꞌnanni keere afiꞌra dandaatto.

17. Mittu rodii ‘fonqolle laꞌnannisi’ woyite ammannanniha ikkinota leellisha dandaannohu hiittoonniiti? (1 Ximootewoosi 3:10; misileno lai.)

¹⁷ “Fonqolle laꞌnona” yitanno yaatto uyinannihe looso danchu garinni loosa dandaattota leellisha hasiissannohe yaate. Hakko daafira cimeeyye mitto looso uyitannohe woyite, insa kultinohe garinninna dirijjite fushshitino biddishshi garinni loosi. Uyinoonnihe looso ma garinni loosattoronna loosse mamoote guda hasiissannohero buuxi. Uyinanniheha mitto mittonka looso diinaggaabbe loosattoha ikkiro, songote giddo noori tenne wodanchitanno hattono naaddannohe. Cimeeyye, cuuantinore labballo roduuwa qajeelsate qixxaabbinoonnire ikke. (1 Ximootewoosi 3:10 nabbawi.) Songoꞌnera dirinsa 10-14 geeshsha woy hakkuyi woro ikkannori cuuantino labballi no? Insa hojju xiinxallo assiꞌrate dancha lawishsha ikkitannoreeti? Gambooshshunniwa ganyite dawaro qoltanno? Hattono soqqansho fultanno? Hatto ikkiro dironsanna noo gara heddine insara malino looso uuyyensa. Konni garinni kuri roduuwa ‘fonqolle laꞌꞌa’ dandiinanni. Hakkiinni dirinsa 17 nna 19 mereero ikkanno woyite songote soqqamaano ikkate ikkadda ikkitara dandiitanno.

18. “Minshanniri nookkire” ikkate yaa mayyaate?

 ¹⁸ “Minshanniri nookkire” ikkate yaa kassansannihe gede assannoha aye coyeno assa dihasiissannohe yaate. Hige Kiristaana kaphunni kassansansara dandiinanni. Yesuusa kaphunni kassansoonnisi; isi harunsaanosino kaphunni kassansansara dandiinannita balaxe kulino. (Yoh. 15:20) Ikkirono Yesuusi gede amanyootunni xuru nookkiha ikkite heeꞌrittoro, songote giddo danchu suꞌmi heeꞌrannohe.—Mat. 11:19.

19. “Mitte galteha” ikkate ma assa hasiissanno?

¹⁹ “Mitte galtere.” Mine kalaqiꞌroottoha ikkiro, Yihowa hunda adhamate fushshino biddishsha ayirrisa hasiissannohe; isi mittu manchi mitte galte adhanno gede hajajino. (Mat. 19:3-9) Mittu Kiristaanchi horonta foora dihasiissannosi. (Ibi. 13:4) Hatto yaa woꞌmanka woyite minaamasira ammanama hasiissannosi yaate; horonta wole meyatera gara ikkinokki baxille leellisha dihasiissannosi.—Iyo. 31:1.

20. Mittu manchi ‘minesi danchu amanyootinni gashshannohu’ hiittoonniiti?

²⁰ “Oosonsanna minensa danchu amanyootinni gashshitinore.” Maatete umo ikkoottoha ikkiro, qeechakki hawa gede laꞌꞌa dihasiissannohe. Ganyite maatete magansiꞌra massagi. Dandiitto deerrinni mittu mittunku maatekki miili ledo soqqansho fuli. Oosokki Yihowa ledo dancha jaalooma kalaqidhanno gede kaaꞌlinsa. (Efe. 6:4) Maatesi towaatanno manchi songono towaata dandaannota leellishanno.—1 Ximootewoosi 3:5 ledo heewisiisi.

21. Songote soqqamaancho ikkite soqqantanni noottokkiha ikkiro maa assa dandaatto?

²¹ Labballo roduuwa, songote soqqamaano ikkitinoonnikkiha ikkiro, huuccatto assidhine konne birxicho seekkitine xiinxalle ballo. Songote soqqamaano wonsha hasiissannonsa guunte xiinxalle; hakkiinni tenne guunte wonshate sharramme. Yihowanna ammanate roduuwaꞌne mageeshshi geeshsha baxxinanniro hedde. Insara soqqamate hasattoꞌne lexxitanno gede assidhe. (1 Phe. 4:8, 10) Ayyaanaamittete maateꞌnera soqqantine hagiirre afidhe. Yihowa songote soqqamaano ikkate assitinannire maassiꞌroꞌne!—Fil. 2:13.