Hojju xiinxallo roore kaaꞌlitannohe gede assiꞌra hasiꞌratto? Aante noo hedo, hedokki billaachaabbukkinni xiinxallatto gede kaaꞌlitahera dandiitanno:

• Dancha bayicho doodhi. Dandaamannoha ikkiro, baxisannohanna gari caabbichi noowa doodhi. Wombarete, xarapheessaho woy wole injaanno bayicho ofolte xiinxalla dandaatto.

• Mannu nookkiwa xiinxalla dandaatto. Yesuusi huuccatto assiꞌrate ‘gute kae, mannu nookkiwa haꞌrino.’ (Maq. 1:35) Mannu nookkiwa xiinxalla dandaattokkiha ikkiro, minikki mannira woy ledokki galtannorira xiinxallammoraati yite kulattonsara dandaatto.

• Hedokki bebbeehanno coye qorophi. Xiinxallate mobayile woy taabileete horoonsiꞌrattoha ikkiro, hedokki bebbeehantannokki gede cufi. Qoleno assa hasiissannohehu mitu coyi qulli yiihero, gedensoonni assatto gede borreessite amaxxi. Hedokki xaphi assiꞌra qarra ikkituhero, boode geya kaꞌe milli yii.